2010–2019
Givim Hat Blong Yumi Long God
Oktoba 2015


Givim Hat Blong Yumi Long God

Taem yumi letem yumi wan long Spirit, yumi lanem wei blong God mo filim tingting blong Hem.

Elda Dalin H. Oaks, long Epril jeneral konfrens, i bin tokbaot nid “blong jenisim personal laef blong yumi.”1 Mi talem se jenis ia i stat wetem wan hat we i jenis—nomata long ol eksperiens o ples we yu bon long hem.

Mi blong Saot pat blong Yunaeted Stet, mo long taem we mi yangfala ol toktok blong olfala hym blong Protestan i bin tijim mi tru hat blong wan disaepol—wan we i bin jenis. Tingting long ol toktok blong singsing ia we mi laekem:

!Mekem wanem yu wantem Lod!

!Mekem wanem yu wantem Lod!

Yu yu Man blong mekem graonpot.

Mi mi graon.

Yusum mi mo mekem mi

Olsem we yu wantem,

Taem mi stap wet

Yu talem tingting blong Yu.2

?Olsem wanem nao yumi, wan niu, bisi, pipol blong kompit, i save stap kwaet mo wet? Olsem wanem nao yumi save mekem wei blong Lod i wei blong yumi? Mi biliv se yumi stat taem yumi lanem samting long Hem mo prea from andastaning. Taem tras blong yumi long Hem i gro, yumi openem hat blong yumi, lukaotem blong mekem wanem we Hem i wantem, mo wet from ol ansa we bae i helpem yumi blong harem save samting.

Jenis long hat blong mi wan i bin stat taem mi gat 12 yia, mi stat blong lukaotem God. Nomata we mi save long Prea blong Lod,3 mi no rili save hao blong prea. Mi tingbaot se mi nildaon, long tingting se bae mi filim lav blong Hem, mo askem, “?Wehem Yu, Papa long Heven? Mi save se yu stap samples antap ia, be wea? Truaot long yangfala taem blong mi, mi bin askem. Mi bin kasem wan smol saen se Jisas Kraes i tru, be Papa long Heven i bin letem mi blong lukaotem mo wet from blong 10 yia,

Long 1970, taem ol misinari oli tijim mi abaot Plan blong fasin blong sevem man mo abaot Atonmen blong Sevya, mi stop blong wet ia nao. Mi akseptem ol tru tok ia mo mi bin baptaes.

Folem save ia long bigfala sore, mo paoa blong Lod, hasban blong mi, ol pikinini, mo mi jusum famli moto ia: “Evri samting bae i wokaot.” ?Be olsem wanem nao yumi save talem ol toktok ia long wanwan long yumi taem ol trabol oli kam mo ol ansa oli no rere blong kam yet.

Taem we 21 yia gel blong mifala, Jojia, i stap long hospital from kondisen blong hem i nogud tumas folem wan aksiden long baeskel, famle blong mi i talem, “Evri samting bae i wokaot” Taem mi flae mi aot long misin long Brasil i go long Indianapolis, Indiana, blong stap wetem hem, mi biliv long famle moto ia. Be afta, naesfala gel blong mifala i ded i go long spirit wol wan aoa bifo plen blong mi i foldaon. Wetem bigfala sore mo sapraes we i ron tru long famle olsem wan taed, ?olsem wanem nao bae mifala i gohed blong lukluk mifala mo stil talem, “?Evri samting bae i wokaot?”

Folem ded blong Jojia long wol ia, ol filing blong mifala i harem nogud, mifala i traehad, mo kasem tedei mifala i gat ol taem blong sore, be mifala i hang long save ia se i no gat wan we i rili ded. Nomata long bigfala sore ia taem bodi blong Jojia i nomo wok, mifala i gat fet se hem i stap gohed blong laef long spirit, mo mifala i biliv se bae mifala i laef wetem hem long laef we i no save finis, sapos mifala i stap folem ol tempol kavenan blong mifala. Fet long Ridima blong yumi mo laef bakegen long ded blong Hem, fet long prishud paoa blong Hem, mo fet long ol siling we i no save finis, bae yumi talem moto blong yumi wetem strong tingting.

Presiden Godon B. Hinkli i talem: “Sapos yu traem bes, bae evri samting i wokaot. Putum hop blong yu long God … Lod bae i no save livim yu.”4

Famle moto blong mifala i no talem se, “Evri samting bae i wokaot naoia.” Hem i tokbaot hop long risal we i no save finis—i no rili minim ol risal blong naoia. Skripja i talem. “Luklukgud wetem strong tingting, prea oltaem, mo stap biliv, mo evri samting bambae oli wok tugeta blong gud blong yufala.”5 Hemia i no minim se evri samting i gud, be blong olgeta we oli no flas mo stap fetful—evri samting we i gud mo i nogud—oli wok together blong gud, mo folem taem blong Lod. Yumi wet long Hem, samtaem olsem Job taem i stap safa, hem i save se God “i mekem man i karekil: hem i stap mekem man i gud bakegen tu long trabol.”6 Wan hat we i no flas i akseptem hadtaem ia mo i wet long taem blong hiling mo kam gud bakegen fulwan.

