2010–2019
Mus Ib Ruam Tom Ntej
October 2015


Mus Ib Ruam Tom Ntej

Nej Leej Txiv Saum Ntuj Ceeb Tsheej thiab Nws Leej Tub, Yexus Khetos, caw nej mus ib ruam tom ntej los cuag Nkawd. Tsis txhob tos. Cia li mus tom ntej tam sim no.

Tsis ntev tas los kuv poob siab thaum kuv muaj kev sib ntsib nrog ib pawg Haiv Neeg Ntseeg hauv Hnub Nyoog Kawg. Kuv nug hais tias, “Leej twg xav rov qab mus nrog Leej Txiv Saum Ntuj Ceeb Tsheej nyob?” Txhua tus tau tsa tes. Ces kuv nug tias: “Leej twg ntseeg tias nej yuav mus?” Tu siab thiab xav tsis thoob, feem coob tsis tau tsa tes.

Thaum peb pom tias tus neeg uas peb yog tam sim no nyob deb ntawm tus neeg uas peb xav rais los ua, ces peb feem coob raug ntxias kom poob siab thiab tsis muaj kev ntseeg.1

Vim “tsis muaj ib yam tsis dawb huv yuav muaj peev xwm nkag tau mus rau hauv nws lub nceeg vaj,”2 yog peb xav rov qab mus nrog Nws nyob, peb yuav tsum tsis muaj kev txhaum3 thiab rais los ua neeg dawb huv.4 Yog tias peb yuav tsum ua peb ib leeg xwb, ntshe tsis muaj leej twg uas tsim nyog mus. Tiam sis peb tsis nyob peb ib leeg xwb. Muaj tseeb tiag, peb yeej tsis nyob peb ib leeg xwb.

Peb muaj Vajtswv txoj kev pab vim peb muaj Yexus Khetos thiab Nws txoj Kev Theej Txhoj.5 Tus Cawm Seej hais tias, “Yog nej yuav ntseeg kuv nej yeej yuav muaj hwj chim ua tau txhua yam uas kuv pom zoo.”6 Thaum peb muab siab rau ntseeg, peb txoj kev ntseeg loj tuaj.

Kuv xav kom peb xav txog peb lub ntsiab cai uas yuav pab peb rov qab mus nrog peb Leej Txiv Saum Ntuj Ceeb Tsheej nyob.

Hloov Los Ua Zoo Li Ib tug Me Nyuam

Peb tus tub xeeb ntxwv yaus tshaj plaws tau qhia txog lub ntsiab cai thib ib. Tom qab nws tau kawm nkag mus thiab sawv, nws twb tau xav taug kev. Muaj ob peb zaug, nws ntog, quaj, thiab ntsia peb zoo li nws hais tias, “Kuv yeej tsis kam ua li ntawd ib zaug ntxiv! Kuv yuav nkag mus xwb.”

Thaum nws ntog thiab vau, nws niam thiab nws txiv tsis tau xav tias nws tsis muaj kev cia siab los yog nws yeej yuav tsis txawj taug kev. Tiam sis nkawd ncav tes rau nws thiab hu nws, thiab vim nws ntsia nkawd, nws rov qab sim taug kev mus rau nkawd txoj kev khawm.

Peb muaj ib leej niam thiab leej txiv uas ncav tes xav txais peb txawm peb tsuas mus ib ruam xwb kom taug txoj kev yog. Nkawd paub tias qhov uas peb txaus siab rov qab sim dua yuav pab peb vam meej.

Tus Cawm Seeej qhia hais tias yog peb xav tau Vajtswv lub nceeg vaj, peb yuav tsum rais los mus zoo li ib tug me nyuam yaus.7 Yog li ntawd, hais txog sab ntsuj plig los, lub ntsiab cai thib ib yog qhov uas peb yuav tsum ua tej yam uas peb tau ua thaum peb yog cov me nyuam.8

Nrog kev txo hwj chim li ib tug me nyuam yaus thiab kev txaus siab tsom ntsoov rau peb Leej Txiv Saum Ntuj Ceeb Tsheej thiab peb tus Cawm Seej, peb ib ruam dhau ib ruam mus cuag Nkawd, es peb tsis txhob poob siab, txawm peb ntog los yog. Peb Leej Txiv Saum Ntuj Ceeb Tsheej zoo siab xyiv fab txhua zaus peb mus ib ruam xwb, thiab yog peb ntog, Nws zoo siab thaum peb siv zog sawv thiab rov qab sim dua ntxiv.

