Vim Li Cas Muaj lub Koom Txoos

Nyob tas kuv sim neej, lub Koom Txoos cov tuam rooj sab laj yog tej sij hawm uas txhawb nqa kuv sab ntsuj plig, thiab lub Koom Txoos yog qhov chaw uas kuv tau kawm txog tus Tswv. Kuv paub muaj ib txhia uas xav tias lawv nyiam teev ntuj tiam sis lawv tsis xav koom ib lub koom txoos thiab xav tias tsis tas muaj ib yam dab tsi zoo li ntawd. Kev teev ntuj yog ib yam uas lawv ua lawv tus kheej xwb. Tiam sis tus uas peb sab ntsuj plig tsom ntsoov rau yog tus uas tau tsim lub Koom Txoos no—Yexus Khetos. Tsim nyog uas peb xav txog vim li cas Nws tau xaiv tsim ib lub koom txoos uas yog Nws lub Koom Txoos, Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg, kom ua raws li Nws thiab Nws Leej Txiv txoj hauj lwm kom tib neeg tsis txawj tuag thiab muaj txoj sia nyob mus ib txhis.”¹

Txij thaum Adas los, lawv tau qhia Yexus Khetos txoj moo zoo, thiab muab neeg ua tej kab ke cawm seej, xws li kev cai raus dej, dhau ntawm lawv tsev neeg uas muaj lub pov thawj hwj.² Thaum lawv tej lub sawm fem loj zuj zus tuaj, Vajtswv kuj hu lwm tus yaj saub, cov tub xa xov thiab xib hwb. Nyob hauv Mauxes lub caij nyoog, peb nyeem txog ib tug txheej txheem uas muaj txwj laug, pov thawj, thiab neeg txiav txim. Nyob hauv Phau Ntawv Maumoos zaj keeb kwm, Amas tau txhim tsa ib lub koom txoos uas muaj cov pov thawj thiab cov xib hwb.

Ces, hauv lub caij nyoog nruab nrab sij hawm, Yexus tau tsa Nws txoj hauj lwm kom cov thawj coj qhia tau txoj moo zoo nyob hauv ntau lub teb chaws thiab rau tej haiv neeg nyob qhov txhia chaw. Vajtswv muab Yexus Khetos lub Koom Txoos los ua rau saum lub qua tsev uas cov “thwj tim thiab cov yaj saub twb ncaws tau cia lawm. Tus ncej tas ntawd yog Yexus Khetos ntag.”³ Kuj muaj cov thawj coj ntxiv xws li cov xya caum, txwj laug, npisov, pov thawj, xib hwb, thiab dikas. Yexus kuj txhim tsa lub Koom Txoos nyob hauv Ntiaj Teb Sab Hnub Poob tom qab Nws txoj Kev Sawv Rov Los.

Tom qab lub Koom Txoos uas tus Tswv tau txhim tsa thaum Nws nyob hauv lub ntiaj teb raug kev tso qhov tseeb tseg thiab ploj mus, tus Tswv rov qab txhim tsa Yexus Khetos lub Koom Txoos dhau los ntawm tus Yaj Saub Yauxej Xamiv. Lub Koom Txoos no tseem muaj lub hom phiaj uas muaj thaum ub: kom tshaj tawm Yexus Khetos txoj moo zoo thiab muab neeg ua tej kab ke cawm seej—los yog hais tias, kom coj tib neeg los cuag Khetos.⁴ Thiab nim no, dhau los ntawm lub Koom Txoos uas raug txum tim rov qab los, cov ntsuj plig ntawm cov uas tas sim neej cov uas tsis tau paub ntau txog tus Cawm Seej txoj kev tshav ntuj lawv kuj txais tau kev txhiv dim.

