Vuki ki Vua ka na Basika Mai na iSaunitaro

Au sa vakasamataka voli na itukutuku me baleta eso na tamata ena ivolanikalou. Taura, me ivakaraitaki, o Leimani kei Lemueli. Me vakataki Nifai, erau a “vinaka na [nodrau] itubutubu” ka vakavulica na “nodra ivakavuvuli kece na [nodrau] qase.”² Ia rau a vosa kudrukudru baleta ni sa tamata daurairai o tamadrau. Mai na nodrau rai vakairau, na nona vakatulewa e veicalati, ni rau sa sega ni kila na veika ni Kalou ka, yaco kina, me rau sega ni vakabauta.³

E kauwaitaki toka ni nodrau digidigi a vakatarai rau ni rawata na taraicake ni vakabauta sotavi namaki. E rau biuta na nodrau itikotiko kei na iyau. E rau sotava na dredre ni lako voli ena lekutu. E rau qai tini veivuke ni tara na waqa, ka rau vakadonuya na itosotoso ki na dua na vanua tawakilai.

A lako curuma o Nifai na veika vata ga oqo. Ia e tara li na nodrau vakabauta na veika a caka oqo? Na vakabauta nei Nifai a vaqaqacotaki ia e tubucake ga na veidabui kei na cudrucudru nei Leimani kei Lemueli. E rau a raica sara madaga ka rogoca na veitacini oqo e dua na agilosi, ia, rau se vakatitiqa ga.⁴

Na bula vakayago e sega ni rawarawa ki na dua vei keda. Eda sa biu mai ki vuravura meda sagai ka vakatovolei. Na ka eda sotava ena veika ni bula ena vakayarayarataka vakalevu sara na noda ivakadinadina. Navuca eso na imoimoi nei Leimani kei Lemueli: E rau a vosa kudrukudru ni kerei rau o tamadrau me rau cakava na ka dredre eso.⁵ E rau a saga ni taura mai na peleti parasa, ia ni rau sega ni rawata, rau sa soro. Na nodrau itovo ni bula “Keirau sa tovolea, na cava tale me keirau cakava?”⁶

Ena dua na gauna rau sa luluvu sara ga kina ena cakacala ka rau kere veivosoti.⁷ E rau a masu ka sa vosoti. Ia e tukuni ena ivolanikalou ni emuri rau sa lesuva tale na veivakadiloi ka rau sega ni via masu. Rau a lako mai vei Nifai ka kaya ni rau “sega ni kila rawa na ka sa tukuna ko [tamadrau].”⁸ A tarogi rau o Nifai kevaka rau sa bau “kerea mada vua na Turaga.”⁹ Dikeva na nodrau isaunitaro: “E segai; e sega ni dauvakatakila vei [keirau] na Turaga na veika vakaoqo.”¹⁰

Na ivakamacala lesu nei Nifai kivei rau na tuakana e sa dua na usutu vei keda ena ciqomi ni isaunimasu tomani voli:

“A cava dou sa sega ni muria kina na vunau ni Turaga? Dou sa via rusa li ena kaukauwa ni yalomudou?

“Dou sa guilecava beka na veika sa tukuna na Turaga?—Kevaka dou na sega ni vakaukauwataka na yalomudou, ka kerekere vei au ena vakabauta, ka vakadinata ni na soli vei kemudou, ka muria na noqu vunau, [ena] vakatakilai vakaidina vei kemudou na veika oqo.”¹¹

Au kila eso na lesumai na kaulotu ka ra a sotava na veika vakayalo tawacakitaki rawa, ia ena lailai ni so na itovo vakayalo e sa vakavuna vei ira mera guilecava na veigauna a vosa kina vei ira na Kalou. Kivei ira na lesumai na kaulotu oya kei keda kece sara, kevaka “dou sa rekitaka na loloma dou sa vakabulai kina, a cava dou sa nanuma ena gauna oqo?”¹² Kevaka o sega ni vakila oqo, o na rawa ni vakila tale, ia nanuma na ivakasala nei Nifai. Dau talairawarawa, nanuma na veigauna eliu o a vakila kina na Yalotabu, ka kerekere ena vakabauta. Na nomu isaunitaro ena lako mai, ka ko na vakila na loloma kei na vakacegu ni iVakabula. Ena rairai sega ni lako totolo mai se ena ivakarau o gadreva, ia na isaunitaro ena lako mai. Kua ni dau soro! Kakua ni soro!

Meda sa vakatauvatani Leimani kei Lemueli ki vei ratou na luvei Mosaia tagane. A tuberi ruarua na ilawalawa tagane oqo ena matavuvale yalododonu, ia rau a veiseyaki. Rau a kacivi me rau veivutuni mai vua e dua na agilosi, ia na cava e duidui ena veika ratou a sotava na luvei Mosaia?

E tawa guilecavi rawa na nodra rawaka vakadaukaulotu. Udolu era a saumaki ki na sala ni Turaga. Ia, eda guilecava wasoma ni gauna era tekivuna kina nodra kaulotu, era sa “yalolailai, ka [ra] via lesu tale, [ia] sa vakacegui [ira] na Turaga.” Era a vakasalataki mai vua na Turaga mera “vosota vakadede na veika rarawa sa yaco vei [ira].”¹³

Cava na vuna e vaqaqacotaka kina na nodratou vakabauta kei na veidinadinati na veivakatovolei ratou a sotava na luvei Mosaia tagane oqo ka sega ni vakavuna me ratou vosa kudrukudru se vakatitiqa? Na usutu “io sa kaukauwa sara na nodratou vakabauta na ivakavuvuli dina; eratou sa tamata yalomatua ka dau vakasaqaqara vagumatua ena ivola tabu, me ratou kila kina na vosa ni Kalou.”¹⁴ Eda na sotava taucoko na veivakatovolei ka da vakatataro, ia nanuma ni sa dodonu meda “tautauri matua tikoga ena ititoko kaukamea.”¹⁵ “Na vosa i Karisito sa tukuna vei [keda] na veika kece [meda] kitaka.”¹⁶ Sa dodonu me tiki ni noda bula e veisiga na vulici ni ivolanikalou, ni oqo ena tadolava na katuba ni vakatakila.

