Nona iSolisoli Veidusimaki e Dua na Gone

A lutudromu tiko e dua na tama ni gone. Eratou a taubale wavokita e dua na drano, o rau na luvena, kei na vugona. E wavoliti ratou na ulunivanua veipaini, e karakarawa na lomalagi, ka veiciriyaki na o vulavula malumu, ka vakabasikata na totoka kei na maravu. Ni rau sa katakata ka oca na gone, erau nanuma na turaga e rua me rau sa vavai rau ka qalo kosova na drano qiqo.

E rawarawa na kena irairai—me yacova na gauna sa vakila kina o tamadrau ni sa vaka e laudre sobu, sa vaka me bibi na ka kecega. A biligi koya sobu ki boto ni drano na wai, ka yaco mai vua e dua na yalo ni domobula. Me na vude tiko vakacava—vakabibi ni vava tiko na luvena yalewa lailai?

E seyavu na domona ni kaci yani; sa rui yawa sara na vugona me sauma mai na vakatakekere ni veivuke. A galili ka lomaleqa o koya.

E rawa beka ni o raitayaloyalotaka na nona galili, ni sega ni rawa ni kukuva e dua na ka me tatakube kina ka guraka na nomu bula kei na luvemu? Ka ni rarawa, ni o keda kece eda dau vakila e dua na itagede ni mataqali yalo vakaoya ni da sotava na gauna vaqo ni gadreva vakabibi na veivuke me da bula ka vakabulai ira eda dau lomana.

Ni lomataqaya tu, sa qai vakila mai ni dreti koya sobu tiko na bi ni nona ivava curumiwai. Ni saga me vude tiko, sa tekivu tovolea o koya me luvata nona ivava. Ia e vaka me rau vesuki tu ena dua na iceru. Sa curumiwai tu na wa ni vava, ka vakavuna me qa sivia na kena ivesu.

Ena iotioti ni nona igu ni sasaga, a rawata rawa me luvata laivi na ivava mai yavana, ka qai taluva yani na ivava, ka lutu totolo sara ki na boto ni drano. Ni sa galala mai na icolacola bibi ka dreti koya sobu tiko, sa qai qalotaki koya kei na luvena yalewa icake. Sa qai rawa vua me qalo ki liu ena gauna oqo, ka toso yani ki na veitaqomaki ena tai kadua ni drano.

So na gauna eda na rairai vakila vaka eda sa luvu tiko. E rawa ni bibi na bula. Eda bula tiko ena “dua na vuravura kosakosa ka osooso. … Kevaka eda sega ni qaqarauni, sa rawa ni [vakaluvuca] tani na veika ni Yalotabu na veika ni vuravura oqo.”¹

Me da muria vakacava na nona ivakaraitaki na tama oqo ka biuta laivi eso na bibi ni vuravura eda kauta voli—me rawa kina ni vude toka e dela ni wai na uludra na luveda kei na noda vakasama lomaleqa? Ena rawa vakacava me da, me vaka na ivakasala i Paula, “biuta laivi tu na ka bibi kece”?² Me da vakarautaki ira vakacava na luveda ki na siga sa na sega kina ni rawa ni ra kubeti keda toka kei na noda ivakadinadina—ni sai ira saraga era qalo tiko?

Ena yaco mai e dua na kena isau ni da kila na ivurevure vakalou ni kaukauwa oqo. Oqo e dua na ivurevure e dau vakawaleni ena vuqa na gauna, ia e rawa ni vakayagataki e veisiga me vakamamadataka na noda icolacola ka tuberi ira na luveda taleitaki. Na ivurevure oqori sai koya na isolisoli veidusimaki ni Yalo Tabu.

Ena yabaki walu, sa rawa ni ra papitaiso na gone. Era vulica baleta ka veiyalayalati kei na Kalou. Ena wavoliti ira tu o ira era dau lomana ni ra tabadromuci ka cabe mai na tobu ena yalo ni reki. Oti era qai ciqoma na isolisoli ni Yalotabu e sega ni vakamacalataki rawa, na isolisoli ka rawa ni dusimaki ira voli ni ra bulataka na veivakalougatataki oya.

E kaya o Elder David A. Bednar: “Na rawarawa ni [veivakadeitaki] e rawa ni vakavuna noda raibaleta na kena bibi. Na va na vosa oqo—‘Ciqoma na Yalo Tabu’—era sega ni vosa cavuti wale tu ga; ia, era sa ivakaro ni matabete—e dua na ivakasala tauci mai ena lewa me cakacakataki ka sega ni waraki me tukuni vei keda.”³

Dau nodra gagadre tu na gone me ra caka vinaka ka me ra vinaka. E rawa ni da vakila nodra savasava, nodra savavuka. Era dau kidava talega vakavinaka na domo malua, lailai.

iVakatakilakila

Nodra qaravi na gone ni Nifai

Ena 3 Nifai 26, e vakaraitaka vei keda na iVakabula na nodra rawaka vakayalo na gonelalai:

“A sa sereka na wa ni yamedra ka ra sa vosataka vei ira na qase na veika sa levu ka veivakurabuitaki, io sa levu cake mai na veika sa vakatakila oti ko Koya vei ira na tamata. …

“… Era sa raica ka rogoca ko ira na lewevuqa ni ra sa vosataka na ka e veivakurabuitaki ko ira na gonelalai.”⁴

Eda na vakalevutaka vakacava o keda na itubutubu na nodra kila vakayalo na noda gonelalai? Eda na vakavulici ira vakacava me ra biuta laivi na veivakayarayarataki vakavuravura ka nuitaka na Yalotabu ni da sega ni tiko vata kei ira ka ra tiko duadua voli ena wai titobu e so ni nodra bula?

