En Seri ah Kisakis en Kaweid
Ia mwomwen atail pahn padahkihong neitail serihkan soikala songosong kan en sampah oh likih Ngehno?
Pahpa pwulopwul men udahn kikihralahr nan pihlo. Ih, nah seri riemen, oh en ah pwoud ah pahpa kohla alu limwahn pilap ehu. Re mih nan pwungen dohl kaselel me audaudkihda tuhke pahin, oh pahn lahng me poh mei, audaudkihda kisin depwek pwetepwet kan, me kihda lingan oh meleilei. Ni serih ko ahr pwangadahr oh karakar, ohl riemeno pilahnehda serihko en amwpwuh irahda oh irail kisin papalahte ekis palio pihlo.
E mwomwen mengei—lau lel ansou me pahpao kehn me e mwomwen wie kohkohdier, soahng koaros mwomwen toutoulahr. Pihl kihdier ih nan kapin pihlo, pepehm en saloh ahpw kohdohngehr ih. Iamwomwen ah pahn kak wie pampap te—oh wia mwo ni nah kisin serepeino ah mihmi pohn pwopweo?
Ngileo solahr sansal ansou me ira wie dohdohlao; en ah pwoud pahpa sohte kak rongki ah nohn dohsangehro. E kehn me e kelekelehpw oh anahne sawas.
Ke kak medewe soangen pepehm en kelekelehpw me e pehm di, ni sohte kak daperidi emen pwehn kol oh weiweikek nan pwunod en ahmw mour oh mour en noumw seri? Ele, kitail koaros iangehr lelohng nan irair en soangen pepehm wet ni atail mih nan irair me kitail udahn anahne diar sawas pwe kitail en kak mour oh kapitala irail akan me kitail poakoahng.
Kereniong en salohda, ah e tehkada me ah suhto me kihkihdi ih nan pihlo ki ah toutoukilahr pihl. Ni ah songosong en wie peipei powe, e uhd song en kihsang suht toutouo ni neho. Ahpw udahn e teng. Sahl en suhto umpwoskipesengki pihl oh tengehngehr ni suhto.
Ihme kawuhdi ah salohu, e song en kihsang suhto ni nehu, oh suhto mwuterekda oh sapwedek da,oh mwadangete kihrla nan pihlo. Saledek sangehr katoutou me wie pwupwuhsdi ih pah, e mwadangete pwuhsda ih oh nah serepeino powe. Met e kakehr papla mwowe, oh mwekmwekid kohwei ni keneinei ni keilen pihlo.
Ekei pak kitail pahn kin ahneki pepehm en me kitail duhla. Mour kak katoutou. “Kitail mih nan sampah me katairong oh kediropw. … Ma kitail sohte pahn kanaiehng, dipwisou en sampah kak mih la nan dowen Ngehno.”1
Iamwomwen atail pahn alasang karasaras en pahpa menet oh koskihsang ekei dipwisou en sampah me kitail wauwa, pwe kitail en dehr toutoukihla dipwisou en sampah? Ia mwomwen atail pahn, ni duwen Paul ah kaweidki, “kesehsang kitail mehkoaros me kerempwai kitail”?2Ia mwomwen atail pahn kak kaunopada neitail serihkan ohng rahn me re sohlahr pahn mih pahn atail epwel de mih pahn atail kadehde—ma irail me pein uhd wie pampap?
Pasapeng kin kohdo ansou me kitail kin kasawihada kehlail wet me kohsang powe. Kehlail wet ekei pak kitail kin sohte katapaniki, ahpw e kak doadoahk rehtail ansou koaros pwehn kamarara ihda atail wesik oh kahluwa neitail seri kesempwal akan. Kehl wet iei kisakis en kaweid me kohsang rehn Ngehn Sarawio.
Ni sounpar waluh, serih kan kakehr iang alehdi pepdais. Re kin esehla oh wiahda inou ohng Kauno. Irail akan me re poakpoake kin kapil irail ni ahr kin kohdahsang nan wasahn pepdaiso ni ahniki pepehm en peren laud. Re ahpw kin uhd alehdi kisakis sohte sansalo sang rehn Ngehn Sarawio, kisakis me kak kaweid irail ansou koaros ni ahr kin warohng en momourki kapaio.
Elder David A. Bednar koasoaia: “Duwen mengei en alehda kisakis en Ngehn Sarawio kak wiahiong kitail en sohte kilang kesempwal peo. Lepin lokaia siluh pwukat—‘Alehda Ngehn Sarawi’—sohte wia mehn ndalahte; ahpw re audaudkihda kosoned sang rehn priesthood ko—e wia poahngoak manaman ehu en doadoahngki oh kaidehn en kisin doadoahngki te.”3
Seri kan kin ahniki pein pepehm en men wia me mwahu oh en kin mwahu. Kitail kak kehn ahr mehlel, ahr mwakelekel. Re kin kak kehn laud kisin ngil tikitiko.
Nan 3 Nephi 26, Sounkomouro kasalehiong kitail wen ngehn sarawi me kin mih rehn serih kan:
“E ketin lapwahda lohrail akan, oh irail eri koasoai ohng arail pahpa kan mehkan me kesempwal oh kopwuriamwei kan, me laudsang mehkan e ketin kasalehiongehr aramas akan. …
“… Irail koaros kilangehr oh rongehr seri pwukat; ehi pil seri pwelel kin kihpeseng nan ewerail akan oh kin kosoia me kopwuriamwei akan.”4
Ia mwomwen ni duwen pwukoah en kitail pahpa nohno kan pahn kalaudehla dewen ngehn sarawi rehn neitail serih kan? Ia mwomwen atail pahn padahkiong irail en kesehla dipwisou en sampah oh likih Ngehno ni ansou me kitail sohte mih rehrail oh irail kelekelehpw nan ansou kan nan arail mour?
