2010–2019
Ua Neej Tsim Nyog Txais Peb tej Koob Hmoov uas Cog Lus Tseg
October 2015


Ua Neej Tsim Nyog Txais Peb tej Koob Hmoov uas Cog Lus Tseg

Peb yuav tsum muaj lub hom phiaj ntawm peb Leej Txiv tej koob hmoov uas tau cog lus tseg nyob nraim hauv peb lub siab txhua hnub.

Nej puas hlub tus viv ncaus nyob hauv daim video no? Peb yeej paub hais tias muaj nej coob tus uas muaj tsis taus me nyuam yeej rau siab hlub, pab tu, pab qhia thiab foom koob hmoov rau cov me nyuam yaus lawm. Peb Leej Txiv Saum Ntuj Ceeb Tsheej thiab peb cov viv ncaus, yeej hlub nej rau tej kev pab ntawd!

Peb sawv daws, suav cov viv ncaus hauv lub Koom Haum Me Nyuam thiab Koom Hauv Ntxhais Hluas tib si, puas tau muaj cib fim los puag ib tug me nyuam mob liab es pom nws qhia qhov muag ntsia peb? Peb puas tau hnov tus ntuj plig dawb huv no uas nyuam qhuav los saum Leej Txiv Saum Ntuj Ceeb Tsheej los rau hauv ib lub cev huv huv? Tsawg tsawg zaus kuv thiaj li tau hnov tej kev zoo, kev siab mos siab muag, thiab hnov tus ntuj plig no xwb.

Peb lub cev yog ib qho khoom pliag dawb ceev los ntawm Leej Txiv Saum Ntuj Ceeb Tsheej los. Peb lub cev yog peb tej tuam tsev. Thaum peb ceev peb lub cev kom dawb huv thiab huv huv, ces peb thiaj li tsim nyog los pab tsim lub cev rau peb Leej Txiv Saum Ntuj Ceeb Tsheej tej me nyuam ntsuj plig.

Daim Duab
Thawj Tswj Hwm Packer hais lus

Nyob hauv Thawj Tswj Hwm Boyd K. Packer zaj lus kawg hauv lub tuam rooj sab laj, tej zaum nej yuav nco tau hais tias yog, “ib lub khob noom thiab hnia ib pas,” nws hais lus tim khawv tias “zaj lus txhib kom muaj tub muaj ki thiab huaj vam mus puv tas lub ntiaj teb...tseem ceeb heev...thiab yog tib neej txoj kev zoo siab. Yog tias siv lub hwj chim no raws li kev ncaj ncees, peb thiaj muaj cuab kav txav los ze peb Leej Txiv Saum Ntuj Ceeb Tsheej thiab txais kev zoo siab tag nrho. Lub hwj chim ntawm kev tsim tub ki tsis yog ib qho tsis tseem ceeb hauv txoj hau kev; nws yog txoj hau kev ntag.”

Nws hais ntxv tias:

“Kev hlub tiag tiag yuav tsum tos kom sib yuav lawm tso mam li siv tej hwj chim dawb ceev no … thiab yuav tsum tsis txhob ua tej yam uas lub cev yuav tswj tsis tau. …

“… Peb txoj kev zoo siab hauv lub neej no, peb txoj kev xyiv fab thiab kev tsa nto yuav nyob ntawm seb peb yuav ua li cas rau tej kev xav ntawm peb lub cev nqaij daim tawv no.” 1

Cov viv ncaus, laus thiab hluas, kuv ntxhov siab kawg thaum kuv npaj zaj lus no. Ua li Amas tus Hluas tau hais, “Kuv vam puag hauv kuv nruab siab tuaj … tias nej yuav nej yuav hu nws lub npe dawb huv, thiab saib xyuas thiab thov tsis tu ncua, kom nej yuav tsis raug ntxias tshaj qhov uas nej tiv taus, … xwv kom nej yuav raug tsa sawv nyob hauv hnub kawg.”2

Tom qab ntawd, Maumoos kuj tau hais lus tim khawv hais tias nyob hauv Amas lub sij hawm, Khaulihos, tus uas tawm tsam Khetos, ”tau qhia … , coj tau … tej siab … [ntawm] coob tus poj niam.”3

Cov viv ncaus, Dab Ntxwg Nyoog tau tsa ib daim paiv zoo li Khaulihos rau hauv peb lub neej niaj hnub nim no. Nws siv tej yam dab tsi? Tej phau ntawv ntxias txog kev hlub, tej yeeb yam tsis zoo hauv TV, cov poj niam uas twb muaj txiv lawm rov mus tiv tauj tej qub hluas nraug, thiab tej duab liab qab. Cov viv ncaus, peb yuav tsum xyuam xim nawb! Peb kov tsis tau Dab Ntxwg Nyoog tej xib xub hluav taws es yuav tsis kub peb nawb. Kuv paub hais tias yuav tsis muaj dab tsi uas yuav pab kom tus Vaj Ntsuj Plig Dawb Huv nrog nraim peb npaum li kev tsim txiaj!

