2010–2019
Prokram en Kasukuhl ohng Kekeirda Mehlel
October 2015


Prokram en Kasukuhl ohng Kekeirda Mehlel

Ma kitail kin aktikitik oh men rong kaweid, Ngehn Sarawio pahn kahluwai kitail lahng ni imwatail, ahpw kitail anahne peki kaweid rehn Kauno.

Ni ansou me I pwulopwul, I tepida men esehla me pid duwen mwomwohdisou. I tepida ahniki ineng en men esehla rongamwahuo sang ni karasaras en kompoakepahi me iang towe mwomwohdisou, ahpw I pil ahnki ineng kehlail ien esehla mwomwen arail padahk kan. Ni ansou me I esehla me ohl oh lih me poadidi kak wie kekeirda oh duwehla atail pahpa oh nohno nanleng, udahn I pwuriamweila mehlel. I leliki koasoandi wet, I kehn me e mehlel.

Mwurinte ahi pepdaislahu, I kin onopiki Kapahrek en Pohn Dohlo, oh I esehla me Sises pil padahki iren padahk mehlel wet nan pwuhk sarawi me pidada atail mour soutuk. E ketin mahsanih, “ Eri mourimwail en unsekla duwehte ieias unsek en Samamwail me ketiket Nanleng.”1

I wiaier tohn mwomwohdiso ki sounpar 40, oh ni ansou koaros me ikin wadek iren pwuhk sarawi wet, e kin katamanehngie kahrepen ahi mih pohn sampah. Kitail kohdo pwe kitail en kasukuhl oh kekeirda lau kitail udahn mwakelekelda de unsekla rehn Krais.

Seiloak en tohnpadahk men kaidehn mehkot mengei ehu. E kahdaniki “prokram en kasukuhl en kekeirda mehlel.”2 Ni atail kin wieseiseiloak nan ahl inen oh tehtikitik o, Ngehno kin song kitail pwe kitail en kak mwahula oh nananti kohwei. Ngehn Sarawio wia iengetail mwahu men nan seiloak wet. Ma kitail kin aktikitik oh men rong kaweid, E pahn kol pehtail kat oh kaweid kitail lahng ni imwatailo.

Ahpw kitail anahne peki ren Kauno en kaweid kitail nan seilok wet. Kitail anahne idek kalelapak apwal,me duwehte “ Dahme I anahne kawekala?” “Iamwomwen ahi kak kekeirda?” “ Luwet dah me anahne kakehlaila?”

Na kitail tehk nan Kadehde Kapw koasoaiepen mwahnakapw kopwehpweho. E wiahier kaun mwahu men sang ni ah kin kapwkapwaiada Kosonned Eiseko, ahpw e men pil mwahusang mwo. Ah ouraman iei mour soutik.

Ni ansou me e tuwong Sounkomouro, e kalelapangki, “ Dahme I en pil wia ?”3

Sises ahpw mwadangete sapeng, ohng kaweid me ohngete mwahnakapw kepwehpweho. “Sises ketin mahsanihong, Ma ke men unsekla mehlel, kohwei oh netikihla omw kepwe kan koaros, pweine kan ke ahpw kihong me semwehmwe kan, oh …. ke ahpw kohdo iangiehla.”4

Mwahnakapwo ahpw pwuriamweila; pwe e sohte kin medewe soangen tohnmeteio. E ahneki karakarak en kalelapak rehn Kauno ahpw e sohte ahneki kehlail laud pwehn idahwen kaweid me kohiengehr ih. Kitail anahne idawehn kaweid ni atail kin ale.

President Harold B. Lee kaweidki: “ Kitail koaros, ma kitail men unsekla, kitail anahne idek rehtail kalelapak wet” ‘Dahme ien pil wia ?’”5

Mie Nohno poadidih men me ikin ese me karakarahkdi oh kalelapak rehn Kauno, “Dahme wie korkoromwpwahla ahi kekeirda?” Ohng lihet pasapeng sang Ngehno mwadangete kohdo: “Uhdihsang kaulim.” Pasapeng wet kapwuriamwei ihda ih, pwehki e sohte tehk me e wia sohn kauwlim men. Ahpw pasapeng sang Ngehn Sarawio udahn sansal. Mwurin rahn kei oh wihk kei me dower powe e kin tepier tehk mwahu ah mwekid en kaulim. Kaping ohng kaweid en men kekeirda, e koasoanehdi me e pahn uhd wadek ah kapai kan ahpw kaidehn ah kahpwal kan. Rahn kei dou powe e alehdi pepehm me e pwung dahme e wiewia sang Ngehn Sarawi o.

