Pagsungka sang Aton Mga Tagipusuon sa Dios

Si Elder Dallin H. Oaks, sang Abril nga kabilogan nga konperensya, naghambal sang parte sa ginakinahanglan nga “magbag-o sang aton kaugalingon nga mga kabuhi.”¹ Ginapanugyan ko nga ang kaugalingon nga pagbag-o nagasugod sa pagbag-o sang tagipusuon—wala sapayan sa mga inagihan sang kabuhi ukon diin ka man nabun-ag.

Naghalin ako sa Ubos Bagatnan sang United States, kag sa panahon sang akon pagkabatan-on ang mga tinaga sang daan nga mga himno Protestante nagtudlo sa akon parte sa tunay nga tagipusuon sang isa ka disipulo—isa nga nabag-o. Talupangda ining mga pulong sang musika, nga tuman ko nga naluyagan:

Paano kita, isa ka moderno, masako, kag makumpetensya nga katawhan, mangin katawhan nga nagahulat sa pagbuot sang Dios? Paano naton buhaton nga ang mga pagginawi sang Ginuo mga pagginawi naton? Nagapati ako nga kita nagasugod paagi sa pagtuon parte sa Iya kag nagapangamuyo para sa paghangop. Samtang ang aton pagsalig sa Iya nagadaku, ginabuksan naton ang aton mga tagipusuon, nagatinguha kita sa pagtuman sang Iya kabubut-on, kag nagahulat sa mga sabat nga makabulig sa aton nga makahangop.

Ang pagbag-o sang akon tagipusuon nagsugod sang ako, bilang isa ka 12-anyos nga bata, nagsugod sa pagpangita sa Dios. Luwas sa pagpangadi sang Amay Namon,³ wala ko mabal-an kon paano magpangamuyo. Madumdoman ko nga nagaluhod, nagalaum nga mabatyagan ko ang Iya pagpalangga, kag nagapamangkot, “Sa diin ka na, Langitnon nga Amay? Nabal-an ko nga ara Ikaw sa sagwa, apang diin?” Ini nga pagpamangkot nagpadayon sa mga tuig sang akon pagkatinedyer. May ara ako sang malip-ot nga mga inagihan nga si JesuCristo tunay, apang ang Langitnon nga Amay, suno sa Iya kaalam, nagtugot nga magpangita kag maghulat ako sang napulo ka tuig.

Sang 1970, sang gintudloan ako sang mga misyonero parte sa plano sang kaluwasan sang Amay kag sang Pagpasag-uli sang Manluluwas, ang paghulat ko natapos. Ginbaton ko ining mga kamatuoran kag nagpabunyag.

Suno sa sining ihibalo parte sa kalooy kag gahum sang Ginuo, ang bana ko, mga anak, kag ako nagpili sining motto para sa amon pamilya: “Ining tanan sa ulihi mangin maayo.” Apang paano naton mahambal ining mga pulong kon grabe nga mga problema ang nagaabot kag wala sang sabat nga ara sa gilayon?

Sang ang amon palangga, takos, 21-anyos nga anak nga babayi, si Georgia, naospital nga ara sa grabe nga kahimtangan pagkatapos sang aksidente sa bisekleta, ang amon pamilya nagsiling, “Ining tanan sa ulihi mangin maayo.” Samtang ako nagsakay sa eroplano halin sa amon mission sa Brazil padulong sa Indianapolis, Indiana, USA agud updan siya, nagsalig ako sa amon motto. Apang, ang matahom namon nga dalaga nagtaliwan padulong sa kalibutan sang espiritu pila lang ka oras antes ang ginsakyan ko nga eroplano naghugpa. May kasubo kag kakugmat nga nagdalagan sa amon pamilya kasubong sang koryente, paano kami magtulokay sa kada isa kag sa gihapon magsiling, “Ining tanan sa ulihi mangin maayo”?