Ua Raws Li Kev Ntseeg

Muaj ob tug neeg Ntseeg uas qhia txog lub ntsiab cai thib ob, nyias muaj nyias tej kev xav nrhiav tau ib tug khub nyob mus ib txhis. Nkawd ob leeg tau thov Vajtswv kom muaj kev ntseeg ua tej yam zoo

Yuri, ib tug Neeg Ntseeg hauv Hnub Nyoog Kawg los ntawm Russia, tau rau siab ua tej yam thiab khaws nyiaj kom muaj cib fim mus rau lub tuam tsev. Nyob hauv tsheb nqaj hlau nws pom ib tug poj niam zoo nkauj uas muaj ntsej muag ci ntsa iab, es nws xav tias nws yuav tsum qhia txoj moo zoo rau tus poj niam ntawd. Nws tsis paub ua li cas, nws thiaj li pib nyeem Phau Ntawv Maumoos, cia siab hais tias tus poj niam ntawd yuav pom nws.

Yuri tsis tau paub hais tias tus poj niam ntawd, Mariya, yog ib tug Haiv Neeg Ntseeg thiab. Mariya tsis tau paub tias Yuri kuj yog ib tug mej zeej, thiab nws txais kev tshoov siab nws yuav tsum qhia txoj moo zoo rau tus txiv neej ntawd, nws thiaj li pib nyeem Phau Ntawv Maumoos thiab, cia siab hais tias tus txiv neej yuav pom nws.

Thaum nkawd ib leeg ntsia ib leeg, Yuri thiab Mariya xav tsis thoob vim nkawd ob leeg nyeem Phau Ntawv Maumoos—thiab, nkawd sib hlub thiab sib yuav nyob hauv lub tuam tsev. Hnub no, Yuri thiab Mariya Kutepov los ntawm Voronezh, Russia, yog ib khub niam txiv nyob mus ib txhis, es nkawd pab lub Koom Txoos loj tuaj nyob hauv Russia.

Qhov tseem ceeb tsis yog qhov uas ib khub niam txiv txaus siab ua li no vim nkawd muaj kev ntseeg xwb. Qhov tseem ceeb kuj yog lub ntsiab cai thib ob—tus Tswv foom koob hmoov rau peb yog peb txaus siab ua raws li kev ntseeg. Tus Tswv tsis foom koob hmoov rau peb npaum li peb txaus siab mus ib ruam tom ntej xwb; Nws yuav foom koob hmoov ntau nplua mias rau peb.

Leej Txiv Saum Ntuj Ceeb Tsheej thiab peb tus Cawm Seej yeej xav foom koob hmoov rau peb. Nkawd tsuas hais kom peb muab ib feem kaum ntawm cov koob hmoov uas Nkawd foom pub rau peb ces Nkawd cog lus tias rooj ntug yuav qhib phlo!9

Thaum peb txaus siab ua raws li kev ntseeg Yexus Khetos thiab mus ib ruam tom ntej, qhov tseem ceeb yog thaum peb yuav tsum hloov siab lees txim, ces Vajtswv muab dag zog rau peb.10

Kuv ua tim khawv tias tus Tswv yuav coj peb thaum lub sij hawm uas peb mus tom ntej tam sim ntawd. Peb siv zog npaum li cas los Nws yuav muab Nws lub hwj chim ib txhiab npaug yog peb txaus siab yeej meem sim, hloov siab lees txim, thiab mus tom ntej nrog txoj kev ntseeg peb Leej Txiv Saum Ntuj Ceeb Tsheej thiab Nws Leej Tub, Yexus Khetos.

Tus Tswv cog lus tias yuav muab tej txiaj ntsim ntawm sab ntsuj plig rau cov uas hlub Vajtswv thiab ua raws li tag nrho Nws cov lus txib, thiab cov uas xav ua li ntawd.11 Cov uas nrhiav thiab siv zog tsis tu ncua yuav txais dag zog.

Ob lub cim ntawm peb txoj kev mus cuag peb Leej Txiv Saum Ntuj Ceeb Tsheej txhua lub lim tiam yog txoj kev khi lus thiab txoj kab ke ntawm lub cim nco txog thiab peb txoj kev hwm Hnub Caiv. Thaum lub tuam rooj sab laj tas los, Thawj Tswj Hwm Russell M. Nelson qhia peb hais tias Hnub Caiv yog tus Tswv lub txiaj ntsim rau peb. Qhov uas peb rau siab hwm Hnub Caiv txhua lub lim tiam yog ib lub cim rau tus Tswv uas qhia hais tias peb hlub Nws.12

Txhua Hnub Caiv peb ua tim khawv rau nws hais tias peb “txaus siab txais [Nws] lub npe, thiab nco ntsoov txog nws, thiab coj raws li nws tej lus txib.”13 Yog peb muaj siab xav hloov siab lees txim thiab cog lus rau Nws, tus Tswv rov qab cog lus tias Nws yuav zam peb lub txim thiab ua kom peb muaj tau “Nws tus Ntsuj Plig nrog [peb] nyob.”14 Tus Vaj Ntsuj Plig Dawb Huv lub hwj chim txhawb nqa, qhia thiab coj peb.

