Tafoki Kiate Ia pea ʻe Maʻu e Ngaahi Talí

Kuó u fakakaukau ki he ngaahi fakamatala ʻa ha niʻihi fakafoʻituitui ʻi he folofolá. Tau vakai kia Leimana mo Lēmiuela. Hangē ko Nīfaí, naʻe “fanauʻi [kinaua] ʻi ha ongo mātuʻa lelei” pea akonekina “ʻi he ʻilo kotoa ʻa [ʻena] tamaí.”² Ka naʻá na kei lāunga pē koeʻuhí ko ha tangata faʻa mata-meʻa-hā-mai ʻena tamaí Naʻá na pehē naʻe ʻikai totonu ʻene ngaahi tuʻutuʻuní, he naʻe ʻikai ke na ʻilo ʻa e ngaahi meʻa ʻa e ʻOtuá, pea ko ia ai naʻe ʻikai ke na tui.³

ʻOku mālie ke fakatokangaʻi naʻe fakaʻatā kinautolu ʻe heʻenau ngaahi filí ki ha ngaahi aʻusia ke fakatupulaki ai ʻenau tuí. Naʻa nau mavahe mei honau ʻapí mo ʻenau koloá. Naʻa nau faingataʻaʻia ʻi heʻenau ʻauhē holo ʻi he feituʻu maomaonganoá. Naʻá na iku tokoni ke langa ʻa e vaká, peá na loto ke nau folau ki ha fonua taʻeʻiloa.

Naʻe foua ʻe Nīfai ʻa e ngaahi aʻusia tatau ko ʻení. Ka naʻe langaki nai ʻe he ngaahi anga faí ni ʻena tuí? Naʻe fakamālohia e tui ʻa Nīfaí, ka naʻe toe ʻāsili ange ʻa e tuʻutuʻukehe mo e ʻita ʻa Leimana mo Lēmiuelá. Naʻe aʻu ʻo mamata mo fanongo ʻa e ongo taʻokete ko ʻení ki ha ʻāngelo, kae pangó naʻá na kei veiveiua pē.⁴

ʻOku ʻikai faingofua ʻa e moʻui fakamatelié ki ha taha ʻiate kitautolu. ʻOku ʻomi ʻa kitautolu ki he māmaní ke ʻahiʻahiʻi mo siviʻi. ʻE tokoni lahi ʻetau matatali ʻa e ngaahi aʻusia ʻo e moʻuí ki heʻetau ngaahi fakamoʻoní. Fakakaukau ki he niʻihi ʻo e ngaahi anga fai ʻa Leimana mo Lēmiuelá: Naʻá na lāunga ʻi he taimi naʻe fekauʻi ai ʻe heʻena tamaí ha meʻa faingataʻa kiate kinaua.⁵ Naʻá na feinga ke maʻu mai e ʻū lauʻi peleti palasá, ka ko e taimi naʻe ʻikai ola lelei aí, naʻá na loto foʻi. Ko hona ʻulungāngá naʻe peheni, “Kuó ma ʻosi feinga; ko e toe hā mo ha meʻa te ma lava ʻo fai?”⁶

Naʻe aʻu foki ki ha taimi naʻá na mamahi ai koeʻuhí ko ʻena angahalá peá na kole ai ha fakamolemole.⁷ Naʻá na lotu pea naʻe fakamolemoleʻi kinaua. Ka naʻe hiki ʻi he folofolá naʻá na toe foki ʻo lāunga kimui ai peá na fakafisinga ke lotu. Naʻá na haʻu kia Nīfai mo pehē ange ʻoku ʻikai ke lava ʻo “mahino [kiate kinaua] ʻa e ngaahi lea kuo lea ʻaki ʻe [heʻenau] tamaí.”⁸ Naʻe fehuʻi ange ʻe Nīfai pe kuó na “fehuʻi ki he ʻEikí.”⁹ Fakatokangaʻi ange ʻena talí: “Kuo ʻikai; he ʻoku ʻikai fakahā mai ʻe he ʻEikí ha meʻa pehē kiate [kimaua].”¹⁰

Ko ha meʻa mahuʻinga kiate kitautolu ʻa e tali ʻa Nīfai ki hono ongo taʻoketé ke tau maʻu maʻu ai pē ha ngaahi tali ki heʻetau lotú:

“Ko e hā ʻoku ʻikai te mou tauhi ai ʻa e ngaahi fekau ʻa e ʻEikí? Ko e hā te mou fie malaʻia ai ko e tupu ʻi he fefeka ʻo homou lotó?

