2010–2019
Kumwail Sohte Kelkelehpw nan Doadoahk wet
October 2015


Kumwail Sohte Kelkelehpw nan Doadoahk wet

Ni amwail kin mwekid sang ehu kolahng nan ehu pwukoa en priesthood kumwail pahn ese me Kauno ieiang kumwail.

Riei oahloko, kitail kaping kalahngan ong Kauno ah ketin malipe Elder Ronald A. Rasband, Elder Gary E. Stevenson, oh Elder Dale G. Renlund en wiahla Wahnparon en Kauno Sises Krais. Mohngiongitail, atail kapakap oh atail pwoson utungada irail.

Kitail ese uwen arail koahiek. Ahpw irail anahne kamehlele nan arail maliplip kan, duwehte kitail koaros, me Kauno ketin ieiang irail nan Sapwellime doadoahk wet. Dihken me keieu kapw anahne kamehlel wet duwehte high priest men me kin ale pwukoa kapw.

Koapwoaroapwoar wet kin laudla ni atail eseda me Ih me ketin malipe kitail. Ihme I men sewesehkin kumwail en ese ni amwail wia amwail pwukoa, Kauno pahn kalaudehla Sapwellime manaman nan amwail doadoahk kan.

Malipilip koaros me kitail ale nan wehin Kauno anahne atail koahiek en madamadau oh kehlail koaros. Maliplip pwukat pil anahne sawas sang Kauno, me pahn pil kohdo. Dihken kapwo pahn esehda me met mehlel, oh e pahn alahle kamarain kohkohla.

Emen pwutak nein nei iang kitail pwongpwong wet nan ah keieun mihting en priesthood. E kasarawihong dihken rahn weneu samwalahr. E kasik me ah keieun pwukoa nan priesthood e pahn iang wa kamadipw sarawi Rahn Sarawi kohkohdo. I kapakapki me e pahn wia pwukoaho ansou me e lel ong.

Ele e pahn medewe me iei ah pwukoa ong Kauno en kin wahlang aramas akan delen kamadipw sarawio nan sakramen mihting. Ahpw Kauno sohte kupwurkihte aramas en ale pilawa oh pihl. Irail en kolokol inou ehu me pahn kahluwa irail nan ahl me kin kohlahng mour soutuk. Pwe met en kak wiawi, Kauno anahne ketkihda ngehno en sair armas me pahn ale kamadipwo nan dahl me dihkeno kapahlahng irail.

I kilangehr soahngwet eh wiawi nan ehu wasahn apwalih me mah ansou me dihkeno kapalahng dahlo rehn lih mwoangpwet men. Liho kilekilang pilahwa kan likamw mehkoat kesemwpal. I sohte kak manokehla en liho poh koamwoakoamw ni eh ale pilawaho oh ih pikir moangen dihkeno oh nda ni ngil laud. “Menlau kalaimwhun!”

Dihkeno wiewiahte ah pwukoahn priesthood. Ahpw, Kauno katehlapehla dahme dihkeno wia. E sansal me liho tamanda Sounkomouro ni eh kaping kalahngan mwuledengki en dihkeno ah doadoahk. Liho kamehlele ni ansou me dihkeno kapahlang sakrameno me Ngehno pahn ieiang ih. Liho sohte kelkelehpw rahno, nan wasao. Dihkeno pil sohte kelkelehpw ni ah wiewia ah pwukoahu.

Sounpadahk pwulepwul men nan Priesthood en Aaron kakete sohte kehn, ni eh kolahng kaskuhl ehu peneinei, me e wia emen iengen Kauno nan Sapwellime doadoahk. I tamatamante ehu kadehde mengei me emen me pwulepwul wia nan ah pas ni imwat o. Ngehno kadehde ongie oh ahi peneinei ah kosoai kan. E mwein manokelahr rahno, ahpw I tamatamante.

Kauno pahn pwurehng kalaudehla doadoahk me emen mwahnakapw ni eh pahn malipilipehng en wiahla emen priest. Keieun pepdais me e pahn wia pahn kakete ong emen me pwulepwul me e sohte ese. Ele e kak periki pwe ede nda lokaia me sapwung oh sohte wia tiahk sarawio ni pwung.

