Wan Rod blong Folem blong Kasem Pis
Pis we yumi evriwan i stap lukaotem i nidim blong yumi mas tekem aksen—taem yumi stap lanem abaot Jisas Kraes, taem yumi stap lisin long ol toktok blong Hem, mo taem yumi stap wokbaot wetem Hem.
Sam yia i pas, oli askem gel mo dewen blong mitufala blong tufala i mekem wan tim mo tij long wan Praemeri klas blong faef smol boe blong fo yia we i oli muvmuv plante. Gel blong mitufala bae i tij mo dewen blong mifala bae i kipim klas i kwaet, mo tufala i traem bes blong mekem hemia, blong tijim ol gospel prinsipol long ol pikinini.
Long wan taem blong klas we i raf lelebet, afta plante woning long wan boe we i mekem noes, dewen i tekem fo yia boe i go aotsaed long klasrum. Taem tufala i stap aotsaed, mo i stap rere blong tok strong long smol boe ia long fasin blong hem mo go lukaotem papa mo mama blong hem, smol boe ia i stopem dewen blong mitufala bifo hem i toktok, i leftemap han blong hem mo wetem bigfala filing, i talem: “!Samtaem, i had tumas blong mi stap tingting nomo long Jisas!”
Long wokbaot blong yumi long wol ia, nomata ples blong go long hem i gat glori, mo rod ia i gat fulap samting long hem, yumi evriwan bae i fesem ol tes mo harem nogud folem rod ia. Elda Josef B. Witlin i tijim: “Nidel long wil blong harem nogud i stap poen i go long wanwan long yumi. Long wan taem, evriwan i mas fesem harem nogud. I no gat wan i save ronwe.”1 “Lod, long waes tingting blong Hem, i no protektem eniwan long harem nogud long hat o no stap hapi.”2 Be, paoa blong yumi blong travel long rod ia wetem pis, bae i dipen bigwan long, sapos yes o no, yumi tu, yumi gat hadtaem blong tingbaot Jisas.
Pis long maen, pis long tingting, mo pis long hat, oli no makem folem paoa blong yumi blong stap longwe long tes, harem nogud o hat i soa. Nomata ol tru prea blong yumi, i no evri hariken we bae i jenisim rod, i no evri handikap we bae i hil, mo maet bae yumi no andastanem fulwan evri doktrin, prinsipol, o praktis we ol profet, sia mo reveleta oli stap tijim. Be Lod i promesem pis long yumi—wetem kondisen i hang long hem.
Long Gospel blong Jon, Sevya i tijim se nomata ol hadtaem long laef, yumi save stap glad; yumi save gat hop, mo yumi no nid blong fraet, from se Hem i talem: “Yufala i save stap kwaet from yufala i joen gud long mi.”3 Fet long Jisas Kraes mo sakrifaes we i pem praes from sin, hem i mo bambae hem i oltaem, fasfala prinsipol blong gospel mo hem i fandesen we hop blong yumi blong gat “pis long wol ia mo laef we i no save finis long nekis wol,” i stanap long hem.4
Blong helpem yumi blong kasem pis long medel blong ol jalenj evri dei, yumi kasem wan simpol paten blong kipim tingting blong yumi i stap long Sevya, we i talem: “Lanem samting aot long mi, mo lisin long ol toktok blong mi; wokbaot wetem fasin blong no stap flas we i kam long Spirit blong mi, mo bae yu kasem pis long mi. Mi, mi Jisas Kraes.”5
Lanem, lisin, mo wokbaot—ol trifala step wetem wan promes.
Faswan: “Lanem samting aot long mi.”
Long Aesea, yumi ridim: “Hae God i God blong Jekob. Yufala i kam. Yumi go antap long hil ia blong hem. Yumi go mekem wosip long haos blong hem. Hem bambae i tijim yumi long ol fasin we hem i wantem blong yumi folem.”6
Wetem namba we i stap go antap blong ol tempol we i makem wol, yumi lanem abaot Jisas Kraes mo rol blong Hem long plan blong Papa olsem Krieta blong wol ia, olsem Sevya mo Ridima blong yumi, mo olsem stamba blong pis blong yumi.
Presiden Tomas S. Monson i tijim: “Wol i save kam wan jalenj mo wan had ples blong stap long hem. … Taem yu mo mi i stap long ol tabu haos blong God, taem yumi stap tingbaot ol kavenan we yumi mekem, bae yumi save gat moa paoa blong tekem evri tes, mo blong winim evri temtesen. Long tabu haos ia, bae yumi faenem pis.”7
Long wan taem we mi bin go mekem wan wok long wan stek konfrens sam yia i pas taem mi stap long Saot Amerika, mi mitim wan kapol we hat i stap sore from ded blong smol bebi boe blong tufala.
