K’ulub’ejo choq’ re li qayeechi’inb’il osob’tesihom

Ma ink’a nekereek’a eerahom chirix li komon ixq sa’ li kaxlan mu a’in? Naqanaw naq naab’al eere li moko wanjenaq ta eekok’al, toj nekek’e lee yu’am re xraab’al, xtzolb’al, ut rosob’tesinkil kok’al. Ut, k’a’jo’ nekexrahe’ xb’aan li qaChoxahil Yuwa’ ut qab’aan laa’o, lee komon ixq, xb’aan a’an!

Ma wanjenaq qahoonal chiqajunilo, jo’eb’ ajwi’ li qaraarookil saaj ixq li wankeb’ sa’ li Tzoleb’aal reheb’ li Kok’al malaj li Saaj Ixq, re xq’alunkil sa’ quq’ junaq k’uula’al toje’ xyo’la ut toril raj sa’ xnaq’ qu? Ma xqeek’a li loq’laj ut santil eek’ahom sutinb’il wi’ li choxahil musiq’ej a’an, li toje’ xtaqlaak chaq xb’aan li qaChoxahil Yuwa’ sa’ lix ch’ina junxaqalil saq ru ut ak’ xyo’ob’tesinkil? Moko naab’al ta sut wanjenaq we eek’ahom jwal sa, jwal q’un, ut jwal musiq’anb’il.

Li qajunxaqalil a’aneb’ loq’laj maatan re li qaChoxahil Yuwa’. A’aneb’ santil ochoch choq’ re li junjunq.Naq k’uulanb’ileb’ qab’aan re naq ch’ajch’ookeb’ ut saqeb’ ru, naru naq k’ulub’ejaqo chixtenq’ankil li qaChoxahil Yuwa’ re xyo’ob’tesinkil xjunxaqalileb’ lix raarookil musiq’ejil alal.

Jalam-uuch

Na’aatinak li Awa’b’ej Packer

Sa’ li roso’jik aatin k’eeb’il xb’aan li Awa’b’ej Boyd K. Packer sa’ li jolomil ch’utub’aj-ib’, maare teejultika jo’ “jun galleet ut jun li tz’ub’ ”, a’an kixch’olob’ xyaalal naq “li aqlahom re k’ihank ut xnujob’resinkil li ruchich’och’ … [a’an ] aajel ru … ut naxe’enk re chixjunil li sahil ch’oolejil. Rik’in roksinkil li wankilal a’in sa’ tiikilal, naru toonach’oq rik’in qaYuwa’ ut taqak’ul xtz’aqalil li sahil ch’oolejil, a’anaq ajwi’ li diosilal. Li wankilal re yo’ob’tesink maawa’ yal jun raqal sa’ li na’leb’ kixk’uub’ li Dios; a’an b’an a’an tz’aqal li na’leb’ ”.

Kixye ajwi’:

“Li tz’aqal rahok naraj naq taqak’uula toj chirix li sumlaak lix wotzb’al li rahok-ib’ li naxte li loq’laj wankilal a’an … [rik’in] naq ink’a’ too-ok b’ar wi’ li ratawom li tz’ejwalej naru chi numtaak sa’ qab’een. …

“… Lix sahil qach’ool ut lix taqsinkil qaloq’al nachal a’ yaal jo’ chanru naqoksi li kawil atawom a’in.”¹

Ex inraarookil komon ixq, li saaj ut li moko jwal saajex ta, xweek’a chaq x’anchalil ink’a’uxl sa’ xk’uub’ankil li waatin a’in. Jo’ kixye laj Alma, li alalb’ej: “Nawaj saʼ xchamal inchʼool … naq … teepatzʼ lix santil kʼabʼaʼ, ut rajlal yooqex chi yoʼlek ut chi tijok, re naq inkʼaʼ texʼaaleeq chi numtajenaq chiru li nekexru chixkuybʼal, … re naq texwaklesiiq saʼ rosoʼjik li kutan”.²

Moqon chik, laj Mormon kixch’olob’ ajwi’ xyaalal naq sa’ xkutankil laj Alma, laj Korihor, aj xik’ ilonel re li Kristo, “kijultikan aatin … , [ut] kixjalbʼehi kʼiila ixq”.³

Ex komon ixq, laj Satanas ak xwaqlesi chaq sa’ qakutan jun eetalil jo’ li re laj Korihor,ut yoo chi nimank xwankil. K’a’ruheb’ junjunq reheb’ lix k’anjeleb’aal? Li hu chirix li payok, li novela neke’k’utman sa’li kaxmu, sumsuukil ixq li neke’aatinak chi Internet malaj chi k’am ch’iich’ rik’in li ani xe’payok chaq reheb’ najter, ut li pornografia. Tento naq taqil qib’ chi us, ex inraarookil komon! Moko tooruuq ta chi b’atz’unk rik’in lix lochlookil tzimaj laj Satanas chi ink’a took’ate’q. Maak’a’aq chik xnimal xwankil, jo’ nawb’il inb’aan laa’in, chiru li saq ruhil na’leb’ re xk’eeb’al qak’ulub’ re naq junelik taawanq li Santil Musiq’ej qik’in.