Emen mwahnakapw karakarahk, me saikinte kak diar pelie peinakapw peki sawas rehn Kauno: E kalelapak “ Dahme I sohte kak diarki peliei?” Pasapeng wet ahpw kohdohng nan ah madamadau: “ Uhdisang lokaia suwed.Ni ansouo e ahpw kasawiada me diren lokaia suwed e kin kalap doadoahngki, oh e pilada e pahn wekila.

Emen peinakapw ahpw kalelapak: “ Dahme I anahne wia pwe ien kak wekila?” oh Ngehn o mwenginingineng nda, “Kedehr sopuk aramas ni ansou me re kin koaskoasoai.” Ngehn Sarawi o kin kihdo kaweid pwung ohng emen emen aramas. E ketin wia kompoakepah mehlel oh pahn kin ndang kitail mehkot me sohte emen ese de kak ahneki kehlail en nda.

Emen misineri me pwuredohr ahnekihdi pwunod laud ohng kediropwlahn ah ansou me e ahnekihdi. E nanantiong en rapahkihda ansou mwahu pwehn doadoahk, onop, patehng peneinei, oh wia a pwukoa nan Mwomwohdiso. E peki kaweid rehn Kauno: “ Iamwomwen ahi kak ahneki pepehm mwahu ohng soang koaros me I anahne wia?” E sohte kasik pasapengo; E alehdi pepehm me e anahne wauneki Rahn Sarawi. E koasoanehdi e pahn kiong Rahn Sarawi ohng ete Kauno—e sohte pahn wia ah homework ahpw e pahn onopiki rongamwahuo. Kisin wekila tikitik wet wahdohng ih meleilei oh koasoandi mwahu me e kin raparapahkio.

Pahr kei samwalahro, I wadekada nan ehu magazine en Mwomwohdisoh koasoaiepen serepein men me dohsang ah wasahn kousoan oh ieiang college. E sohte nohn pweida nan ah klahs kan, mwomwen ah kin ehu iong ekei kaidehn ih me e kasik, oh e udahn kin ahneki pahtou. Eri ehu rahno, e kelepwidi oh werkihla, “ Dahme I pahn wia pwe ien kak kamwahuila ahi mour?” Ngehn Sarawio ahpw mwenginingin ehng, “Uhda oh kamwakelehda nan ahmw perehn.” Pepehm wet inenen kapwuriamweihda mehlel, ahpw ihme e anahne pwe en kak tepida. Mwurin ah koasoanehdi nan ah wasahu, E kehn Ngehn Sarawio ah kadirehla nan ah perehu oh kamarahrahda ah mohngiong.

Ngehn Sarawio sohte kin ndahng kitail en kamwahula soahng koaros ansouohte. Ma e wia met, kitail pahn ehudahte nsensuwedla oh pwang. Ngehn Sarawio kin sewesei kitail ni wen me kitail kak oahng, wad ekis ekis, de ni mwohmw me Kauno mahsanih, “ lain pohn lain, kosoned pohn kosoned …oh mehd pai irail me kin rong oh kapwaiada ahi kosoned kan, …pwe irail me kin alehda, I pahn kiong irail me tohto.”6 Karasepe, ma Ngehn Sarawio kin kapehmkin uhk ken nda kalahngan pak tohto, oh ke pohnese kapehmo Ngehn Sarawio pahn ese me komw onopadahr en wia me apwal—soangen kaskasukuhl ki nda, “Kupwur mahk; mwo udahn ahi sapwung.”

Kilel
Peneinei kin ale kamadipw sarawi

Ansou keieu mwahu en kalelapak, “Dahme ien pil wia?” iei ansou me kitail kin ale kamadipw sarawi. Wahnpoaron Paul padahngki me nan ansou wet iei ansou en tehk pein kitail.7 Ni ansou en meleilei oh wahu ni ansou en kamadipw sarawio, ni atail madamadau ah uhlahng nanleng, Kauno kak padahkiong kitail dahme kitail anahne uhd koadoahke en kamwahula.

Duwehte te kumwail I, alehier diren pasapeng sang rehn Ngehno nan irair en soumpar kei. I pahn ehuki ehu karasar en ekei aramas me kin alehda padahko ni arail ineng mehlel. Ekei pepehm pwukat kin koasoaia:

  • Kedehr ngihl laud.

  • Koasoanehdi pein kowe; kosoanehdi soahng kan me ke pahn kin wia rahn koaros.

  • Apwalih mwahu pali weremwen sang ni ahm pahn kin kang wahn tuhke kan.

  • Katohtowehla ahmw kin iang kohla nan tehnpas sarawi.

  • Kin medemedewe mwahu mwohn ahmw pahn kapakap.

  • Peki rehn ahmw pwoud en kaweid.

