Un Konfiansa Sagrado

Mi rumannan stimá, mi ta pidi pa e Spiritu guiá mi palabranan awe nochi. Un hilu komun ta mara nos huntu. Nos a wòrdu konfiá pa kargá e saserdosio di Dios i pa aktua den Su nòmber. Nos ta e resipiente di un konfiansa sagrado. Muchu ta wòrdu sperá di nos.

Nos ta lesa den Doktrina y Convenios, sekshon 121, versíkulo 36, ku e derechonan di e saserdosio ta inseperablemente konektá ku e podernan di shelu. Ki regalo maravioso nos a wòrdu duná. Di nos ta e responsabilidat pa kuida i protehá e saserdosio ei i pa ta digno di tur e bendishonnan glorioso ku nos Tata na Shelu tin prepará pa nos—i pa otronan dor di nos.

Na unda ku bo bai, bo saserdosio ta bai ku bo. Bo ta parando den lugánan santu? Promé ku bo ta pone bo mes i bo saserdosio den peliger dor di riska bai den lugánan of partisipá den aktividatnan ku no ta digno di bo òf e saserdosio ei, tuma pousa pa konsiderá e konsekuensianan. Kòrda ken bo ta i kiko Dios ta spera ku bo ta bira. Bo ta un yu di promesa. Bo ta un hòmber di poder. Bo ta un yu hòmber di Dios.

E regalo presioso aki di poder di saserdosio ta trese huntu ku ne no solamente responsabilidatnan solèm pero tambe bendishonnan speshal pa nos mes i pa otronan. Laga nos, den kualke lugá ku nos ta haña nos mes aden, semper ta digno pa yama riba su poder, pasobra nos nunka no sa ki ora nos nesesidat i nos oportunidat pa hasi asina lo bini.

Durante e Di Dos Guera Mundial, un amigu di mi tabata sirbiendo den e Sùit Pasífiko ora su avion a wòrdu tirá abou riba e oséano. E i e otro miembronan di tripulante a sali eksitosamente ku parashut for di e avion kimá, a yena nan vlòtnan di salba bida ku aire, i a pega na e vlòtnan pa tres dia.

Riba e di tres dia nan a mira loke nan tabata sa tabata [ku ta] un barku di reskate. El a pasa nan. E siguiente mainta el a pasa nan atrobe. Nan a kuminsá desesperá ora nan a realisá ku esaki tabata e último dia e barku lo tabata ta den e área.

E ora ei e Spiritu Santo a papia na mi amigu: “Bo tin e saserdosio. Manda esunnan ku ta reskatá pa bin buska boso.”

El a hasi manera el a wòrdu inspirá: “Den e nòmber di JesuCristu i pa e poder di e saserdosio, bira rònt i bin buska nos.”

Denter di algun minüt e barku tabata banda di nan, yudando nan subi riba dèk. Un poseedor di e saserdosio fiel i digno, den su ekstremidat, a usa e saserdosio ei, bendishonando su bida i e bida di otronan.

Laga nos determiná, aki i awor, pa ta semper prepará pa nos tempu di nesesidat, nos tempu di sirbishi, nos tempu di bendishon.

Awor ku nos ta konkluí e seshon general di saserdosio aki, mi ta bisa na boso ku boso “ta un [generashon] eskohí, saserdotenan real” (1 Pedro 2:9). Ku semper nos lo ta digno di e honor divino aki, mi ta pidi ku henter mi kurason den e nòmber di JesuCristu, nos Salbador, amèn.