“ʻOku ʻikai te mou manatuʻi koā ʻa e ngaahi meʻa kuo folofola ʻaki ʻe he ʻEikí?—Kapau ʻe ʻikai te mou fakafefeka homou lotó, pea mou kole kiate au ʻi he tui, ʻo ʻamanaki te mou maʻu, ʻi hoʻomou tauhi faivelenga ʻeku ngaahi fekaú, ko e moʻoni ʻe fakahā ʻa e ngaahi meʻá ni kiate kimoutolu.”¹¹

ʻOku ou ʻiloʻi ha kau ʻosi ngāue fakafaifekau ʻe niʻihi ne nau maʻu ha ngaahi aʻusia fakalaumālie taʻehanotatau, ka ʻoku hangē ʻoku hanga ʻe he siʻisiʻi e ngaahi tōʻonga moʻui fakalaumālie tukupaú ke matangalo ai e ngaahi taimi naʻe folofola ai ʻa e ʻOtuá kiate kinautolú. Ki he kau ʻosi ngāue fakafaifekau ko iá mo kitautolu hono kotoa, kapau “kuo mou fie hiva ʻaki ʻa e hiva ʻo ʻene ʻofa huhuʻí, ʻoku ou fie fehuʻi atu, pe ʻoku mou fie pehē he taimí ni?”¹² Kapau ʻoku ʻikai ke ke ongoʻi ia he taimí ni, te ke lava ʻo toe ongoʻi ia, ka ke fakakaukau ki he akonaki ʻa Nīfaí. Talangofua, manatuʻi ʻa e ngaahi taimi naʻá ke ongoʻi ai ʻa e Laumālié ʻi he kuohilí, pea kole ʻi he tuí. Te ke maʻu hoʻo talí, pea te ke ongoʻi ʻa e ʻofa mo e melino ʻa e Fakamoʻuí. Mahalo pē ʻe ʻikai hoko vave mai pe ʻi he founga ʻokú ke fie maʻú, ka ʻe haʻu pē ʻa e talí. ʻOua naʻá ke foʻi! ʻOua naʻá ke teitei foʻi!

Tau fakafehoanaki ange muʻa ʻa Leimana mo Lēmiuela ki he ngaahi foha ʻo Mōsaiá. Naʻe ohi fakatouʻosi ʻa e kau tangatá ni ʻi ha ongo fāmili tui faivelenga, ka naʻa nau fakatou hē. Naʻe fakatou ui kinaua ki he fakatomalá ʻe ha ʻāngelo, ka ko e hā naʻe kehe ai e aʻusia ʻa e ngaahi foha ʻo Mōsaiá?

ʻOku fakangalongataʻa ʻa e lavameʻa ʻenau ngāue fakafaifekaú. Naʻe ului ha laui afe ki he ngaahi hāʻeleʻanga ʻo e ʻEikí. Ka neongo ia, ʻoku faʻa ngalo ʻiate kitautolu ko e kamata ko ia ʻenau ngāue fakafaifekaú, naʻe “mafasia [honau] lotó, ʻo [nau] meimei foki, ka naʻe fakafiemālieʻi ʻa [kinautolu] ʻe he ʻEikí.” Naʻe akonekina kinautolu ʻe he ʻEikí ke nau “kātakiʻi ʻi he faʻa kātaki ʻa [honau] ngaahi mamahí.”¹³

