ទំនុកចិត្តដ៏ពិសិដ្ឋមួយ
ដោយ ប្រធាន ថូម៉ាស អេស ម៉នសុន
អំណោយទាននៃអំណាចបព្វជិតភាពដ៏មានតម្លៃនេះ មិនគ្រាន់តែមាននូវការទទួលខុសត្រូវដ៏ឧឡារិកប៉ុណ្ណោះទេ ប៉ុន្តែជាពរជ័យដ៏ពិសេសផងដែរ សម្រាប់ខ្លួនយើង និងអ្នកដទៃទៀត ។
បងប្អូនប្រុសជាទីស្រឡាញ់របស់ខ្ញុំ ខ្ញុំអធិស្ឋានសុំឲ្យព្រះវិញ្ញាណដឹកនាំការនិយាយរបស់ខ្ញុំនាល្ងាចនេះ ។ អំបោះរួមមួយបានចងយើងភ្ជាប់គ្នា ។ យើងត្រូវបានទុកចិត្តឲ្យកាន់បព្វជិតភាពនៃព្រះ ហើយធ្វើកិច្ចការក្នុងព្រះនាមរបស់ទ្រង់ ។ យើងគឺជាអ្នកទទួលនូវទំនុកចិត្តដ៏ពិសិដ្ឋមួយ ។ មានអ្វីជាច្រើនត្រូវបានរំពឹងពីយើង ។
យើងអាននៅក្នុង គោលលទ្ធិ និងសេចក្ដីសញ្ញា កណ្ឌ ១២១ ខទី ៣៦ « សិទ្ធិទាំងឡាយនៃបព្វជិតភាព គឺជាប់ជាមួយនឹងអំណាចទាំងឡាយនៃស្ថានសួគ៌ ដែលមិនអាចបំបែកបានឡើយ » ។ ឱនោះជាអំណោយដ៏អស្ចារ្យមួយ ដែលយើងបានទទួល ។ កិច្ចការរបស់យើង គឺទទួលខុសត្រូវចាំយាម និងការពារបព្វជិតភាពនោះ ហើយត្រូវមានភាពសក្ដិសមចំពោះរាល់ពរជ័យដ៏រុងរឿងដែលព្រះវរបិតាសួគ៌យើងមានសម្រាប់យើង--និងសម្រាប់អ្នកដទៃតាមរយៈយើង ។
មិនថាអ្នកទៅទីណាទេ បព្វជិតភាពរបស់អ្នកនឹងទៅជាមួយអ្នក ។ តើអ្នកកំពុងឈរនៅក្នុងទីបរិសុទ្ធដែរឬទេ ? ពីមុនបងប្អូនធ្វើឲ្យខ្លួនឯង និង បព្វជិតភាពខ្លួនធ្លាក់ចូលក្នុងគ្រោះថ្នាក់ ដោយការប្រថុយចូលទៅកន្លែងណា ឬចូលរួមក្នុងសកម្មភាពណាដែលមិនសក្ដិសមនឹងបងប្អូន ឬបព្វជិតភាពនោះ សូមមេត្តាឈប់មួយភ្លែតសិន ដើម្បីពិចារណាពីផលវិបាកនានា ។ សូមចងចាំថាអ្នកគឺជានរណា ហើយព្រះរំពឹងឲ្យអ្នកប្រែក្លាយទៅជាអ្វី ។ អ្នកជាកូននៃសេចក្ដីសន្យា ។ អ្នកជាបុរសនៃអានុភាព ។ អ្នកជាបុត្រាម្នាក់របស់ព្រះ ។
អំណោយទាននៃអំណាចបព្វជិតភាពដ៏មានតម្លៃនេះ មិនគ្រាន់តែមាននូវការទទួលខុសត្រូវដ៏ឧឡារិកប៉ុណ្ណោះទេ ប៉ុន្តែជាពរជ័យដ៏ពិសេសផងដែរ សម្រាប់ខ្លួនយើង និងអ្នកដទៃទៀត ។ មិនថាយើងស្ថិតនៅក្នុងកន្លែងណាទេ សូមឲ្យយើងមានភាពសក្ដិសមដើម្បីប្រើអំណាចបព្វជិតភាពជានិច្ច ដ្បិតយើងមិនដឹងថាតម្រូវការ និងឱកាសរបស់យើងដើម្បីធ្វើកិច្ចការនឹងកើតមានឡើងនៅពេលណានោះទេ ។
