Usa ka Sagradong Responsibilidad

Akong minahal nga mga kaigsoonan, nag-ampo ko nga ang Espiritu mogiya sa akong pakigpulong karong gabhiona. Dunay komon nga butang nga nagsumpay kanato. Gisaligan kita nga maghupot sa priesthood sa Dios ug molihok pinaagi sa Iyang pangalan. Kita ang nakadawat sa usa ka sagradong responsibilidad. Dako kaayo ang gilauman gikan kanato.

Atong mabasa sa Doktrina ug mga Pakigsaad, seksyon 121, bersikulo 36, “Ang katungod sa pagkapari dili mabulag gikan sa mga gahum sa langit.” Pagkatalagsaon nga gasa nga gihatag kanato. Ato ang responsibilidad nga bantayan ug panalipdan kana nga priesthood ug mahimong takus sa tanang mahimayaong panalangin nga giandam sa atong Langitnong Amahan alang kanato—ug alang sa uban pinaagi kanato.

Bisan asa kamo moadto, ang inyong priesthood magauban kaninyo. Nagbarug ba kamo sa balaang mga dapit? Sa dili pa ninyo ibutang sa peligro ang inyong kaugalingon ug ang inyong priesthood pinaagi sa pag-adto sa mga dapit o sa pag-apil sa mga kalihokan nga dili makaayo kaninyo o nianang priesthood, hunong aron hunahunaon ang mga sangputanan. Hinumdumi kon si kinsa kamo ug unsay gilauman sa Dios kon unsa kamo sa umaabut. Kamo anak sa pakigsaad. Kamo bantugan nga lalaki. Kamo anak sa Dios.

Kining bililhong gasa sa gahum sa priesthood nagdala dili lamang sa balaang mga responsibilidad apan sa espesyal usab nga mga panalangin alang sa atong kaugalingon ug sa uban. Hinaut nga kita, bisan asa pa kita nga dapit, mahimong kanunayng takus nga mosangpit niining gahum, kay wala gayud kita masayud kon kanus-a moabut ang atong panginahanglan ug oportunidad sa pagbuhat sa ingon.

Atol sa Ikaduhang Gubat sa Kalibutan, ang usa nako ka higala nagserbisyo didto sa Habagatang Pasipiko sa dihang gipahagsa ang iyang eroplano didto sa kadagatan. Siya ug ang ubang mga sakop sa crew malampusong nag-parachute gikan sa nasunog nga eroplano, mipaburot sa ilang mga life raft, ug nagpabilin niadtong mga raft sulod sa tulo ka adlaw.

Sa ikatulong adlaw nakakita sila sa unsay ilang nahibaloan nga usa ka sakayan nga pang-rescue. Gilabyan ra sila niini. Pagkasunod buntag gilabyan na usab sila niini. Hinay-hinay na sila nga nawad-an og paglaum samtang ilang naamguhan nga kini ang katapusang adlaw nga ang sakayan nga pang-rescue naa sa dapit.

Dayon ang Balaang Espiritu misulti sa akong higala: “Duna kay priesthood. Mando-i ang mga rescuer nga kuhaon mo.”

Iyang gibuhat sumala sa giaghat: “Sa pangalan ni Jesukristo ug pinaagi sa gahum sa priesthood, balik ug kuhaa mi.”

Sulod sa pipila ka minutos ang sakayan diha na sa kilid nila, mitabang nila nga makasakay. Usa ka matinud-anon ug takus nga naghupot sa priesthood, sa iyang lisud kaayo nga kahimtang, migamit niana nga priesthood, mipanalangin sa iyang kinabuhi ug sa kinabuhi sa uban.

Hinaut nga modesisyon kita, dinhi ug karon, nga kanunayng mangandam alang sa atong panahon sa panginahanglan, atong panahon sa pagserbisyo, atong panahon sa panalangin.

Sa pagtapos nato karon niining kinatibuk-ang miting sa priesthood, ako moingon kaninyo nga kamo “usa ka kaliwatan nga pinili, ang kahugpungan sa mga harianong sacerdote” (1 Pedro 2:9). Unta mahimo kitang takus niining balaanong pasidungog, akong giampo sa pangalan ni Jesukristo, ang atong Manluluwas, amen.