Koj Tsis Nyob Koj Ib Leeg Xwb Ua txoj Hauj Lwm No

Cov kwv tij, peb muaj kev ris txiaj vim tus Tswv tau hu Txwj Laug Ronald A. Rasband, Txwj Laug Gary E. Stevenson, thiab Txwj Laug Dale G. Renlund ua tus Tswv Yexus Khetos cov Thwj Tim. Peb lub siab, peb tej kev thov Vajtswv, thiab peb txoj kev ntseeg yuav txhawb nqa lawv.

Peb paub hais tias lawv muaj peev xwm ntau. Tab sis mas, lawv yuav xav tau kev pom zoo rau lawv tej hauj lwm uas lawv raug hu los ua, ib yam li peb sawv daws xav tau, hais tias tus Tswv yeej nrog lawv nyob hauv Nws txoj hauj lwm no. Tus dikas tshiab khiv los xav tau kev ua siab loj li no, ib yam li tus pov thawj hlob tshaj plaws thaum nws raug hu los ua ib txoj hauj lwm tshiab.

Txoj kev ua siab loj ntawd loj hlob tuaj thaum nej pom hais tias Nws tau hu nej los dhau ntawm Nws cov tub qhe. Kuv xav pab kom nej yuav paub thaum nej ua nej qhov hauj lwm, ces tus Tswv ntxiv nws lub hwj chim rau nej tej hauj lwm.

Ib yam hauj lwm uas peb raug hu los ua hauv tus Tswv lub nceeg vaj xav tau ntau tshaj tib neeg lub tswv yim thiab peb tej hwj chim xwb. Tej hauj lwm no xav tau tus Tswv txoj kev pab, uas yeej yuav los. Thiab tus dikas tshiab tshiab yuav kawm hais tias qhov no muaj tseeb, nws tseem yuav kawm li no rau ntau xyoo tom ntej thiab.

Kuv ib tug tub xeeb ntxwv nyob hauv no hmos no rau nws thawj tuas rau lub pov thawj hwj. Nws raug tsa los ua ib tug dikas rau hnub tas los lawm. Tej zaum nws yuav ua nws thawj txoj hauj lwm hauv lub pov thawj hwj thaum nws yais lub cim nco txog Hnub Caiv tom ntej no. Kuv thov kom nws yuav pom hais tias qhov ntawd tseem ceeb npaum li cas.

Tej zaum nws yuav xav tias nws txoj hauj lwm rau tus Tswv yog kom yais lub cim nco txog rau cov neeg uas zaum hauv txoj kev sib ntsib noj lub cim nco txog. Tiam sis tus Tswv lub ntsiab tsis yog kom tib neeg noj khob cij thiab haus dej xwb. Twb yog kom lawv ua raws li ib txoj kev khi lus kom los pib taug kev mus rau txoj sia nyob mus ib txhis. Es yog tias yuav muaj li no, tus Tswv yuav tsum pab tus neeg uas txais lub phiab los ntawm tus dikas thiab kom lawv hnov dab tsi ntawm lawv sab ntsuj plig.

Kuv twb pom li ntawd hauv lub tsev laus thaum ib tug dikas muab cev rau ib tug pog laus uas plaub hau dawb tag. Nws saib daim khob cij ua ib yam uas muaj nuj nqi heev. Kuv yeej nco qab ntsoov nws txoj kev luag nyav thaum nws noj thiab tau ncav tes kov tus dikas lub taub hau hais nrov nrov hais tias, “Au, ua koj tsaug nawb!”

Tus dikas ntawd tab tom ua nws txoj hauj lwm hauv lub pov thawj hwj xwb. Tiam sis tus Tswv tau ntxiv zog rau tus dikas txoj hauj lwm. Qhov no yeej qhia tseeb hais tias tus viv ncaus ntawd nco txog tus Cawm Seej thaum nws hais ua tsaug rau tus dikas txoj hauj lwm ntawd. Nws txawm paub tias qhov uas nws yais lub cim nco txog yuav pab nws muaj tus Ntsuj Plig nrog nraim nws nyob. Hnub ntawd nws tsis nyob nws ib leeg xwb hauv lub tsev laus ntawd. Thiab tus dikas los tsis nyob nws ib leeg ua hauj lwm ntawd.

