Lub Txiaj Ntsim uas Coj Ib tug Me Nyuam
Peb yuav ua li cas qhia peb cov me nyuam kom tsis ua raws li lub ntiaj teb hais thiab tso siab rau tus Ntsuj Plig?
Ib leej txiv tsev hluas tog rau hauv qab dej. Nws thiab nws ob tug me nyuam thiab nws tus yawm txiv tau taug kev mus ib ncig ntawm ib lub pas dej. Muaj cov roob hauv pes nyob ib puag ncig, lub ntuj ntsuab xiab, muaj huab dawb pawg, thiab txhua yam yeej zoo nkauj thiab kaj siab lug. Thaum cov me nyuam sov dhau thiab nkees lawm, ob tug txiv neej no txiav txim siab tias yuav ev ob tug me nyuam hla lub pas dej.
Yeej yooj yim heev—mus txog thaum lub sij hawm uas tus txiv tsev xav tias muaj dab tsi rub nws zuj zus rau hauv qab dej, txhua yam yeej hnyav heev lawm. Cov dej tshoob nws mus rau hauv qab dej, thiab nws pib ntshai heev lawm. Nws yuav ua li cas thiaj ntab tau—thiab yuav ua li cas thaum nws muaj nws tus ntxhais nyob ntawm lub nraub qaum?
Nws hu nrov nrov kom tau kev pab; nws tus yawm txiv nyob deb dhau nws thiaj tsis hnov. Nws xav tias nws nyob ib leeg thiab ua tsis tau dab tsi.
Nej sim xav seb, yuav zoo li cas yog yus nyob ib leeg zoo li nws, tsis muaj dab tsi rau yus tuav tau thiab yus nrog yus tus me nyuam raug xwm txheej zoo li no? Tu siab uas peb txhua tus muaj tej kev xav zoo li no thaum peb xav tau kev pab heev kom ua neej tau thiab cawm cov uas peb hlub.
Nws ntshai kawg, es nws txawm paub hais tias nws nkawm khau ntub tag thiaj rub nws mus rau hauv qab dej. Thaum nws ua seb nws puas ntab tau, nws sim hle nws nkawm khau hnyav. Tiam sis zoo li hle tsis tau nws nkawm khau hlo li. Txoj hlua khi khau nqus tau dej ntau, thiaj haj yam khi nkawm khau khov ntxiv.
Tej zaum yog qhov kawg ua ntej tsis muaj kev cia siab lawm, nws txawm hle tau nkawm khau kom dim tau, thiab nkawm khau poob mus rau hauv qab dej sai heev. Vim tsis muaj qhov hnyav ntawd rub nws kom poob rau hauv qab dej, nws cia li ua rau nws thiab nws tus ntxhais ntab tau. Nws thiaj li ua luam dej mus rau sab tid rau ntug dej.
Tej lub sij hawm peb xav tias zoo li peb tog rau hauv qab dej. Lub neej no yeej muaj nra ev hnyav heev. Peb nyob hauv “ib lub ntiaj teb uas nrov thiab maj heev. … Yog peb tsis ceev faj, tej yam ntawm lub ntiaj teb yuav nrov dua li tus Ntsuj Plig tej lus.”1
Peb yuav ua li cas kom coj raws li tus txiv tsev no thiab hle tej yam uas hnyav hauv lub ntiaj teb uas peb pheej ris, peb thiaj pab tau peb cov me nyuam kom tsis txhob tog rau hauv qab dej? Peb yuav ua li cas kom ua raws li Povlauj qhia tias, “cia li muab txhua yam uas thaiv peb kev … tso pov tseg?”2 Peb yuav ua li cas kom npaj tau peb cov me nyuam rau hnub uas lawv tos tsis tau peb thiab peb tej lus tim khawv—thaum lawv yog cov uas ua luam dej?
