2010–2019
Muab Siab Npuab Nws thiab Txais Lus Teb
October 2015


Muab Siab Npuab Nws thiab Txais Lus Teb

Cia li mloog lus, nco txog tej lub sij hawm thaum nej tau hnov tus Ntsuj Plig dhau los, thiab muaj kev ntseeg nug. Nej yuav txais lus teb.

Thaum kuv yog ib tug tub hluas, kuv niam kuv txiv nkawd tau koom Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg. Peb paub hais tias cov tub txib qhia nkawd, tiam sis kuv niam kuv txiv tau kawm cov tub txib tej lus qhia nkawd tus kheej xwb.

Tom qab nkawd hais tias nkawd yuav ua kev cai raus dej, kuv cov kwv tij thiab kuv pib mloog cov tub txib thiab, thiab lawv zoo siab tau txais zaj lus ntawm kev muab txoj moo zoo txum tim rov qab los. Txawm kuv xav kawm los, kuv tsis muaj siab xav hloov kuv lub neej. Tiam sis kuv txaus siab ua raws li cov tub txib hais kom kuv thov Vajtswv seb Phau Ntawv Maumoos puas yog Vajtswv txoj lus, tiam sis ntshe kuv twb tsis tau txais lus teb thaum ntawd.

Tej zaum nej xav paub vim li cas Leej Txiv Saum Ntuj Ceeb Tsheej tsis tau teb kuv tej lus thov; kuv kuj xav paub vim li cas thiab. Txij thaum ntawd kuv tau kawm tias Maulaunais txoj kev cog lus yeej hais yog lawm. Vajtswv yeej teb peb tej lus thov txog qhov uas txoj moo zoo muaj tseeb, tiam sis Nws teb thaum peb muaj “ib lub siab dawb paug” thiab “thov tiag tiag.”1 Nws tsis teb vim tias peb lam xav paub xwb.

Tej zaum muaj ib yam dab tsi nyob hauv nej lub neej uas nej xav nug. Tej zaum muaj ib qho teeb meem uas nej tsis paub kho. Hnub no kuv xav qhia ob peb yam rau nej uas tej zaum yuav pab nej nrhiav tau lus teb los sis txoj kev pab. Tus txheej txheem no pib ntawm kev hloov siab los ntseeg Yexus Khetos txoj moo zoo.

Kev Txais Kev Tshwm Sim Nyob ntawm Seb Peb lub Siab Zoo Li Cas thiab Xav Li Cas

Kuv tau xav txog tej zaj ua hais txog ob peb tug neeg nyob hauv vaj lug kub. Piv txwv hais tias, Lamas thiab Lemu-ees. Ib yam li Nifais, nkawd “tau yug los ntawm niam txiv zoo” thiab tau kawm me ntsis ntawm tag nrho “[nkawd] txiv tej kev txawj ntse.”2 Tiam sis nkawd yws yws vim nkawd txiv yog ib tug neeg uas pheej ua yog toog pom. Raws li nkawd xav, nws txiav txim siab tsis txawj ntse, vim nkawd tsis tau paub txog Vajtswv, yog li ntawd nkawd tsis kam ntseeg.3

Nkawd tej kev xaiv cia lawv muaj cib fim txais tau tej yam uas yuav txhawb nqa nkawd txoj kev ntseeg. Nkawd twb ncaim nkawd tsev thiab tso nkawd tej nyiaj txiag tseg. Nkawd raug kev txom nyem thaum nkawd taug mus nyob hauv roob moj sab qhua. Nkawd tau pab ua ib lub nkoj thiab nkawd pom zoo mus rau ib lub teb chaws txawv.