Thaum peb nco txog Nws txhua Hnub Caiv, yog peb tig peb lub siab mus rau tus Cawm Seej dhau ntawm ob lub cim no, ces peb txais tau cov koob hmoov ntau nplua mias raws li Nws tau cog lus tseg. Tus Tswv cog lus tias, yog peb rau siab hwm Hnub Caiv, peb yuav txais tag nrho tej yam nyob hauv lub ntiaj teb.15

Txoj kev rov qab mus cuag peb Leej Txiv Saum Ntuj Ceeb Tsheej coj peb mus rau tus Tswv lub tsev, qhov chaws uas peb txais tau cov kab ke cawm seej rau peb tus kheej thiab cov uas tas sim neej lawm uas peb hlub. Thawj Tswj Hwm Boyd K. Packer qhia hais tias “cov kab ke thiab kev khi lus yog peb daim ntawv tso cai nkag mus rau hauv Vajtswv lub xub ntiag.”16 Kuv thov kom peb txhua tus yuav tsim nyog thiab siv peb tej daim ntawv tso cai nkag tuam tsev tsis tu ncua.

Kov Yeej tus Neeg Ntiaj Teb

Lub ntsiab cai thib peb yog li no: peb yuav tsum tiv tau kom tsis txhob ua li neeg ntiaj teb ua kom laug sij hawm los sis tso tej yam zoo tseg.17

Thaum peb ua raws li peb tej kev khi lus, peb yeej yuav ua yuam kev, ib txhia yuav ua yuam kev ntau zaus. Peb ib txhia muaj yees los sis coj yam ntxwv tsis zoo uas peb xav tias peb tsis muaj hwj chim kov yeej. Tiam sis kev ntseeg Leej Txiv Saum Ntuj Ceeb Tsheej thiab Yexus Khetos yog ib lub ntsiab cai ntawm kev muaj peev xwm thiab hwj chim.18 Yog peb txaus siab ua tej yam, ces peb yuav txais dag zog txaus kom hloov siab lees txim thiab txais dag zog txaus kom hloov tau.

Peb poob tsuas yog thaum peb tsis muaj kev ntseeg mus ib ruam tom ntej. Peb yuav tsis poob hlo li yog peb rau siab koom nrog tus Cawm Seej ntawm lub ntiaj teb—tus uas yeej tsis tau ua txhaum thiab yeej yuav tsis tso peb tseg!

Cov Koob Hmoov uas Vajtswv Cog Lus Tseg

Kuv cog lus rau nej tias txhua zaus nej muaj kev ntseeg mus ib ruam tom ntej, Vajtswv yuav pab. Peb txais kev coj thaum peb thov peb Leej Txiv Saum Ntuj Ceeb Tsheej, tso siab rau peb tus Cawm Seej thiab ua raws li Nws hais, thiab mloog tus Vaj Ntsuj Plig Dawb Huv lus. Peb txais dag zog vim muaj Yexus Khetos txoj kev theej txhoj.19 Kev kho thiab kev zam txim los ntawm Vajtswv txoj kev tshav ntsuj.20 Kev muaj tswv yim thiab kev ua siab ntev los ntawm kev tso siab rau tus Tswv txoj kev teem sij hawm rau peb. Kev pov hwm yeej los ntawm kev ua raws li Vajtswv tus yaj saub, Thawj Tswj Hwm Thomas S. Monson hais.

Vajtswv tau tsim nej “kom [nej] yuav muaj kev xyiv fab,”21 kev xyiv fab thaum nej tsim nyog rov qab mus nrog nej Leej Txiv Saum Ntuj Ceeb Tsheej thiab tus Cawm Seej nyob hauv Nkawd lub xub ntiag.

Kuv ua tim khawv txog tej yam tseeb no. Nej Leej Txiv Saum Ntuj Ceeb Tsheej thiab Nws Leej Tub, Yexus Khetos, muaj txoj sia nyob. Nkawd paub nej. Nkawd hlub nej. Nkawd caw nej mus ib ruam tom ntej los cuag Nkawd. Tsis txhob tos. Cia li mus tom ntej tam sim no. Los ntawm Yexus Khetos lub npe dawb ceev, amees.