Warehng Ale Kapai Tengeteng kan

Kumwail seu pokepoke lih menet? Kitail ese me tohto kumwail me saikinte nainki pein noumwail seri kin pokepoke, kakairada, kaskuhli, oh kapaiahda serihkan nan amwail mourkan. Oh mehlel Sahm Nanleng oh kiht riomwail lihakan poakohng kumwail pwehki amwail pokepoke serihkan.

Mieier nan pwungatail, iangahki serepein pwulepwul kan nan Primary oh Pwihn en Peinakapw kan me ahnekiher ansou mwahu en koledi seri pwelel men oh serio eri kin kilengdohng nan masatail kan? Kitail kin kehn uwen pepehm sarawi oh mwakelekel me mih reh me apwtehn pekederdo sang Sahm Nanleng pwehn audehla kisin wahr wet? I saikinte kehn pepehm me nohn lingan, nohn kaselel, oh nohn sarawi duwehte met.

Paliwaratail wia kisakis sarawi kei sang Samatail Nanleng. Paliwaratail wia tehnpas sarawi kei. Ma kitail apwali mwahu oh kamwakele, kitail pahn kak warehng sewese Samatail Nanleng kapikada paliwar kan ong Sapwellime seri ngehn kan.

Kilel

President Packer mahmahsen

Nan en Presiden Boyd K. Packer keimwseklahn kapahrek nan kapokon lap, me kitail kak tamanki “ehu kirahka oh ehu kis,” e kadehde me “kosonned me pid kaparaparla oh audehla sampa …e kesemwpwal …oh e wia mehn kaperenda aramas. Ma kitail kin doadoahngki manaman wet ni pwung, kitial pahn kak karaniala Samatail Nanleng oh alehdi peren mehlel unsek. Manaman en kapikada mour sohte wiahte kisehn pilahn en popohlo; pwe iei ih me wia kih en popohl.”

E doula

: “Limpoak mehlel kin kauhdi wiewia kan me pahn kahrehda ineng en tuhpene pahn wiawi lao kapwopwoud wiawiher…(oh) aramas en dehr doula nan wiewia me pahn kamwakidada ineng en paliwar. …

“… Atail nsenamwahu, peren, oh popohl nan mour wet kin peian mwoamwen atail kin apwalih ineng en paliwar uk oh kehlail pwukat.”¹

Riei lih akan, koaros me pwulepwul oh me sohte nohn pwulepwul, I ahneki pwunod ni ahi kaukaunop kapahrek wet. Ihme Alma me pwulepwulo kosoia, I anahne sang nan mohngiongi koaros … me kumwail en … eker mware sarawio, oh mwasmwasahn oh poaden kapakap, pwe kumwail en dehr ale kasongsong me kumwail sohte kak pelian … pwe kumwail en kak komourla ni imwio.”²

Mwuri, Mormon pil kadehdeh me nan mwein Alma, Korihor, me kin pelian-Krais, kin kapahrek… , oh karotongala mohngiong en … lih tohto.”³

Riei lih akan, Tepelo kapwuredohr mour en Korihor me inenen kehlail nan mwehi et. Soahng dahnge kan me e kin doadoahngki? Pwuk en soi suwed kan, prokram en TV kan, lih pwopwoud kan me pil pwurehng arail mehn mahs kan nan internet oh kilel suwed kan. Kitail anahne kanaiehng! Kitail sohte kak mwadongki nein Tepeloketieu kisinieikan ahpw sohte rongala. I ese me sohte mehkoat likin mwakelekel me kak kahrehda atail warehng kitail en ieiang Ngehn Sarawio.

Me tohto rahnwet me raprapahki ren mwadang diar nsenamwahu oh kamarain sang Internet. Ahpw, kitail pahn diar kapai laud ma kitail doadoahngki atail pwoson oh kanengama oh kohla rehn Samatail Nanleng, poahson en me mehlelo. Inou tohto me pidada peik, kapakap, wadek pwuhk sarawi, ahpw mehlel Pwuken Mormon ansou koaros, ahpw sohte soangen inou pwukat me pid Internet. Soukohp Jacob kadehde me, Pwe Ngehno kin mahsen mehlel oh sohte likamw. Pwe e kin mahsani dahme kin uhdahn mie, oh dahme pahn uhdan wiawi,”⁴

Ni atail kin iang kilekilang, wadwadek on wiewia mehkan me sohte pahrekiong kupwuren Samatail Nanleng, kitail kin luwetala, riei lih akan. Menda ma pwulepwul de mah, ma kitail kilang, wadek, rong, de pilada mehkoat me sohte pahrekiong kupwuren Kauno me sansalehr nan For the Strength of Youth, kitail kesehla, tehredi, oh ritingedi wenihmwo

Kilel

Sounkomouro ketket nan Kedsemeni

Sohte emen kitail me inenen pwung, ahpw ma kitail dipadahr, Presiden Packer katamanehng kitailehr:

… Inouo iei: Kilang, mehmen me keluhkilahr dipehkan, dipehkan lapwadahr, oh Ngehi, Kauno, sohte pahn tamataman (D&C 58:42). …

… Toamwo, me kak komourla emen emen kitail, sohte kin lipilipil. Met wehwehki me sohte lipilipil dahme kitail wiahier de ia wasa kitail miehier de dahme wiawihero, ma kitail uhdahn keluhla, E ketin inoukiher me E pahn tomwki. Oh ni E tomwkiher, miehier mahk. Me tohto kitail me wie sansas seli … milahr pahn katoutou en dihp, sohte ese ia mwoamwen eh kak pitila. Kitail kak pitla ma kitail alehda Toamw en Krais, oh mehkoaros me kaweikek kak wiahla mehkoat lingan oh kempoake oh potopot.⁵

Likin keluhla—me kitail koaros anahne—soangen elen sawas dahnge me kohieng kitailehr pwehn sewese kitail en mwakelekel oh pwung? Atail Primary oh peinakapw koaros ese oh kin koulki koulo “Scripture Power”⁶ Kitail kak katehlapehla ong “Manaman en Kapakap” “Manaman en Tehnpas Sarawi” “Manaman en Inoukan” “Manaman en Soukohp” oh “Manaman en Mwakelekel”?

Pil mie kapai laud oh inou en perehre me kin patehng atail kin likou kihda likou en nan tehnpas sarawi kan. I kin kehn me I wie pwupwuhrieng nan likou puhp kaselel ehu me Semei Nanleng ketkiong iehier. Ni atail kin nsenohki likoukihda likou pwukat ni pwung, I kadehde me Samatail mwahngi me e wia kilel en atail limpoak oh wahu ong Ih. E wia kilel en inou kan me kitail wiahiongehr Ih, oh E ketin inouki, Ngehi, Kauno, pahn kapwaiahda ma kumwail oke ahi mahsen; ahpw ma kumwail sohte oke ahi mahsen, sohte ahi inou ong kumwail.⁷

Mekeren I kosoieng emen kempoakepai me mweisangehr ah pwoud pak riau pwehki kamam oh kamwahl en ah pwoud riemeno. Liho oh nah seri silimen alehier kahpwal laud. Liho werkihla: I soangehr uwen ahi kak en momourki mour mwahu. Dahme I nohn ahnekiki kahpwal tohto? Dahme sapwung me I wiadahr? Dahme Sahm Nanleng kupwurki ien wia? I kin kapakap oh wadek nei pwuhk sarawi, sewese nei serihkan, kalap kohla ni tehnpas sarawi.

Ni ahi wie rongorong liho, I men ngil laud da oh nda, Ke wiewia me pwung! Ke wiewia mehkoars me Sahm Nanleng kupwuriki ke pahn wia!

Mehlel, me tohto kosoiahier me sapwellimen Sahmo inou en kapaikan me nohn do, ni ansou me aht mour direhkihla kahpwalkan. Ahpw Alma padahkiong nah pwutako me mour wet iei ansou en … kaunopada en tuong Koht.⁸ kaidehn ansoun ale kapai kan koaros. Presiden Packer kawehwe me ‘oh irail koaros wie momour pereperen kohkohlahte’ met sohte kin ntingdi nan keriau en mwekido. Lepin kahso wia kisehn keimwsekalahn mwekido ansou me me rir kan pwunglahr oh mehkoaros mwahuer.⁹ Ahpw, kilel en sapwellimen Sahmo inoun kapaikan anahne en mih mwohn mesetail kan rahn koaros—iangahki atail wehwehki me sapwellime limpoak mwuledek¹⁰ me kitail kin wie alahle rahn koaros.

Riei lihakan, I sehse dahme kahrehda kitail ahneki ki diren kahpwal, ahpw pein ngehi pepehm, riei lihakan, me pweinen kahpwalko inenen laud, soutuk oh potopot, kaperen oh kitail sohte kak wehwehki kahrehda ni rahn en ale pweinen doadoahko, kitail pahn men ndaiong Samatail limpoako, Pwe ihte me se anahne wia? I kamehlele me ma kitail kak rahn koaros tamataman oh kasawiada uwen loal en limpoak me Samatail Nanleng oh atail Sounkomouro sapwellimaniki ong kitail, kitail pahn men wia mehkoaros. Re pekihte Ren pwurehng pwurala nan Mwoalerail. Eri, riei lihakan, dahme wia ma kitail ale kahpwal met ma, ni imwio, kahpwalkohte me pahn kahrehiong atail warehng en ale mour soutuk oh pwekpwekdahla nan wehin Koht Rehrail?

I kadehde me paliwaratail wia kisakis sarawi kei sang Samatail Nanleng oh ma kitail momourki mour pwung oh mwakelekel oh kolokol kilel en sapwellimen Sahmo inou en kapai kan mwohtail rahn koaros, kitail pahn ehu rahn ale mehkoaros me Samatail sapwellimaniki.¹¹ Ni lengileng kapai en Sises Krais, amen.