Tej zaum ib tug xib hwb hluas hauv lub Pov Thawj Hwj Aloos yuav tsis to taub thaum nws mus qhia ib yim neeg, tias nws yog tus Tswv ib tug khub uas koom tes pab ua Nws txoj hauj lwm. Kuv tseem nco ib tug tub hluas uas tuaj qhia tom peb tsev zaj lus tim khawv. Tus Ntsuj Plig qhia rau kuv thiab kuv tsev neeg tias nws cov lus muaj tseeb. Tej zaum nws tsis nco qab hnub ntawd, tiam sis kuv tseem nco.

Tus Tswv yuav ntxiv zog rau nws tej hauj lwm dua thaum nws raug hu los ua ib tug pov thawj. Piv xam hais tias, tej zaum thawj zaug uas nws muab neeg ua kev cai raus dej yuav yog ib tug neeg hluas uas nws tsis paub. Tej zaum nws yuav txhawj tsam nws hais cov lus ntawd tsis yog thiab nws puas yuav ua kab ke ntawd kom yog.

Tiam sis vim nws yog tus Tswv ib tug tub qhe ces, tus Tswv yuav ntxiv zog rau nws txoj hauj lwm. Tus neeg uas nws muab ua kev cai raus dej tau txiav txim los pib taug kev mus rau txoj sia nyob mus ib txhis. Tus Tswv yuav ua Nws txoj hauj lwm uas loj dua. Nws twb ua li ntawd rau kuv thaum tus tub hluas uas kuv muab ua kev cai raus dej, los los kua muag es ntxhis lus rau kuv tias, “Kuv huv lawm. Kuv huv lawm.”

Thaum nej ua ib txoj hauj lwm hauv lub pov thawj hwj mus rau lwm txoj, nej yeej yuav pom tus Tswv pab nej ua hauj lwm. Kuv pom li no nyob hauv ceg txheem ntseeg lub rooj sab laj ntau xyoo tas los lawm thaum kuv ntsib ib pawg txwj laug tus thawj tswj hwm. Nyob hauv lub rooj sab laj ntawd muaj coob tshaj 40 tus txiv neej uas raug pom zoo txais lub Pov Thawj Hwj Mekixedes.

Ceg txheem ntseeg tus thawj tswj hwm ntxhi lus rau kuv tias, “Tag nrho cov txiv neej ntawd yog cov uas tsis tshua tuaj tshawj uas tsis tau yog txwj laug li.” Kuv xav tsis thoob, ces tau nug tus thawj tswj hwm seb nws ua li cas thiaj cawm tau cov txiv neej no.

Nws taw tes rau ib tug txiv neej hluas uas nyob puag nram qab chav teev hawm. Nws tias, ”Nws nyob ntawd. Cov txiv neej no feem coob rov qab los ntseeg vim yog lawv tus thawj tswj hwm rau pawg txwj laug ntawd.” Nws zaum puag nram qab, hnav dog dig, xyab nws txhais ceg pom nws nkawm khau uas ntuag tas.

Kuv thov ceg txheem ntseeg tus thawj tswj hwm coj kuv mus ntsib nws tom qab lub rooj sab laj. Thaum peb sib ntsib ntawd, kuv qhia tus txiv neej hluas tias kuv xav tsis thoob thiab nug seb nws ua li cas thiaj ua tau li ntawd. Nws tshoom xub pwg yim tsis paub. Nws yeej tsis xav tias nws tsim nyog tau nqi zog li.

Ces nws maj mam hais tias, “Kuv paub txhua tus txiv neej uas tsis tuaj tshawj hauv lub zos no. Lawv feem coob tsav cov tsheb thauj khoom. Kuv los muaj ib lub tsheb thauj khoom. Kuv ntxuav kuv lub tsheb thauj khoom hauv tib qhov chaw uas lawv ntxuav lawv lub. Nyob nyob ces, lawv pib ua kuv cov phooj ywg.