I pahn ehukiong kumwail ekei ire.
Keieu, kitail kak padahkiong neitail serihkan ren kin ese rongada oh kehnda Ngehno. Kitail pwurala nan poadoapoad en Kadehde Mering kitail kilang mwomwen Ilai ah wia soangohte ohng Samuel.
Kisin Samuel rong ngihlo pak riau oh tangala rehn Ilai, nda, “Iet ngehi.”
“I sohte lukwer,” Ilai sapengki.
Ahpw “Samuel sohte ese me iei Kauno mwo, pwe Kauno sohte kin mahseniong mahs.”
Ni kesiluh en ansou o, Ilai tehkada me Kauno me ketin malimalipe Samuel oh ndahiong Samuel en sapeng patohwan, “Maing, Kaun; komw ketin mahsen, pwe sapwellimomwi laduwet patohwan rongorong.”5
Samuel tepida kehn, kasawihiada, oh rong oh kapwaiada kepitien Kauno. Ahpw kisin pwutaket sohte wehwehkihla lau Ilai sewesehki ih en wehwehkihla. Oh sang ni ah kasukuhlda, Samuel tepida kin ahnla ngihl tikitiko.
Keriau, kitail kak kaunopada imwatail oh neitail serihkan en kehn ngihl tikitiko. “Tohto sounpadahk me kin lokaiahki ehu soangen lokaia kamehlele me seri kin esehla ehu lokaia nan ‘prokram akan me re kin iang mihmi loale,’ me wehwehki ansou me re kin mih nan pwungen irail me kin koasoaiki lokaiao oh re anahne iang pil doadoahngki lokaiao. Re sohte esehla te mwomwen nda lokaiahko, ahpw re udahn kin maiengala koasoaiki lokaiahko oh pil iangahki madamadau duwehtete pwihn me ahneki lokaiahko. Wasa me keieu ‘mwahu me serihkan pahn iang towehda’ ohng kasukuhl en pali ngehn iei nan ihmw, wasa me padahk en palingehn kak wiahda kisehn momour en rahn koaros.”6
“Padahkiong noumwail seri kan [Sapwellimen Kauno mahsen], kataman kin irail ahnsou me kumwail kin mihmi nan imwamwail oh pil ni ahnsou me kumwail kin mihmiseli ekis wasa tohrohr, ni ansou me kumwail kin kommoal oh pil ni ahnsou me kumwail kin wiewia amwail doadoahk.”7Kakairada atail peneinei ohng nan Ngehno pahn sewese neitail serihko mengeieng alehda Sapwellime malipilip.
Kesiluh, kitail kak sewese neitail serihkan wehwehkihla iamwomwen Ngehno ah kin koasoaieng irail. Sosep kaweidki: “Ma e pahn ketin ketido rehn kisin seri, E pahn ketin wiahda sapwellime mahsen oh mwokid ni wen me kisin seri kak wehwehki.”8 Emen nohno kasawihada me pwehki seri mwomwen ahr kin wehwehkihla mehkot ah wekpeseng—ekei kin koledi sang ni ahr kin kilang, ekei sang ni ahr kin rong, ekei sang ni ahr kin doahke, de kehn—ni ah kin kalapw kasakasawih nah serihko, ih ah kin laudla ah kin kilangada me Ngehn Sarawio kin padahkih nah seri ko ni mwohmw me emen emen irail kin kolkihdi mwadang.9
Emen nohno ehuki irair me e lelohng ni ah sesewese nah seri ko ren esehla tehkada Ngehno. “Ekei pak,” e ntingihdi, “[seri kan] sohte kin tehk me madamadau me kin kalapw pwarada, pepehm en kansenamwahu me kin kohda mwurin ahr kin sengiseng, de kin tamanda mehkot ni ansou me e anahneo iei ih mwomwen Ngehn Sarawio ah kin koasoaieng [irail].” E doula koasoaia, “I kaskasukuhliong nei serih ka ren kin tehk dahme re kin kehn oh [wia dahme re kehno].”10
Kekehn oh kasakasawiada Ngehno pahn wahdo dowen ngehno nan en neitail seri kan ahr mour, oh ngihl me re pahn esehlao pahn wie sansalehng irail la. E pahn duwehte dahme Elder Richard G. Scott koasoaiao: “Ni ahmw pahn iang kehn di duwen Ngehno oh pweida sang ni kaweid en Ngehno, ahmw kamehlele ohng pepehm me ke kehn pahn wiahla mehkot mehlel sang dahme ke kin anahne kilang mahs de rong.”11
Kitail sohte anahne masak ni atail kilang neitail seri kan doudiong nan pihl en mour, pwe kitail sewese irail en kesehla sang irail kediropw en sampah. Kitail padahkiong irail en kin momouriki kaweid en kisakis en Ngehn Sarawio. Kisakis wet pahn doudoulahte kamarahrahihda arail mehn wesik kan me re wawa oh kaweid irail lahng nimwarail nanleng, ma re pahn momouriki oh idawehn Sapwellime kaweid. Ni mwaren Sises Krais, amen.