Kwaļo̧k Būruwōd n̄an Anij

Elder Dallin H. Oaks, ilo kweilo̧k eo eļap ilo Eprōļ eo, eaar kōnono kōn aikuj “n̄an ukōt mour kein ad.”¹ Ij kalikarļo̧k bwe oktakin mour an juon armej ej jino ilo bōro—jekdoon ta en̄jaake ko am̗ ilo mour in ak ijo kwar ļotak ie.

Ij itok jān ijo emūlaļ ilo tuiōn̄ in Amedka, im ilo iien ko ij jo̗dikdik naan ko ilo al ko an protijen raar katakin eō kōn m̧ool in bōro an juon rikaļoor—juon eo em̗ōj an oktak. Ilo ļōmņaki naan kein, relukkuun aorōk ippa:

Ewi wāween, juon rūraan kein, elukkuun poub, im rijie, emaron̄ kwaļo̧k buruōn im lūr? Ewi wāween jemaron̄ kōm̧m̧an bwe wāween ko an Irooj ren ad? Ij tōmak bwe jej ijjino ilo ad katak kōn E im jar n̄an mel̗el̗e. Ilo an ļapļo̧k lōke ko ad ilo E, jej kōpelļo̧k būruwōd, pukōt n̄an kōm̧m̧an Ankilaan, im kōttar an uwaak bwe en maron̄ jipan̄ kōj mel̗el̗e.

Lukkuun oktak ilo būruwō eaar jino ke ej 12 aō iiō, iaar jino kappukōt Anij. Ijjeļokin aō kōm̧m̧ane Jar eo an Irooj,³ Iaar jab lukkuun jeļā kilen jar. Ij kememej aō kar bukwelōlō, kōjatdikdik bwe in en̄jake iakwe eo An, im kajjitōk, “Kopād ia, Jemedwōj Ilan̄? Ijeļā kopād jene, ak ia?” Ilo aolepān iien ko ke ej em̧m̧an detta, Iaar kajjitōk. Eaar wōr jidik aō en̄jake kōn m̧ool eo kōn Jisōs Kraist, ak iaar kappukōt im kōttar ium̗in 10 iiō n̄an kam̧ool kōn Jemedwōj Ilan̄.

Ilo 1970, ke mijinede ro raar katakin eō kōn karōk in lo̧mo̧o̧r eo an Anij im kōn Pinmuur eo an Rilo̧mo̧o̧r eo, ekar jem̧ļo̧k aō kōttar. Iaar kam̧ool katak kein im iaar peptaij.

Pedped ioon jeļā in kōn tūriam̗o im kajoor eo an Irooj, ļeo ippa, ajri ro nejimirro, im n̄a kōm kar kālet m̗ato in an baam̧le in: “Aolep men renaaj em̧m̧an.” Aaet ewi wāween ad ba naan ko n̄an ro jet n̄e ej itok inepata im n̄e ejjab uwaak jar ko ad?

Ke eo nejim 21 an iiō eo ekam̧ōņōņō, im erreo mour eo an, Georgia, eaar deļo̧n̄ ilo aujipitōļ kōn juon jekjek epād ie ekauwōtata ālkin an jorrāān ilo juon bajikaļ, baamle eo am eaar ba, “Aolep men renaaj em̧m̧an.” Ke ij kajju kālo̧k jān mijen eo am ilo Brazil n̄an Indianapolis, Indiana, bwe in pād ippān, Ij ļōmņake wōt m̗ato eo an baam̧le eo am. Ijoke, jiron̄ eo nejim eaar etal n̄an laļ eo an jetōb jejjo awa m̗okta jān an bal̗uun eo jok. Būrom̗ōj im ilbōk eaar itok ioon baam̧le eo am, ewi wāween ad maron̄ kalimjōk doon im ba, “Aolep men renaaj em̧m̧an”?

