E Le o Tuua Na o Outou i le Galuega

Uso e, ua tatou fiafia lava ua valaauina e le Alii Elder Ronald A. Rasband, Elder Gary E. Stevenson, ma Elder Dale G. Renlund o ni Aposetolo a le Alii o Iesu Keriso. Tatou te lagolagoina i latou i o tatou loto, a tatou tatalo, ma lo tatou faatuatua.

Ua tatou iloaina lo latou gafatia. Ae, o le a latou manaomia le faamautinoaga i o latou valaauga, e pei ona tatou manaomia uma, faapea o loo i ai le Alii ma i latou i Lana galuega. E manaomia e se tiakono fou lava se talitonuga mautu, e faapena foi i se faitaulaga sili e tele sona potomasani e mauaina se valaauga fou.

O lena talitonuga maumaututu e tuputupu ae a o oo ina e iloaina na Ia valaauina oe e ala i Ana auauna. O lau faamalosiauga o le fesoasoani lea ia te oe ia e iloaina, a e faia lau vaega, e faaopoopo e le Alii Lona mana i au taumafaiga.

Soo se valaauga tatou te mauaina i le malo o le Alii e manaomia ai se mea e sili atu i lo se atamai faaletagata po o le malosi faaletagata. O na valaauga e manaomia ai le fesoasoani mai le Alii, ia o le a oo mai lava. E oo foi lava i le tiakono fou o le a iloaina e moni lena mea, ma o le a ia aoao pea i le olaga atoa.

O se tasi o atalii o la’u fanau o loo iinei i le po nei i lana uluai sauniga perisitua. Sa faauuina o ia o se tiakono i le ono aso talu ai. Atonu ua ia faamoemoeina o lana faatinoga muamua lava o se tiute faaleperisitua o le tufaina o le faamanatuga i le Aso Sa a sau. Ou te tatalo o le a ia vaaia lena taimi e pei ona i ai moni lava.

Atonu e manatu o ia na o le pau lena o lana galuega mo le Alii o le tufa atu lea o le fata faamanatuga i tagata o loo alala i le sauniga faamanatuga. Ae o le faamoemoega o le Alii e le na o le o mai o tagata e taumamafa i le areto ma le vai. O le tuu atu lea ia i latou ia tausi se feagaiga o le a tuleia ai i latou i luga o le ala i le ola e faavavau. Ma ina ia tupu lena mea, e tatau i le Alii ona tuu atu se aafiaga faaleagaga i le tagata lea e tuu atu i ai e le tiakono le fata.

Na ou vaai i lena mea o tupu i se nofoaga mo tagata matutua, ina ua punou atu se tiakono e pasi atu le fata i se olomatua ao sinasina. Sa tilotilo atu o ia i le falaoa e faapei o se mea taua. E lei galo lava ia te au lana ataata a o ia taumafaina ona aapa ae lea i luga ma popo le ulu o le tiakono, ma fai atu leotele, “Se, faafetai lava!”

Sa na ona faia e lena tiakono lona tiute faaleperisitua. Ae, sa faateleina e le Alii faatinoga a le tiakono. Sa manino lava na manatua e le tamaitai le Faaola a o ia faailoa atu le lotofaafetai faamaoni mo le auaunaga a se tiakono. Sa faamautinoa atu ia te ia a o ia avatu le faamanatuga ia te ia, o le a ia maua le Agaga e faatasi ma ia. Sa le i tuua na o ia i lena aso i le nofoaga autu o le tausiga. E faapena foi le tiakono i lana auaunaga.

Atonu e le lagonaina e se aoao talavou o le Perisitua Arona, a o alu atu e aoao se aiga, o loo paga o ia ma le Alii i Lana galuega. Ou te manatua pea le molimau faigofie a se soa talavou o faiaoga o aiga, sa o atu i lo matou fale. Sa faamautu mai e le Agaga ana upu. Atonu na te le o manatuaina lena aso, ae ou te manatuaina.

O le a toe faalauteleina e le Alii taumafaiga a se alii talavou pe a valaauina o ia e avea ma se ositaulaga. O le papatisoga muamua na ia faatinoina, atonu o se talavou na te le iloa. Atonu e popole pe o le a sa’o lona ta’uga o upu ma sa’o le faatinoga o le sauniga.