Muaj coob tus neeg niaj hnub nim no uas xav nrhiav kom tau kev zoo siab thiab kev paub ub no sai heev hauv Internet. Peb yuav tau koob hmoov, yog hais tias peb muaj siab ntseeg thiab ua siab ntev es mus thov peb Leej Txiv Saum Ntuj Ceeb Tsheej, uas yog lub hau paus ntawm kev tseeb, qhia txog peb tej kev txhawj. Muaj ntau cov lus teb thiab tej kev cia siab uas los ntawm kev tshawb nrhiav thiab kawm vaj lug kub txhua hnub thiab kev rau siab thov Vajtswv, tab sis hauv internet twb tsis muaj lus dab tsis cog tseg li. Tus yaj saub Yakhauj tau hais lus tim khawv tias, “Vim tus Ntsuj Plig hais qhov tseeb thiab tsis dag. Yog li ntawd, nws hias txoj tej us lawv yeej muaj tiag, thiab txog tej uas lawv yeej yuav muaj tiag.”4

Thaum peb saib dab tsi, nyeem dab tsi, los sis ua dab tsi uas tsis raws li peb Leej Txiv Saum Ntuj Ceeb Tsheej tej cai, ces yuav ua rau peb tsis muaj zog. Txawm hais tias peb laus los hluas, yog tias peb saib dab tsi, nyeem dab tsi, mloog dab tsi, los xaiv ua dab tsi uas tsis raws li tus Tswv tej kev cai hauv phau Ntxiv Dag Zog rau cov Tub Hluas Ntxhais Hluas, no ces cia li muab dua pov tseg, muab cuam pov tseg, thiab kaw qhov rooj.

Daim Duab
Tus Cawm Seej nyob hauv Khexemanes

Peb yeej tsis txawj ua txhua yam, tab sis thaum peb ua txhaum ces, Thawj Tswj Hwm Packer twb tau hais tias kom peb nco ntsoov tias:

“Cov lus cog tseg hais tias: ‘Saib seb, tus uas hloov siab lees txim ntawm nws tej kev txhaum, twb tau kev zam txim rau tus ntawd, thiab kuv, tus Tswv tsis nco qab tej ntawd ntxiv lawm’ (Q&K 58:42). …

“… Txoj Kev Theej Txhoj, uas pab tau peb txhua tus, yeej tsis ua rau peb muaj caws pliav. Qhov no txhais hais tias txawm peb tau ua dab tsi los yog peb tau mus qhov twg los yog muaj xwm txheej dab tsi los, yog peb hloov siab lees txim tiag tiag, Nws cog lus tias Nws yuav theej peb lub txhoj. Thiab thaum Nws theej peb lub txhoj, tsis muaj teeb meem ntxiv. Peb feem coob nyuaj siab txhawj xeeb vim peb xav txog peb txoj kev muaj txim, es peb tsis paub ua li cas kom dim tau. Nej dim tau thaum nej los txais txoj Kev Theej Txhoj, ces tag nrho nej tej kev mob siab yuav hloov los ua tej yam zoo nkauj thiab muaj kev hlub nyob mus ib txhis.”5

Tsis hais txog kev hloov siab lees txim xwb, muaj kev pab dab tsis uas yuav pab peb ua neej huv huv thiab ua neeg tsim txiaj? Peb lub Koom Haum Me Nyuam Yaus thiab Koom Haum Ntxhais Hluas yeej paub thiab hu zaj nkauj no “Vaj Lug Kub lub Hwj Chim.”6 Peb ntxiv hais tias “Kev Thov Vajtswv lub Hwj Chim”, “Lub Tuam Tsev lub Hwj Chim,” “Kev Khi Lus lub Hwj Chim,” “Hnub Caiv lub Hwj Chim,” “Tus Yaj Saub lub Hwj Chim,” thiab “Kev Tsim Txiaj lub Hwj Chim” no puas tau?