Ālkin mej eo an Georgia, en̄jake ko am rej pād wōt, kōm ej metak kaki, im n̄an kiiō ewōr iien am lukkuun būrom̗ōj, ak kōm ej dāpdep wōt ilo jeļā in ke ejjeļo̧k juon ej lukkuun mej. Kōjekdoon metak ko am ke Georgia eaar jab maron̄ makūtkūt, eaar wōr am tōmak bwe ej mour wōt ilo jetōb, im kōmij tōmak bwe jenaaj bar mour ippān doon n̄an indeeo eļan̄n̄e kōmij kōjparok bujen ko am ilo tampeļ. Tōmak ilo Rilo̧mo̧o̧r eo ad im Jerkakpeje eo An, tōmak ilo kajoor eo an priesthood, im tōmak ilo liāp ko n̄an indeeo rej kapenļo̧k m̧ato eo am.

Būreejtōn Gordon B. Hickley eaar ba: “Eļan̄n̄e kwōj kōm̧m̧ane ijo koņaam̗, aolep men renaaj em̧m̧an. Likūt am̗ lōke ilo Anij. … Irooj ej jāmin katajinemjene kōj.”⁴

M̗ato eo an baam̧le eo am ejjab ba, “Aolep men renaaj em̧m̧an kiiō.” Ej kōnnaan kōn kōjatdikdik kōn tōprak ko an mour indeeo—ejjab lukkuun aorōk tōprak ko an kiiō. Jeje ko rekwojarjar rej ba, “Niknik kappukōt, jar iien otemjej, im lōke, im aolep men renaaj jerbal ippān doon n̄an em̧m̧anļo̧k eo ami.”⁵  Ejjab meļeļein aolep men rem̧m̧an, ak n̄an ro rittā im retiljek wōt, jimor ilo men ko—rem̧m̧an im renana rej ippān doon n̄an em̧m̧anļo̧k eo, ilo iien eo ejjejet an Irooj. Jej kōttar wōt E, jet iien āinwōt Job ke eaar en̄taan, jeļā bwe Anij “ej kametak, im Ej korak e; Ej kakinejnej im pā ko Pein rej kājmour.”⁶ Juon bōro ettā emel̗el̗e kōn mālijjon̄ im ej kōttar iien eo enaaj mour im anjo̗.

N̄e jej kōpeļļok būruwōd n̄an Jetōb eo, jej katak wāween eo an Anij im jej en̄jake Ankilaan. Ilo iien kwojkwoj eo, eo me ij ņae etan unleplep eo an raan in Jabōt, emōj aō loe bwe ālkin jar im kajjitōk n̄an jeorļo̧k bōd, elukkuun jipan̄ n̄an kajjitōk ippān Jemedwōj Ilan̄, “ewōr ke men eļapļo̧k imaron̄ kōmmane?” N̄e jej ettā im lūr, lōmņak ko ad remaron̄ kajjuļo̧k n̄an men ko jet jej aikuj ukōti—men ko ewōr jon̄aer ekkar n̄an maron̄ ko ad n̄an bōk imwe in tōl ko an jetōb ak kōmour im jipan̄ jān E.

N̄an waanjon̄ak, ilo m̧ool Iaar lukkuun dāpij aō illu ippān juon armej. N̄e Ij kajjitōk eļan̄n̄e elōn̄ bar men ekōņaan kwaļo̧k ruōn kake, naan in “ittino” ejjiktok ilo ļōmņake aō. Ilo ad jeļā, Jetōb Kwojarjar ej unoojdikdik, “Kwoj lukkuun m̧ool ilo am kajjitōk eļan̄n̄e ekar lōn̄ wōt, im en̄in. Illu ko am rej kabweer eok im kakkure maron̄ eo am n̄an bōk juon jemjera eo emourur. Komaron̄ kōtļo̧k. “O, ej juon jerbal epen—jemaron̄ en̄jake ad jimwe ilo iien ad illu—ak bōk wāween eo an Irooj ej wāween eo de ņe n̄an mōņōņō eo ejjeļo̧k jem̧ļo̧kin.