Nws lub Koom Txoos ua dab tsi kom muaj raws li tus Tswv lub hom phiaj? Peb yuav tsum paub hais tias Vajtswv lub hom phiaj tseem ceeb tshaj plaws yog peb txoj kev vam meej. Nws xav kom peb txais ib qho hwj chim ntxiv rau ib qho, txog thaum peb tau txais tag nrho Nws pub tau.⁵ Ua li ntawd ces yuav tsum ua ntau tshaj kev ua siab zoo los sis mloog tau tus ntsuj plig xwb. Peb yuav tsum ntseeg Yexus Khetos, hloov siab lees txim, ua kev cai raus dej thiab raus tus Ntsuj Plig, thiab nyiaj kom mus txog thaum kawg.⁶ Yus ua tsis tau li no yus tus kheej xwb, yog li ntawd tus Tswv ib lub hom phiaj rau lub koom txoos yog kev tsim ib Haiv Neeg Ntseeg uas yuav sib pab taug “txoj kev ti thiab nqaim uas yuav coj mus rau txoj sia nyob mus ib txhis.”⁷

“Thiab [Khetos] tsa qee leej ua [thwj tim], qee leej ua cov [yaj saub], qee leej ua xib hwb qhia Txoj Moo Zoo, qee leej ua cov xib hwb qhia thiab qee leej ua cov [xib hwb];

“… Kom cov ntseeg paub ua Vajtswv tej hauj lwm; cov ntseeg uas yog Yexus Khetos lub cev thiaj li yuav txawj loj hlob zuj zus:

“Mus txog thaum peb sawv daws ua tau ib lub siab, ntseeg ib yam nkaus, paub tseeb Vajtswv tus Tub, thiab ua tau lub neej zoo ib yam li Yexus Khetos.”⁸

Yexus Khetos “yog peb lub hauv paus kev ntseeg thiab ua kom peb kev ntseeg tiav.”⁹ Qhov uas peb koom Yexus Khetos lub cev—uas yog lub Koom Txoos—yog ib qho tseem ceeb ntawm peb txoj kev ris Nws lub npe.¹⁰ Vaj lug kub qhia peb hais tias lub Koom Txoos thaum ub “tau sib ntsib ua ke tsis tu ncua, yoo mov thiab thov Vajtswv, thiab ib leeg nrog ib leeg tham txog txoj kev nyab xeeb ntawm lawv tej ntsuj plig”¹¹ “thiab mloog tus Tswv txoj lus.”¹² Nyob hauv lub Koom Txoos niaj hnub no peb ua zoo ib yam. Peb ib leeg qhia thiab txhawb nqa ib leeg thiab siv zog ua tau lub neej zoo ib yam li ib tug thwj tim tiag tiag, “ua tau lub neej zoo ib yam li Yexus Khetos.” Peb ib leeg siv zog pab ib leeg paub tus Tswv,¹³ mus txog thaum hnub uas “tsis tas lawv yuav qhia rau tej neeg zej zog kom paub tus Tswv, rau qhov lawv txhua tus puav leej yuav paub kuv, tsis hais tus hlob tus yau.”¹⁴

Nyob hauv lub Koom Txoos no tsis yog peb kawm txog Vajtswv cov lus qhuab qhia xwb; peb kawm ua raws li cov lus qhuab qhia ntawd. Vim cov meej zeej ntawm lub Koom Txoos yog Khetos lub cev, lawv ib leeg txhawb pab ib leeg txhua hnub. Peb txhua tus yeej tsis zoo tag nrho; tej zaum peb yuav ua txhaum rau lwm tus thiab lwm tus yuav ua txhaum rau peb. Feem ntau peb ib leeg sim ib leeg lub siab dhau los ntawm tej yam uas peb pheej ua. Vim peb yog Khetos lub cev, peb yuav tsum tsis txhob xav txog tej lub ntsiab thiab tej lus tsa nto xwb thiab yuav tsum kawm ntawm peb tus kheej kom nyob ua ke nrog txoj kev sib hlub.¹⁵

Txoj kev teev ntuj no tsis yog rau yus tus kheej xwb; tiam sis tus Tswv hu peb txhua tus ua hauj lwm pab. Peb yog qhov muag, txhais tes, taub hau, ko taw, thiab lwm yam ntawm lub cev, thiab “peb lub cev muaj qee yam tsis tshua tseem ceeb, tiam sis yog tsis muaj tej ntawd peb yeej tsis tsheej neeg.”¹⁶ Peb xav tau tej hauj lwm no, thiab peb yuav tsum pab lwm tus.