Ae o le Alii lea e auauna i ai o ia, o le a faalauteleina lana taulaga. O le tagata na te papatisoina na filifili e agai atu i le ala i le ola e faavavau. O le a faia e le Alii Lana vaega e sili atu. Na Ia faia mo au i se tasi taimi, ina ua musumusu mai i lo’u taliga le tamaitiiti na ou papatisoina, ma loimata na tafe ifo i ona alafau, “Ua ou mama. Ua ou mama.”

A o e agai atu mai le tasi auaunaga faaleperisitua i le isi, o le a e vaaia ai le i ai o le Alii faatasi ma oe i le galuega. Sa ou aoaoina lenei mea mai le ma feiloaiga ma se peresitene o le korama a toeaina i se konafesi faalesiteki i tausaga ua mavae. I le konafesi, sa silia ma le 40 igoa na tuuina mai o alii mo le mauaina o le Perisitua Mekisateko.

Sa faalagolago mai le peresitene o le siteki ma musmusu mai ia te au, “O alii uma la sa lei toaaga mai a ua tatau ona avea ma toeaina.” I lo’u ofo tele, sa ou fesili i le peresitene po o le a lana polokalama sa laveai mai ai nei tagata.

Sa ia tusi atu i se alii talavou sa i le pito i tua o le falesa. Sa ia fai mai, “O ia le la. O le toatele o nei alii na toe aumaia ona o le peresitene le la o le au toeaina.” Sa nofo o ia i le pito i tua, sa fai ona ofu e masani ai, sa faaloloa ona vae ma ona seevae ua masaesae i ona luma.

Sa talosaga i le peresitene o le siteki e faafeiloai atu au i ai pe a uma le sauniga. Ina ua ma feiloai, sa ou ta’u atu i le taulealea ua ou maofa lava i le mea sa ia faia ma sa ou fesili atu i ai pe na faapefea ona ia faia. Sa faamimigi ona tauau. Sa iloagofie na ia manatu e le onomea se viiga mo ia.

Ona ia fai mai lemu lea, “Ou te iloaina le aualii uma o le nuu lenei ua le toe toaaga mai. O le toatele lava o i latou e i ai a latou taavale pikiapu. E i ai foi la’u loli. Ou te fufuluina la’u pikiapu i le mea e fufulu ai a latou taavale. Na oo ina avea i latou uma ma a’u uo.

“Ona ou faatalitali lea i se taimi e sese ai se mea i o latou olaga. E tupu pea lava. Latou te faamatala maia ia te au. Ou te faalogologo ma ou te le vaavaai masei lava. A oo la ina latou fai mai, “E i ai se mea o sese i lo’u olaga. E tatau lava ona i ai se mea e sili atu i lo lenei.’ Ou te ta’u atu i ai le mea o loo misi ma le mea e mafai ona latou maua ai. O nisi taimi latou te talitonu ia te au, ma a oo ina talitonu, ona ou alu lea ma ave matou te o.”

Ua outou silafia la le mafuaaga na tauagafau ai o ia. Aua sa ia iloa sa ia faia si ana vaega itiiti ma sa faia e le Alii mea na totoe. O le Alii na pa’i atu i loto o na alii i o latou faafitauli. O le Alii na tuu atu ia i latou le lagona e tatau lava ona i ai se mea e sili atu ma se faamoemoe o le a mafai ona latou maua.

O le taulealea—pei o outou—o se auauna a le Alii, sa na ona talitonu afai na te faia lana vaega itiiti, o le a fesoasoani le Alii i na alii i luga o le ala agai i le aiga, ma le fiafia lea e na o Ia e mafai ona tuuina atu ia i latou. Sa iloa foi e lenei taulealea, na tofia o ia e le Alii e avea ma peresitene o le korama a toeaina aua o le a ia faia lana vaega.