Nifais tau ua tej yam no zoo ib yam thiab. Tiam sis tej kev ua no puas tau txhawb nqa nkawd txoj kev ntseeg? Nifais txoj kev ntseeg muaj zog tuaj, tiam sis Lamas thiab Lemu-ees chim thiab npau taws zuj zus tuaj. Ob tug tij laug no twb pom thiab hnov ib tug tim tswv, tiam sis nkawd tseem ua xyem xyav.4

Lub neej no yeej tsis yooj yim rau peb txhua tus. Peb nyob hauv lub ntiaj teb no kom peb raug sim siab. Qhov uas peb ua li cas thaum peb raug tej yam nyob hauv lub neej no yuav muaj feem ntau pab los sis rhuav peb tej zaj lus tim khawv. Cia li xav seb Lamas thiab Lemu-ees tau ua dab tsi: Nkawd yws yws thaum nkawd txiv thov kom nkawd ua tej yam nyuaj.5 Nkawd sim mus muab kom tau cov phiaj toog, tiam sis thaum nkawd ua tsis tau, nkawd cia li tsum xwb. Nkawd xav tias, “Peb twb sim ua lawm; ua tsis tau ntxiv.”6

Twb muaj ib lub sij hawm thaum nkawd tu siab vim nkawd ua txhaum thiab tau thov kev zam txim.7 Nkawd tau thov Vajtswv thaib txais kev zam txim. Tiam sis cov vaj lug kub qhia hais tias tom qab ntawd nkawd rov qab yws yws thiab nkawd tsis kam thov Vajtswv. Nkawd tau los rau Nifais thiab hais tias nkawd “tsis to taub txog cov niag lus uas [nkawd] txiv tau hais.”8 Nifais nug nkawd seb nkawd puas tau “thov tus Tswv.”9 Saib nkawd teb li cas: “Tsis tau; vim tus Tswv tsis ua tej yam zoo li no rau [wb] paub li.”10

Kev Mloog Lus Tsis Tu Ncua Ua Rau Peb Txais Tau Lus Teb

Nifais tej lus teb nws ob tug tij laug yog ib txoj kev qhia peb txais tau lus teb rau peb tej lus thov:

“Yog vim li cas nej thiaj tsis [ua raws li] tus Tswv tej lus txib? Yog vim li cas es nej xav kom nej piam sij, vim yog txoj kev tawv ntawm nej tej siab tej ntsws los?

“Nej tsis nco qab txog tej yam uas tus Tswv tau hais lawm los?—Yog hais tias nej tsis txhob cia nej tej siab tej ntsws tawv qhwb qhawv, thiab thov kuv los ntawm txoj kev ntseeg, ntseeg ntsoov tias nej yeej yuav tau txais, kub siab lug ceev kuv tej lus txib, ces nej yeej yuav paub tej yam no.”11

Kuv paub ib co tub txib uas rov qab los tsev es lawv twb muaj tej kev tshwm sim ntawm sab ntsuj plig, tiam sis vim lawv tsis ua tej yam kom txhawb nqa lawv sab ntsuj plig ua rau lawv tsis nco txog tej lub sij hawm thaum Vajtswv tau hais lus rau lawv. Rau cov tub txib uas tau rov qab los tsev thiab rau peb txhua tus, yog nej tau “xav hu zaj nkauj txoj kev hlub uas txhiv dim, kuv yuav nug tias, nej puas xav li ntawd nim no?”12 Yog nej tsis xav ua tam sim no, nej yeej muaj peev xwm rov qab xav tau, tiam sis cia li xav txog Nifais tej lus ntuas. Cia li mloog lus, nco txog tej lub sij hawm thaum nej tau hnov tus Ntsuj Plig dhau los, thiab muaj kev ntseeg nug. Nej yuav txais lus teb, thiab nej yuav hnov tus Cawm Seej txoj kev hlub thiab txoj kev kaj siab lug. Tej zaum nej yuav tsis txais raws li nej xav los sis sau npaum li nej xav, tiam sis nej yeej yuav tau txais. Tsis txhob tso tseg! Tsis txhob tso tseg ib zaug li!