Ilo iien im jidik kōn jidik, jej bōk jouj in kajoor eo An im tōl—ilo m̧ool ej tōl kōj bwe en ikkutkut ad deļo̧n̄e tampeļ ak n̄an katak eļapļo̧k kōn Pinmuur eo an Kraist, ak reiļo̧k n̄an juon eo m̧ōttam, bisop, im rikapilōklōk eo etijemļo̧k, ak emaron̄ juon taktō. Kōmour in bōro ej ijjino n̄e jej leļo̧k ad im kabun̄ jar n̄an Anij.

Kabun̄ jar ilo m̧ool ej ijjino n̄e būruwōd ejimwe im̗aan mejān Jemed im eo Nejin. Jekjek ta eo būruwōd epād ie kiiō? Ej waļo̧k, bwe en waļo̧k n̄an juon bōro emour im etiljek, jej aikuj m̗okta kōtļo̧k būruwōd bwe en rub im̗aan mejān Irooj. “Kom̧ naaj ajetok āinwōt juon katok n̄an Eō bōro e rup im jetōb ettā,”⁷ Irooj ej kwalo̧k. Tōprak in katok in bōro ko, ak maron̄, n̄an Irooj ej bwe jej bōk tōl an jetōb eo me jej aikuj.

Ilo an ļapļo̧k jeļāļo̧kjeņ eo kōn jouj im tūriamo eo an Irooj, jej lo bwe n̄e būruwōd eobrak kōn ikdelel ej jino kōk im rub kōn kam̧oolol. Innām jej tōpar E, kōņaan kōttaik kōj n̄an Eo Nejin Anij Ejitōnbōro. Ilo ad kōttōpar im ettā kōn bōro erup im ettā, jej bōk juon kōjatdikdik ekāāl im juon tōl ekāāl jān Jetōb Kwojarjar.

Epen aō kar joļo̗k kōn̗aan ko an laļ in n̄an kōņaan ko aō make, aaet kile bwe kōn̗aan ko aō relikjab, ewōr jon̄aer, im rejjab jejjet n̄an wāween eo an Jisōs Kraist. “Wāween eo An ej iaļ eo me ej tōl kōj n̄an mōņōņō ilo mour in im mour eo ej itok.”⁸ Jemaron̄ ke iakwe Jisōs Kraist im wāween ko An eļapļo̧k jān ad iakwe kōj make im m̧akūtkūt ko ad make?

Jet remaron̄ ļōmņak relikjab ilo elōn̄ iien ko im en̄jake aer lukkuun mōjņo̧ n̄an ukōt m̧akūtkūt ko aer renana ak kōņaan ko an laļ in. Ijoke, āinwōt jet ribujen in Israel, jejjab kajjeon̄ im bar kajjeon̄ kōn maron̄ ko ad make n̄an oktak. Eļan̄n̄e jej lukkuun kwaļo̧k būruwōd n̄an Anij, E ej bōk kōj—im kōkm̧anmanļo̧k kōj n̄an jon̄an eo jej jab kar kōtamene. Rikatak kōn kabun̄ eo ebun̄bun̄ Robert L. Millet eaar jeje bwe en em̧m̧anļo̧k kōņaan ko ad me rekkar, jej aikuj jon̄an wōt juon ippān kam̧ool ko an jetōb bwe kōn im ilo Jisōs Kraist, jemaron̄ tōprak.”⁹ Kōn ad meļeļe, jemaron̄ lukkuun m̧ool ilo ad ba n̄an Jemedwōj Ilan̄.

N̄e jej kōpeļļo̧k būruwōd n̄an Jisōs Kraist, Ej m̧ōņōņō kōn men ko jej lil̗o̗k. Ej bōk kōj. Jekdoon ta jeluuji, kinejnej kaki, im kōraat ko jej iooni, An jouj im kajoor n̄an kōmour ekajoor jān men otemjej. Em̧ool ettā n̄an Rilo̧mo̧or eo, jemaron̄ ba kōn lōke eļap, “Aolep men renaaj em̧m̧an.” Ilo etan Jisōs Kraist, amen.