Masunod sa mortal nga kamatayon ni Georgia, tuman ka mahapdi ang amon nabatyagan, nabudlayan kami, kag bisan karon may ara kami sang mga higayon sang labing kasubo, apang kami nagapabilin sa paghangop nga wala sang bisan sin-o nga napatay gid sa katunayan. Wala sapayan sa amon pag-antus sang ang lawas ni Georgia nag-untat sa paggana, may pagtuo kami nga siya nagpadayon nga buhi bilang isa ka espiritu, kag nagatuo kami nga makaupod namon siya liwat sa walay katubtuban kon kami magtuman sa amon mga kasugtanan sa templo. Ang pagtuo sa aton Manunubos kag sa Iya Pagkabanhaw, pagtuo sa gahum sang Iya priesthood, kag pagtuo sa walay katapusan nga mga paghugpong nagatugot sa amon nga maghambal sang amon motto nga may pagpamatuod.

Si Presidente Gordon B. Hinckley nagsiling: “Kon himoon ninyo ang inyo pinakalabing maayo, ini tanan sa ulihi mangin maayo. Magsalig sa Dios. … Ang Ginuo indi magsikway sa aton.”⁴

Ang motto sang amon pamilya wala magsiling, “Ini tanan mangin maayo karon.” Ini nagahambal sang amon paglaum sa walay katubtuban nga bunga—indi bangud sang mga resulta karon. Ang Kasulatan nagasiling, “Magsayasat sing maukod, magpangamuyo sing dalayon, kag mangin matinuohon, kag ang tanan nga mga butang ululupod nga magbuhat para sa inyo kaayohan.”⁵  Ini wala nagakahulogan ang tanan nga butang mga maayo, apang sa mapainumoron kag matinuohon, ang mga butang—angay maayo kag malain—magbuhat sing ululupod para sa kaayohan, kag kon san-o suno sa Ginuo. Maglaum sa Iya, kon kaisa subong kay Job sa iya pag-antus, nakabalo nga ang Dios “nagapasakit, kag nagabulong: siya nagapilas, kag ang iya mga kamot nagapapali.”⁶ Ang kubos nga tagipusuon nagabaton sang pagtilaw kag nagahulat sa sinang tion sang pagpapali kag pagpa-ayo nga mag-abot.

Kon kita nagahanda sang aton mga kaugalingon nga magbaton sa Balaan nga Espiritu, matun-an naton ang banas sang Dios kag mabatyagan ang Iya pagbuot. Sa tion sang sacramento, nga ginatawag ko nga tagipusuon sang Adlaw nga Inugpahuway, natukiban ko nga pagkatapos sang akon pagpangamuyo para sa kapatawaran sang mga sala, makapanulin sa akon ang magpamangkot sa Langitnon nga Amay, “Amay, may ara pa bala sang dugang?” Kon kita mapainumuron kag maligdong, ang aton mga hunahuna sarang matuytoyan sa isa pa ka dugang nga dapat naton bag-ohon—isa ka butang nga nagapugong sa aton ikasarang nga magbaton sang espirituhanon nga paggiya ukon bisan sang pag-ayo kag tabang.

Halimbawa, basi may ginahuptan ako sing madugay nga kaugot sa isa ka tawo. Sang nagpamangkot ako kon may ara pa sang dugang nga dapat ikonpesar, ina nga “sekreto” maathag nga nag-abot sa akon isip. Sa katunayan, ang Balaan nga Espiritu nagahutik, “Matampad ikaw nga nagpamangkot kon may ara pa sang dugang, kag ari ini. Ang kaugot mo nagabuhin sang imo progreso kag nagasamad sa imo ikasarang nga makaangkon sang maayo nga mga relasyon. Sarang mo buy-an ini.” Oh, ini mabudlay buhaton—basi kita nagabatyag nga ang aton kaugot may kinamatarong—apang ang magsungka sa gawi sang Ginuo amo lang ang paagi sa nagapadayon nga kalipayan.

