O Lau Laa i Le Isi Laasaga
Saunia e Elder Randall K. Bennett
O Le Fitugafulu
O lou Tama Faalelagi agaalofa ma Lona Alo, o Iesu Keriso, ua valaaulia oe e laa i le isi laasaga agai atu ia i Laua. Aua le faatali. Laa nei loa.
Ua ootia lou loto i se fonotaga talu ai nei ma le Au Paia o Aso e Gata Ai lelei. Sa faia le fesili, “O ai e manao e toe mafuta faatasi ma le Tama Faalelagi?” Sa sii uma i luga lima. O le isi fesili na sosoo ai: “O ai e talitonu o le a faamanuiaina?” Paga lea, sa tele lima na tuu i lalo.
A tatou vaaia se avanoa i le va o tagata ua tatou i ai nei ma tagata tatou te mananao ia avea ai i tatou, e faaosoosoina le toatele ia filifili e lafoai ese le faatuatua ma le faamoemoe.1
Ona “e leai se mea lē mama e mafai ona mau faatasi ma le Atua,”2 ina ia mafai ai ona toe mafuta faatasi ma Ia, o lea e manaomia ai ona faamamaina i tatou mai agasala3 ma faapaiaina.4 Afai e ao ona tatou faia na o i tatou, lenei mea, e leai ma se tasi o i tatou o le a oo i ai. Ae e le o tuua na o i tatou. O le mea moni, e le o tuua na o i tatou.
Ua ia i tatou le fesoasoaniga a le Lagi ona o Iesu Keriso ma Lana Togiola.5 Sa fetalai le Faaola, “Afai tou te faatuatua mai ia te au o le a outou maua le mana e fai ai soo se mea e tatau ai ia te au.”6 A faatino le faatuatua, o le a faateleina foi le faatuatua.
Tatou mafaufau faatasi i ni mataupu faavae se tolu o le a fesoasoani ia i tatou i la tatou malaga e toefoi atu i lo tatou Tama Faalelagi.
Avea ma se Tamaitiiti
O le atalii a se tasi o le ma fanau sa faaalia le mataupu faavae muamua. Ina ua ia iloa totolo ona sosoo ai lea ma le tu i luga, sa ia taumafai e savali. I ana uluai taumafaiga laiti, sa ia pa’u ai, tagi, ma pupula mai e faapea, “O le a ou le—toe—taumafai lava!”
Ina ua ia tautevateva, sa lei lagonaina e ona matua ua leai sona faamoemoe pe o le a ia le toe savali lava. Ae sa la faaloaloa atu o la lima a o valaau atu ia te ia, ma faatasi ai ma lona faataupupula atu ia i laua, sa ia toe taumafai ai e laa atu i luma i le la opo agaalofa.
O matua agaalofa e saunia i taimi uma ma o la lima e faaloaloa mai e fusi atu e oo lava i nai laa aupito itiiti i le itu sa’o. Latou te iloaina o lo tatou naunautaiga e taumafai ma saga taumafai pea, o le a taitai atu ai i le alualu i luma ma le manuia.
Sa aoao mai le Faaola ina ia maua le malo o le Atua, e tatau ona avea i tatou e faapei o se tamaitiiti.7 O lona itu faaleagaga la, o le uluai mataupu faavae e faapea, tatou te manaomia ona faia mea sa tatou faia a o tatou tamaiti.8
Faatasi ai ma le lotomaualalo ma le naunau faatamaitiiti e taulai atu i lo tatou Tama Faalelagi ma lo tatou Faaola, tatou te faia ai ni nai laa e agai atu ia i Laua, aua lava nei faavaivai i le faamoemoe, e tusa lava pe tatou te pauu. E olioli lo tatou Tama Faalelagi i laasaga taitasi o le faatuatua, ma a tatou pauu, e olioli o Ia i taumafaiga taitasi e toe tulai ai i luga ma toe taumafai foi.
Faatino i le Faatuatua
O le mataupu faavae lona lua ua faaalia e ni tagata faamaoni se toalua o le Au Paia, e taufai mananao uma i laua ma le naunautai e saili se soa e faavavau. Sa tofu faia e i laua uma i le agaga tatalo ni laasaga na faatumulia i le faatuatua.
O Iuli, o se tasi o le Au Paia o Aso e Gata Ai i Rusia, na ositaulaga e faia se malaga umi i le malumalu. I luga o le nofoaafi sa ia matauina ai se tamaitai lalelei faatasi ai ma ona foliga na susulu mai, ma sa ia lagonaina e tatau ona ia faasoa atu i ai le talalelei. Sa amata ona ia faitauina le Tusi a Mamona, ma le faamoemoe na te matauina mai.
Sa lei iloaina e Iuli o le tamaitai lea, o Maria, o se tasi o le Ekalesia. Ma lona leiloaina foi o [Iuli] o se tasi o le Ekalesia, ma mulimuli foi le uunaiga e faasoa atu le talalelei ia te ia, o lea sa amata ai ona faitau foi e Maria le Tusi a Mamona, ma le faamoemoe e fesili atu Iuli.
Ina ua la taufai ea a’e i luga, sa ofo ia Iuli ma Mariya i le vaai atu i le Tusi a Mamona i lima o le tasi ma le isi—ae, ina ua alolofa faamamai i la’ua sa faamauina i la’ua i le malumalu. O le asō, ua tele le sao o Iuli ma Mariya Kutepov, o se soa e faavavau, i le Ekalesia i Rusia.
O le faamamafa i i e le na o le naunau o le ulugalii e faatino i le faatuatua. E faatatau foi i le mataupu faavae lona lua—e sili atu i le na ona faafetauia e le Alii o lo tatou naunautaiga e faatino i le faatuatua. O lo tatou naunau e laa e le na ona faafetaiaia—e matua sili atu—e ala i Ana faamanuiaga folafolaina.