Naab’aleb’ sa’ li ruchich’och’ anajwan neke’xsik’ xsahilaleb’ ut li junpaatil xnawomeb’ sa’ li Internet. Sa’ xjunpak’alil, osob’tesinb’ilaqo chi naab’al wi naqak’anjela li qapaab’aal ut li qak’uyum ut naqasik’ li qaChoxahil Yuwa’, li yo’leb’aal re chixjunil li yaal, choq’ re xsumenkil li qapatz’om. Naab’al li sumehom ut xk’ojob’ankil qach’ool naru te’chalq rik’in xtzolb’al li loq’laj hu wulaj wulaj ut rik’in li tijok b’aanunb’il chi anchal li qach’ool, a’b’an maak’a’eb’ li yeechi’ihom a’an sa’ li Internet. Li profeet aj Jakob kixch’olob’ xyaalal: “Li Musiqʼej naxye li yaal ut inkʼaʼ natikʼtiʼik. Joʼkan ut, naʼaatinak chirix li kʼaʼaq re ru joʼ chanru tzʼaqal wan, ut chirix li kʼaʼaq re ru joʼ chanru tzʼaqal taawanq”.⁴

Naq noko’oken sa’ rilb’al sa’ kaxmu, rilb’al ru sa’ hu, malaj xnumsinkil yalaq k’a’ru chi na’leb’ li kub’enaq ru chiru li naraj li qaChoxahil Yuwa’, a’an nokoxlub’tesi. Us ta saajo malaj tiixo, wi li naqil, li naqab’i, malaj li naqasik’ ru xb’aanunkil moko naxk’ul ta rib’ rik’in li naxpatz’ li Qaawa’ rik’in li li wan sa’ li hu Para la Fortaleza de la Juventud, chechup, chepej, chek’ut chaq, ut chetz’ap chi kaw li okeb’aal.

Jalam-uuch

Li Kolonel sa’ Getsemani

Maajun qe tz’aqal re ru, a’ut naq ak xoomaakob’k, li Awa’b’ej Packer naxjultika qe:

“Li yeechi’ihom naxye: “K’ehomaq reetal, ani xjal lix k’a’uxl chirixeb’ lix maak, a’an ajwi’ kuyb’ileb’ lix maak, ut laa’in, li Qaawa’, ink’a’ chik neke’jultiko’ we” (Tz. ut S. 58:42). …

“… Lix tojb’al rix li maak, li naru chiqaxokb’al chiqjunjunqal, ink’a’ naxk’uula reetalil li rahilal. A’an naraj naxye naq maak’a’ naxye k’a’ru xqab’aanu malaj b’ar wanjenaqo chaq malaj chanru kik’ulman k’a’ruhaq, wi naqajal qak’a’uxl chi yaal, li Kristo ak xyeechi’i naq a’an tixtoj rix li maak. Ut naq ak xb’aanu li tojok-ix, ak raqb’il xkana. Jwal naab’alo li yooko chixkutinkil qib’ yalaq b’ar, chi ra qach’ool xb’aan qamaak, ut ink’a’ naqanaw chanru too’elq aran. Tat-elq rik’in xk’ulb’al li xtojb’al rix li maak xb’aan li Kristo, ut chixjunil li rahil ch’oolej naru taajalmanq sa’ ch’ina-usil ut rahok ut li junelik q’e kutan”.⁵

Re xtz’aqob’ li jalb’a’-k’a’uxlej, k’a’ru chi tenq’ malaj k’anjeleb’aal k’eeb’il chaq qe re qatenq’ankil re tookanaaq chi ch’ajob’resinb’ilaqo ut chi saqaq ru qana’leb’? Chixjunileb’ li qasaaj sa’ li Tzoleb’aal reheb’ li Kok’al ut li Saaj ixq neke’xnaw ut neke’xb’icha li b’ich “Xmetz’ew li loq’laj hu”.⁶ Ma naru taqajal ajwi’ jo’ “Xmetz’ew li tijok”, “Xmetz’ew li santil ochoch”, “Xmetz’ew li sumwank”, “Xmetz’ew li hilob’aal kutan”, “Xmetz’ew li profeet”, ut “Xmetz’ew li saq ruhil na’leb’ ”?

