Bula Kilikili ki na Noda Veivakalougatataki Yalataki

E sega beka ni ko lomana na tacimu oqo? Keimami kila ni vuqa vei kemuni a sega ni nomuni na madigi mo ni vakaluveni o ni sa soli bula tiko ena nodra lomani, vakavulici, ka vakalougatataki o ira na gone. Isa, sa dua na ka na levu ni nona lomani kemuni na Tamada Vakalomalagi kei keimami na marama ena vuku ni ka oqori!

iVakatakilakila

E dua na goneyalewa e keveta tiko e dua na gonelailai sucuvou

Oi keda kece beka, oka kina o kemuni na veitacini yalewa ena Lalai kei na Goneyalewa, eda sa keveta oti e dua na gone sucu vou mai ka me qai raica mai na matada? Eda a vakila beka na ka tabu ka savasava a solega voli na yalo vakasilesitieli oqo, se qai talai walega mai vua na Tamada Vakalomalagi ki na yagona buli vou, lailai savasava? Au sa dau vakila vakavuqa na veika kamica, lomani, ka vakayalo sara.

Na yagoda era sa isolisoli tabu mai vua na Tamada Vakalomalagi. Era sa noda valetabu. Ni da vakasavasavataka ka vakatudonutaka tiko, sa rawa meda kilikili meda vukea na Tamada Vakalomalagi ena kena buli na yago baleti ira na Luvena lomani vakayalo.

iVakatakilakila

E vosa tiko o Peresitedi Packer

Ena iotioti ni vosa nei Peresitedi Boyd K. Packer ena koniferedi raraba, ko ni nanuma tiko beka me baleta “na bisikete kamica kei na iregu,” a kaya kina “na ivakaro ni vakatubu kawa ka vakatawai vuravura … sa ka yaga sara … ka sa ivurevure ni bula marau ni tamata. Mai na vakayagataki vakadodonu ni kaukauwa ni [veibuli] oqo, sa rawa meda toro voleka vua na Tamada Vakalomalagi ka vakila e dua na taucoko ni reki, vakakina na bula vakalou. Na kaukauwa ni vakatubu kawa e sega ni dua na tiki lailai ni ituvatuva; sai koya na ituvatuva.”

A tomana:

“Na dodomo dina na kena maroroi me oti mada na vakamau me qai wasei na veivinakati oqori me dolavi kina na kaukauwa tabu … [ena noda] drotani mai na gagano vakayago ena rawa ni veirawai. …

“… Na noda bula marau ena bula oqo, na noda reki kei na bula vakacerecerei ena vakatau tiko ki na ivakarau ni noda raica na gagadre oqo e gugumatua, veivakayarayarataki ka vakayago.”¹

Kemuni na taciqu lomani, gone kei na qase, au a marau vakalevu niu vakarautaka tiko na vosa oqo. Me vaka a vakamacalataka o Alama Lailai, “Au sa nanumi kemudou sara vakalevu … mo dou … masuta na yacana tabu, dou vakatawa ka masu tikoga, me kakua ni rawai kemudou na vere, … mo dou laveti cake ena siga mai muri.”²

E muri, a qai tukuna talega qo o Momani ena siga nei Alama, o Korio, na meca i Karisito, “sa vunau voli … , ka sa rawa e vuqa na tamata … kei na yalewa.”³

Kemuni na taciqu, sa mai vakarewataka cake tiko o Setani e dua na drotini vaka-Korio ena noda siga oqo ka sa gugumatua sara tiko. Cava beka eso na nona iyaragi? Na ivola ni veidomoni, vakatasuasua ena TV, yalewa vakamau kei ira na nodra itau e liu era veisemati tale tiko ena veivolavolai raraba, kei na iyaloyalo vakasisila. Meda sa qai qaqarauni sara, kemuni na taciqu lomani! Ena sega ni rawa meda vaqitora na gasau vidi nei Setani meda qai sega ni kama. Au sega ni kila e dua na ka meda na rawata kina na veitokani tudei kei na Yalo Tabu me vakataka na bula dodonu.

E vuqa ena vuravura nikua era sa vinakata tiko na marau totolo kei na kila totolo ena Initaneti. Ena yasana kadua, eda na vakalougatataki vakalevu keda vakabauta tiko ka vosota ka gole vata kei na noda leqa vua na Tamada Vakalomalagi, na ivurevure ni ka dina kecega. Sa levu na isau ni taro kei na veivakadeitaki ena noda vakasaqara ka vulica na veivolanikalou ka salavata na yalodina ka masu ena yalo dina, ia e sega ni dua na yalayala vakaoqori e tiko ena Initaneti. A kaya na parofita o Jekope, “Ia na Yalo Tabu sa tukuna na ka dina ka sega ni lasu. Ia sa tukuna ko koya na veika sa yaco dina tiko kei na veika ena yaco dina mai.”⁴

Ni da okati keda ena saravi, wiliki, se cakava na veika e torosobu mai na ivakatagedegede nei Tamada Vakalomalagi, oqori ena vakamalumalumutaki keda. Veitalia na noda yabaki, na veika eda raica, wilika, vakarogoca, se digitaka meda cakava e sega ni tautauvata kei na ivakatagedegede ni Turaga e tiko ena Me iSakisaki ni iTabagone, sogota, kolotaka laivi, dresulaka, ka sogota na katuba.

iVakatakilakila

Na iVakabula mai Kecisemani

E sega ni dua e taucoko sara, ia ni da ivalavala ca, sa tukuna kina vei keda o Peresitedi Packer:

“Na yalayala: ‘Raica ko koya sa veivutunitaka na nona ivalavala ca, ena vosoti, ia koi au na Turaga au na sega ni nanuma tale na nona ivalavala ca’ (V&V 58:42). …