Vei iratou na luvei Mosaia tagane, “ia e sega ni o koya wale ga oqori; eratou sa gumatua sara ena masumasu kei na lolo; ka sa tu vei iratou na yalo ni parofisai, ka ratou tukuna na veika ena yaco.”¹⁷ Na masumasu kei na lolo ena vakatarai keda ni kauwaitaka na veivakauqeti vakayalo eso. Na veitaratara kei na Tamada Vakalomalagi ni da tarovi vakainaki voli mai na kakana kei na gunu, ena vakatarai keda ni “sereka nai vesu sa sega ni dodonu [ka] luvata nai kaukau bibi.”¹⁸ Na masumasu, ni salavata kei na lolo, ena vakarautaka na gauna ko na qai “masu, … ena rogoci iko ko Jiova; … [na gauna eda] tagi kina, … ena kaya mai ko Jiova, Koi au oqo.”¹⁹

Na itovo vakalotu ni tamata oqo—na talairawarawa, vuli ivolanikalou, masumasu, kei na lolo—a vakaukauwataki iratou na luvei Mosaia tagane. Na lailai ni itovo vakalotu ni tamata vata ga oqo e sa dua na vuna levu a malumalumu kina o Leimani kei Lemueli ki na veitemaki me rau vosa kudrukudru ka vakatitiqa.

Kevaka o sa temaki mo vosa kudrukudru, kevaka e a tiko na nomu vakatitiqa ka muataki ki na tawa vakabauta, kevaka sa sivia na veivakatovolei mai na nomu icolacola, vuki ki Vua. Kevaka o iko e dua ka sa vuki tani se vakabekataka na nomu ivalavala, vuki ki Vua. O rawa ni nanuma na gauna “au a sega li ni vakaceguya kina na yalomu… ? Ai vakadinadina cava tale ko gadreva me uasivia na ivakadinadina sa solia na Kalou?”²⁰ Tarogi iko, “Au sa voleka li ni bula voli vakataki Karisito ena gauna oqo mai na kena au a tu kina eliu?” Yalovinaka, vuki ki Vua.

Me’u lesu tale mada ki na noqu italanoa. Kena itinitini, sa tekivu me’u yalodina. Au nanuma na gauna a tarogi au kina na daukaulotu a vakatavulici au tiko kevaka au sa vakarau tu me’u papitaiso. Au sauma ni se tiko eso na noqu vakatataro. A tukuna vei au na daukaulotu yalomatua oqo ni sa rawa vua me sauma ia me’u na sauma mada na nona taro eliu. A tarogi au o koya kevaka e sa dina na iVola i Momani ka sa dua na parofita o Josefa Simici. Au tukuna vua ni’u sa sega ni kila, ia au sa vinakata meu kila.

Na noqu vakatataro a vakatubura na vakabauta. Au a vakasaqaqara vakamalua. Vei au, na isaunitaro a sega ni lako mai vaka e dua na soqo ia e vaka e dua na ivakarau. Au kinoca rawa ni noqu sa “rogoca na vunau” ka tekivu “vakabauta,” “au sa taleitaka sara” na iVola i Momani ka sa “vakamarautaka na yaloqu” ka vakaidina sa “vunau vinaka ka dina.” Kena itinitini au sa sotava na ka e vakamacalataka na ivolanikalou me “sa na tubu vakaidina.”²¹ Sa yaco kina ena gauna oqo me’u gadreva na papitaiso ka solia na noqu bula kivei Jisu Karisito.

Au sa kila vakaidina ni sa vosa ni Kalou na iVola i Momani. Au kila ni a parofita o Josefa Simici. Io, e se tu ga eso na ka e sega ni matata tu vei au, ia na noqu ivakadinadina me baleta na dina e sa kauti au vakavoleka vua na iVakabula ka taracake na noqu vakabauta.

Kemuni na taciqu kei na ganequ, nanumi Nifai kei iratou na luvei Mosaia tagane, ka ra a sotava na veika vakayalo ka qai cakacakataka ena vakabauta me rawati kina na isaunitaro ka tubu na nodra yalodina. Veidutaitaka oqo vata kei Leimani kei Lemueli, ka rau vakatitiqa ka vosa kudrukudru. Dina ga ni rau cakacaka ena so na gauna ena sala yaga eso, na cakacaka e sega kina na vakabauta sa mate. Sa dodonu me tiko na vakabauta kei na cakacaka meda ciqoma kina na isaunitaro.

Au nuitaka me vaka o sa vakarorogo voli ena mataka oqo ni sa vakauqeta ki na nomu vakasama kei na lomamu na Yalotabu e dua na ka o rawa ni cakava me saumi kina na nomu vakatataro se mo kunea e dua na iwali veivakauqeti ki na leqa o sotava. Au tukuna na ivakadinadina dokai ni ko Jisu na Karisito. Vuki ki Vua ka na saumi na nomu masu. Ena yaca i Jisu Karisito, emeni.