Cia peb muab Lamas thiab Lemu-ees piv rau Mauxiyas cov tub. Cov txiv neej no puav leej muaj tsev neeg ncaj ncees, tiam sis lawv puav leej tau tso qhov tseeb tseg. ib tug tim tswv tau hu lawv puav leej kom rov qab hloov siab lees txim, tiam sis Mauxiyas cov tub tau ua dab tsi txawv?

Kev Sim Siab Yuav Txhawb Nqa Peb txoj Kev Ntseeg

Peb yeej nco ntsoov txog lawv txoj kev vam meej thaum lawv ua tub txib. Muaj ntau txhiab tus neeg uas hloov siab los ntseeg tus Tswv tej kev. Tiam sis, peb pheej tsis nco qab hais tias thaum lawv pib ua tub txib, lawv “nyuaj siab, thiab [lawv] tau yuav luag tig rov qab, [tiam sis] tus Tswv tau nplij [lawv] siab.” Tus Tswv ntuas lawv kom “ua siab ntev nyiaj [lawv] tej kev txom nyem.”13

Kev Kawm Vaj Lug Kub Qhia Peb txog Vajtswv lub Siab Nyiam

Vim li cas Mauxiyas cov tub tej kev raug sim siab tau txhawb nqa lawv txoj kev ntseeg thiab kev mob siab thiab tsis ua rau lawv yws yws los sis ua xyem xyav? Qhov tseem ceeb yog qhov uas “lawv tau loj hlob muaj zog nyob hauv txoj kev paub ntawm qhov tseeb; vim lawv … yog neeg ruaj ntawm txoj kev to taub thiab lawv tau rau siab nrhiav vaj lug kub, xwv kom lawv yuav paub Vajtswv txoj lus.”14 Peb sawv daws raug kev sim siab thiab muaj lus nug, tiam sis nco ntsoov tias peb yuav tsum tuav rawv tus nqaj hlau ruaj ruaj tsis tso.15 “Khetos tej lus yuav qhia [peb] txhua txhia yam tsav uas [peb] yuav tsum ua.”16 Peb yuav tsum kawm vaj lug kub txhua hnub, vim qhov no yuav pab qhib qhov rooj ntawm kev tshwm sim.

Kev Thov Vajtswv, Koom nrog Kev Yoo Mov, Qhib Kev rau Kev Tshwm Sim

Hais txog Mauxiyas cov tub, “tsis tas li no xwb; lawv tau muab lawv tus kheej thov Vajtswv thiab yoo mov heev; yog li ntawd lawv tau muaj tus ntsuj plig uas qhia tej uas yuav muaj los yav tom ntej, thiab tus ntsuj plig ntawm kev tshwm sim.”17 Kev thov Vajtswv thiab kev yoo mov pab peb hnov tau tej kev tshoov siab ntawm sab ntsuj plig. Kev sib txuas lus nrog Leej Txiv Saum Ntuj Ceeb Tsheej thaum peb yoo mov thiab tsis haus dej, ua rau peb “daws tau tej saw hlau ntawm txoj kev tsim txom thiab txo tus quab.”18 Kev thov Vajtswv, thaum peb yoo mov, yuav pab peb thaum peb “thov, tus Tswv yuav teb nej; [thiab] thaum [peb] hu kom nws pab, nws yuav teb hais tias kuv nyob ntawm no.”19

Muab Siab Npuab Nws

Tej kev teev ntuj no—kev mloog lus, kev kawm vaj lug kub, kev thov Vajtswv, thiab kev yoo mov—tau ntxiv dag zog rau Mauxiyas cov tub. Qhov uas Lamas thiab Lemu-ees tsis ua tej kev teev ntuj no yog ib qho tseem ceeb ua rau nkawd raug kev ntxias ntawm kev yws yws thiab kev ua xyem xyav.