“… Na Veisorovaki, ka sa rawa meda taukena yadua, e sega kina na mawe ni mavoa. Sa kena ibalebale se cava sara na veika eda sa cakava se eda a tu mai vei se a yaco vakacava, kevaka eda na veivutuni dina, sa yalataka tu o Koya ni na sorovaki keda. Ni sa sorovaki keda, sa yaco sara ga e kea. E vuqa vei keda era sa veilecayaki voli … era kila ni ra sa cala, ka sega ni kila na sala mera dro bula kina. O na dro bula ga ni ko ciqoma na Veisorovaki i Karisito, kei na yalo rarawa kece ena rawa ni vuki me ka totoka ka lomani ka tawamudu.”⁵

Mai na veivutuni, na veivuke se iyaragi cava, sa soli oti vei keda meda tiko savasava ka bula dodonu kina? Era sa kila kece tu na noda Lalai kei na goneyalewa mera lagata na “Kaukauwa ni iVolanikalou.”⁶ Eda rawa ni vakatetea me “Kaukauwa ni Masu,” “Kaukauwa ni Valetabu,” “Kaukauwa ni Veiyalayalati,” “Kaukauwa ni Siga ni Vakacecegu” “Kaukauwa ni Parofita,” kei na “Kaukauwa ni iValavala Dodonu”?

Era sa tu talega na veivakalougatataki cecere kei na yalayala veitaqomaki e sema tiko ki na kena daramaki vakadodonu na noda isulu ni valetabu. Au sa mai vakila niu sa mai daramaka tiko vakaivakatakilakila na isulu vakaranadi sa solia mai na Tamaqu Vakalomalagi. Au vakadinadinataka kemuni na taciqu, ni da saga meda daramaka vakadodonu na qameni, sa na kila sara na Tamada ni sa ivakatakilakila cecere ni noda lomana ka dina tiko Vua. Sai koya na ivakatakilakila ni veiyalayalati eda sa cakava Vua, ka sa yalataka o Koya, “Raica koi au na Turaga, au na vakayacora na noqu yalayala kevaka dou sa muria na noqu ivakaro; ia kevaka dou sa sega ni muria na noqu ivakaro, dou na sega ni rawata na ka sa yalataki.”⁷

Dua na gauna au a veivosaki kei na dua na itokani makawa sa sere oti vakarua baleta na veivakatotogani kei na nodrau sega ni dina na watina e liu. A sotava o koya kei na luvena e tolu na rarawa levu. A lelevaka, “Au saga vakaukauwa sara meu bula savasava. Na cava meu mai vakatovolei kina vakalevu? Na cava beka noqu cala? Na cava e vinakata na Tamada Vakalomalagi meu cakava? Au dau masu ka wilika noqu ivolanikalou, vukei iratou na luvequ, ka gole vakavuqa ki valetabu.”

Niu vakarorogo vei taciqu oqo, au vinakata sara ga meu kailavaka, “O sa cakava tiko! O sa cakava sara tiko ga na veika kece e vinakata na Tamada Vakalomalagi ka nuitaka mo na cakava!”

Sa kilai vinaka tu, ni vuqa era kaya ni veivakalougatataki yalataki nei Tamada sa “tu vakayawa sara,” vakabibi ni sa boloraki tu ga ena bolebole na noda bula. Ia a vakavulica o Amuleki “me vakarautaki koya na tamata ena bula oqo … me na lesu tale vua na Kalou,”⁸ E sega ni kena gauna meda sa taura taucoko noda veivakalougatataki. A vakamacalataka o Peresitedi Packer ni “‘Ra sa qai bula marau vata ki na ivakataotioti’ e sega ni volai ki na ikarua ni ivakatasuasua. Na vosa oqo e oka ena ikatolu ni vakatasuasua ni sa laurai na veika vuni ka vakatudonutaki na veika kece.”⁹ Ia, meda sa qai raica vakatabakidua e matada e veisiga na veivakalougatataki yalataki nei Tamada—vakakina meda na kila tiko “na nona loloma levu na Turaga”¹⁰ eda sa sotava tiko ena veisiga yadua.

Kemuni na taciqu, au sega ni kila na vuna e levu tu ga kina na noda vakatovolei, ia na noqu nanuma, ni na cecere na kena isau, sa tawamudu ka tawayalani, sa ka rekitaki sara ka sega ni da kila rawa ni yaco mai noda siga ni veisaumi, eda na vakila meda kaya vua na Tamada dauveivueti ka dauloloma, “Sai koya kece beka ga o ya e a gadrevi?!” Au vakabauta kevaka meda nanuma ka kila tiko ena veisiga yadua na titobu ni nodrau lomani keda na Tamada Vakalomalagi kei na noda iVakabula, eda na vakaio meda cakava na veika kecega Rau kerea meda lesu rawa kina vei Rau, ka solegi ena Nodrau loloma tawamudu. Na cava na kena yaga, kemuni na taciqu lomani, na noda mai rarawa tu eke, kevaka sa mai cava, na veivakatovolei kece oqori sai koya sara ga na ka meda rawata kina na bula tawamudu kei na bula vakacerecerei ena matanitu ni Kalou vata kei Tamada kei na iVakabula?

Au vakadinadinataka ni yagoda sa isolisoli tabu mai vua na Tamada Vakalomalagi ka da maroroya na noda bula me taucoko ka savasava ena veisorovaki ni solibula ni noda iVakabula ka raica matua tiko ena veisiga yadua na isau sa yalataka tu na Tamada, ena yaco dina na siga eda na ciqoma kina na “ka kecega sa tu vei [Tamada].”¹¹ Ena yaca tabu o Jisu Karisito.