Long wan intaviu long taem blong konfrens nao mi mitim Brata Tumiri mo mi kam blong save abaot lus blong hem. Taem mitufala i storian, hem i serem se hem i harem nogud long ded blong boe blong hem, be i harem nogud tumas long tingting ia se bae i neva luk hem bakegen. Hem i eksplenem se, mo tufala i ol niu memba blong Jos, oli bin sevem inaf mane blong go long tempol wan moa taem, bifo smol boe i bon, mo tufala i bin sil olsem wan kapol mo tufala gel blong tufala. Nao i tokbaot hao tufala i sevem mane blong go long tempol be oli no tekem smol boe i go blong sil wetem hem tu.
Nao mi luksave se tufala i no andastanem gud samting. Mi eksplenem se, yes, bae i luk boe blong hem bakegen sapos hem i gohed blong stap fetful, from siling odinens ia we i joenem hem long waef mo gel blong hem i inaf tu blong joenem hem long boe blong hem, we i bon insaed long kavenan.
Hem i sapraes. Hem i askem sapos hemia i tru, mo mi talem se i tru. Afta, hem i askem sapos mi save toktok long waef blong hem, we i stap harem nogud tumas tu wik finis i pas afta long ded blong smol boe.
Long Sandei aftenun, afta long konfrens, mi mitim Sista Tumiri, mo eksplenem gudfala doktrin ia long hem tu. Harem nogud from lus ia i strong yet, be naoia, wan hop i saen, wetem wota long ae i askem: “?I tru bae mi save holem smol boe bakegen?” ?Bae hem i blong mi blong oltaem? Mi talem yes long hem se i olsem sapos hem i kipim ol kavenan blong hem, siling paoa ia insaed long tempol i laef from atoriti ia blong Jisas Kraes, bae i mekem se hem mo boe i stap tugeta bakegen mo bae i holem hem.
Sista Tumiri, nomata hat i soa from ded blong boe, i aot long miting ia wetem wota long ae mo tangkyu mo i fulap long pis from tabu odinens ia blong tempol i mekem i posibol, mo hemia tru long Sevya mo Ridima.
Evri taem yumi go long tempol—long evri samting yumi harem, mekem mo talem; long evri odinens we yumi tekpat long hem; long evri kavenan we yumi mekem—oli poenem yumi long Jisas Kraes. Yumi filim pis taem yumi harem ol toktok blong Hem mo lanem samting aot long eksampol blong Hem. Presiden Godon B. Hinkli i tijim: “Go long haos blong Lod mo filim, long ples ia, Spirit blong Hem mo toktok wetem Hem, mo bae yu save wan pis ia we yu no save faenem long nara ples.”8
Seken Step: “Lisin long Ol Toktok blong Mi”
Long Doktrin mo Ol Kavenan, yumi ridim : “Nomata oli kamaot tru long voes blong miwan o tru long voes blong ol wokman blong mi, i semmak.”9 Stat long taem blong Adam i kamdaon, tru long ol yia bifo kasem profet blong tedei, Tomas Spensa Monson, Lod i bin toktok tru long olgeta we oli kasem raet from. Olgeta we oli jusum blong lisin mo mekem folem ol toktok blong Lod, olsem we ol profet oli talem, bae oli faenem se oli sef mo gat pis.
Long Buk blong Momon, yumi faenem plante eksampol long hao i impoten blong folem ol kaonsel blong ol profet, mo stanap wetem profet, mo i gat wan lesen we yumi lanem long visen blong Lihae abaot tri blong laef we yumi faenem long1 Nifae japta 8. I neva gat wan taem we bigfala haos ia wetem fulap spes i fulap gud, o noes we i kam long ol windo blong hem we i open i lidim nogud man, i stap jik mo tantanem tingting blong man bitim tedei. Long skripja ia, yumi ridim abaot tufala grup blong ol pipol mo ansa blong olgeta long ol singaot blong bilding ia.
Stat long ves 26, yumi ridim:
“Mo tu, mi bin sakem ol ae blong mi raonabaot, mo mi bin luk, long narasaed long reva blong wota, wan bigfala haos we i gat fulap spes. …
“Mo hem i bin fulap wetem ol pipol, … mo oli stap olsem se oli stap jikim ol man mo poenem ol fingga blong olgeta long olgeta we i bin kam kamaot, mo oli bin stap kakae frut.
“Mo afta we oli bin testem frut ia oli bin sem, from olgeta we oli stap jikim olgeta; mo oli bin foldaon i go long ol rod we i no blong folem, mo oli bin lus.”10
Long ves 33, yumi ridim abaot ol narawan we oli gat defren fasin taem oli fesem ol toktok blong jik we i kamaot long bilding. Lihae i eksplenem se olgeta long bilding “oli bin poenem fingga blong jik long mi, mo olgeta we oli stap kakae frut tu; be mifala i no lisin long olgeta.”11
Wan ki samting we i defren i we, olgeta we oli sem, ol foldaon, mo oli go lus, mo olgeta we oli no folem ol tok blong jik blong bilding, mo oli stanap wetem profet, wanem i hapen i kamaot long tu toktok. Faswan “afta we oli bin testem, ” mo seken, “olgeta we oli kakae.”