Ua naunau lo tatou Tama Faalelagi ma lo tatou Faaola e faamanuia i tatou. O le mea moni, e na o le tasi vaesefulu le mea ua poloai mai ai mai mea ua La faamanuia ai i tatou ona folafola mai lea o le a tatala mai pupuni o le lagi!9
Soo se taimi tatou te faatino ai ma le naunautai le faatuatua ia Iesu Keriso, ma faia se isi la’a aemaise i se laa e le lagolelei e manaomia ai le suiga po o le salamo, e faamanuiaina lava i tatou i le malosi.10
Ou te molimau atu o le a taiala i tatou e le Alii—ma e ala—i a tatou laa e sosoo ai. O le a Ia le na ona faafetaui o a tatou taumafaiga ma Lona mana pe afai tatou te naunau e taumafai pea, salamo, ma agai i luma ma le faatuatua i lo tatou Tama Faalelagi ma Lona Alo, o Iesu Keriso.
Ua folafola mai meaalofa faaleagaga e le na o i latou o e alolofa i le Atua ma tausi Ana poloaiga uma, ae faafetai foi ia i latou o e “[saili] e faia.”11 E tuuiina mai le malosi ia i latou o e saili pea i ai.
O pou faailoga e lua e tatau ai i vaiaso taitasi lea e maka ai la tatou malaga i lo tatou Tama Faalelagi o le feagaiga faifai pea lea o sauniga o le faamanatuga ma lo tatou tausia o le Sapati. Na aoao mai e Peresitene Russell M. Nelson i le konafesi aoao talu ai faapea o le Sapati o le meaalofa lea a le Alii ia i tatou. O lo tatou tausia faalevaiaso o le Sapati o la tatou faailoga lea i le Alii tatou te alolofa ia te Ia.12
O aso Sapati taitasi tatou te molimauina ai ua tatou “naunau e tauave i o [tatou lava luga Lona suafa], ia manatua pea o ia, ma tausi Ana poloaiga.”13 O le taui mo o tatou loto salamo ma a tatou tautinoga, e faafouina e le Alii le faamagaloga na folafola mai o agasala ma mafai ai ona tatou “maua lona Agaga e faatasi ma i [tatou].”14 E faaleleia atili, faamalosia, aoao mai, ma taialaina i tatou e le faatosinaga a le Agaga Paia.
Afai o le manatuaina o Ia, e liliu atu ai o tatou loto i le Faaola e ala i nei pou faailoga e lua, o a tatou taumafaiga ua le na ona fetaui ma Ana faamanuiaga folafolaina. Ua folafola mai, faatasi ai ma le tuuto atu e tausia faamaoni le aso Sapati, o le a avea le atoaga o le lalolagi ma a tatou.15
O le ala e toe foi ai i le Tama Faalelagi e tau atu i le maota o le Alii, lea e faamanuiaina ai i tatou e maua ai sauniga faaola mo i tatou lava ma o tatou aiga ua maliliu. Na aoao mai e Peresitene Boyd K. Packer faapea o “sauniga ma feagaiga e avea ma o tatou tusipasi i le afioaga o le Atua.”16 Ou te tatalo o le a tatou agavaa pea lava ma faaaoga o tatou pepa faataga o le malumalu e auauna atu ai e le aunoa.
Faatoilalo le Tagata Natura
O se mataupu faavae lona tolu o lenei: e tatau ona tatou faafetaiaia le faamoemoega a le tagata o le lalolagi e faatuutuu pe lafoai loa.17
A o tatou alualu i luma i le ala o le feagaiga, o le a tatou faia ni mea sese, o nisi e faatele ona fai. O nisi o i tatou e tauivi ma amioga poo vaisu ia tatou te manatu ua leai se malosi e faatoilalo ai. Ae o le faatuatua i le Tama Faalelagi ma Iesu keriso o se mataupu faavae o le faatinoga ma le mana.18 Afai tatou te naunau e faatino, o le a tuuina mai ia i tatou le malosi e salamo ai ma suia.
Tatou te toilalo pe afai tatou te le la’a i luma i se isi laa faamaoni. O le a tatou le toilalo pe afai tatou te tauamo ma le faamaoni ma le Faaola o le lalolagi—O Ia o le e le toilalo lava ma o le a le tuulafoaiina lava i tatou.
Faamanuiaga Folafolaina
Ou te folafola atu o laa taitasi ua tumu i le faatuatua, o le a taunuu i le fesoasoani mai le lagi. E maua mai le taitaiga a o tatou tatalo i lo tatou Tama Faalelagi ma faalogo atu i le Agaga Paia. E maua le malosi ona o le taulaga togiola a Iesu Keriso.19 E maua le faamalologa ma le faamagaloga ona o le alofa tunoa o le Atua.20 E maua le poto ma le onosai i le faalagolago i le taimi a le Alii. E maua le puipuiga i le mulimuli i le perofeta soifua a le Atua, o Peresitene Thomas S. Monson.
Na foafoaina outou “ina ia outou maua le olioli,”21 o le olioli o le a outou lagonaina pe a outou toe foi agavaa atu i lo outou Tama Faalelagi ma le Faaola ma laa atu ai i la La’ua opo mafanafana.
Ou te molimau atu i nei upumoni a’ia’i O loo soifua lo outou Tama alofa i le Lagi ma Lona Alo o Iesu Keriso. Ou te iloa e alolofa i la’ua ia te outou. O loo la valaaulia outou ma le alolofa ia laa i le isi laasaga. Aua le faatali. Laa nei loa. I le suafa o Iesu Keriso, amene.