Ang Sunod Ninyo nga Tikang

Ang amon pinakaagot nga apo nagalaragway sining prinsipyo. Pagkatapos nga makabalo magkamang kag dayon magtindog, siya handa nga magtilaw sa paglakat. Sa una niya nga mga pagtinguha, natumba siya, naghibi, kag nagtulok nga daw nagsiling, “Indi na gid ako—bisan san-o—magtilaw sina liwat! Magpadayon lamang ako nga magkamang.”

Sang siya nakasandad kag natumba, ang mapinalanggaon niya nga mga ginikanan wala makabatyag nga siya wala sing paglaum ukon nga siya indi na gid makalakat. Sa luyo sini gin-abot ang mga butkon nila samtang ginatawag siya, kag nagatulok sa ila, siya nagtilaw liwat nga maglakat padulong sa ila mapinalanggaon nga paghakos.

Ang mapinalanggaon nga mga ginikanan dalayon nga handa upod ang bukas nga mga butkon sa pagbaton bisan sang pinakadiutay nga tikang padulong sa husto nga direksyon. Nabal-an nila nga ang aton pagkaluyag nga magtilaw paliwat-liwat magapadulong sa pag-uswag kag kadalag-an.

Ang Manluluwas nagtudlo nga agud mapanubli ang ginharian sang Dios, dapat kita nga mangin kasubong sang isa ka bata.⁷ Gani, sa espirituhanon nga paghambal, ang unang prinsipyo amo nga kita dapat maghimo sinang aton ginhimo bilang mga bata.⁸

Upod ang pagpakubos nga iya sang bata kag pagkaluyag nga magtumod sa aton Amay sa Langit kag sa aton Manluluwas, kita maghimo sang mga tikang padulong sa Ila, dalayon nga may paglaum, bisan nga kita matumba. Ang mapinalanggaon nga Langitnon nga Amay nagakalipay sa kada matinuohon nga tikang, kag kon kita matumba, nagakalipay Siya sa kada pagtinguha nga magbangon kag magtilaw liwat.

Ang ikaduha nga prinsipyo ginpakita sang duha ka matinuohon nga mga Santos, ang kada isa madalom ang luyag nga makasapo sang kaupod sa walay katubtuban. Angay sila nga nagpangamuyo kag naghimo sang mga tikang nga puno sang pagtuo.

Si Yuri, isa ka LDS sa Russia, nagsakripisyo kag nagsupot agud makakadto sa templo nga malayo sa ila. Sa tren namutikan niya ang isa ka matahom nga babayi nga malipayon ang itsura, kag nabatyagan niya nga dapat niya ipaambit ang ebanghelyo sa iya. Tungod wala mabal-an ang iya himuon, siya nagsugod sa pagbasa sang Libro ni Mormon, nagalaum nga basi matalupangdan siya sang babayi.

Si Yuri wala makabalo nga ang babayi, si Mariya, isa man ka LDS. Wala mabal-an nga si Yuri isa man ka miyembro, kag nagasunod sa pagpabatyag nga dapat niya ipaambit ang ebanghelyo sa lalaki, si Mariya nagsugod man sa pagbasa sa iya Libro ni Mormon, nagalaum nga matalupangdan siya sang lalaki.

Ti, sang sila dungan nga nagtangla, si Yuri kag Mariya natingala nga sila pareho nga nagakapot sang Libro ni Mormon—kag huo, pagkatapos nga sila naghigugmaanay, sila ginhugpong sa templo. Subong nga adlaw, si Yuri kag si Mariya Kutepov sang Voronezh, Russia, bilang mga magkaupod sa walay katubtuban, daku nga nagabulig sa paglambo sang Simbahan sa Russia.

Ang ginapatalupangod diri indi lamang parte sa pagkaluyag sining magtiayon nga magbuhat sa pagtuo. Ini parte man sa ikaduhang prinsipyo—ang Ginuo mas labaw nga nagaparis sang aton pagkaluyag nga magbuhat sa pagtuo. Ang aton pagkaluyag nga maghimo sang tikang wala lamang ginaparisan; ini ginapasobrahan paagi sa mga bugay nga ginsaad sang Ginuo.

Ang Langitnon nga Amay kag ang Manluluwas luyag gid nga magbugay sa aton. Labi sa tanan, Sila nagapangayo lamang sang ikapulo nga bahin sang Ila ginbugay sa aton kag dayon nagasaad nga ang mga bintana sang langit pagabuksan!⁹

Kon san-o man nga kita luyag magbuhat nga may pagtuo kay JesuCristo kag maghimo sang isa pa ka tikang, labi na ang mabudlay nga tikang nga nagakinahanglan sang pagbag-o ukon sang paghinulsol, ginabugayan kita sang kabakod. ¹⁰

Nagapamatuod ako nga ang Ginuo magagiya sa aton sa—kag paagi—sa sunod naton nga mga tikang. Labaw Niya nga parisan ang aton mga pagtinguha paagi sa Iya gahum kon kita luyag nga magpadayon sa pagtilaw, paghinulsol, kag paglakat pasulong upod ang pagtuo sa aton Langitnon nga Amay kag sa Iya Anak, nga si JesuCristo.

Ang espirituhanon nga mga dulot ginasaad indi lamang sa mga nagapalangga sa Dios kag nagatuman sa tanan Niya nga mga sugo apang amo man, kita nagapasalamat, sa yadto sa aton nga “[nagatinguha] sa paghimo sini.”¹¹ Ang kabakod ginahatag sa yadtong nagapadayon sa pagtinguha kag sa pagtilaw.