  • Oh kin ahniki kanengamah ansou me kumwail tangatang nan sdohsa; dehr daulihla uwen marahra me kosoandi. (I pil wie koadkoadoahke te ire wet ien kapwaiada.). )

Tomwo me wiahda unsekla de mwakelekelda en kak wiawi. Kitail sohte kak wiahda sang pein kitail, ahpw Sapwelimen Kauno mahk me itarohng en sewesei kitail. Elder David A. Bednar patohwen: “Palilaud en kitail udahn wehwehki me Toamwo iei ohng me dipan akan. Ahpw I sohte nohn wehweki ma kitail ese me Toamwo pil ohng souleng kan—ohng ohl mwahu oh lih mwahu me peik, me warohng, oh me kin kanaiehng ahr doadoahk oh wehwehki oh irail kan me kin nannati ren mwahula.”8

Kilel
Lih kapapak

I men peki emen emen kumwail en pil song iang kakehlailih pali ngenamwahil kan ni ansou mwadang, pil kak pwohnget ni amwail pahn wia amwail kapakap kan. Ni karakarahk peki rehn Kauno kalelapak pwukat: “Dahme wie katkatengehla ahi kekeirda?” De ni ehu lokaia: “ Dahme ien pil wia?” Oh ekis ahniki ansou meleilei en rong pasapengo. Ma udahn kumwail ahniki ineng mehlel, pasapengo pahn mwadangete sansalda. E pahn wia kaudiahl ohngete kumwail.

Ele mwein Ngehno pahn ndang kumwail me kumwail anahne mahkohng aramaso. De mwein kumwail pahn alehdi pasapeng me kumwail anahne lipilipilki koul me kumwail kin rong de kasdo me kumwail kin kilang. Ngehno pahn kak pil kiong kumwail pepehm ehu kumwail en kin mehlel nan amwail doadoahk de kadek ni amwail kin wia meirong en kaisihsol.Soahng tohto kak sansalehng kitail.

Ngehno kak kasalehiong kitail atail luwet akan, ahpw E pil kin kak kasalehiong kitail atail kehl kan. Ekei pak kitail pahn kin anahne idek dahme mwahu me kitail wiewia pwe Kauno en kak kamarainih kitail oh kakehlailih kitail. Ni atail kin wadek neitail patriarchal blessing kan, e kin kataman ehng kitail me Sahm Nanleng mwahngih dahme kitail kak wia. E kin ketin keremwel ansou koaros me kitail kin kekeirda. Ohng Ih, E katapaniki wasa kitail kohkohla ie laud sang iawen marahrahn atail mwokmwokid.

Wonowei mwowe, riei oahl oh lih akan, ahpw dehr pwangada. Kitail pahn sohte kak unsekla nan mour wet, ahpw nan mour wet kitail kak kawada atail poahsoan. “ Iei atail pwukoah kitail en mwahula rahn wet, sang atail mour en aio, oh mwahula lakapw sang atail mour en rahnwet.”9

Ma kekeirdahn pali ngehn sohte wia mehkoat kesempwal ehu nan atail mour, ma kitail sohte mih nan prokram en kasukuhl en kekeirda, kitail pahn katiasang kahrepe kesempwal kan me Kauno kupwurki ketkihong kitail.

Pahr kei samwalahro I wadek koasoai pwukat en President Spencer W. Kimball, me inenen kawekiehla oh sair ie mehlel. E koasoaia: “I esehla me wasa me kin mie mohngiong karakarahk oh kin kapakap wia me pwung, powehdi wiewia suwed, oh kapwaiada Sapwelimen Koht kosonned akan, Kauno kin ketikihdo marain oh kin lalaudla oh lel wen kehlail ehu me kak lella nanleng. ... Soangen aramas me ahniki soangen peik oh mwahu wet me ahniki inou ehu me inenen pweilaud me ehu rahn e pahn uh mwohn silangin Koht oh ese me iei Ih mwo.10

Iei ahi kapakap me soangen irair laud wet pahn kak wiahla atail ehu rahn, ni atail pahn mweidohng Ngehn Sarawio en kaweid kitail lahng ni imwatailo. Ni mwaren Sises Krais, amen.

Ireh Kan

  1. Madiu 5:48.

  2. Neal A. Maxwell, “Testifying of the Great and Glorious Atonement,” Liahona, Epreil. 2002, 9.

  3. Madiu 19:20..

  4. Madiu 19:21.

  5. Teachings of Presidents of the Church: Harold B. Lee (2000), 197.

  6. 2 Nephi 28:30.

  7. Tehk 1 Korint 11:28.

  8. David A. Bednar, “The Atonement and the Journey of Mortality,” Liahona, Epreil 2012, 14.

  9. Joseph Fielding Smith, Doctrines of Salvation, comp. Bruce R. McConkie, 3 vols. (1954–56), 2:18.

  10. Spencer W. Kimball, “Give the Lord Your Loyalty,” Tambuli, Feb. 1981, 47.