Sa pagligad sang panahon kag sa inanay, mabaton naton ang maalwan Niya nga kabakod kag direksyon—siguro nagatuytoy sa aton nga masami magkadto sa templo ukon magtuon sang mas madalom parte sa Pagpasag-uli sang Manluluwas, ukon magkonsulta sa isa ka abyan, isa ka bishop, propesyonal nga manuglaygay, ukon bisan pa sa isa ka doktor. Ang pag-ayo sang aton tagipusuon nagasugod kon kita magpadumala kag magsimba sa Dios.

Ang matuod nga pagsimba nagasugod kon ang mga tagipusuon naton husto sa atubang sang Amay kag Anak. Ano ang kondisyon sang aton tagipusuon karon nga adlaw? Kabaliskaran, agud nga makaangkon sang nag-ayo kag matinuohon nga tagipusuon, dapat anay naton nga buk-on ini sa atubang sang Ginuo. “Magadulot kamo bilang isa ka halad sa akon sang isa ka nagapakubos nga tagipusuon kag mahinulsulon nga espiritu,”⁷ ang Ginuo nagapahayag. Ang resulta sang paghalad sang aton tagipusuon, ukon sang aton pagbuot, sa Ginuo amo nga kita makabaton sang espirituhanon nga paggiya nga kinahanglan naton.

Upod ang nagalambo nga paghangop parte sa grasya kag kalooy sang Ginuo, masapwan naton nga ang aton nagabuot-sa-kaugalingon nga mga tagipusuon nagasugod sa paglitik kag mabuka sa pagpasalamat. Dayon kita nagadab-ot sa Iya, nahidlaw nga mag-angot sang aton mga kaugalingon sa Bugtong nga Anak sang Dios. Sa aton nagapakubos nga pagdab-ot kag pag-angot, makabaton kita sang bag-o nga paglaum kag preska nga paggiya paagi sa Balaan nga Espiritu.

Nabudlayan ako sa pagdula sang mortal nga handom nga ang mga butang suno sa akon paagi, sang ulihi mabal-an ko nga ang akon paagi oh tuman gid ka kulang, limitado, kag kubos sangsa paagi ni JesuCristo. “Ang Iya paagi amo ang banas nga nagapadulong sa kalipayan sa sining kabuhi kag kabuhing walay katapusan sa kalibutan nga maabot.”⁸ Sarang bala naton palanggaon si JesuCristo kag ang Iya paagi labaw sangsa pagpalangga naton sa aton mga kaugalingon kag sa aton mga ginaplano?

Ang pila nagahunahuna nga sila napaslawan na sing tuman ka madamo nga beses kag nagabatyag nga tuman ka mahuyang agud magbag-o sang mga makasal-anan nga mga buhat ukon sang kalibutanhon nga mga handom sang tagipusuon. Apang, bilang may kasugtanan nga Israel, wala kita nagatinguha kag nagatinguha nga nagaisahanon sa pagbag-o. Kon mabaskog kita nga magpangabay sa Dios, kuhaon Niya kita kon sa diin man kita—kag buhaton kita nga mas kapin pa sangsa aton nahunahunaan. Ang ginkilala nga manug-estudyo sang Dios nga si Robert L. Millet nagasulat parte sa “isa ka maayo nga paghandom agud mag-uswag”, ginbalanse sang espirituhanon nga “pagpasalig nga sa kag paagi kay JesuCristo matuman naton ini.”⁹ May amo nga paghangop, matampad nga masiling naton sa Langitnon nga Amay:

Kon ginahalad naton ang aton nagapakubos nga tagipusuon kay JesuCristo, ginabaton Niya ang aton halad. Ginakuha Niya kita liwat. Bisan ano ang mga kapiyerdihan, mga samad, kag pagsikway nga aton naantus, ang Iya grasya kag pagpaayo mas mabakod sangsa tanan. Matuod nga naangot sa Manluluwas, sarang kita magsiling nga may pagsalig, “Ang tanan sa ulihi mangin maayo.” Sa ngalan ni JesuCristo, amen.