Ko e hā hono ʻuhinga naʻe fakamālohia ai e tui mo e tukupā ʻa e ngaahi foha ʻo Mōsaiá ʻe he ngaahi ʻahiʻahi kae ʻikai ke ne fakatupunga kinautolu ke nau lāunga pe veiveiua? Ko e meʻa mahuʻingá “kuo nau tupulaki ʻo mālohi ʻi he ʻiloʻi ʻo e moʻoní; he ko e kau tangata faʻa fakakaukau lelei ʻa kinautolu pea kuo nau fakatotolo faivelenga ʻi he ngaahi folofolá, koeʻuhi ke nau ʻiloʻi ʻa e folofola ʻa e ʻOtuá.”¹⁴ Te tau fehangahangai kotoa pē mo e ngaahi ʻahiʻahí mo ha ngaahi fehuʻi, kae manatu kuo pau ke tau “piki maʻu maʻu ai pē ki he vaʻa ukameá.”¹⁵ “ʻE fakahā kiate [kitautolu] ʻe he ngaahi folofola ʻa Kalaisí ʻa e ngaahi meʻa kotoa pē ʻoku totonu ke [tau] faí.”¹⁶ Kuo pau ke tau ʻai e ako folofolá ko ha konga ʻo ʻetau moʻui fakaʻahó, he te ne fakaava e ngaahi matapā ʻo e fakahaá.

Ki he ngaahi foha ʻo Mōsaiá, “ʻoku ʻikai ko ia pē; ka kuo nau faʻa lotu, mo ʻaukai lahi; ko ia naʻa nau maʻu ʻa e mālohi ʻo e kikité, pea mo e laumālie ʻo e fakahaá.”¹⁷ ʻE hanga ʻe he lotu mo e ʻaukaí ʻo ʻai ke tau ongoʻingofua ʻa e ngaahi ueʻi fakalaumālié. Ko e fefolofolai ko ia mo e Tamai Hēvaní lolotonga e ʻikai ke tau kai mo inú, ʻokú ne ʻai ʻe ia ke tau lava ʻo “vete ʻa e ngaahi noʻo ʻo e angahalá [pea] ke vete ʻa e ngaahi kavenga mamafá.¹⁸ Te ne tokonaki ʻo ka taú ka lotu mo ʻaukai pea ʻi heʻetau “uí, … ʻe tali ʻe he [ʻEikí]; … [pea ʻi heʻetau] kalangá, … te ne pehē mai, Ko au eni.”¹⁹

Naʻe hanga ʻe he ngaahi tōʻonga moʻui fakalotu ko ʻení—ʻa e talangofuá, ako folofolá, lotú mo e ʻaukaí—ʻo fakamālohia ʻa e ngaahi foha ʻo Mōsaiá. Ko e tōnounou ʻi he ngaahi tōʻonga moʻui fakalotu ko ʻení ʻa e ʻuhinga lahi ne hinga ngofua ai ʻa Leimana mo Lēmiuela ki he ngaahi ʻahiʻahi ʻo e laungá mo e veiveiuá

Kapau kuo ʻahiʻahiʻi koe ke ke lāunga, kapau kuo ʻi ai hao ngaahi veiveiua ʻo ne tākiekina koe ki he taʻetuí, kapau ʻoku ngali lahi ange ʻa e ngaahi ʻahiʻahí he meʻa ʻokú ke malavá, tafoki kiate Ia. Kapau ko ha tokotaha koe kuó ke sītuʻa pe fakatonuhiaʻi ho ʻulungāngá, tafoki kiate Ia. ʻOkú ke manatuʻi koā ki he taimi naʻá Ne “lea ʻaki [ai] ʻa e fiemālié ki ho ʻatamaí … ? Ko e hā mo ha toe fakamoʻoni lahi hake te ke lava ʻo maʻu ʻi ha fakamoʻoni mei he ʻOtuá?”²⁰ Fehuʻi hifo, “ʻOku ofi ange nai ʻeku moʻuí ke u hangē ko Kalaisí ʻi he taimí ni mei he taimi ki muʻá?” Kātaki, ʻo tafoki kiate Ia.

