O Le Mana o Folafolaga e Tausia
Saunia e Linda S. Reeves
Fesoasoani Lua i le Au Peresitene Aoao o le Aualofa
E tatau ona i ai se vaaiga mamao i faamanuiaga maoae ua folafola mai e lo tatou Tama e avea ma taulaiga tupito i o tatou mata i aso uma.
Tou te alolofa i lea uso? Matou te iloa o le toatele o outou e lei maua se avanoa e fanauina ai ni a outou lava fanau, ua alu o outou olaga e alolofa ai, faafailele, aoao, ma faamanuiaina fanau. Ma, e maeu le alofa o lo tatou Tama Faalelagi faapea foi i matou ia te outou uso e, ona o lena mea!
Pe ua tatou maua uma ea, faatasi ai ma outou uso talavou i le Peraimeri ma Tamaitai Talavou, se avanoa e sii ai se pepe fou i o tatou lima ma faatilotilo mai i o tatou mata? Pe ua tatou lagonaina ea le lagona mamalu ma le paia e siosiomia ai lea agaga selesitila, faatoa auina mai e lo tatou Tama Faalelagi i si ona tino itiiti faatoa foafoa, ma le mama a’ia’i? E seasea ona ou maua lea lagona e ese le manaia, ese le mu’amu’a, ma e matua faaleagaga naua.
O o tatou tino o ni meaalofa paia mai lo tatou Tama Faalelagi. O o tatou tino o ni malumalu patino. A tatou tausia ia mama ma ia le pona, e mafai ona tatou agavaa e fesoasoani i lo tatou Tama Faalelagi e foafoa ia tino o Ana fanau agaga faapelepele.
I le saunoaga faaiu a Peresitene Boyd K. Packer i le konafesi aoao, lea atonu tou te manatua “o se kuki ma se kisi,” sa ia molimau mai ai faapea “o le poloaiga ia fanafanau ma ia faatumuina le lalolagi … e taua … ma o le punavai o le fiafia o le tagata. E ala mai i le faaaogaina ma le amiotonu o lenei mana [foafoa], e mafai ai ona tatou latalata atu i lo tatou Tama i le Lagi ma maua ai se atoaga o le olioli, e oo lava i le tulaga faaleatua. O le mana e foafoa ai le ola e le o se vaega faafuaveta o le fuafuaga; o le fuafuaga lava lena.”
Na ia faaauau:
“O le alofa moni e manaomia ai le taofiofi o le faaaogaina o lea alofa uluitino seia maea ona faaipoipo, e tatalaina ai na mana paia … [e ala] i le taumamao mai tulaga e ono pulea ai e manaoga faaletino. …
“… O lo tatou fiafia i le olaga faitino, o lo tatou olioli ma le faaeaga e faalagolago i le ala tatou te tali atu ai i nei manaoga malolosi, faifai pea.”1
Ou uso pele, o e laiti ma e e le laiti tele, sa ou lagonaina se popole tele a o ou saunia lenei lauga. E pei ona sa ta’ua ai e Alema le Itiiti, “Ou te moomoo mai le vaega totonugalemu o lo’u loto … ina ia outou … valaau atu i lona suafa paia, ma mataala ma tatalo e le aunoa, ina ia le faaosoosoina outou i luga atu o le mea e mafai ona outou lavatia, … ina ia mafai ona sii a’e outou i luga i le aso mulimuli.”2
Mulimuli ane, sa molimau mai ai foi Mamona e faapea, i ona po o Alema, o Korioa, le aneti-Keriso, “na talai atu … , ma taitai ese atu ai loto o … fafine e toatele.”3
Uso e, ua sisi ae e Satani se faatosinaga faapei o Korioa i o tatou aso ma le matua faamanuiaina. O a ni ana meafaigaluega? O tusi o talafatu o le alofa faatuinanau, o ata faasolo o TV, ponokalafi, o fafine faaipoipo ua fesootai ma uo tama tuai i ala faasalalau faaagafesootai, ma ponokalafi. Ua tatau ona tatou matuai faaeteete, uso pele! E le mafai ona tatou taaalo ma ū fanafana a Satani ae lē mu ai. Ou te le iloa se mea o le a agavaa ai i tatou mo le mafutaga faifai pea o le Agaga Paia e pei o le amioatua.
O le toatele i le lalolagi i aso nei ua vaavaai atu mo mea e vave ona faamalie ai manaoga ma le vave ona iloa i luga o le Initoneti. I se faatusa atu i ai, o le a matuai faamanuiaina i tatou pe afai tatou te faatino le faatuatua ma le onosai ma o atu i lo tatou Tama Faalelagi, o le punavai o upumoni uma. Ua matuai tele naua folafolaga e o faatasi ma le usiusitai, tatalo, ma le suesue o tusitusiga paia, aemaise ai le suesue e le aunoa i le Tusi a Mamona, ae e leai ni folafolaga faapena mo le Initoneti. Ua molimau mai le perofeta o Iakopo, “Aua e tautala mai le Agaga i le upumoni ma e le pepelo. O le mea lea, e fetalai mai o ia e uiga i mea e pei ona i ai moni lava.”4
A tatou aofia ai i le matamata, faitau, pe oo i soo se mea e le tusa ai ma tulaga faatonuina a lo tatou Tama Faalelagi, e faavaivaia ai i tatou, uso pele. Pe tatou te laiti pe ua matutua, afai o mea o loo tatou tilotilo i ai, faitau, faalogologo i ai, pe filifili e fai e le tusa ai ma tulaga faatonuina o le Alii i le Mo Le Malosi o le Autalavou, ona togi lea i fafo, tape, saei, ma ato le faitotoa.