O le a i ai taimi i lau auaunaga o le a e le maua ai le vaaiga ma le ofoofogia o le faamanuiaina e pei o lena peresitene o le korama a toeaina. O le taimi lena o le a e manaomia ai le talitonu mautinoa, o le Alii, ua silafia o le a e faia lau vaega i le galuega, na Ia tofia oe e ala i Ana auauna ua faamaonia. O le faatuatua i le valaauga mai le auauna a le Alii sa taua i le galuega faafaifeautalai a le tama o lo’u tamamatua o Henry Eyring.

Na papatiso o ia i le aso 11 , o Mati, 1855, i St. Louis, Misuri. E lei pine ae faauuina o ia e Erastus Snow i le tofi o se ositaulaga. O le peresitene o le Siteki a St. Louis, o John H. Hart, sa tofia o ia e faamisiona i Cherokee Nation i le aso 6 o Oketopa.¹ Sa faauuina o ia o se toeaina i le aso 11 o Oketopa. Na tietie atu o ia i se solofanua mo le Misiona a Cherokee i le aso 24 o Oketopa. Sa 20 ona tausaga ma na o le fitu masina talu ona liliu mai i le taimi lea.

Afai e i ai se tasi ua umia le perisitua e i ai se mafuaaga e lagona ai le le agavaa po o le lei saunia, o Henry Eyring. Na pau le mafuaaga sa ia maua ai le lototoa e alu ai, sa ia iloa i lona loto na valaauina o ia e le Atua e ala i Ana auauna faatagaina. O le punavai lea o lona lototele. Atonu o le punavai lea o lo tatou lototele onosai ai, po o le a lava o tatou valaauga i le perisitua.

Ina ua uma ona auauna atu Elder Eyring mo ni tausaga faigata se tolu faapea ai ma le maliu o le peresitene o le misiona, sa filifilia ia Henry ma lagolagoina e avea ma peresitene o le misiona i se sauniga sa faia i le aso 6 o Oketopa, 1858. Sa faate’ia o ia ma sa pei o le faate’ia o se tiakono fou. Na ia tusia, “Sa fai lava si o’u faateia ina ua tofia i lena tofi peitai ona o le finagalo o le usoga, sa ou talia fiafia ai, ma le lagona i lena lava taimi o lo’u vaivai tele ma le leai o se poto masani.”²

Ua femalagaai nei Peresitene Eyring i Nuu o Cherokee, Creek, ma Choctaw i le 1859. Na auala mai i ana taumafaiga, na faaopoopo ai e le Alii e pei ona tusia e Henry, “se aofaiga i le ekalesia.” Sa ia faatulagaina ni paranesi se lua ae sa matauina “e toaitiiti lava sa tulimataia ma lagolagoina le galuega.”³

I le tausaga mulimuli ane, sa feagai Henry ma se faigata moni lava lea sa faasaina ai e taitai faalemalo o tagata na ia auauna i ai ia faifeautalai o le Au Paia o Aso e Gata Ai ona toe faia a latou galuega. A o ia mafaufau loloto po o le a se mea e tatau ona ia faia, sa ia manatua le faatonuga mai lana peresitene o le misiona na i ai muamua, lea na faailoa atu i ai o le a faaumiumi atu lana misiona seia oo i le 1859.⁴

Ia Oketopa o lena tausaga, sa tusi atu Henry ia Peresitene Polika Iaga mo se taitaiga, ae na te lei maua se tali i lana fesili. Sa tusia e Henry, “O le le mafai ona maua o se tala mai le Au Peresitene o le Ekalesia, sa ou valaau atu ai i le Alii i le tatalo, ma ole atu ia te ia e faailoa mai ia te au lona mafaufau ma lona finagalo e tusa ai ma lo’u toe nofo ai pea po o le malaga atu i Siona.”

Sa ia faaauau: “O le miti lea na tuuina mai ia te au e tali a’i la’u tatalo. Sa ou miti na ou taunuu i le Aai o [Sate Leki] ma ou alu loa lava i le ofisa o [Peresitene Polika] Iaga, lea na ou maua atu i ai o ia. Sa ou fai atu ia te ia: ‘[Peresitene] Iaga, ua ou tuua la’u misiona, ua ou sau i lo’u lava loto, ae afai e i ai lava se mea ua sese ai lena mea, ua ou fiafia e toe foi e faauma la’u misiona.’ [I le miti sa tali mai ai le perofeta]: ‘Ua lava le umi na e nofo ai, e le afaina.’