Ang duha nga kinahanglanon kag sinimana nga mga palatandaan nga nagamarka sa aton pagpanglakaton pabalik sa aton Amay sa Langit amo ang nagapadayon nga kasugtanan sang ordinansa sang sacramento kag ang aton pagtuman sa Adlaw nga Inugpahuway. Si Presidente Russell M. Nelson nagtudlo sa aton sang ulihing nagligad nga kabilogan nga konperensya nga ang Adlaw sang Inugpahuway dulot sang Ginuo sa aton. Ang aton himpit nga pagtuman sa sinimana nga Adlaw sang Inugpahuway amo ang tanda naton sa Ginuo nga kita nagapalangga sa Iya.¹²

Kada Domingo kita nagasaksi nga kita “luyag nga mag-angkon sa [aton mga kaugalingon sang Iya ngalan],  kag dalayon nga magdumdom sa iya, kag magtuman sa mga sugo niya.”¹³ Bilang balos sa aton mahinulsulon nga tagipusuon kag sa aton panaad, ang Ginuo nagabag-o liwat sa ginsaad nga pagpatawad sang sala kag nagapakasarang sa aton sa “dalayon nga pag-angkon sang iya Espiritu nga mag-upod sa [aton].”¹⁴ Ang impluwensya sang Balaan nga Espiritu nagapauswag, nagapabakod, nagatudlo, kag nagagiya sa aton.

Kon sa aton pagdumdom sa Iya kada Domingo, ginahatag naton sa Manluluwas ang aton mga tagipusuon paagi sa sining duha ka importante nga mga tanda, ang aton mga pagtinguha sa liwat mas labaw nga ginaparisan sang Ginuo paagi sa mga bugay nga Iya ginsaad. Kita ginpromisahan nga, sa aton himpit nga pagtuman sa Adlaw nga Inugpahuway, ang tanan nga bugana sang kalibutan mangin aton.¹⁵

Ang banas pabalik sa aton Amay sa Langit nagapadulong sa balay sang Ginuo, kon diin kita ginbugayan sa pagbaton sang makaluwas nga mga ordinansa para sa aton mga kaugalingon kag sa nagtaliwan nga mga palangga naton. Si Presidente Boyd K. Packer nagtudlo nga “ang mga ordinansa kag mga kasugtanan mangin documento naton para pasudlon sa atubang sang [Dios].”¹⁶ Ginapangamuyo ko nga ang kada isa sa aton dalayon nga mangin takos sa kag maggamit sang aton mga temple recommend agud dalayon nga mag-alagad.

Ang ikatatlo nga prinsipyo amo ini: dapat naton batuan ang huyog sang kinaandan nga tawo nga magpabuyanbuyan, magpadugay, ukon mag-untat.¹⁷

Samtang kita nagapadayon sa banas sang kasugtanan, makahimo kita sang mga sayup, ang pila sini sa madamo nga beses. Ang pila sa aton nabudlayan sa mga pamatasan ukon mga adiksyon nga kita daw sa wala sang ikasarang sa paglutos. Apang ang pagtuo sa Langitnon nga Amay kag sa kay JesuCristo isa ka prinsipyo sang pagbuhat kag gahum.¹⁸ Kon kita luyag nga maglihok, pagabugayan kita sang kabakod agud maghinulsol kag magbag-o.

Malugaw-an lamang kita kon kita indi na maghimo sang isa pa ka matinuohon nga tikang pasulong. Indi gid kita malugaw-an kon kita himpit nga nakaangot sa Manluluwas—Siya nga wala pa gid malugaw-an kag indi gid magtugot nga kita malugaw-an!

Ginasaad ko nga ang kada isa ka tikang nga napuno sang pagtuo pagaparisan sang bulig halin sa langit. Ang paggiya magaabot samtang kita nagapangamuyo sa aton Langitnon nga Amay, nagasalig sa aton Manluluwas kag magsunod sa Iya, kag magpamati sa Balaan nga Espiritu. Ang kabakod magaabot bangud sa nagapasag-uli nga sakripisyo ni JesuCristo.¹⁹ Ang pag-ayo kag kapatawaran magaabot bangud sang grasya sang Dios.²⁰ Ang kaalam kag pagpaumod magaabot paagi sa pagsalig sa tiempo sang Ginuo para sa aton. Ang pag-amlig magaabot paagi sa pagsunod sa buhi nga propeta sang Dios, si Presidente Thomas S. Monson.

Kamo gintuga “nga [kamo] makaangkon sang kalipay,”²¹ kalipay nga mabatyagan ninyo kon kamo takos nga magbalik sa inyo Langitnon nga Amay kag sa inyo Manluluwas kag magsulod sa Ila mapinalanggaon nga paghakos.

Nagasaksi ako sa sining mga kamatuoran nga wala nagabag-o. Ang inyo mapinalanggaon nga Langitnon nga Amay kag ang Iya Anak, si JesuCristo, nagakabuhi. Kilala Nila kamo. Palangga Nila kamo. May pagpalangga nga ginadapit Nila kamo nga maghimo sang sunod ninyo nga tikang padulong sa Ila. Indi maghulat. Himoa ini karon. Sa sagradong ngalan ni JesuCristo, amen.