Te Bwaintangira ni Kairakin te Ataei
Ti na kanga n reireniia natira n totokoi ana kariiri te aonaaba ao ni kakoaua te Tamnei?
E taraa n ae e nang bwabwa te karo ae ataei. Ngaia, ma natina aika uoman, ao ai tamana a nakonako ni katobibia tenei. A katobibiaki n taian maunga ake a rabunaki n taian aroka ae te maiango, ao karawa e mawaawa, e rabunaki n te nang ae mainaina, ni kaota te tamaroa ao te rau. Ngke a bueeroro ataei ao a kua, uoman mwaane a baireia bwa a na kakukuuia ataei iaon nukaia ao n uaua rinanon te tenei n te raroa ae bon tau.
E taraa ni bebete—ni karokoa te tai are ngke e a moanna te karo ni katikaki rikaaki, bwaai ni kabane a taraa n rawawata. Te ran e a notuia nako kabin te nei, ma namakinan te raraoma ae e a roko irouna. E na kanga n teimatoa ni beibeti iaon te ran—ao ni karaoia ma natina te aine ae onoti ae kukuu iaon nukana?
E tabe ni keerikaki bwanaana ngke e wewete n takarua ngke e a raroa riki; e rangin raroa nako ai tamana arei mai irouna ni kaekaan ana bubuti ibukin buokana. E namakina te maroa ao te aki buokaki.
Ko kona n namakina te maroa n aron ae e namakinna, n aki kona ni karoko nakon te bwai are ko na taua ni kamatoa ao n rootaki n te tabo ae kakorakai ibukin maium ao natim? N akea te tekeraoi, ngaira ni kabane ngkai ti a tia n rinanon te kaangaanga ao te namakin aei riki ngkana ti mena n taabo ike ti rang kainnanoi iai buokara bwa ti aonga ni maiu ao ni kataniia naake ti tangiriia.
Ngke e roko irouna te maaku, e nooria bwa ana kau ake a mara man n tibu n ran a katikia rikaaki nako naano. Inanon kakatakin beibetina iaon te ran, e kataia ni kanakoi ana kau aika tinebu mai waena. Ma e taraa n ae kanga a kairoroaki n tauaki. Kabaean ana kau atibu n ran, ma ni kamatoatoa riki kabaeana.
E na aekakira aron maanin ana kabanea ni bwarannano, e kataia ni kanakoi kaau mai waena, ao n tokina a bwara kabaean ana kau, ni waekoa ni bwaka nako kabin te nei. Ni kainaomataakina man te rawawata are e katikia nako naano, e waekoa ni uaua rake ma natina te aine. E a kona ngkai ni uaua nako mooa, ni waaki nako ni kamanoia n iteran te nei are te iterana.
N tabetai ti namakinna bwa kanga ai aron ae ti a bwabwa. Te maiu e kona ni karawawata. Ti maeka n “te aonaaba ae katabetabe. … Ngkana ti aki karaurau, bwain te aonaaba aei a kona n [oneamwiin] bwain te Tamnei.”1
Ti na kanga n ira ana katooto te karo aei ao ni kanakoi bwain te aonaaba are ti uouoti, bwa ti aonga n aki karawawataaki ni bwain te aonaaba? Ti na kanga ngaira, n aron ana reirei Bauro, “ni kaki rawawata ni kabane”?2 Ti na kanga ni katauraoia natira ibukin te bong ngkana a aikoa kona n nim ma ngaira ao ara kakoaua—ngke boni ngaiia ake a uaua?
E roko te kaeka ngke ti kinaa te buoka aei ibukin te korakora. Bon te buoka ae mamanrereaki, irarikina e kona ni kamanenaaki ni katoa tai ni kabebetei uotara ao ni kairiia natira aika onoti. Te buoka anne bon ana bwaintituaraoi ni kairiiri te Tamnei ae Raoiroi.
Ni waniua te ririki, ataei a kona n rinanon te bwabetito. A reiakinaki taekan ao karaoan te berita ae tabu ma te Atua. Naake a tangiriia ake irarikiia ngkai a otirake ao n otinako man te tabo ni bwabetito ma namakinan te kimwareirei. Ngkanne a kona ni karekea ana bwaintituaraoi te Tamnei ae Raoiroi ae amarau, te bwaintituaraoi are e na teimatoa ni kairiia ngkai a maiu ibukin te kakabwaia anne.
E taku Unimwaane David A. Bednar: “Bebeten te [kamatoaki] e karaoira bwa ti na tarariaoa kakawakina. Taeka aika aua aikai—‘Kam na anganaki te Tamnei are e Raoiroi’—tiaki atongana bwa a aki mwamwakuri; irarikina, a katea tuan te nakoanibonga—te kariaia n te kauring bwa ko na karaoa te mwakuri ma e na aki karaoaki nakoim.”3
Ataei a taneiai ma nanoia ni karaoa ae tamaroa ao ni karikiia bwa a na tamaroa riki. Ti kona n namakinna bwa akea aia kairua, a itiaki. Iai naba aia kakanamakin nakon te bwanaa ae, maraara ma n abebete.
