Ang Nagagiya nga Dulot sang Isa ka Bata

Isa ka batan-on nga amay ang nagalugdang sa tubig. Siya, upod ang duha ka anak, kag ang ugangan nga lalaki nagpamasyar palibot sa isa ka linaw. Sila nalibotan sang matahum nga mga bukid nga puno sang kakahuyan, kag ang langit asul nga puno sang panganod, naghatag sang katahum kag kalinong. Sang nainitan kag ginkapoy ang mga bata, sila ginpaaba sang duha ka lalaki kag naglangoy sing malip-ut patabok sa linaw.

Daw hapos ini—tubtob nabatyagan sang amay nga siya nagalugdang, ang tanan daw nangin mabug-at. Ginbutong siya sang tubig paidalom sa linaw, kag nakabatyag siya sang kakulba. Paano siya magapabilin nga nagalutaw—kag himuon nga upod ang palangga nga anak nga babayi sa iya likod?

Nagsinggit siya apang wala mabatian; ang iya ugangan tuman ka malayo agud magtabang. Siya nagaisahanon kag wala sing mahimo.

Mabatyagan bala ninyo ang iya nagaisahanon nga kahimtangan, wala sang makapyutan kag nabudlayan sa ital-ital nga sitwasyon para sa iya kabuhi kag sang iya anak? Walay palad, kita tanan makaagi sa amo man nga balatyagon kon ara kita sa mga sitwasyon nga kinahanglang gid naton ang tabang agud makaluwas kag luwason yadtong mga palangga naton.

Halos nagsala, natukiban niya nga ang iya natubigan nga mga sapatos ang nagabutong sa iya paidalom. Samtang nagakapakapa agud magpabilin nga nagalutaw, gintinguhaan niya nga ubahon ang iya sapatos. Apang ang mga ini daw sa nagtapik sa iya mga tiil. Ang mga sintas naghugot kay nabasa, kag nangin mas mahugot ang pagkahigot sa iya sapatos.

Sa daw pinakaulihi gid niya nga pagtinguha, nauba niya ang mga sapatos sa iya mga tiil, kag sang ulihi nakakas ang mga ini, kag nalugdang sa idalom sang linaw. Hilway sa kabug-aton nga nagabutong paidalom sa iya, gilayon siya kag ang iya anak nga babayi nagbutwa. Mahapos siya nga naglangoy, padulong sa kaluwasan sa pihak nga bahin sang linaw.

Kon kaisa kita tanan makabatyag nga kita daw sa malumos. Ang pangabuhi sarang nga mangin mabug-at. Nagapangabuhi kita sa “isa ka magahud kag masako nga kalibutan. …Kon kita wala nagahalong, ang mga butang sining kalibutan sarang [maglumos] paggwa sa mga butang sang Espiritu.”¹

Paano naton sundon ang halimbawa sining amay kag patabugon ang pila ka mga pabug-at sang kalibutan nga aton ginapas-an, agud nga mapabilin naton nga nagalutaw ang aton mga anak kag ang naligban naton nga mga hunahuna? Paano naton buhaton ang laygay ni Paul nga, “bayaan sa higad ang tanan nga pabug-at”?² Paano naton ihanda ang aton mga anak sa adlaw nga kon sila indi na sarang mangunyapot sa aton kag sa aton mga pagpamatuod—kon sila na ang nagalangoy?

Ang sabat ara kon mabal-an naton ang langitnon nga kuluhaan sang kabakod. Ini nga kuluhaan masami ginakabig sing kubos, apang sarang ini magamit sa matag-adlaw agud mangin mamag-an ang aton palas-anon kag maggiya sa aton palangga nga mga anak. Ina amo ang nagagiya nga dulot sang Balaan nga Espiritu.

Sa edad nga otso anyos, ang kabataan sarang mabunyagan. Sila makatuon parte sa kag maghimo sang kasugtanan sa Dios. Ginapalibotan sila sang ila mga pinalangga samtang sila ginatugmaw kag magbutwa halin sa bulunyagan nga may dako nga kasadya. Dayon ila mabaton ang di-mahambal nga dulot sang Balaan nga Espiritu, dulot nga sarang maggiya sa ila sing dalayon samtang sila takos sa sina nga bugay.

Si Elder David A. Bednar nagsiling: “Ang pagkasimple sang [kumpirmasyon] makahimo sa aton nga di-makakita sang importansya sini. Ining mga tinaga—‘Batuna ang Balaan nga Espiritu’—indi pagpahayag sang pagpahimunong; apang, ang mga ini nagatukod sang isa ka mando sang priesthood—may awtoridad nga laygay sa pagbuhat kag indi ang maghulat lamang.”³

Ang kabataan may kinaandan nga handom sa pagbuhat sang maayo kag mangin maayo. Mabatyagan naton ang ila pagka-inosente, ang ila pagkaputli. May ara man sila sang dako nga pagkabatyag sa malinong, kag diutay nga tingog.

Litrato

Pagpangalagad sa mga Kabataan nga Nephite

Sa 3 Nephi 26, ang Manluluwas nagpakita sa aton sang espirituhanon nga ikasarang sang kabataan:

“Ginpalos Niya ang ila mga dila, kag sila naghambal sa ila mga amay sang dalagko kag makatilingala nga mga butang, nga mas labaw pa sang sa ginpakita na niya sa mga katawhan. …

“… Alangay nila nga nakit-an kag nabatian ining mga kabataan; huo, bisan ang mga lapsag nagtikab sang ila mga baba kag naghambal sang makatilingala nga mga butang.”⁴

Bilang mga ginikanan, paano naton mapadako ang espirituhanon nga ikasarang sang aton diutay nga mga bata? Paano naton sila tudloan sa pagbiya sang kalibutanhon nga mga impluwensya kag sa pagsalig sa Espiritu kon indi naton sila kaupod kag kon sila nagaisahanon sa dalagko nga mga problema sang ila mga kabuhi?