អំឡុងសង្គ្រាមលោកលើកទី II មិត្តខ្ញុំម្នាក់បម្រើនៅប៉ាស៊ីហ្វិកខាងត្បូង ពេលដែលយន្ដហោះរបស់គាត់ត្រូវបានបាញ់ទម្លាក់ក្នុងសមុទ្រ ។ គាត់ និងពួកនាវិកដទៃទៀត បានលោតឆ័ត្រយោងចេញពីយន្ដហោះដែលឆេះនោះបានជោគជ័យ ហើយបានអណ្ដែតក្បូនសង្គ្រោះជីវិតរបស់ពួកគេ ហើយតោងនឹងក្បូននោះអស់រយៈពេលបីថ្ងៃ ។
នៅថ្ងៃទីបី ពួកគេបានឃើញអ្វីមួយ ដែលពួកគេស្គាល់ថាជាទូកជួយសង្គ្រោះ ។ វាបានទៅផុត ។ នៅព្រឹកឡើង វាបានទៅផុតម្ដងទៀត ។ ពួកគេបានចាប់ផ្ដើមអស់សង្ឃឹម នៅពេលពួកគេដឹងថានេះគឺជាថ្ងៃចុងក្រោយដែលទូកជួយសង្គ្រោះនឹងនៅក្នុងតំបន់នោះ ។
បន្ទាប់មកព្រះវិញ្ញាណបរិសុទ្ធបានប្រាប់ដល់មិត្តខ្ញុំថា ៖ « អ្នកមានបព្វជិតភាព ។ សូមបញ្ជាឲ្យអ្នកជួយសង្គ្រោះនោះមកទទួលអ្នកឡើង » ។
គាត់បានធ្វើដូចដែលបានបំផុសគំនិត ៖ « នៅក្នុងព្រះនាមនៃព្រះយេស៊ូវគ្រីស្ទ ហើយដោយអំណាចនៃបព្វជិតភាព សូមត្រឡប់មកវិញ ហើយស្រង់យើងឡើង » ។
ក្នុងរវាងពីរបីនាទី ទូកនោះបានមកជិតពួកគេ ហើយបានជួយពួកគេឡើងទូក ។ អ្នកកាន់បព្វជិតភាពដែលស្មោះត្រង់ និងសក្ដិសម នៅក្នុងពេលបន្ទាន់របស់គាត់ បានអនុវត្តបព្វជិតភាពនោះ ប្រទានពរដល់ជីវិតគាត់ និងជីវិតអ្នកដទៃទៀត ។
សូមឲ្យយើងតាំងចិត្តនៅទីនេះ ឥឡូវនេះ ត្រៀមខ្លួនសម្រាប់ពេលនៃតម្រូវការរបស់យើង ពេលនៃការបម្រើរបស់យើង និងពេលនៃពរជ័យរបស់យើង ។
ឥឡូវ នៅពេលយើងបញ្ចប់សម័យប្រជុំបព្វជិតភាពទូទៅនេះ ខ្ញុំសូមថ្លែងទៅអ្នកថា អ្នកគឺជា « ពូជជ្រើសរើស ជាពួកសង្ឃហ្លួង » (ពេត្រុស ទី ១ ២:៩) ។ សូមឲ្យយើងសក្ដិសមនឹងកិត្តិយសដ៏ទេវភាពទាំងនេះជានិច្ច ខ្ញុំសូមអធិស្ឋានដោយអស់ពីចិត្តនៅក្នុងព្រះនាមនៃព្រះយេស៊ូវគ្រីស្ទ ជាព្រះអង្គសង្គ្រោះរបស់យើង អាម៉ែន ។