“Ces kuv tos kom muaj dab tsi tsis zoo hauv lawv lub neej. Yeej yuav muaj. Lawv qhia kuv txog qhov ntawd. Kuv ua tib zoo mloog thiab tsis liam lawv li cas. Ces, thaum lawv hais tias, ‘Muaj ib yam dab tsi tsis zoo hauv kuv lub neej. Yuav tsum muaj ib yam dab uas zoo tshaj qhov no.’ Ces kuv qhia lawv tias tseem tshuav yam dab tsi thiab lawv yuav nrhiav qhov twg. Tej thaum lawv ntseeg kuv, thiab thaum lawv ntseeg, kuv coj lawv nrog kuv mus.”

Koj yeej pom hais tias nws coj tus tus. Kuv paub yog vim nws twb ua nws txoj hauj lwm me me thiab tus Tswv tab tom ua qhov txuas ntxiv. Tus Tswv yog tus uas tau tshoov cov txiv neej ntawd tej siab thaum lawv muaj kev cov nyom. Twb yog tus Tswv uas ua rau lawv xav tias yuav tsum muaj ib yam dab tsi zoo dua rau lawv thiab kev cia siab tias lawv yuav nrhiav tau.

Tus txiv neej hluas, uas—zoo li nej—yog tus Tswv ib tug tub qhe, tsuas ntseeg yog tias nws yuav ua nws txoj hauj lwm me me ces, tus Tswv yuav pab tau cov txiv neej ntawd taug kev rov qab mus tsev thiab yuav tau kev zoo siab uas Nws tib leeg xwb pub tau rau lawv. Tus txiv neej no kuj paub tias tus Tswv tau hu nws los ua pawg txwj laug tus thawj tswj hwm vim nws yuav ua nws tej hauj lwm.

Yuav muaj tej lub sij hawm thaum koj tsis ua zoo npaum thiab pom tau khav npaum tus thawj tswj hwm hluas rau pawg txwj laug no. Nov yog lub sij hawm uas koj yuav tsum tso siab plhuav rau tus Tswv, paub tseeb hais tias koj yuav ua koj tej hauj lwm, uas koj raug hu los ua los ntawm Nws cov tub qhe. Muaj kev ntseeg hais tias Tus Tswv cov tub qhe tau hu yog qhov tseem ceeb ntawm kuv tus yawg koob Henry Eyring txoj hauj lwm mus ua tub txib.

Nws ua kev cai raus dej thaum lub Peb Hlis Ntuj hnub tim 11, 1855, hauv lub nroog St. Louis, Missouri. Erastus Snow tsa nws los ua ib tug pov thawj tsis ntev tom qab ntawd. Tus thawj tswj hwm rau St. Louis Ceg Txheem Ntseeg, John H. Hart, hu nws mus ua tub txib rau Haiv Neeg Cherokee thaum lub Kaum Hli Ntuj hnub tim 6.¹ Nws raug tsa los ua ib tug txwj laug thaum lub Kaum Hli Ntuj hnub tim 11. Nws caij nees mus rau Qhov Chaw Tshaj Tawm Txoj Moo Zoo rau Haiv Neeg Cherokee thaum lub Kaum Hli Ntuj hnub tim 24. Nws muaj 20 xyoo thiab nyuam qhuav hloov siab los ntseeg xya hli tas los lawm.

Yog tias ib tug neeg uas tuav lub pov thawj hwj twg yuav xav tias nws tsis tsim nyog los sis tsis paub ua, yeej yog Henry Eyring. Nws tsuas muaj siab loj mus ua vim nws paub hauv nws lub siab hais tias Vajtswv tau hu nws dhau los ntawm Nws cov tub qhe. Qhov ntawd yog lub hauv paus rau nws txoj kev ua siab loj. Qhov ntawd yuav tsum yog lub hauv paus rau peb txoj kev ua siab ntev, tab txawm peb raug hu los ua hauj lwm dab tsi hauv lub pov thawj hwj los xij.