Ipaambit ko sa inyo ang pila ka mga ideya.

Una, sarang naton ipatalupangod sa aton kabataan kon sila nagapamati ukon nagabatyag sa Espiritu. Balikan naton ang Daan nga Testamento kag lantawon naton kon paano ginhimo ini ni Eli kay Samuel.

Ang batan-on nga si Samuel nakabati sang duha ka beses kag nagkadto kay Eli, nagasiling, “Ari ako.”

“Wala ako magtawag,” sabat ni Eli.

Apang “si Samuel wala pa makakilala sa Ginuo, ukon ang pulong sang Ginuo ginpahayag nga wala pa sa iya.”

Sa ika-tatlo nga beses, nabal-an ni Eli nga ang Ginuo nagtawag kay Samuel kag ginhambalan si Samuel nga magsiling, “Maghambal, Ginuo; kay ang imo alagad nagapamati.”⁵

Si Samuel nagsugod sa pagbatyag, pagkilala, kag pagpamati sa tingog sang Ginuo. Apang ining batang lalaki wala nagsugod sa paghangop tubtob si Eli nagpatigayon sining pagkilala. Kag bangud natudloan, si Samuel nangin mas nakakilala sa malinong, kag diutay nga tingog.

Ika-duha, sarang naton ihanda ang aton mga puluy-an kag mga kabataan nga makabatyag sa malinong, kag diutay nga tingog. “Madamo nga manunudlo sang iban nga mga hinambalan ang nagapati nga ang mga bata labing maayo nga makabalo sang isa ka hinambalan sa ‘immersion programs,’ kon diin sila ginpalibotan sang iban nga nagahambal sinang hinambalan kag sila mismo nagabuylog sa paghambal sini. Manuto sila indi lamang sa paghambal sang mga tinaga, apang ang maghambal sing batid kag bisan ang maghunahuna sa bag-o nga hinambalan. Ang pinakalabing maayo nga ‘immersion’ nga kahimtangan para sa espirituhanon nga edukasyon amo ang ara sa puluy-an, kon diin ang espirituhanon nga mga prinsipyo amo ang basihan sang matag-adlaw nga pagpangabuhi.” ⁶

“Itudlo ninyo [ang mga pulong sang Ginuo] sing maukod sa inyo mga kabataan, kag pagahambalan ang mga ini kon kamo ara sa inyo puluy-an, kon kamo nagapanglakaton, kag kon kamo nagahigda, kag kon kamo nagabugtaw.” ⁷ Ang paghulom sa aton mga pamilya sa Espiritu magapabilin sa mga tagipusuon sang aton mga kabataan nga bukas sa Iya impluwensya.

Ika-tatlo, sarang naton buligan ang aton kabataan nga mahangpan kon paano ang Espiritu nagahambal sa ila. Si Joseph Smith nagtudlo: “Kon Siya magduaw sa isa ka bata, Siya magpaanyo sa hinambalan kag ikasarang sang isa ka diutay nga bata.”⁸ Isa ka iloy ang nakatukib nga bangud ang kabataan nagatuon sing magkatuhay—ang pila nagatuon paagi sa paglantaw, sa pagpamati, sa pagtandog, ukon sa paghulag—sa dugang nga pag-obserba niya sa iya mga anak, mas dugang niya nga nabal-an nga ang Balaan nga Espiritu nagatudlo sa iya mga anak sa mga paagi nga sila mas labi nga makabalo sing mas labing maayo.⁹

Isa pa ka iloy ang nagpaambit sang inagihan sa pagbulig sa iya mga anak nga makabalo sa pagkilala sa Espiritu. “Kon kaisa,” sulat niya, “[ang kabataan] wala makabalo nga ang isa ka nagabalikbalik nga panghunahuna, balatyagon sang kasulhay pagkatapos sang paghibi, ukon ang makadumdom sang isa ka butang sa husto gid nga tion, ini tanan mga paagi nga ang Balaan nga Espiritu nagapakig-ugyon [sa ila].” Nagpadayon siya, “Ginatudloan ko ang akon mga anak nga magtumod sa ila nabatyagan [kag magbuhat bangud sini].”¹⁰

Ang pagbatyag kag pagkilalala sa Espiritu magadala sang espirituhanon nga ikasarang sa mga kabuhi sang aton kabataan, kag ang tingog nga makilal-an nila mangin mas maathag kag mas maathag sa ila. Ini mangin kasubong sang ginsiling ni Elder Richard G. Scott: “Samtang kamo nagaangkon sang inagihan kag kadalag-an sa paggiya sang Espiritu, ang inyo kumpiyansa sa mga pagpabatyag nga inyo nabatyagan mangin mas pat-od sang sa butang nga inyo makit-an kag mabatian.”¹¹

Indi kita dapat mahadlok samtang ginalantaw naton ang aton mga anak nga nagaubog sa mga tubig sang kabuhi, bangud kay ginbuligan naton sila nga magbiya sa ila mga kaugalingon sang kalibutanhon nga kabug-at. Gintudloan naton sila nga mangin takos sa nagagiya nga dulot sang Espiritu. Ini nga dulot magapadayon sa pagpamag-an sang ila palas-anon kag magatuytoy sa ila pabalik sa ila langitnon nga puluy-an, kon sila takos sini kag magsunod sa mga pagpabatyag sini. Sa ngalan ni JesuCristo, amen.