Solia na Yaloda Vua na Kalou

Ena vosa nei Elder Dallin H. Oaks, ena koniferedi raraba ni Epereli, a vosa ena kena gadrevi meda “vakavoutaka noda bula yadua.”¹ Au nanuma ni veisau ni bula yadua oqo e tekivu ena veisau ni yalo—se cava ga na veika o sotava ena nomu bula se vanua o sucu kina.

Au gole mai na Loma ni Ceva kei Amerika, ena gauna au se gone kina a vakavulici au na serenilotu makawa ni Protestant baleta na yalo vakatisaipeli dina—e dua sa veisau. Oqo na qaqana, e talei vei au:

Eda na soli keda tikoga vakacava ena gauna nikua, ni da sa osooso, ka tamata dau veisisivi? Eda na cakava vakacava me noda sala na sala ni Turaga? Au vakabauta meda na tekivu ena noda vulici Koya ka masu meda kila vinaka cake. Ni tubu cake tiko noda nuitaki Koya, eda dolava na yaloda, vakasaqara meda cakava na Nona lewa, ka waraka na kena isau meda na kila vinaka cake.

A tekivu na veisau ni yaloqu niu se yabaki 12, kau sa tekivu vakasaqara na Kalou. Au a kila ga na Masu ni Turaga,³ ia au a sega sara ni kila meu masu vakacava. Au nanuma noqu dau tekiduru, ka nuitaka niu na vakila na Nona loloma, ka taroga, “Evei oi Kemuni, Tamaqu Vakalomalagi? Au kila Ko ni tiko ena dua na vanua, ia evei?” Ena veigauna taucoko ni noqu goneyalewa, au vakatataro voli. Au a raica eso na dina baleti Jisu Karisito, ia a vakatara na Tamada Vakalomalagi meu vakasaqaqara ka wawa me 10 na yabaki.

Ena 1970, ni rau sa vakavulica vei au na daukaulotu na ituvatuva ni veivakabulai nei Tamada kei na Veisorovaki ni iVakabula, sa mai oti na noqu wawa. Au sa ciqoma na dina oqo ka papitaiso sara.

Yavutaki ena noqu kila na loloma kei na kaukauwa ni Turaga, keitou sa mai digitaka kei watiqu kei iratou na gone, me neitou ibole ni matavuvale oqo: “Ena vinaka taucoko mai.” Ia me keitou kaya tiko vakacava oqo ni sa yaco tikoga mai na veileqa lelevu ka sega na kena iwali ena gauna o ya?

Ena gauna sa curu bibi kina i valenibula o Georgia, na luvei keirau yalewa mamarau, bula kilikili ka yabaki 21, ena coqa ni basikeli, e kaya na noqu matavuvale, “Ena vinaka taucoko mai.” Niu vuka yani vakatotolo mai na ilesilesi vakalotu mai Brazil ki Indianapolis, e Indiana, meu laki raici koya, au sa ququmi toka ga ena neitou ibole ni matavuvale. Ia, a mani takali yani na luvei keirau totoka oqo ki na vuravura ni yalo ni vo toka ga e vica na auwa me ro yani na noqu waqavuka. Ni sa curumi keitou vaka na livaliva na rarawa kei na kidacala, me na keitou veiraici rawa vakacava ka kaya tikoga “Ena vinaka taucoko mai”?

Ni sa mai takali vakayago o Georgia, sa bibi sara na lomai keitou, ka keitou lomaleqa, me yacova mai nikua keitou dau yalorarawa ena so na gauna, ia keitou ququmi tikoga ena kila o ya ni sega ni dua e mate dina. Se cava sara na neitou lomabibi ni sa mai takali na yagoi Georgia, keitou sa vakabauta tu ni sa bula tiko na yalona, ka keitou vakabauta keitou na laki bula tawamudu vata tale kevaka keitou vakamuria tiko na neitou veiyalayalati ni valetabu. Na vakabauta na noda Dauveivueti kei na Nona Tucake Tale, na vakabauta Nona kaukauwa vakamatabete, kei na vakabauta ena veivauci tawamudu keitou rawa ni tukuna tiko na neitou ibole ena kila e dina.

E kaya o Peresitedi Gordon B. Hinckley: “Ni ko cakava nomu vinaka taucoko, ena vinaka taucoko mai. Mo nuitaka ga na Kalou. … Ena sega ni biuti iko na Turaga.”⁴

E sega ni kaya na neitou ibole ni matavuvale, “Ena vinaka taucoko mai ena gauna oqo.” E tukuna tiko na neitou vakanuinui ena veika tawamudu sa na yaco mai—sega sara ni gadrevi walega oqo. Na ivolanikalou e kaya, “Dou vakasaqaqara vagumatua ka daumasu tikoga ena vakabauta, ia kevaka dou sa caka dodonu ka muria na veiyalayalati dou sa veiyalayalati kina vakai kemudou, ena rawa vakavinaka na veika kece e baleti kemudou.”⁵ Oqo e sega ni kaya na veika kecega sa vinaka, ia vei ira sa yalomalumalumu ka yalodina tiko—na veika kece e vinaka ka ca—era na cakacaka vata me yaco na vinaka, ia ena Nona gauna ga na Turaga. Eda na waraki Koya, me vakataki Jope ena nona rarawa, ni kila tiko na Kalou ena “vakararawataka, a sa viviga talega: sa vakamavoataka, a sa vakabula talega ena ligana.”⁶ Na yalomalumalumu ga ena ciqoma na veivakatovolei ka waraka na gauna me mavo kina ka vakataucokotaki tale.