Muaj ib tug txiv neej nyob hauv kuv pawg ntseeg es nws niam nws txiv tsis pom zoo rau nws txoj kev koom lub Koom Txoos. Nws tau hais li no nyob hauv kev sib ntsib txais lub cim nco txog hais tias: “Kuv txiv tsis to taub vim li cas leej twg yuav xav mus koom lub koom txoos thaum lawv muaj sij hawm mus ski, tiam sis kuv nyiam tuaj koom lub koom txoos heev. Nyob hauv lub Koom Txoos, peb sawv daws taug tib txoj kev, thiab kuv txais kev tshoov siab los ntawm cov tub hluas ntxhais hluas uas muaj zog, cov me nyuam uas muaj siab dawb, thiab los ntawm tej yam uas kuv pom thiab kawm ntawm lwm tus neeg laus. Kuv txoj kev sib raug zoo nrog lawv txhawb kuv lub dag lub zog thiab kuv txais kev xyiv fab thaum kuv ua raws li txoj moo zoo.”

Lub Koom Txoos tej pawg ntseeg thiab ceg ntseeg yog tej qhov chaw rau peb so thiab rov qab muaj zog txhua lub lim tiam, thiab yog ib lub sij hawm kom tso tej teeb meem tseg thaum Hnub Caiv. Yog ib hnub kom “nej … yuav tau kev kaj siab vim nej mloog [tus Tswv] lus,”¹⁷ kom txais kev kho mob ntawm sab ntsuj plig los ntawm lub cim nco txog, thiab kom txais kev cog lus tias Nws tus Ntsuj Plig yuav nrog peb nyob.¹⁸

Ib txoj koob hmoov zoo kawg nkaus uas peb txais tau vim peb yog ib feem ntawm Khetos lub cev, yog qhov uas peb raug qhuab ntuas txog peb tej kev txhaum, txawm peb tsis xav tias yog ib txoj koob hmoov thaum ntawd. Peb pheej daws peb tus kheej kom tsis txhob raug txim, thiab tej lub sij hawm peb tsis paub peb yuav tsum ua dab tsi kom ua zoo dua los sis tsis paub ua li cas. Yog tsis muaj cov uas qhuab ntuas peb kom nruj thaum yog sij hawm, thaum tus Vaj Ntsuj Plig Dawb Huv tshoov siab,¹⁹ tej zaum peb yuav tsis ua siab loj txaus hloov siab thiab mloog tus Xib Hwb lus. Yus hloov siab lees txim ntawm yus tus kheej, tiam sis muaj kev sib raug zoo thaum yus taug txoj kev nyuaj ntawd nyob hauv lub Koom Txoos.²⁰

Thaum kuv hais txog qhov uas lub Koom Txoos yog Khetos lub cev, peb yeej yuav tsum nco ntsoov ob qho. Qhov thib ib, peb tsis xav kom tib neeg hloov siab los ntseeg lub Koom Txoos, tiam sis peb xav kom lawv hloov siab los ntseeg Khetos thiab Nws txoj moo zoo; lub Koom Txoos saib xyuas txoj kev hloov siab los ntseeg no.²¹ Phau Ntawv Maumoos piav meej hais tias cov neeg tau hloov siab los ntseeg tus Tswv, thiab tau los sib koom rau Khetos lub koom txoos.²² Qhov thib ob, peb yuav tsum nco ntsoov tias thaum xub thawj, lub Koom Txoos yog yus tsev neeg xwb, thiab txawm hnub no yog ob pawg uas nyias nyob nyias, tsev neeg thiab lub Koom Txoos sib pab thiab ib pawg muab dag zog rau ib pawg. Tsis muaj ib pawg uas tseem ceeb dua ib pawg, thiab lub Koom Txoos, txawm txhua tus ua zoo tshaj plaws los, sawv cev tsis tau rau cov niam txiv zoo. Lub hom phiaj ntawm kev qhia txoj moo zoo thiab kev muab kab ke pov thawj hwj dhau los ntawm lub Koom Txoos yog kev pab kom tsev neeg yuav tsim nyog muaj txoj sia nyob mus ib txhis.