Sa tusia e Henry i lana apitalaaga, “O le i ai o miti muamua ia na faataunuuina moni lava, sa ia te au le faatuatua e talitonu ai, o le mea lea o le a i’u i ai ma amata ai loa lava ona sauniuni ou te malaga.”

Na taunuu o ia i le Aai o Sate Leki i le aso 29 o Aokuso, 1860, ma sa tele ina savali i le malaga atoa. O le aso na sosoo ai, sa ia savali atu ai i le ofisa o Peresitene Polika Iaga.⁵

O upu nei na faamatala ai e Henry le mea na tupu: “Sa [ou] talanoa atu ia [Peresitene] Iaga, o le sa taliaina [a’u] ma le agalelei tele. Sa ou fai atu ia te ia, ‘[Peresitene] Iaga ua ou sau e aunoa ma ma se upu faapea ou te sau, ae afai ua ou sese, ua ou fiafia e toe foi ma faauma la’u misiona.’ Sa tali mai [Polika Iaga]: ‘Ua lelei, o loo matou faatalitali atu i lou foi mai.”

Sa faamatala e Henry lona olioli, ma faapea mai, “O lea la na taunuu moni ai lava la’u miti.”⁶

Na maua lona olioli i se faamautuuga faapea na la galulue faatasi ma le Alii ma vaavaaia o Ia. Sa ia aoaoina le mea e moni mo i tatou uma—faapea e musuia auauna a le Alii ia iloa le finagalo o le Alii. Ma sa faamautuina e Henry Eyring, le mea foi ua ou iloaina, faapea o le perofeta, i le avea ai ma peresitene o le perisitua, e musuia e le Atua e vaavaai ma tausia auauna a le Alii.

Po o le a lava lou valaauga i le perisitua, atonu e i ai taimi e te manatu ai e le o silafia oe e le Tama Faalelagi. E mafai ona e tatalo ia e iloa Lona finagalo, ma faatasi ai ma se manaoga faamaoni e faia soo se mea Na te poloaiina oe e fai, o le a e maua lava se tali.

O le a faatagaina oe e le Tama Faalelagi e te lagonaina o loo Ia silafia oe, Na te talisapaia lau auaunaga, ma ua oo ina e agavaa mo le faafeiloaiga mai le Alii lea e te matua manao e faalogo i ai: “Le auauna lelei e ma le faamaoni; ua e faamaoni i nai mea iti, ou te tofia oe e pule i mea e tele: ulufale maia i le fiafia o lou Alii.”⁷

Ou te tatalo mo i latou uma o e umia le perisitua ia aapa atu ma le faatuatua e laveai mai agaga uma ua tuu atu ai ia te ia le tiutetauave. O le a faaopoopo atu e le Atua Lona mana i taumafaiga a Ana auauna. O le a ootia loto o tagata e faia filifiliga o le a aumaia i latou i le ala o le talalelei e agai atu i le fiafia ma aveesea ai [latou] mai le faanoanoa.

Ou te tatalo foi ia lagona e i latou uma e umia le perisitua le alofa ma le tausiga mata’itu a le Tama Faalelagi, a le Faaola, ma le perofeta a le Atua i lona valaauga.

Ou te tuuina atu ia te outou la’u molimau faapitoa o loo tatou i ai uma i le galuega a le Alii toetu o Iesu Keriso. Ou te molimau atu ua Ia valaauina oe ma au i Lana galuega ma le iloaina lelei o le fesoasoaniga o le a tatou manaomia. O le a Ia faamanuiaina a tatou taumafaiga i talaatu o o tatou faamoemoega faamama’i, pe a tatou tuu atu o tatou tagata uma i Lana galuega. Ou te molimau atu o le perofeta a le Atua, o le peresitene o le au perisitua uma i le lalolagi, e musuia e le Atua.

E tumu au i le faafetai mo faataitaiga a le au perisitua faamaoni i soo se mea. Ua tumu foi le Tama Faalelagi ma le Faaola i le faafetai i lou faia o lau vaega. La te silafia outou ma e alolofa ia te outou. I le suafa o Iesu Keriso, amene.