Peb txais tau lus teb thaum peb paub tias lub dag zog no yeej los ntawm Vajtswv los. Yog ib qho uas neeg feem coob tsis tshua xav txog, tiam sis qhov no yuav pab peb txhua hnub kom peb lub nra tsis hnyav thiab kom coj peb cov me nyuam uas muaj nqi heev. Qhov ntawd yog lub txiaj ntsim Vaj Ntsuj Plig Dawb Huv uas coj peb kev.
Thaum muaj yim xyoo, cov me nyuam lawv xaiv tau ua kev cai raus dej. Lawv kawm txog thiab khi lus nrog Vajtswv. Cov uas lawv hlub nyob ib puag ncig thaum lawv raus dej thiab tawm ntawm lub dab dej los nrog txoj kev xyiv fab heev. Ces lawv txais lub txiaj ntsim Vaj Ntsuj Plig Dawb Huv, ib lub txiaj ntsim uas yuav coj lawv tsis tu tsis tseg thaum lawv ua neej tsim nyog muaj txoj koob hmoov ntawd.
Txwj Laug David A. Bednar hais tias: “Tej zaus qhov uas txoj [kev pom zoo] no yooj yim ua yuav ua rau peb tsis pom tias nws tseem ceeb npaum li cas. Cov lus no—‘Cia li txais tus Vaj Ntsuj Plig Dawb Huv’—tsis yog ib co lus uas lawv lam seev suab hais xwb; tsis yog li ntawd, yog cov lus uas txib ntawm lub pov thawj hwj, kev ntuas kom ua hauj lwm, tsis txhob raug lwm yam ua hauj lwm rau yus.”3
Cov me nyuam yeej xav ua zoo thiab ua neeg zoo. Peb hnov tau lawv txoj kev ncaj ncees, lawv txoj kev dawb huv. Lawv kuj paub mloog tau lub suab yau yau.
Nyob hauv 3 Nifais 26, tus Cawm Seej qhia tias cov me nyuam sab ntsuj plig muaj zog npaum li cas:
“Nws tau ua rau lawv tej nplaig muag, thiab lawv tau hais tej yam loj thiab zoo kawg nkaus uas xav tsis thoob rau lawv [leej] txiv, twb loj dua li tej uas nws tau ua rau cov neeg paub. …
“… Lawv tau pom thiab tau hnov cov me nyuam yaus no; muaj tseeb tiag, tej me nyuam mos liab kuj tau qhib lawv tej qhov ncauj thiab tau hais tej yam zoo kawg uas xav tsis thoob.”4
Peb cov niam tsev txiv tsev yuav ua li cas kom peb cov me nyuam yau muaj zog ntawm sab ntsuj plig. Peb yuav ua li cas qhia lawv kom tsis ua raws li lub ntiaj teb hais thiab tso siab rau tus Ntsuj Plig thaum peb tsis nrog lawv nyob thiab thaum lawv nyob lawv tus kheej hauv cov dej tob ntawm lawv lub neej?
Cia kuv qhia ob peb lub tswv yim rau nej.
Qhov thib ib, peb qhia tau peb cov me nyuam thaum lawv hnov tus Ntsuj Plig. Cia peb xav txog zaj nyob hauv Phau Qub kom pom Elis ua li cas pab Xamuyees ua li no.
Xamuyees hnov ib lub suab ob zaug thiab khiav rau Elis, hais tias, “Kuv nyob ntawm no.”
Elis teb hais tias, “Kuv tsis tau hu koj.”
Tiam sis “Xamuyees tsis paub hais tias yog tus Tswv, rau qhov tus Tswv tsis tau hu nws dua ib zaug li.”
Thaum zaum peb, Elis paub tias tus Tswv tau hu Xamuyees thiab qhia kom Xamuyees hais tias, “Tus Tswv, thov koj cia li hais; koj tus tub [qhe] tab tom mloog.”5
Xamuyees pib hnov tau, paub, thiab mloog tus Tswv lub suab. Tiam sis tus tub hluas tsis tau pib to taub mus txog thaum Elis pab nws paub. Thiab tom qab Elis qhia nws, Xamuyees yuav paub ntxiv tias lub suab yau yau no zoo li cas.