Ni da dolavi keda vua na Yalotabu, eda na vulica na sala ni Kalou ka vakila na Nona lewa. Ena gauna ni sakaramede, kau vakatoka me uto ni Siga ni Vakacecegu, au raica ni oti noqu masu ni kere veivosoti ni ivalavala ca, au sa vakasalataki meu kerea vua na Tamada Vakalomalagi, “Tamaqu, e se vo tale eso?” Ni da sa soli keda vakadua tu, ena rawa ni dusimaki noda vakasama ki na vuqa tale na ka eda gadreva meda veisautaka—na veika e yalana noda igu meda ciqoma kina na veidusimaki vakayalo se veivakabulai ka vukei.

Me vakataka, noqu rairai maroroya lo vinaka toka noqu cata tiko e dua na tamata. Niu taroga ke se vo tiko eso tale na ka me vakatusai, na “ka vuni” o ya ena votu vinaka mai na noqu vakasama. Na ka dina, ena vosamalua mai na Yalo Tabu, “Ko a taroga dina se vo tale eso, ia sai koya oqo. Na nomu yaloca ena vakalailaitaka nomu torocake, ka vakacacana nomu igu mo veimaliwai kina vakavinaka. Sa rawa mo laiva oqo.” Ia sa ka dredre dina—ena rairai donu beka ni da cata e dua—ia ni da soli keda ki na sala ni Turaga sai koya ga na sala ki na marau tawayalani.

Ni toso na gauna kei na ituvaki, eda sa ciqoma na Nona kaukauwa ni loloma soliwale kei na veidusimaki—ka rairai liutaki keda vakalevu ki valetabu se vulica vakatitobu na Veisorovaki ni iVakabula, se veivosaki kei na dua na itokani, bisopi, dua na daunivakasala vuku, se dua na vuniwai. Na kena mavo na yaloda ena tekivu ena noda soli keda ka sokalou vua na Kalou.

Ena tekivu na sokalou dina ni sa tudonu na yaloda vua na Tamada kei na Luvena. E vakacava tu na ituvaki ni yaloda nikua? Ni veidutaitaki vata, ni gadrevi me vakabulai ka me dina na yalo, meda na vakatara taumada me ramusu e mata ni Turaga. “Ia mo dou cabora ga vei au na yalo sa raramusumusu kei na yalo sa bibivoro,”⁷ a vakaraitaka na Turaga. Na ivatuka ni noda cabora na yaloda, se lomada, vua na Turaga eda na ciqoma na veidusimaki vakayalo eda gadreva tu.

Ni tubu tiko noda kila vinaka na loloma soli wale ka veivueti ni Turaga, eda na raica ni lewa ga ni yaloda ena tekivu me ramusu ka kavoro ena vakavinavinaka. Eda sa qai gole yani Vua, soli keda meda vakaivua vata kei na Luvena Duabau Ga na Kalou. Ni sa ramusu na yaloda ena sasaga kei na vakaivua, eda sa ciqoma na inuinui vou kei na veidusimaki vou mai vua na Yalo Tabu.

Au dau saga vakaukauwa meu tagutuva tani na gagadre vakavuravura meu muria ga na noqu sala, ia au dau qai kila ni noqu sala e takiveiyaga, yala koso, ka toro sobu ni vakatauvatani ki na sala i Jisu Karisito. “E dodonu vinaka na Nona sala ka na laki cava ena marau ni bula oqo, kei na bula tawamudu ena bula sa bera mai.”⁸ E rawa beka meda lomani Jisu Karisito kei na Nona sala vakalevu cake ka segai oi keda kei na noda sasaga?

Eso era rairai nanuma ni ra sa druka vakavuqa tikoga ka ra sa malumalumu mera na veisautaka nodra caka cala se gagadre vakavuravura ni yalodra. Ia, ni da sa Isireli ni veiyalayalati, eda na sega walega ni tovolea se tovolea ga vakataki keda meda veisau. Kevaka eda na vakamamasu vakaidina vua na Kalou, ena ciqomi keda ga e kea—ka vakatorocaketaki keda ena sala eda a sega vakadua ni namaka. A vola e dua na daunikila vakalotu rogolevu o Robert L. Millet ni “gagadre bula meda vakatorocaketaki,” ka kovuti vata kei na “veivakadeitaki vakayalo vata kei Jisu Karisito eda na rawata vakaidina.”⁹ Ena noda sa kila oqo, eda sa rawa ni kaya vakaidina vua na Tamada Vakalomalagi:

Ni da cabora na yaloda sa raramusumusu vei Jisu Karisito, ena ciqoma na noda vakacacabo o Koya. Ena tauri keda lesu. Se cava sara na luluqa, mavoa, kei na cati eda sa sotava mai, sa ka cecere duadua ki na ka kecega na Nona loloma soliwale kei na veivakabulai. Ni da sa vakaivuataki vakaidina vua na iVakabula, eda sa doudou meda kaya, “Ena vinaka taucoko mai.” Ena yaca i Jisu Karisito, emeni.