Juon Lōke Ekwojarjar

Ro jeiū im jatū, ij jar bwe Jetōb eo en tōl kōnono in aō joteen in. Ewōr juon men ippād jejjab jenolo̧k kake eo ej likwōj kōj ippān doon. Jekar bōke lōke in n̄an kabwijer priesthood eo an Anij im n̄an m̧akūtkūt ilo Etan. Jej ro rej bōk juon lōke ekwojarjar. Eļap kōjatdikdik kōn kōj.

Jej riit ilo Katak im Bujen ko jekjōn 121, eoon 36, “jim̧we ko an priesthood rej ekkejelļo̧k im jamin jekadļo̧k jān kajoor ko an lan̄.” Ej juon menin letok em̧m̧anmōn kar letok n̄an kōj. Ijo koņaad ej n̄an waje im kōjparoke priesthood in im erreo n̄an aolep kōjeraam̧m̧an ko an Jemed ilo Lan̄, ko ekar doori n̄an kōj—im n̄an ro jet kōn kōj.

Jekdo̧o̧n ia kwoj etal ie ļo̧k, priesthood eo am̧ enaaj pād ippām̧. Kwoj ke jutak ilo jikin ko rekwojarjar? M̧okta jān am̧ likūt eok make im priesthood eo am̧ ijo ekauwōtata ilo am̧ door eok ilo jikin ko ak bōk koņaam̧ ilo m̧akūtkūt ko rejjab erreo n̄an kwe ak kōn priesthood in, bōjrak im ļōmņak kōn bōd ko renaaj waļo̧k. Keememej wōn kwe im ta eo Anij ej kōjatdikdik bwe kwon erom. Kwoj juon ajri in kallim̧ur. Kwoj juon em̧m̧aan emaron̄. Kwoj juon ļaddik nejin Anij.

Menin letok in eaiboojoj an kajoor in priesthood eo ejjab bōktok wōt eddo ko raorōk ak barāinwōt ej bōktok kōjeraam̧m̧an ko rejenolo̧k n̄an kōj make im n̄an ro jet. Jemaron̄ ke, ilo jabdewōt jikin loe kōj make, aolep iien erreo n̄an kūr ioon kajoor eo An, kōnke jeban jeļā aikuj eo ad im iien ko rem̧m̧an ko remaron̄ itok n̄an kōm̧m̧an āindein.

Ilo Pata eo an Laļ in Kein Karuo, juon m̧ōtta ekar jerbal ilo South Pacific ke baļuun eo waan ekar eddōbokļo̧k ioon lo̧jet. E im ro m̧ōttan rekar jo̧o̧r jān baļuun eo ebwil, kabooļe kein ebbābe ko aer, im mour ium̧win jilu raan ko.

Ilo raan eo kein kajilu rekar lo ta eo rekar jeļā juon waan lo̧mo̧o̧r. Ekar eļļāļo̧kjān er. Jibbon̄ eo juon ekar bar eļļāļo̧kjān er. Rekar jino ebbweer ke rekar kile bwe ekar raan eo āliktata waan lo̧mo̧o̧r in enaaj pād ilo eria eo.

Innām Jetōb Kwojarjar eo ekar im̧we likao eo m̧ōtta: “Ewōr am̧ priesthood. Kean̄ rilo̧mo̧o̧r raņ bwe ren ektake eok.”

Ekar kōm̧m̧ane āinwōt an Jetōb im̧we e: “Ilo etan Jisōs Kraist im kōn kajoor eo an priesthood eo, ro̧o̧ltok im ektake kōm̧.”

Jejjo wōt minit tim̧a eo ekar pād iturieer, jipan̄ er n̄an ioon deck eo. Juon rikabwijer priesthood eo etiljek im erreo, ilo juon jekjek ekanooj ļap, kar kōjerbale priesthood eo, kōjeraam̧m̧an mour eo an im mour ko an ro jet.

Jemaron̄ ke kōļmenļo̧kjeņ, ijin im kiiō, n̄an m̧aanjabpopo n̄an iien eo jenaaj aikuji, ad iien jipan̄, ad iien kōjeraam̧m̧an.

“Jim̧we ko an priesthood rej ekkejelļo̧k im jamin jekadļo̧k jān kajoor ko an lan̄.” (1 Piter 2:9). Jen aolep iien erreo kōn utiej kein rekwojarjar, ij jar kōn aolepān būruwō ilo etan Jisōs Kraist, ad Rilo̧mo̧o̧r, amen.