Muaj ib qho ntxiv uas qhia yog vim li cas tus Cawm Seej ua hauj lwm dhau los ntawm ib lub koom txoos, uas yog Nws lub Koom Txoos, qhov ntawd yog kev ua tej yam tseem ceeb uas yus ua tsis tau yus tus kheej los sis ua tsis tau nyob hauv ib pawg me me. Ib qho piv txwv meej yog kev pab cov neeg txom nyem. Peb thiab peb tsev neeg yeej saib xyuas lwm tus kom pab lawv muaj raws li lawv xav tau ntawm sab cev nqaij daim tawv, “ib leeg faib rau ib leeg tsis hais sab cev nqaij daim tawv los sis sab ntsuj plig raws li lawv tej kev xav tau thiab xav yuav.”²³ Tiam sis nyob ua ke nyob hauv lub Koom Txoos, peb haj yam muaj peev xwm saib xyuas cov pluag thiab cov uas xav tau kom thiaj pab tau coob dua ntxiv, thiab ua rau ntau tus vam tau lawv tus kheej.²⁴ Tsis tas li ntawd xwb, lub Koom Txoos, cov Koom Haum Niam Tsev, thiab tej pawg pov thawj hwj muab kev txhawb nqa rau cov neeg coob nyob hauv ntau lub teb chaws uas raug xwm txheej, muaj kev tsov kev rog, thiab raug kev tsim txom.

Yog tias tsis muaj Nws lub Koom Txoos, yuav ua tsis tau raws li tus Cawm Seej txoj kev txib kom qhia txoj moo zoo thoob plaws lub ntiaj teb.²⁵ Yuav tsis muaj cov yuam sij ntawm cov thwj tim, tus txheej txheem, cov nyiaj txiag, thiab kev rau siab thiab kev txi ntawm ntau txhiab tus tub txib thiab ntxhais txib uas yuav tsum muaj kom ua tau txoj hauj lwm no. Nco ntsoov tias, “[Yuav tsum] muaj neeg mus qhia Txoj Moo Zoo uas hais txog Ntuj Ceeb Tsheej mus thoob qab ntuj thiab ua tim khawv rau txhua haiv neeg paub lawm, ces thaum ntawd twb yuav txog lub sij hawm kawg.”²⁶

Lub Koom Txoos no ua thiab khiav cov tuam tsev, uas yog tus Tswv cov tsev, es nyob haud cov neeg ua kab ke thiab ua kev khi lus. Yauxej Xamiv hais tias nyob hauv txhua lub caij nyoog Vajtswv lub hom phiaj kom muab Nws cov neeg sib sau ua ke twb yog “kom ua ib lub tsev rau tus Tswv kom Nws qhia tau Nws haiv neeg txog tej kab ke ntawm Nws lub tsev thiab tej yeeb koob ntawm Nws lub nceeg vaj, thiab yuav qhia haiv neeg ntawd txog txoj kev cawm seej; vim muaj tej yam kab ke thiab tej ntsiab cai uas, thaum yuav qhia tawm thiab ua, yuav tsum ua hauv ib qho chaw los sis ib lub tsev uas tau ua kom thiaj ua tau raws li lub ntsiab ntawd nkaus xwb.”²⁷

Tus uas ntseeg tias txhua txoj kev yuav mus rau ntuj ceeb tsheej los yog tsis tas ua dab tsi kom txais tau kev cawm seej, tus ntawd yuav xav tias tsis tas tshaj tawm txoj moo zoo los sis muaj kab ke thiab kev khi lus kom muab cov ciaj thiab cov tuag txhiv dim. Tiam sis peb tsis qhia txog kev tsis txawj tuag xwb peb kuj qhia txog txoj sia nyob mus ib txhis, yog li ntawd yuav tsum muaj txoj moo zoo thiab tej kev khi lus. Thiab tus Cawm Seej kom lub koom txoos muab tej ntawd rau tag nrho Vajtswv cov me nyuam—tsis hais cov ciaj thiab cov tuag los yog.

Qhov kawg uas kuv yuav hais uas qhia vim li cas tus Tswv tau txhim tsa Nws lub Koom Txoos yog qhov uas txawv tshaj plaws—qhov uas lub Koom Txoos yeej yog Vajtswv lub nceeg vaj nyob rau hauv lub ntiaj teb.

Thaum tab tom txhim tsa Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg nyob rau hauv tej xyoo 1830, tus Tswv hais rau tus Yaj Saub Yauxej Xamiv kom cov ntseeg zoo siab thiab xyiv fab, vim tus Tswv twb muab lub nceeg vaj, los sis ua lwm yam lus hais, tej yuam sij ntawm lub koom txoos rau lawv lawm.²⁸ Vim lawv muaj txoj cai los ntawm cov yuam sij no, lub Koom Txoos no cov thawj coj uas tuav lub pov thawj hwj saib xyuas cov lus qhuab qhia kom dawb huv thiab cov kab ke kom ua raws li qhov yog.²⁹ Lawv pab cov uas xav txais tej ntawd kom npaj siab, txiav txim seb cov uas xav tau puas tsim nyog, thiab ua cov kab ke ntawd.