Ahpw Kauno, me sapwellimanki ih, pahn kalaudehla ah pahpah. Aramas me e pepdaisi piladahr en keid nan ahl en mour soutuk. Kauno pahn wia Sapwellime pwukoa lapo. E ketin wiahieng ie ehu pako ni ahi pepdaisih pwutak emen me, pilen mese kereker, ndado nan salengei, I mwakelekel, I mwakelekel.

Ni amwail mwekid sang ehu pwukoa kohla ni ehu nan priesthood, kumwail pahn kilang me Kauno ketin ieiang kumwail. I esehla met sang ni ahi tuhong president en elders quorum men nan ehu stake conference sounpar kei samwalahr. Nan conference o eden ohl 40 kapidolong pwe ren ale Melchizedek Priesthood.

Stake presideno pengdo rehi oh mwengininginki, Ohl pwukat koaros me pahn wiahla elder sohte kin kalap kohdo iang sarawi. I pwuriamweila ngei idek rehn presideno soangen pirokram da me e kaunopada pwehn kapwure iraildo.

E idih mwahnakapw men me mwomwohd nan kapio. Ih eri nda, Io ih. Pali tohtohn oahl pwukat pwuredohr pwehki presiden en elders quorum o. E mwomwohd pohn kahng en sehr me mih keieu mwuri, likou mwahu, nehkan uhwei mwowe ah pwuht kan mering apali neh long pohn apali neh.

I peki rehn stake presideno en kapehseiong ie oahlo mwurin mihting. Ni aht tuhpene, I ndaiong mwahnakapwo me I pwuriamweikihla doadoahk me e wiahier ngehi eri idek ia mwomwen eh wia. E pwek pwoapwehko. E sansal me e sohte men adiki doadoahk mwahu wet.

I eri nda ni ngihl tikitik, I ese oahl koaros me solahr kohdo iang sarawi nan kahnihmw wet. Pali tohtohn irail waraniki sidohsa pikap. Pil mie werei pikap. I kin widen werei pikapo wasa me re kin widen werarailko. Sohte pwand re kin wiahla kempoakepai.

Ngehi eri kin awi lao mehkoat sapwung nan arail mour. E kalap wiawi. Irail kin ndahiong ie. I kin rongete oh sohte kadeik. Kedekedeo irail kin nda, Mehkoat sapwung nan ahi mour, Uhdahn mie mehkoat me mwahu sang met. I kin ndaiong irail dahme irail anahne oh ia wasa irail kak diar ie. Ekei ansou irail kin kamehlel ie, oh ih ansou me I kin wa irail do.

Kumwail kak kilang dahme e karakarahngki. Pwehki e ese me e wiahier ah pwais oh Kauno me pahn wia mehkoaros liki. Kauno me ketin sair mohngiongen irail oahl kan nan arail kahpwal kan. Kauno me ketin kapehmkin irail me uhdahn mie mehkoat mwahu ong irail oh koapwoaroapwoar me irail kak diar mehkoato.

Mwahnakapwo, me—duwehte kumwail—kin papah Kauno, kamehlele me ma e wiahda ah pwais tikitiko, Kauno pahn sewese oahloko pohn ahl me kolahng nan dewarail oh ong popohl me Ih ete kak ketkiong irail. Oahl menet wehwehki me Kauno ketin malipe ih en wia elders quorum presiden pwehki e pahn kapwaiahda ah pwais.

E pahn mie ansou nan amwail wie papah me kumwail sohte pahn ahneki soangen pweida kaseelel me elders quorum presiden pwulepwulo ahneki. Ih ansou me kumwail pahn anahne kamehlele me Kauno mwahngi me kumwail pahn wiahda amwail pwais kahrehda E malipe kumwail. En ahi pahpa pahpa kahlap Henry Eyring doadoahk en misineri pweida pwehki ah pwoson sapwellimen Kauno maliplip me wiawi sang sapwellimeh kan.