Wankeb’ ajwi’ xninqal osob’tesihom ut yeechi’ihom re kolb’a’-ib’chapb’il ru rik’in chanru naqak’am chiqix li loq’laj t’ikr re li santil ochoch. Naweek’a naq chanchan naq nink’am chiwix jun reyil b’aatal li k’eeb’il chaq we xb’aan lin Choxahil Yuwa’. Ninch’olob’ xyaalal, ex inkomon ixq, naq naqayal qaq’e chiroksinkil chi chaab’il li loqlaj t’ikr, li qaYuwa’ naril jo’ jun nimla eetalil re li qarahom ut lix k’eek’ookilal qach’ool chiru. A’an jun reetalil li sumwank xqab’aanu rik’in A’an, ut yeechi’inb’il xb’aan: “Laa’in li Qaawa’, wankin chi teneb’anb’il naq nekeb’aanu li k’a’ru ninye; a’b’an naq ink’a’ nekeb’aanu li k’a’ru ninye, maajun yeechi’ihom nekek’ul”.⁷

Moko najt ta anajwan xin’aatinak rik’in jun wamiiw li ak xjachom rib’ wiib’ sut xb’aan li yib’ ru k’aytesinb’il wi’ ut li muxuk sumsu xb’aanuhom lix b’eelom. A’an ut lix oxib’ chi kok’al ke’rahob’tesiik chi naab’al. A’an kixye rik’in tz’aam, “Ink’ehom inmetz’ew re naq tiikaq ru lin yu’am. K’a’ut naq xiikil lin yalb’a-ix? K’a’ru ink’a us xinb’aanu? K’a’ tawi’ ru naraj li qaChoxahil Yuwa’ naq tinb’aanu? Nintijok ut nawil ru lin loq’laj hu, nintenq’aheb’ lin kok’al, ut rajlal nikinwulak sa’ li santil ochoch”.

Naq yookin chirab’inkil li komon ixq a’in, xwaj raj xjapb’al we chixyeeb’al: “Yookat chixb’aanunkil! Yookat chixb’aanunkil chixjunil li naraj li qaChoxahil Yuwa’ ut li naroyb’eni naq taab’aanu!”

Yaal, naab’aleb’ nekex’ye naq li osob’tesink yeechi’inb’il xb’aan li qaYuwa’ wankeb’ “chi jwal najt”, tz’aqal ajwi’ sa’ li hoonal naq numtajenaq li ch’a’ajkilal sa’ li qayu’am. A’ut laj Amulek kixk’ut naq “li yu’am a’in a’an xq’ehil re naq te’xkawresi rib’ li winq chixk’ulb’al li Dios”.⁸ Maawa’ xq’ehil re xk’ulb’al chixjunileb’ li qosob’tesihom. Li Awa’b’ej Packer kixch’olob’, “Ut chixjunileb’ ke’xnumsi xsahil xch’ooleb’ toj sa’ roso’jik, a’an maajun wa tz’iib’anb’il sa’ li xkab’il k’utb’esink (acto). Li aatin a’an nachal sa’ li roxil k’utb’esink (acto), naq neke’k’utman li muqmuukil na’leb’ ut natuqub’aman chixjunil choq’ re li us”.⁹ A’b’an, jun qilob’aal chirix li saachamil rosob’tesihom yeechi’inb’il xb’aan li qaYuwa’ tento taawanq xb’een xb’een sa’ xyi li qayu’am rajlal kutan—jo’ ajwi’ naq naqak’e reetaleb’ li “xkʼihal lix qʼunil uxtaan”¹⁰ li naqak’ul rajlal kutan.

Ex inkomon ixq, ink’a’ ninnaw k’a’ut naq wank qe k’iila yalb’a-ix, a’b’an nink’oxla naq xb’aan naq li qamaatan jwal nim, maak’a’ roso’jik, jwal sa, ut xb’aan naq naxq’ax ru qanawon, sa’ li kutan taqak’ul wi’ li maatan a’an, maare taqaj raj xyeeb’al re li qaYuwa’ aj rahonel ut aj uxtaan, “Ma yal a’an chixjunil li ki’ajman chaq?” Ninnaw naq wi chi rajlal tooruuq raj chixjultikankil ut chixk’eeb’al reetal xchamal lix rahom li qaChoxahil Yuwa’ ut li Kolonel choq’ qe, taawanq raj qach’ool chixb’aanunkil yalaq k’a’ru re toosutq’iik wi’chik sa’ rilob’aal, sutinb’ilaqo chi junelik xb’aan xrahom. Maak’a’ raj naxye, ex inraarookil komon ixq, li xoorahob’tesiik wi’ arin wi, sa’ roso’jik, li yalb’a-ix, a’an tz’aqal li nokoxk’awresi choq’ re li yu’am maak’a’ roso’jik ut re li taqenaqil loq’al sa lix awa’b’ejihom li Dios rik’in li qaYuwa’ ut laj Kolol qe.

Ninch’olob’ xyaalal naq li qajunxaqalil a’an loq’laj maatan re li qaChoxahil Yuwa’ ut naq rajlal naqak’uula chi chaab’il ut chi saq ru li qayu’am sa’ xk’ab’a’ li mayej aj tojol-ix re laj Kolol qe ut naq naqak’e chiqu li rilob’aal li maatan yeechi’inb’il xb’aan li qaYuwa’, sa’ junaq kutan taqak’ul “chixjunil li kʼaʼru re li [qaYuwaʼ]”¹¹. Sa’ xk’ab’a’ lix loq’laj k’ab’a’ li Jesukristo, amen.