Dua na Veivakabauti Tabu

Kemuni na taciqu lomani, au masulaka na Yalotabu me dusimaka na noqu itukutuku ena bogi nikua. E dua na ivau eda vauci vakatautauvata kina. Eda sa vakabauti me da taura na matabete ni Kalou ka cakacaka ena Yacana. Eda sa ciqoma e dua na veivakabauti tabu. Sa namaki vei keda e levu na ka.

Eda wilika ena Vunau kei na Veiyalayalati wase 121, tikina 36, “Raica na kaukauwa ni ilesilesi vakabete sa kaukauwa ga vakalomalagi.” E dua na isolisoli vakasakiti sa soli vei keda. Sa noda na itavi ni kena yadravi ka taqomaki na matabete oya ka bula kilikili kaya na veivakalougatataki lagilagi kece sara sa vakarautaka tu me baleti keda na Tamada Vakalomalagi—kei vei ira tale eso mai vei keda.

Na vanua cava ga o lako kina, me lako vata kei iko na nomu matabete. O ni sa tu beka ena vanua tabu? Ni bera ni o biuti iko kei na nomu matabete ena dua na vanua rerevaki ena nomu lakova eso na vanua se vakaitavi ena so na ka e sega ni veiganiti kei iko se kei na matebete oqori, tu mada vakadua ka vakasamataka na kena revurevu. Nanuma o cei o iko kei na vanua e namaka na Kalou mo yacova. O iko e dua na luve ni veiyalayalati. O iko e dua na tamata qaqa. O iko e dua na luve ni Kalou.

Na isolisoli talei mana ni matabete e kauta mai sega walega na itavi dokai ia na veivakalougatataki digitaki talega me baleti keda kei ira na tani. Me rawa vei keda, ena vanua cava ga eda kunei keda kina, me da kilikili tikoga me da kaciva na kena mana, ni da sega ni kila na gauna ena yaco mai kina na kena gagadre kei na kena madigi.

Ena iKarua ni iValu Levu, a veiqaravi tiko ena Ceva ni Pasifika e dua na noqu itokani ena gauna a lauvana kina na nona waqavuka ka lutu yani ki wasawasa. Eratou a vakalutulutu ena parasute kei ira na vo ni kaimua mai na waqavuka kama, eratou vakavudera nodratou ibilibilirapa, ka kukuva toka na ibilibili oqori ena loma ni tolu na siga.

Ena ikatolu ni siga eratou a raica e dua na waqa ka kila ni waqa ni veivueti. A lako siviti iratou. Ena mataka ka tarava se baci lako siviti iratou tale. Sa tekivu me ratou yalolailai ni ratou kila oqo sa iotioti ni siga me na tiko kina e kea na waqa ni veivueti.

Qai vosa vei noqu itokani na Yalo Tabu: “E tu vei iko na matabete. Vakaroti ira na dauveivueti me ra vueti kemudou.”

A vakayacora me vaka e vakauqeti kina: “Ena yaca i Jisu Karisito kei na lewa ni matabete, vuki lesu mai ka vueti keitou.”

Ena vica ga na miniti sa tu e yasadratou na waqa, ka ratou vukei yani ki dreke. E dua na matabete yalodina bula kilikili, ena ituvaki rerevaki sara e tu kina, a vakayagataka na matabete oya, ka vakalougatataka na nona bula kei na nodra bula tale eso.

Me da vakatulewataka eke ena gauna oqo, me da tuvakarau tu ena noda gauna ni leqa, noda gauna ni veiqaravi, noda gauna ni veivakalougatataki.

Ni da mai tinia na soqoni ni matabete oqo, au kaya vei kemuni o kemuni “na itabatamata digitaki, na matabete vakaturaga” (1 Pita 2:9). Me da sa kilikili kaya tikoga na isolisoli dokai vakalou oqo, sa noqu masu ena yaloqu taucoko ena yaca i Jisu Karisito, emeni.