E pepdaisla ni Mahs 11, 1855, nan St. Louis, Missouri. Erastus Snow kasarawiala ih ong ohpis en priest mwurinte mwo. President en St. Louis Stake, John H. Hart, malipe ih en wia ah misin ong Cherokee Nation ni Oaktohpe 6.1 E kasarawihong en wiahla elder ni Oaktohpe 11. E mwesel pohn oahs ong Cherokee Mission ni Oaktohpe 24. E sounpar 20 oh e wekila oh wia souleng men ki sounpwong te isuh.

Ma mie emen priesthood me medemedewe me e sohte warehng oh saikinte onopada, iei Henry Eyring. Kahrepe te ieu me kahrehiong eh kak ale pwukoaho iei pwehki e kamehlele nan ah mohngiong me Koht me ketin malipe sang Sapwellimeh kan. Iei me wia poahson en ah eimah. Ih met me konehng wia kahrepen atail eimah pwehn tengetengdi nan sohte lipilipil pwukoah me kitail ahneki nan priesthood.

Mwurin en Elder Eyring papahkier sounpar apwal siluh oh ni kapelsalehdalahn misin presideno, Henry pilipilda oh kamanamanla en wiahla misin president nan mihting ehu me wiawi ni Oaktohpe 6, 1858. E pwuriamweila oh pihrda duwehte dihken kapw men. E ntingi, E wia mehkoat me I sohte douluhl kasik ien maliplipiong pwukoa kesemwpwal wet ahpw pwehki ihme soulengko pwungki kahrehda I ale pwukoah wet ni ahi medemedewe ni ansou ohte uwen laud en ahi soakoahiek.2

Presiden Eyring eri kin seiloak la Cherokee, Creed, oh Choctaw Nations nan 1859. Sang ni ah doadoahk kan, Kauno ketin kapatahiong, ihme Henry nda, ehu nempe ong Mwomwohdisou. E kauwada branch riau ahpw e kosoia me me malaulau me uhdahn poadidi.3

Sounpar ehu mwuri, Henry sohpai ehu kahpwal me tepsang irail kaun kan en aramas nan wasa me e kin wie papah ni arail solahr mweidehng misineri en Mwomwohdisou en kalohk wasao. Ni eh medemedewe dahme e konehng wia, e tamanda dahme misin president en mahs ndahiong me en karairaiala ah misin lao lel nan 1859.4

Nan Oaktohpe en pahro, Henry ntinglahng President Brigham Young, en kaweid, ahpw e sohte ale pasapeng pen ah peideko. Henry ntingi, “Ni ei sohte kak rong mehkot sang Presidensi en Mwomwohdisou, I eker Kauno ni kapakap, peki reh en kasalehiong ie tapwi oh kupwure me pid ma I pahn wie mihmi de ien pwurala Zion.”

E doula: “I ouramanda ouraman wet pwe en wia pasapeng pen ahi kapakapo. I ouramanda me I peidier nan Kahnihmw en Salt Lake oh I mwadangete kohla ni en [Presiden Brigham] Young ah ophis, wasa I diar ih. I ndahiong: ‘[Presiden] Young I mweselsangehr ahi misino, oh pein pwuredohr, ahpw ma dahme I wiaho sapwung, I pwungki pwurala oh kanekehle ahi misino. Nan ouramano soukohpo sapeng: E mwahu pwe wereilahr ahmw mihmi mwo.’”

Henry ntingihdi nan nah pwuhko, “Ni en ahi ouraman en mahs kan kin pweida koaros I pwoson kamehlele me ouraman wet pahn pweida oh ih tepda onohnop pwe I pahn pwur ehr.”

E peidi nan Kahnihmw en Salt Lake nan August 29, 1860, ni eh alu palilaud nan ahlo. Mandahsang rahno, e aluhlongala nan en Presiden Brigham Young ah ohpiso.5

Henry kawehwehda dahme wiawi nin duwe met: “[I] pidelongala rehn [Presiden] Young, me kasamwo ie mwahu. I ndahieng ih, ‘[Presiden] Young I pwuredohr ni amwail sohte eker ie, ma mwekid wet sapwung, I pwungki pwurala oh kanekehla ahi misin.’ [Brigham Young] sapeng: ‘Mehkoaros mwahu, se wie raprapahkin uhk.’”