Vim muaj cov yuam sij ntawm lub nceeg vaj, tus Tswv cov tub qhe thiaj paub qhov tseeb thiab qhov cuav, thiab muaj cai hais tias “Tus Tswv hais li no.” Tu siab uas ib txhia tsis nyiam lub Koom Txoos vim lawv nyias xav tsim nyias qhov tseeb, tiam sis yog ib qho koob hmoov zoo tshaj plaws thaum “paub tias tej yam zoo li cas, thiab thaum ub zoo li cas, thiab yuav zoo li cas yav tom ntej.”³⁰ yog tus Tswv txaus siab muab tshwm sim. Lub Koom Txoos saib xyuas thiab tshaj tawm Vajtswv tej kev tshwm sim—uas yog cov vaj lug kub.

Thaum Daniyees txhais Npanpiloos tus Vaj Ntxwv Nenpukajnexales zaj ua npau suav, qhia tus vaj ntxwv hais tias yuav zoo li cas hauv lub caij nyoog kawg,³¹ nws qhia hais tias “Vajtswv tus uas nyob saum ntuj yuav tsa ib lub [nceeg vaj] uas yuav nyob mus tsis paub kawg li. Lub [nceeg vaj] ntawd yuav tsis muaj leej twg kov yeej nws, nws yuav rhuav tej teb chaws ntawd kom puas tsuaj tas, tiam sis nws yuav nyob mus ib txhis.”³² Lub Koom Txoos yog lub nceeg vaj hauv lub caij nyoog kawg uas tsis yog tib neeg tsim, tiam sis yog Vajtswv saum ntuj ceeb tsheej tsa thiab muab dov mus zoo li yog lub pob zeb uas muab txam tawm saum lub roob los uas tsis yog neeg txam kom txog thaum puv tag nrho lub ntiaj teb.³³

Lub Koom Txoos no yeej yuav tsa Xi-oos kom npaj rau Yexus Khetos txoj kev rov los thiab txoj kev kav nyob hauv lub milenias. Ua ntej hnub ntawd, lub Koom Txoos tsis yog ib lub nceeg vaj xws li kev kav teb kav chaw niaj hnub nim no—ib yam li tus Cawm Seej hais tias, “Kuv lub teb chaws tsis yog lub ntiaj teb no.”³⁴ Tiam sis Nws lub Koom Txoos muaj Nws txoj cai nyob hauv lub ntiaj teb, muab Nws tej kev khi lus dawb huv rau neeg, saib xyuas Nws cov tuam tsev, pov hwm thiab tshaj tawm Nws txoj kev tseeb, qhov chaw rau Ixayees sib sau ua ke, thiab ib qhov chaw tiv thaiv, thiab … ib qho chaw nkaum ntawm cua daj cua dub, thiab ntawm txoj kev npau taws thaum yuav muab nchuav tawm los tsis tseg hlo li rau hauv lub ntiaj teb tag nrho.³⁵

Kuv hais tus Yaj Saub tej lus thov xaus lus:

Thov tus Tswv, kom nws lub nceeg vaj yuav tawm mus rau hauv ntiaj teb, kom tej neeg nyob hauv yuav txais nws, thiab npaj rau tej hnub yuav los, thaum uas Neeg Leej Tub yuav los saum ntuj ceeb tsheej los, nws lub yeeb koob ci ntsa iab ib puag ncig, los cuag Vajtswv lub nceeg vaj uas tsa rau hauv lub ntiaj teb.

Yog li ntawd, thov kom Vajtswv lub nceeg vaj yuav ri mus, kom lub nceeg vaj ceeb tsheej yuav los, kom koj, auj Vajtswv, yuav tau yeeb koob saum ntuj ceeb tsheej ib yam li hauv ntiaj teb, kom kov yeej koj tej yeeb ncuab; vim lub sam xeeb, lub hwj chim thiab lub yeeb koob yog koj li, mus ib txhiab thiab ib txhis.³⁶

Los ntawm Yexus Khetos lub npe, amees.