Tuku muʻa ke u foki ki heʻeku talanoa fakatāutahá. Naʻe faifai pē pea kamata ke u fakamātoato. ʻOku ou manatuʻi e taimi ne fehuʻi mai ai ʻe he faifekau naʻá ne akoʻi aú pe ʻoku ou mateuteu ke u papitaisó. Naʻá ku tali atu ʻoku kei ʻi ai ʻeku ngaahi fehuʻi. Naʻe talamai ʻe he faifekau potó te ne lava ʻo tali ʻeku fehuʻí ka kuo pau ke u fuofua tali ʻene fehuʻí. Naʻá ne fehuʻi mai pe ʻoku moʻoni ʻa e Tohi ʻa Molomoná pea ko ha palōfita nai ʻa Siosefa Sāmita. Naʻá ku talaange ʻoku ʻikai ke u ʻilo, ka ʻoku ou fie ʻilo ki ai.

Naʻe iku ʻeku fehuʻí ki ha tui lahi. Kiate au, naʻe ʻikai hoko mai ʻa e talí ko ha meʻa pē naʻe hoko ka ko ha founga. Naʻá ku fakatokangaʻi ʻi heʻeku “ʻahiʻahiʻi ʻa [e] ngaahi leá” pea kamata ke “ngāueʻaki ha kihiʻi konga siʻi ʻo e tuí,” naʻe “melie [leva ʻa e Tohi ʻa Molomoná] kiate au” peá ne “fakamaama hoku ʻatamaí” mo “langaki [moʻoni] hake ʻa hoku laumālié.” Naʻe faifai pē peá u aʻusia ʻa e meʻa ko ia ʻoku fakaʻuhingaʻi ʻe he folofolá ko e pupula ʻi homou lotó.²¹ Ko e taimi ʻeni naʻá ku loto ai ke u papitaisó pea fakatukupaaʻi ʻeku moʻuí kia Sīsū Kalaisi.

ʻOku ou ʻiloʻi moʻoni ko e Tohi ʻa Molomoná ko e folofola ia ʻa e ʻOtuá. ʻOku ou ʻilo ko ha palōfita ʻa Siosefa Sāmita. ʻOku kei lahi pē ngaahi meʻa ʻoku ʻikai ke u ʻiló, ka ʻoku hanga ʻe heʻeku fakamoʻoní ʻo takiekina au ke u toe ofi ange ki he Fakamoʻuí mo ne fakatupulaki ʻeku tuí.

Siʻi kāinga ʻofeina, manatuʻi ʻa Nīfai mo e ngaahi foha ʻo Mōsaiá, ʻa ia ne nau maʻu ha ngaahi aʻusia fakalaumālie pea nau ngāue ʻi he tuí kae lava ke nau maʻu ha ngaahi tali pea tupulaki ai ʻenau tui faivelengá. Kae ʻikai hangē ko Leimana mo Lēmiuelá, ʻo veiveiua mo lāunga. Neongo naʻá na ngāue ʻi he taimi ʻe niʻihi, ka ko e ngāue taʻe ʻi ai e tuí ʻoku mate ia. Kuo pau ke tau tui mo ngāue ke maʻu ha ngaahi tali.

ʻOku ou fakatau ange ʻi hoʻomou fanongo mai ʻi he pongipongí ní ke ueʻi ʻe he Laumālié ho ʻatamaí mo ho lotó ki ha meʻa te ke ala fai ke tali ai hoʻo ngaahi fehuʻí pe maʻu atu ha solovaʻanga fakalangi ki he palopalema ʻokú ke fehangahangai mo iá. ʻOku ou fai ha fakamoʻoni molumalu ko e Kalaisí ʻa Sīsū. Tafoki kiate Ia pea ʻe tali hoʻo ngaahi lotú. ʻI he huafa ʻo Sīsū Kalaisí, ʻēmeni.