Henry kawehwehda uwen ah peren, nda, Ahi ouramano pwon pweida.6

Ah pereno kohsang ni ah kamehlele me Kauno ketin wie doadoahk oh mwasmwasahn ih. E esehla mehkot me mehlel ong kitail koaros—me Kauno kin kamarainih sapwellimeh kan en ese kupwure. Oh Henry Eyring pil katengehdi mehkot me I eseier: me soukohpo, me wia president en priesthood, kamaraindahr sang Koht en mwasmwasahn oh epwel mwahuih papah en Kauno kan.

Sohte lipilipil soangen maliplip da me kumwail ahniki nan priesthool, kumwail kak kehn ekei ansou me Sahm Nanleng sohte mwahngi kumwail. Kumwail kak kapakap pwehn esehla kupwure, oh ni mehlel men wia sohte lipilipil dahme E kupwurki, kumwail pahn ale pasapeng.

Sahm Nanleng pahn mweidohng kumwail en pehm me E mwahngi kumwail, E kupwure amwail doadoahk, oh kumwail kereniong en warehng ale mahsen kaperen sang Kauno me kitail kin men rong; “Keieu mwahu, papah lelepek oh loaloapwoat men kowe! Pwehki omw loaloapwoat ni koadoahkpen mehkot tikitik, I pahn kiong uhk mehkot laud pwe ke en kin apwahpwalih. Keido pwe ke en iang nsenamwahuki ei pai,”7

I kapakapki me koaros me kolokol priesthood pahn ni pwoson pengla oh doarehla koaros me re kin apwalih. Koht pahn kapatahieng Sapwellime manaman ong doadoahk en Sapwellime papah kan. Mohngiong en aramas pahn kehlailda oh wiahda pilipil me pahn kahlwa irail pohn elen rongamwahuo kolahng popohl oh dohsang kapahtou.

I pil kapakapki me koaros me kolokol priesthood pahn pehm me Sahm Nanleng, Sounkomouro, oh soukohp en Koht o ni ah malipilipo, kin ketin poakepoake oh mwasmwasahn kumwail.

I kiong kumwail ahi kadehde tohrohr me kitail wie papah me iasadaho Kauno Sises Krais. I kadehde me E ketin malipe kumwail oh ngehi ong Sapwellime doadoahk ni E mwahngi atail kak kan oh sawas me kitail anahne. E pahn kapaiada atail doadoahk kan ni uwe me kitail sohte kin kasik ni atail kin wia uwen atail kak koaros nan Sapwellime doadoahk. I kadehde me soukohp en Koht, me wia president en priesthood koaros pohn sampa, kin ale kamarain sang Koht.

I kapingki karasaras en pwoson en me kolokol priesthood wasa koaros. Sahm Nanleng oh Sounkomouro kupwurki amwail wia amwail pwais. Irail mwahngi kumwail oh poakepoake kumwail. Ni mwaren Sises Krais, amen.

Ireh kan

  1. Tehk “Minutes of the Conference,” St. Louis Luminary, Oct. 13, 1855, 187.

  2. Henry Eyring kisin likou ong Brigham Young, Oct. 7, 1858, Brigham Young Office Files, Church History Library, Salt Lake City.

  3. Henry Eyring repwoht ong Church Historian’s Office, Aug. 1860, Missionary Reports, Church History Library, Salt Lake City.

  4. Tehk Henry Eyring kisin likou ong Brigham Young, Oct 9, 1859, Brigham Young Office Files, Church History Library, Salt Lake City.

  5. Tehk President’s Office Journals, Aug. 31, 1860, vol. D, 137, Brigham Young Office Files, Church History Library, Salt Lake City.

  6. Henry Eyring reminiscences, 1896, typescript, 27–28, Church History Library, Salt Lake City.

  7. Madiu 25:23.