Taem yumi givim yumiwan long Spirit, yumi lanem ol wei blong God mo filim tingting blong Hem. Long taem blong sakramen, we mi singaotem hat blong sabat, mi faenem se afta long prea blong fogivnes blong ol sin, bae i help blong askem Papa long Heven, “Papa, i gat sam moa i stap?” Taem we yumi no flas mo stap kwaet, tingting blong yumi i save tekem yumi go long samting moa we yumi nid blong jenisim—samting we i stap mekem yumi no save kasem help long saed blong spirit o hiling.

Eksampol: ating mi haedem gud kros blong mi long wan man. Taem mi askem sapos i gat moa blong konfes, sikret ia i kam klia gud long tingting blong mi. Tabu Spirit i talem stret long mi long smol voes, “Yu bin ones blong askem sapos i bin gat moa, mo hemia nao ansa. Kros blong yu ia i daonem progres blong yu mo i mekem damej long paoa blong yu blong gat gud rilesensip. Yu lego hemia i go.” Oh, hem i hadwok tumas—yumi bae filim se kros i stret nomo—be blong folem wei blong Lod hemi wan rod ia nomo we i go long hapines we i stap longtaem.

Wetem taem mo sloslo, yumi kasem paoa mo daereksen—we maet i lidim yumi blong go long tempol oltaem, o blong stadi dip moa long Atonmen blong Sevya, o blong toktok wetem wan fren, wan bisop, wan profesenol kaonsela, o wan dokta. Hat blong yumi i hil taem yumi stat blong folem mo wosipim God.

Tru wosip i stat taem hat blong yumi i stret long fes blong Papa mo Pikinini. ?Wanem nao kondisen blong hat blong yumi tedei? Wanem i defren i we, blong gat wan hat we i hil mo i stap fetful, yumi mas fastaem letem i brok long fes blong Lod. “Mo bae yufala i mekem olsem wan sakrifaes long mi, wan hat we i fulap wetem sore mo wan spirit we i wantem blong sakem sin,”7 Lod i talemaot. Risal blong sakrifaesem hat blong yumi, o tingting, i go long Lod i we yumi kasem help long saed blong spirit we yumi nidim.

Wetem andastaning long bigfala lav mo sore blong Lod, yumi faenem se ol strong hat blong yumi oli stat blong brokbrok wetem tangkyu. Afta yumi we yumi go from Hem, yumi tekem nem blong Wan Stret Pikinini ia nomo blong God long yumi. Long taem yumi stap lukaotem mo kasem help blong hem, yumi kasem niu hop mo niu daereksen tru long Tabu Spirit.

Mi bin traehad blong stopem fasin ia blong wantem se ol samting oli go olsem we mi wantem, mo long en, mi kam blong luksave se, wei blong mi i no inaf mo i no gud inaf long wei blong Jisas Kraes. “Wei blong “Hem i lid i go long hapines long laef ia mo laef we i no save finis long wol we i stap kam.”8?Yumi save lavem Jisas Kraes mo wei blong Hem moa bitim we yumi lavem yumiwan mo ol program blong yumi?

Sam bae oli ting se olgeta i bin foldaon plante taem mo filim wik tumas blong jenisim ol rabis fasin o tingting blong wol we hat i wantem. Be, olsem Isrel we i mekem kavenan, yumi stap traem mo traem yumiwan blong jenis. Sapos yumi askem tru long God, Hem i tekem yumi olsem we yumi stap—mo mekem yumi kam moa bitim we yumi save tingbaot. Wan popula tija blong relijin Robet L. Milet i raet abaot “wan helti wei blong kam antap,” we i mas balens wetem “stret save long spirit, se tru long Jisas Kraes, bae yumi mekem i kamtru.”9 Wetem haremsave ia, yumi save ones blong talem long Papa long Heven se:

Mi putum evri hop blong mi long kea blong yu,

Mo mi save se yu lavem mi,

Bae mi mekem tingting blong yu, wetem wan tru hat:

Bae mi kam huia yu wantem mi blong kam.10

Taem yumi givim hat blong yumi we i wantem sakem sin long Jisas Kraes, Hem i akseptem ofring blong yumi. Hem i tekem yumi i gobak. Nomata wanem yumi lusum, ol kil blong yumi, mo man we i no wantem yumi, bigfala gladhat mo hiling blong Hem i strong bitim evriwan. Putum yok blong Sevya, mo talem wetem tras: “ Evri samting bae i wokaot.” Long nem long Jisas Kraes, Amen.

Ol Not

  1. Dallin H. Oaks, “The Parable of the Sower,” Liahona,  May 2015, 32.

  2. “Have Thine Own Way, Lord,” The Cokesbury Worship Hymnal, no. 72.

  3. Luk long Matiu 6:9–13.

  4. Gordon B. Hinckley, Jodan Yuta Saot eria konfrens, prishud sesen, 1 Maj 1997; luk tu long “Excerpts from Addresses of President Gordon B. Hinckley,” Ensign, Okt. 2000, 73.

  5. Luk tu long Doctrine and Covenants 90:24.

  6. Job 5:18.

  7. 3 Nifae 9:20.

  8. “Kraes we I Stap Laef: Testemoni blong Olgeta Aposol,” Liahona,, Epr. 2000, 3; oli ademap italik.

  9. Robert L. Millet, After All We Can Do: Grace Works (2003), 133.

  10. “Talem se Mi Redi blong Go Masta,” STSP, pej 46.