Tom qab Henry Eyring ua hauj lwm peb xyoos nyuaj nyuaj thiab tom qab tus thawj tswj hwm rau nws qhov chaw tshaj tawm txoj moo zoo tuag, Henry Eyring raug hu los thiab raug tsa los ua tus thawj tswj hwm hauv ib txoj kev sib ntsib thaum lub Kaum Hli Ntuj hnub tim 6, 1858. Nws xav tsis thoob ib yam nkaus li ib tug dikas tshiab khiv yuav xav. Nws sau ntawv hais tias, “Kuv xav tsis thoob vim kuv raug hu los ua txoj hauj lwm no tiam sis vim cov kwv tij hu kuv ces kuv zoo siab hlo los ua, txawm tias kuv tseem muaj tej kev qaug zog thiab tsis txawj ua.”²

Nim no Thawj Tswj Hwm Eyring taug kev mus rau Haiv Neeg Cherokee, Creek, thiab Choctaw hauv xyoo 1859. Dhau ntawm nws tej hauj lwm, tus Tswv ntxiv, li Henry hais, “coob leej rau hauv lub koom txoos.” Nws txhim tsa ob ceg ntseeg tiam sis hais tias “tsis tshua muaj neeg uas rau siab ntseeg.”³

Ib xyoos tom qab ntawd, Henry muaj teeb meem vim cov nom tswv hauv cov neeg uas nws tab tom qhuab qhia txwv tsis pub ib Tsoom Haiv Neeg Ntseeg hauv Hnub Nyoog Kawg cov tub txib tuaj qhia lawv lawm. Thaum nws xam seb nws yuav tsum ua li cas, nws nco qab nws tus thawj tswj hwm rau qhov chaw tshaj tawm txoj moo zoo cov lus qhia kom nws yuav tsum ua tub txib ntev mus txog xyoo 1859.⁴

Hauv lub Kaum Hli Ntuj xyoo ntawd, Henry sau ntawv rau Thawj Tswj Hwm Brigham Young kom tau lus qhia, tiam sis nws tsis tau ib tsab ntawv los teb nws lo lus nug. Henry sau tias, “Vim kuv tsis hnov xov ntawm lub Koom Txoos tus Thawj Tswj Hwm ces, kuv thiaj thov Vajtswv, es thov kom nws yuav qhia seb nws xav kom kuv ua li cas thiab seb kuv puas tas nyob twj ywm ntxiv los sis mus rau Xi-oos.”

Nws sau ntxiv tias: “Kuv tau ua npau suav li no kom teb tau kuv zaj lus thov Vajtswv. Kuv ua npau suav pom hais tias kuv tuaj txog lub nroog [Salt Lake City] thiab tau mus hauv [Thawj Tswj Hwm Brigham] Young lub hoob kas, nws yeej nyob ntawd. Kuv hais rau nws tias: ‘[Thawj Tswj Hwm] Young, kuv tau tawm ntawm kuv qhov chaw tshaj tawm txoj moo zoo, kuv los kuv, tiam sis yog tias qhov no ua txhaum li cas, kuv yeej kam rov qab mus thiab ua tub txib kom tiav.’ [Hauv zaj npau suav tus yaj saub] teb hais tias: ‘Koj twb nyob ntev txaus lawm, txhua yam yeej zoo.’”

Henry sau hauv nws phau ceev xwm txheej tias, “Vim kuv twb ua npau suav pom tej yam uas muaj lawm tiag kuv thiaj muaj kev ntseeg hais tias yeej yuav muaj li kuv pom no ces thiaj tau npaj yuav sawv kev mus.”

Nws tuaj txog lub nroog Salt Lake thaum lub Yim Hli Ntuj hnub tim 29, 1860, nws tsuas siv ko taw taug kev xwb. Ob hnub tom qab ntawd, nws los rau hauv Thawj Tswj Hwm Brigham Young lub hoob kas.⁵

Henry piav txog qhov ntawd hais tias: “[Kuv] hu [Thawj Tswj Hwm] Young, uas ua siab zoo tos txais [kuv]. Kuv hais rau nws tias, ’[Thawj Tswj Hwm] Young kuv tuaj txawm koj tsis caw kuv tuaj, yog tias kuv ua txhaum li cas, kuv yeej kam rov qab mus thiab ua tub txib kom tiav tas.’ [Brigham Young] teb hais tias: ‘Nws yeej zoo. peb twb nrhiav koj lawm.’”