N 3 Nibwaai 26, te Tia Kamaiu e kaota aia konabwai ataei n te tamnei:
“E kabwarai neweia, ao a bon taekin nakoia aia bakatibu taekan bwaai aika a korakora ma ni kamimi, aika a korakora riki nakon are e kaoti nakoia te botanaomata. …
“… A nooria ataei aikai; eng, ao merimeri naba a bon kaurei wiia man taekin bwaai aika a kamimi.”4
E kanga arora ngaira kaaro ni karikirakei aia konabwai n tamnei natira aika uarereke? Ti na kanga n reireiniia ni katoka ana kairoro te aonaaba ao n onimakina te Tamnei ngkana ti aki mena irarikiia ao a maroa inanon tain karawawataakin maiuia?
N na tibwai nakoimi tabeua iango.
Te moan, ti kona ni karaoia ara ataei bwa a na ataia nningai ae a na ongo ao n namakina te Tamnei. Ti na oki rikaaki nakon tain te Otetemanti n nooria bwa e kanga ni karaoa aei Eri ibukin Tamuera.
Te ataeinimwaane ae Tamuera e ongo te bwanaa uatai te tai ao e biri nakon Eri, ao e taku, “Aei Ngai.”
“I aki wewete,” e kaeka Eri.
Ma “E tuai n ata Iehova Tamuera, ao e tuai ni kaotaki naba ana taeka Iehova nakoina.”
N te katentai, E ataia Eri bwa te Uea e a tia ni wetea Tamuera ao n tuanga Tamuera bwa e na kangai, “Taetae, Iehova; ba e ongo am toro.”5
E a moanna Tamuera n namakinna, ni kinaa, ao ni kakauongo nakon bwanaan te Uea. Ma te rorobuaka aei e aki te roko n ataia ni karokoa are e buokaki iroun Eri. Ao n tiana n reireiaki, e a kona riki Tamuera ni kinaa te bwanaa ae maaraara, man abebete.
Te kauoua, ti kona ni katauraoa mweengara ao natira bwa a na namakina te bwanaa ae maaraara, man abebete. “Angiina taan reirei n te taetae mai iabatera a kakoaua bwa ataei a reiakina te taeka n ae tamaroa ni ‘burokuraem akea a iria,’ ike a katobibiaki irouia tabeman taan taetae n te aba ao a riai n taetae iai n tii ngaiia. A aki tii reiakinaki n taekin taeka, ma a na taetae n akea burena ao n iango n te taetae ae boou. Ae [tamaroa] ‘burokuraem ake a na iria’ bon te tabo n reirei ibukin te tamnei i bon inanon te mweenga, ike reirei n te tamnei a bon boboto iai aan maiura n te bong ae koraki.”6
“Ko na reirei’a raoi natim [ana taeka te Uea] n aikai, ma n taekin ngkana ko tekateka i nanon am auti, ao n nakonakom i nanon te kawai, ao ni wenem, ao n teirakem.”7 Ni kairekerekeia ara utu inanon te tamnei e na kateimatoaia natira ni butimwaea te Tamnei.
Te kateniua, ti kona ni buokiia natira n ota bwa e na kanga n taetae te Tamnei nakoia. E reirei Iotebwa Timiti, “Ngkana E kawara te ataei ae uarereke, E na kataneia nakon ana taetae ao ana konabwai te ataei ae uarereke.”8 Temanna te tina e kunea bwa ngkai a kakaokoro reiakinaia ataei—tabeman a reirei man te tamnei, te kakauongo, rinanon te riingaki, ke rinanon te namakin—ni korakoran taratarakiia raoi natina irouna, e na korakora naba ana atatai bwa te Tamnei ae Raoiroi e reireiniia natina ni kawai ake a na reiakinaki raoi iai ngaiia n tatabemaniia nako.9
Temanna te tina e tibwa ana taneiai ni buoka aron reiakinaia natina ni kinaakin te Tamnei. “N tabetai,” e koroboki, “[ataei] a aki ataia bwa te iango ae okioki, namakinan te rau imwiin tangiia, ke uringan te bwai teuana n te tai ae eti bon kawai ni kabane are e reitaki iai te Tamnei [ma ngaiia].” E reitia nako, “I reireiniia [natiu] bwa a na kabanei nanoia iaon baike a namakin [ao ni mwakuri iaoia].”10
Namakinan ao kinaakin te Tamnei e na uota te konabwai n tamnei ni maiuia natira, ao te bwanaa are ataia e na itiaki riki man itiaki nakoia. E na titebo ma are e taekinna Unimwaane Richard G. Scott: “Ngkai ko karekea am taneiai ao n tokanikai iroun te Tamnei, am onimaki ni iango ake ko namakin a kona ni koaua nakon are ko bon onimakin baike ko noori ke n ongo.”11
Ti riai n aki maaku ngkai ti nooria natira n rin inanon te ran ni kamaiu, bwa ti a tia ni buokiia ni katoka rawawatan te aonaaba mairouia. Ti reireniia ni maiu ibukin ana bwaintituaraoi ni kairiiri te Tamnei. Te bwaintituaraoi aei e na reitinako ni kabebetei uotaia are a uouoti ao ni kairiia n oki nakon mweengaia i karawa ngkana a maiuakinna ao n iriira ana wirikiriki te Tamnei. N aran Iesu Kristo, amen.