Kuj muaj koob hmoov zoo thiab kev tiv thiav cog tseg hais txog kev hnav lub tuam tsev tej tsoos tsho. Kuv to taub lawm hais tias zoo li kuv hnav tej tsoos tsho muaj nqi uas kuv Leej Txiv Saum Ntuj Ceeb Tsheej muab rau kuv. Cov viv ncaus es, kuv ua tim khawv hais tias thaum peb ua tib zoo hnav tej tsoos tsho no zoo zoo, peb Leej Txiv Saum Ntuj Ceeb Tsheej yuav pom tias peb hlub thiab rau siab ntseeg Nws. Nov yog lub cim ntawm kev khi lus nrog Nws, thiab Nws twb cog lus hais tias, “Kuv, tus Tswv, yuav tsum ua li kuv tau cog lus thaum nej ua li kuv hais; tiam sis thaum nej tsis ua li kuv hais, nej yuav tsis tau kev cog lus.”7

Tsis ntev tas los no kuv tau nrog ib tug phooj ywg sib tham uas twb sib nrauj ob zaug vim nws ob tug txiv muaj kev quav ub no thiab tham lwm tus. Nws thiab nws peb tug me nyuam tau txom nyem heev li. Nws tau hais tias, “Kuv rau rau siab ua neej ncaj ncees. Yog vim li cas kuv raug tej kev nyuaj siab li no? Kuv tau ua yuam kev li cas lawm? Leej Txij Saum Ntuj Ceeb Tsheej xav kom kuv ua li cas? Kuv thov Vajtswv thiab nyeem vaj lug kub, pab kuv cov me nyuam, thiab mus hauv lub tuam tsev ntau zaus.”

Thaum kuv mloog cov viv ncaus hais lus, ces kuv xav hais nrov nrov tias, “Nej tab tom ua lawm! Nej twb ua txhua yam li Leej Txim Saum Ntuj Ceeb Tsheej xav thiab vam kom nej ua lawm!”

Muaj coob tus twb tau hais tias peb Leej Txiv Saum Ntuj Ceeb Tsheej tej koob hmoov uas Nws cog lus tseg “nyob deb heev lawm,” thaum uas peb muaj kev cov nyom ntau heev. Tab sis Amas tau qhia hais tias “lub neej no yog lub caij rau tib neeg … npaj mus ntsib Vajtswv.”8 Tsis yog lub sij hawm yuav tau txais tag nrho peb tej koob hmoov. Thawj Tswj Hwm Packer tau piav tias yeej tsis tau sau tseg rau hauv theem ob hais tias “‘Thiab lawv sawv daws ua neej zoo siab heev lawm.’ Qhov ntawd yuav sau tseg rau theem peb thaum uas tsis muaj teeb meem thiab kho txhua yam zoo tag lawm.”9 Tab sis, peb yuav tsum xav txog peb Leej Txiv Saum Ntuj Ceeb Tsheej tej koob hmoov uas Nws cog lus tseg txhua hnub—thiab pom hais tias “nws twb paub peb ntau ntau lawm”10 uas peb yeej pom tau txhua hnub.

Cov viv ncaus, kuv yeej tsis to taub hais tias yog vim li cas peb thiaj li muaj ntau yam kev nyuaj siab, tab sis, cov viv ncaus, kuv xav hais tias lub nqi zog zoo heev nyob mus ib txhis, yeej zoo tshaj qhov uas peb pom tau ces hnub uas yuav muaj nqi zog, ntshe peb yuav hais rau peb Leej Txiv uas muaj lub siab mos siab muag thiab hlub peb heev hais tias, ”Es peb yuav tsum ua li ntawd xwb?” Kuv ntseeg tau tias yog peb nco ntsoov thiab pom tau txhua hnub tias peb Leej Txiv Saum Ntuj Ceeb Tsheej thiab peb tus Cawm Seej hlub peb npaum li cas, ces peb yuav kam ua txhua yam uas Nkawd hais kom peb ua kom peb thiaj li tau rov qab mus rau ntawm Nkawd xub ntiag dua. Cov viv ncaus, yeej yuav tsis ua li cas, yog hais tias thaum kawg, es tej kev nyuaj siab ntawd yuav yog tej uas ua rau peb muaj sia nyob mus ib txhis thiab rau tsa nto rau hauv Vajstwv lub nceeg vaj nrog peb Leej Txiv thiab tus Cawm Seej?

Kuv hais lus tim khawv hais tias peb lub cev yog tej lub txiaj ntsim dawb ceev uas peb Leej Txiv Saum Ntuj Ceeb Tsheej muab rau peb thiab thaum peb ua peb lub neej kom dawb thiab huv thiab pom tau tej nqi zog uas peb Leej Txiv cog lus tseg, hais tias ib hnub twg peb yuav txais “tag nrho tej yam uas [peb] Leej Txiv muaj.”11 Los ntawm Yexus Khetos lub npe dawb ceev, amees.