Meu wasea mada vei kemuni eso na vakasama.

Taumada, e rawa ni da vakatakila vei ira na luveda ni ra rogoca ka vakila tiko na Yalotabu. Me da lesuva tale mada na Veiyalayalati Makawa ka raica na nona vakayacora vei Samuela o Ilai na ka vata saraga oqo.

A rogoca vakarua na gonetagane o Samuela e dua na domo ka cici vei Ilai, ka kaya, “Koi au ga.”

“Au a sega ni kaci,” e sauma o Ilai.

Ia “sa sega mada ni kilai Jiova ko Samuela, ka sa sega mada ni vakatakilai vua na vosa i Jiova.”

Ena ikatolu ni gauna, sa qai kila ko Ilai ni sai Jiova a kacivi Samuela ka kaya vei Samuela me kaya, “Mo ni vosa mai Jiova ni sa vakarorogo na nomuni tamata.”⁵

Sa tekivu me vakila, vakadinadinataka, ka vakarorogo ko Samuela ki na domo ni Turaga. Ia a sega ni tekivu kila na cauravou lailai oqo me yacova ni sa qai vukei koya o Ilai me kila. Ni sa vakavulici sa qai yaco me matau vei Samuela na domo malua, ka lailai.

iKarua, e rawa ni da vakarautaka na noda itikotiko kei ira na luveda me ra vakila na domo malua, lailai. “E vuqa na qasenivuli ni vosa vulagi era vakabauta ni vinaka duadua nodra vulica na gone e dua na vosa ena ‘parokaramu ni vulici ni vosa vulagi,’ ka ra vakavolivoliti mai vei ira tale eso era dau vosataka na vosa oya ka ra kacivi me ra vosataka. Era vulica mera kakua ni cavuta ga na vosa, ia me ra madila ka vakasama talega ena ivosavosa vou. Na vanua [vinaka duadua] ni ‘luvuci’ me baleta na vuli vakayalo o ya ena loma ni itikotiko, na vanua e rawa ni yavutaki kina na ivakavuvuli vakayalo ni bula ena veisiga.”⁶

“Mo ni gumatua ni vakavulica vei ira na luvemuni na [vosa ni Turaga], ka dau vosataka ni kemuni sa tiko ena nomuni vale, ni kemuni sa lako voli ena sala, ka ni kemuni sa koto sobu, ni kemuni sa duri cake.”⁷ Na luvuci ni noda matavuvale ena Yalotabu ena tadolava na lomadra na luveda ki na Nona veivakayarayarataki.

iKatolu, e rawa ni da vukei ira na luveda me ra kila na ivakarau e vosa kina vei ira na Yalotabu. E vakavuvulitaka o Josefa Simici: “Kevaka e lako mai o Koya vua e dua na gonelailai, ena vakamatautaki Koya ki na nona ivosavosa kei na kilaka na gonelailai.” ⁸ A raica rawa e dua na tina me vaka ni duatani nodra ivakarau ni vuli na gone—eso era vuli ena veika era raica, rogoca, tara, se vakila—na levu ga ni nona vakadikevi ira tiko na luvena, na levu ni nona kila rawa ni Yalo Tabu e dau vakavulici ira na luvena ena sala e so era vuli vakavinaka yadua kina.⁹

E dua tale na tina e wasea e dua na ka e sotava ena nona vukei ira na luvena me ra kila na Yalotabu. “Ena so na gauna,” a vola o koya, “era sega ni dau raica rawa na [gone] ni vakanananu talelesu mai, na yalovinaka ni oti na tagi, se na nanumi ni dua na ka ena gauna taudonu sa ra sala kece ni nona veitaratara [kei ira] na Yalo Tabu.” A tomana o koya, “Au vakavulici iratou tiko na [luvequ] me ratou vakanamata ki na veika eratou vakila [ka cakacakataka].”¹⁰

Na vakilai kei na vakadinadinataki na Yalotabu ena kauta mai na kilaka vakayalo ki na nodra bula na luveda, ka na yaco me matata cake tikoga vei ira na domo era sa kila rawa. Sa na vaka na ka a tukuna o Elder Richard G. Scott: “Ni nomuni matua mai ka rawata na ka mai na veidusimaki ni Yalotabu, na nomu yalodei ena veika o vakila ena rawa me yaco me vakadeitaki vakalevu mai na nomu vakararavi ena veika o raica se rogoca.”¹¹

Me da kakua ni rere ni raici ira na luveda ni ra sobuta na wai ni bula, ni da sa vukei ira me kau tani mai vei ira na icolacola vakavuravura. Eda sa vakavulici ira me ra bula ena isolisoli veidusimaki ni Yalotabu. Na isolisoli oqori ena vakamamadataka tikoga na icolacola era kauta voli ka muataki ira lesu ki na nodra itikotiko vakalomalagi kevaka era bulataka tiko ka muria na kena veivakauqeti. Ena yaca i Jisu Karisito, emeni.