Fas grup i kasem tri, oli stanap smol taem wetem profet, be oli testem frut nomo. Oli no gohed blong kakae; oli letem ol jik blong bilding ia i spolem olgeta, i pulum olgeta i go longwe long profet mo i go long rod we i rabis, mo oli go lus.
I gat olgeta we oli bin testem, mo oli go lus, mo olgeta we oli bin stap gohed blong kakae long frut ia. Olgeta ia, oli no wantem save long noes long bilding, oli stanap wetem profet, mo oli stap glad long sefti mo pis we i stap. Komitmen blong yumi long Lod mo ol wokman blong Hem, i no wan haf komitmen. Sapos i olsem yumi stap long denja blong man i kam spolem pis blong yumi. Taem yumi lisin long Lod tru long ol wokman blong Hem we oli gat raet, yumi stanap long ol tabu ples mo yumi no save muv.
Enemi i givim ol giaman ansa we yumi luk se i ansa, be i tekem yumi i go longwe moa long pis ia we yumi stap lukaotem. Hem i givim wan giaman pikja we i luk se i folem loa mo i sef, be long en, i olsem bigfala bilding ia wetem fulap spes, bae i kapsaet, i prapa spolem gud evriwan we oli lukaotem pis insaed long ol wol blong haos ia.
Trutok, oli faenem nomo long simpol toktok blong singsing blong Praemeri: “Toktok blong profet: Obei komanmen. I gat sefti mo i gat pis long hemia. ”12
Nambatri Step: “Wokbaot Wetem Fasin blong No Stap Flas we I Kam long Spirit blong Mi”
Nomata yumi aot i go longwe long rod ia, Sevya i stap invaetem yumi blong gobak mo wokbaot wetem Hem. Invitesen ia blong wokbaot wetem Jisas Kraes i wan invitesen blong wokbaot wetem Hem i go long Getsemane, mo aot long Getsemane i go long Kalvari, mo aot long Kalvari i go long Hol blong Ston. Hem i wan invitesen blong luklukgud raon, mo yusum bigfala sakrifaes we i pem praes, we i blong wanwan man mo i no gat en. Hem i wan invitesen blong sakem sin, blong yusum paoa blong klinim man, blong holem han blong Hem we Hem i stretem wetem lav. Hem i wan invitesen blong stap long pis.
Yumi evriwan i filim, long laef blong yumi, soa mo hat i soa we i go wetem sin mo fasin blong brekem loa, from sapos “yumi talem se yumi no gat sin, yumi giaman long yumiwan mo trutok i no stap wetem yumi.”13 Be nomata “sin blong yumi i red,” taem yumi yusum Atonmen blong Jisas Kraes mo wokbaot wetem Hem tru long tru fasin blong sakem sin, “bae oli kam waet olsem sno.”14 Nomata rong i kakae yumi, bae yumi save kasem pis.
Yangfala Alma i mas fesem ol sin blong hem taem wan enjel blong Lod i visitim hem. Hem i tokbaot eksperiens blong hem olsem:
“Be mi bin filim i soa wetem trabol we i no save finis, from we sol blong mi i filim nogud go kasem mak ia we i bigwan olgeta, mo mi harem nogud from evri sin blong mi.
“… Yes, mi bin luk se mi go agensem God blong mi, mo mi no obei ol tabu komanmen blong hem.”15
Ol sin blong hem oli bigwan, mo long medel blong trabol ia, hem i gohed i se:
“Mi bin tingbaot tu we mi bin harem papa blong mi i profesae long ol pipol long saed blong wan Jisas Kraes, wan Pikinini blong God, we bae i kam blong pem praes blong ol sin blong wol.
“… Mi bin prea insaed long hat blong mi: “O Jisas, yu yu Pikinini blong God, gat sore long mi.”16
“Mo, kasem taem we mi prea long Lod Jisas Kraes from sore, neva mi bin kam klin from ol sin blong mi olsem ia. Be luk, mi prea long hem mo mi faenem pis long sol blong mi.”17”
Semmak long Alma, yumi tu, yumi save faenem pis long sol blong yumi taem yumi wokbaot wetem Jisas Kraes, sakem ol sin blong yumi, mo praktisim hiling paoa blong Hem insaed long laef blong yumi.
Pis we yumi evriwan i lukaotem i askem moa bitim blong wantem. I askem yumi blong tekem aksen—taem yumi lanem samting aot long Hem, taem yumi lisin long ol toktok blong Hem, mo taem yumi wokbaot wetem Hem. Bae yumi no gat paoa blong kontrolem evri samting we i stap hapen raon long yumi, be yumi save kontrolem hao yumi yusum paten blong gat pis we Lod i givim—wan paten we i mekem i isi blong tingting plante long Jisas.
Mi testifae se Jisas Kraes “i rod, i trutok, mo i laef,”18 mo se tru long Hem nomo bae yumi save kasem tru pis long laef ia mo laef we i no save finis long wol we i stap kam. Long nem blong Jisas Kraes, amen.