E leai se tasi o i tatou e atoatoa, ae afai foi tatou te agasala, sa faamanatu mai i tatou e Peresitene Packer e faapea:
“O le folafolaga o le: ‘Faauta, o ia o le ua salamo i ana agasala, o ia lava lea ua faamagaloina, ma o A’u, o le Alii, e le toe manatuaina lava’ (MF&F 58:42). …
“… O le Togiola, lea e mafai ai ona toe faafoi atu i tatou taitoatasi, e leai ni mailaila. O lona uiga tusa lava po o a mea sa tatou fai, pe o fea foi sa tatou i ai, pe na faapefea ona tupu se mea, afai lava tatou te salamo moni, ua Ia folafola mai o le a Ia totogiina. Ma ina ua Ia totogiina, ua Ia taulimaina lena mataupu. E matua toatele naua i tatou o e o loo fesasaai solo … i lagona o le tausalaina, e le o matua malamalama pe faapefea ona sosola ese mai. E te sola ese e ala i le taliaina o le Togiola a Keriso, ma o mea uma sa tiga ai le loto ua mafai ona suia i le matagofie ma le alofa ma le faavavau.”5
E ese mai le salamo, o a ni fesoasoani po o meafaigaluega ua tuuina mai e fesoasoani ia tatou tumau ai i le mama ma le amioatua? Ua iloa uma lava e a tatou fanau Peraimeri ma tamaitai talavou usu le pese “Mana o Tusi Paia.”6 Pe mafai ona tatou faalauteleina i le “Mana o le Tatalo,” “Mana o le Malumalu,” “Mana o Feagaiga,” “Mana o le Perofeta,” ma le “Mana o le Amioatua”?
E i ai foi faamanuiaga sili ma folafolaga e puipuia ai e o faatasi ma le ofuina faalelei o o tatou ofusa o le malumalu. Ua oo ina ou lagonaina ua ou ofuina faafaatusa ia ofu tautupu na tuuina mai ia te au e lo’u Tama Faalelagi. Ou te molimau atu, uso e, a tatou taumafai e ofuina faalelei le ofusa, ou te molimau atu e silafia ai e lo tatou Tama o se faailoga tele lea o lo tatou alolofa ma le tuuto atu ia te Ia. O se faailoga o feagaiga ua uma ona tatou osia ma Ia, ma ua Ia folafola mai, “O A’u, o le Alii e noatia au pe a outou faia mea Ou te fai atu ai, ae a outou le faia mea Ou te fai atu ai, e leai se folafolaga mo outou.”7
Talu ai nei sa ou talanoa ai i se uo ua leva, o le ua faalua ona tatala ana faaipoipoga ona o vaisu ma le le faamaoni o ana tane. Sa matuai mafatia o ia ma lana fanau e toatolu. Sa aioi mai o ia, “Sa ou matua taumafai malosi e ola amiotonu. Aisea ua matua tele ai o’u tofotofoga? O le a sa’u mea o sese ona fai? O le a le mea e finagalo le Tama Faalelagi ou te fai? Ou te tatalo ma faitau a’u tusitusiga paia, fesoasoani i la’u fanau, alu soo i le malumalu.”
A o ou faalogologo atu i lenei uso, sa ou fia faataio atu i ai, “O lena e te faia! O loo e faia mea uma e finagalo ma faamoemoe le Tama Faalelagi e te faia!”
E malamalama lelei, e toatele ua fai mai o faamanuiaga e folafola mai e lo tatou Tama e “matuai mamao lava,” aemaise pe a matua tumu o tatou olaga i luitai. Ae na aoao e Amuleka e faapea “o le olaga lenei … e saunia ai e fetaiai ma le Atua.”8 E le o se taimi e mauaina ai o tatou faamanuiaga uma. Na faamalamalama mai e Peresitene Packer e faapea “Ona latou ola fiafia uma ai lea’ e le o se vaega o le olaga faitino.”9 Peitai, e tatau ona i ai se vaaiga mamao i faamanuiaga maoae ua folafola mai e lo tatou Tama e avea ma taulaiga tupito i o tatou mata i aso uma—faapea foi ma se iloa “o le tele naua o lona alofa mutimutivale”10 lea tatou te maua i aso taitasi.
Uso e, ou te le iloa pe aisea ua tele ai o tatou tofotofoga, ae o lo’u lava lagona patino, uso e, e maoae le taui, e matuai faavavau ma tumau, e matua tumu i le olioli ma e le oo i ai lo tatou malamalama pe a oo i lena aso o le taui, atonu tatou te fia fai atu i lo tatou Tama alofa ma alofa mutimutivale, “Pe sa na o le pau lava lena o le mea sa manaomia?” Ou te talitonu afai e mafai ona tatou manatuaina i aso taitasi ma iloa le loloto o le alofa o lo tatou Tama Faalelagi ma lo tatou Faaola mo i tatou, o le a tatou naunau e faia soo se mea ina ia tatou toe foi atu ai i lo La’ua afioaga, ma siomia i lo La alolofa e faavavau. O le a le mea e taua, uso pele, o mea tatou te mafatia ai iinei, i le iuga, o na tofotofoga o mea tonu lava na o le a faaagavaaina ai i tatou mo le ola e faavavau ma le faaeaga i le malo o le Atua faatasi ma lo tatou Tama ma le Faaola?
Ou te molimau atu o o tatou tino o ni meaalofa paia mai lo tatou Tama Faalelagi ma a tatou tausisia le le pona ma le mama o o tatou olaga ma tausia i o tatou luma se vaaiga mamao i aso taitasi i taui na folafola mai e lo tatou Tama, o le a i ai se aso tatou te maua ai “mea uma ua i ai i lo [tatou] Tama.”11 I le suafa paia o Iesu Keriso, amene.