Qhov thib ob, peb npaj tau peb tsev neeg thiab peb cov me nyuam kom hnov lub suab yau yau. “Ntau tus kws qhia lwm yam lus ntseeg tias cov me nyuam kawm tau lus zoo tshaj thaum lawv muaj lwm tus uas hais yam lus ntawd nyob ib puag ncig thiab lawv yuav tsum hais yam lus ntawd lawv tus kheej thiab. Tsis yog lawv kawm hais lus xwb, tiam sis lawv kawm txawj hais thiab siv yam lus ntawd xav txog tej yam. Qhov chaw zoo tshaj plaws rau kev kawm txog sab ntsuj plig yog nyob hauv lub tsev, kom peb qhia tau cov ntsiab cai ntawm sab ntsuj plig ua neej niaj hnub nim no.”6
“Nej yuav tsum muab [tus Tswv tej lus] qhia rau nej tej me nyuam, thiab niaj hnub hais txog tej lus ntawd, tsis hais thaum nej nyob hauv tsev, thaum nej taug kev, thaum nej so thiab thaum nej ua hauj lwm.”7 Qhov uas peb mloog tus Ntsuj Plig lus nyob hauv peb tsev neeg tsis tu tsis tseg yuav pab peb cov me nyuam lub siab qhib rau Nws lub hwj huam.
Qhov thib peb, peb pab tau peb cov me nyuam to taub tus Ntsuj Plig hais li cas rau lawv. Yauxej Xamiv qhia hais tias: “Yog Nws los cuag ib tug me nyuam yau, Nws yuav kho Nws tej lus kom tus me nyuam yau ntawd to taub.”8 Ib tug niam tsev kawm hais tias vim cov me nyuam nyias muaj nyias txoj kev kawm—ib txhia pom, ib txhia hnov, ib txhia siv tes taw kawm—thaum nws saib nws cov me nyuam, nws paub tias tus Vaj Ntsuj Plig Dawb Huv siv tus txheej txheem zoo qhia nws cov me nyuam.9
Ib tug niam tsev qhia txog ib zaug thaum nws pab nws cov me nyuam kawm paub tus Ntsuj Plig zoo li cas. Nws sau hais tias, “Tej lub sij hawm [cov me nyuam] tsis paub tias ib qho uas lawv rov qab xav txog, kev nplij siab tom qab lawv quaj, los sis kev nco txog ib yam dab tsi thaum lub sij hawm zoo yeej yog tag nrho tej yam uas tus Vaj Ntsuj Plig Dawb Huv siv kom hais lus [rau lawv].” Nws hais ntxiv hais tias, “Kuv qhia kuv cov me nyuam kom tsom ntsoov rau tej yam uas lawv hnov [thiab ua raws li tej ntawd].”10
Kev hnov thiab paub txog tus Ntsuj Plig yuav ua rau peb cov me nyuam muaj zog ntawm sab ntsuj plig hauv lawv lub neej, thiab lawv yuav paub lub suab ntawd meej zuj zus tuaj. Yeej yuav zoo li Txwj Laug Richard G. Scott hais tias: “Thaum nej kawm ntxiv thiab txawj cia tus Ntsuj Plig coj, nej yuav tso siab ntau dua rau tej uas nej hnov hauv nej tej siab es tsis tshua tso siab rau tej yam uas nej pom tau los sis pob ntseg hnov tau lawm.”11
Peb tsis tas ntshai thaum peb pom peb cov me nyuam hla cov dej ntawm lub neej no, vim peb tau pab lawv tshem lawv tej nra hnyav ntawm lub ntiaj teb no mus. Peb tau qhia lawv kom paub ua neej raws li tus Ntsuj Plig txoj kev coj. Lub txiaj ntsim no yeej yuav pab lawv tej nra tsis hnyav thiab coj lawv rov qab mus rau lawv lub tsev saum ntuj ceeb tsheej yog tias lawv mloog nws lus thiab ua raws li nws tej kev tshoov siab. Los ntawm Yexus Khetos lub npe, amees.