Henry piav txog nws txoj kev zoo siab hais tias, “Txawm muaj li kuv ua npau suav pom lawm.”⁶

Nws tau kev zoo siab vim nws paub tias tus Tswv tau nrog nws ua hauj lwm thiab tau saib xyuas nws. Nws kawm qhov tseeb rau peb sawv daws—tias tus Tswv cov tub qhe tau kev tshoov siab kom lawv paub tias tus Tswv lub siab xav li cas. Ces Henry Eyring kawm paub tias qhov ntawd muaj tseeb, kuv los paub tib yam li ntawd hais tias: tus yaj saub, uas ua tus thawj tswj hwm rau lub pov thawj hwj, txais Vajtswv txoj kev tshoov siab kom saib xyuas thiab tu tus Tswv cov tub qhe thiab kom hu lawv.

Txawm koj raug hu los ua dab tsi hauv lub pov thawj hwj los, yuav muaj tej lub sij hawm thaum koj xav tias Leej Txiv Saum Ntuj Ceeb Tsheej tsis paub txog koj. Koj los muaj cai thov Vajtswv seb Nws xav li cas, thiab thaum muaj lub siab kam ua yam twg ua Nws txib koj ua ces, koj yeej yuav tau lus teb.

Leej Txiv Saum Ntuj Ceeb Tsheej yuav qhia rau koj paub hais tias Nws paub koj, tias Nws pom zoo rau koj tej hauj lwm, thiab tias koj tab tom yuav tsim nyog tau lo lus teb uas koj xav hnov hais tias: “Zoo heev, koj yog tus tub txib uas zoo thiab ncaj ncees! Tej yam me me uas koj saib, koj ua ncaj. Kuv yuav tsa koj ua tus saib yam uas loj. Koj cia li los nrog kuv nyob kaj siab lug.”⁷

Kuv thov Vajtswv kom txhua tus neeg uas tuav lub pov thawj hwj yuav muaj kev ntseeg ncav tes mus pab txhua tus neeg uas nws muaj kev lav ris saib xyuas. Vajtswv yuav ntxiv Nws lub hwj chim rau Nws cov tub qhe tej hauj lwm. Yuav tshoov tib neeg tej siab kom lawv xaiv los ua tej yam uas yuav pab lawv taug txoj moo zoo txoj hau kev kom lawv muaj kev zoo siab thiab txav deb ntawm kev nyuaj siab.

Kuv thov kom txhua tus uas tuav lub pov thawj hwj yuav pom hais tias Leej Txiv Saum Ntuj Ceeb Tsheej, tus Cawm Seej, thiab Vajtswv tus yaj saub yeej hlub thiab saib xyuas nws txoj hauj lwm.

Kuv ua tim khawv tshwj xeeb tias peb tab tom ua tus Tswv Yexus Khetos uas tau sawv rov los lawm txoj hauj lwm. Kuv hais lus tim khawv tias Nws tau hu kuv thiab nej los ua Nws tej hauj lwm vim Nws paub peb muaj cuab kav thiab xav tau dab tsi. Nws yuav foom koob hmoov rau peb tej hauj lwm ntau tshaj peb xav thaum peb muab tag nrho peb siab ntsws rau Nws tej hauj lwm. Kuv hais lus tim khawv tias Vajtswv tus yaj saub, tus uas yog tus thawj tswj hwm rau tag nrho lub pov thawj hwj hauv ntiaj teb no, yeej tau Vajtswv txoj kev tshoov siab.

Kuv muaj kev ris txiaj rau txhua tus uas tuav lub pov thawj hwj thoob plaws ntiaj teb no tej yam ntxwv. Leej Txiv Saum Ntuj Ceeb Tsheej thiab tus Cawm Seej yeej ris nej txiaj vim nej ua nej tej hauj lwm. Nkawd paub nej, Nkawd saib xyuas nej, thiab Nkawd hlub nej. Los ntawm Yexus Khetos lub npe, amees.