Yog tias nej raug ntxias yws yws, yog tias nej tau ua xyem xyav uas ua rau nej tsis ntseeg, yog tias nej raug kev sim siab uas nej xav tias nej nyiaj tsis taus, cia li muab siab npuab Nws. Yog tias nej tau tso Nws tseg los sis tau daws nej tus kheej tej kev txhaum, cia li muab siab npuab Nws. Nej puas nco txog thaum Nws tau hais lus ua rau nej lub siab kaj … ? Koj yuav tau qhov tim khawv dab tsi uas tseem ceeb tshaj li qhov uas los ntawm Vajtswv?20 Nug koj tus kheej hais tias, “Kuv puas ua neej raws li Yexus Khetos tam sim no zoo dua li kuv tau ua yav tas los?” Thov, cia li muab siab npuab Nws.

Thov cia kuv rov qab hais txog kuv tus kheej. Thaum kawg kuv pib muaj siab xav paub tiag. Kuv tseem nco txog thaum tus tub txib uas qhia kuv nug seb kuv puas npaj siab ua kev cai raus dej. Kuv teb hais tias kuv tseem muaj tej lus nug. Tus tub txib txawj ntse no qhia kuv tias nws yuav teb kuv tiam sis kuv yuav tsum teb nws tej lus nug ua ntej. Nws nug kuv seb Phau Ntawv Maumoos puas muaj tseeb thiab Yauxej Xamiv puas yog ib tug yaj saub. Kuv qhia nws hais tias kuv tsis tau paub, tiam sis kuv xav paub tiag.

Kuv tej lus nug ua rau kuv txoj kev ntseeg loj zuj zus tuaj. Rau kuv mas, tej lus teb tsis tau los kiag rau kuv thaum tib lub sij hawm xwb tiam sis los zuj zus. Kuv pom hais tias thaum kuv “xyaum kawm txog … tej lus” thiab pib “muab ib qho kev ntseeg me me sim,” ces Phau Ntawv Maumoos tau rais los ua “qab heev rau kuv” thiab “pib ua rau kuv to taub” thiab “ua rau kuv tus ntsuj plig loj tuaj” tiag tiag. Thaum kawg kuv muaj raws li vaj lug kub qhia hais tias yog kev pib hlob nyob rau hauv yus lub siab.21 Thaum ntawd kuv tau xav ua kev cai raus dej thiab cog lus tias kuv yuav muab kuv lub neej rau Yexus Khetos.

Kuv paub tseeb hais tias Phau Ntawv Maumoos yog Vajtswv txoj lus. Kuv paub tias Yauxej Xamiv yog ib tug yaj saub. Tseem muaj tej yam uas kuv tsis to taub, tiam sis kuv zaj lus tim khawv ua rau kuv los nyob ze tus Cawm Seej thiab txhawb nqa kuv txoj kev ntseeg.

Cov kwv tij thiab cov muam, cia li nco txog Nifais thiab Mauxiyas cov tub, uas muaj tej yam los ntawm sab ntsuj plig tshwm sim los ces lawv muab siab rau ntseeg kom lawv txais tau lus teb thiab lawv rau siab ntxiv zuj zus mus. Muab cov no piv rau Lamas thiab Lemuyees, uas ua xyem xyav thiab yws yws. Txawm tej lub sij hawm lawv ua tej hauj lwm tsim nyog los, tej hauj lwm thaum tsis muaj kev ntseeg yeej tuag lawm. Peb yuav tsum muaj kev ntseeg thiab ua hauj lwm kom txais tau lus teb.

Thaum nej mloog kuv tag kis no kuv cia siab hais tias tus Ntsuj Plig tau tshoo nej lub siab kom nej yuav ua ib yam dab tsi nej thiaj yuav txais lus teb los sis nrhiav tau ib txoj kev kho nej tej teeb meem. Kuv ua tim khawv hais tias Yexus yog tus Khetos. Muab siab npuab Nws thiab Nws yuav teb nej tej lus thov. Los ntawm Yexus Khetos lub npe, amees.