Nco Ntsoov txog Nws

Cov kwv tij thiab cov muam, thaum kuv ua hauj lwm nyob hauv Asia, tej lub sij hawm tib neeg nug hais tias, “Txwj Laug Gong, muaj pes tsawg tus neeg uas nyob hauv lub Koom Txoos Cheeb Tsam Asia?”

Kuv hais tias, “Ib nrab ntawm txhua tus neeg hauv lub ntiaj teb—3.6 txhiab lab neeg.”

Ib tug neeg nug kuv tias, “Puas nyuaj nco qab lawv txhua tus lub npe?”

Kev nco qab—thiab kev hnov qab—yeej yog ib feem ntawm peb lub neej txhua hnub. Piv txwv hais tias, muaj ib zaug, tom qab kuv tus poj niam nrhiav nws lub xov tooj nyob txhua qhov chaw, nws txiav txim siab siv lwm lub xov tooj hu nws li. Thaum nws hnov nws lub xov tooj nrov, kuv tus poj niam xav tias, “Leej twg hu tuaj rau kuv? Kuv tsis tau qhia kuv tus xov tooj rau leej twg!”

Kev nco qab—thiab kev hnov qab—kuj yog ib feem ntawm peb lub neej mus ib txhis. Lub sij hawm, kev ywj siab, thiab lub cim xeeb pab peb kawm, loj hlob thiab muaj kev ntseeg ntxiv.

Raws li tej lus ntawm ib zaj nkauj qhuas Vajtswv hais tias:

Txhua lub lim tiam, thaum peb txais lub cim nco txog, peb khi lus tias peb yuav nco ntsoov Nws. Hais txog 400 tawm nqe vaj lug kub uas muaj lo lus nco ntsoov,muaj rau txoj kev uas peb yuav nco ntsoov txog Nws tau.

Qhov thib ib, peb yuav nco ntsoov Nws thaum peb tso siab rau Nws tej kev khi lus, cov lus cog tseg, thiab tej lus qhia.

Tus Tswv nco ntsoov Nws tej kev khi lus uas kav ib txhis—txij thaum Adas ua neej nyob txog hnub uas Adas cov xeeb leej xeeb ntxwv thaum nej tej tub ki yuav txais yuav qhov tseeb, thiab ntsia lawm saum ntuj, thaum ntawd Xi-oos yuav ntsia saum ntuj los, thiab tag nrho lub ntuj yuav co nrog kev zoo siab, thiab lub ntiaj teb yuav tshee hnyo nrog kev xyiv fab.²

Tus Tswv nco txog Nws tej lus cog tseg, tsis hais cov lus cog tseg kom muab Ixayees sib sau ua ke dhau ntawm Phau Ntawv Maumoos: Ib zaj Lus Tim Khawv Ntxiv txog Yexus Khetos thiab cog lus rau txhua tus mej zeej thiab tub txib uas nco txog qhov uas ib tug neeg muaj nqi npaum li cas.³

Tus Tswv nco ntsoov thiab nplij tej haiv neeg thiab cov neeg. Nyob hauv lub caij nyoog uas muaj kev kub txhov no,⁴ “muaj qee leej cia siab rau lawv tej tsheb nees thiab ib txhia cia siab rau lawv tej nees, tiam sis peb cia siab rau tus Tswv uas yog peb tus Vajtswv lub hwj chim,”⁵ uas coj yav tom ntej ib yam li coj yav tas los.⁶ Nyob hauv lub sij hawm uas muaj kev kub ntxhov,⁷ peb nco ntsoov hais tias twb tsis yog Vajtswv txoj hauj lwm uas raug muab rhuav, tiam sis yog tib neeg txoj hauj lwm.⁸

Qhov thib ob, peb yuav nco ntsoov Nws thaum peb ua Nws tsaug rau txhua yam Nws ua rau peb hauv peb lub neej.

Peb pom qhov uas tus Tswv pab peb lub neej meej tshaj thaum peb nco txog yav tas los. Raws li tus kws tawm tswv yim Søren Kierkegaard hais tias: “Lub neej mas yuav tsum to taub mus rov qab. Tiam sis … yuav tsum ua neej mus tom ntej.”⁹

Tsis ntev tas los kuv niam nyuam qhuav ua koob tsheej nco txog nws hnub yug thaum 90 xyoo tas los. Nws tau ua tim khawv txog qhov uas Vajtswv tau foom koob hmoov rau nws tas nws lub neej. Tsev neeg zaj keeb kwm, tsev neeg kab lig kev cai, thiab cov txheeb ze pab peb nco txog tej yam dhau los, thiab ua yam ntxwv txog yav tom ntej thiab kev cia siab. Txoj cai pov thawj hwj thiab yawg suab cov koob hmoov ua tim khawv txog Vajtswv txhais tes uas pab ntau tiam neeg.

Nej puas tau xav txog nej tus kheej hais tias nej lub neej yeej yog ib phau ntawv nco txog—uas qhia tias nej tau xaiv kom nco ntsoov txog dab tsi?

Piv txwv hais tias, thaum kuv tseem hluas, kuv xav xav ua basketball hauv kuv lub tsev kawm ntawv. Kuv pheej xyaum txhua hnub. Muaj ib hnub tus kws qhia taw tes rau tus all-state center uas siab li 6-foot-4-inch (1.93 m) thiab tus all-star forward uas siab li 6-foot-2-inch (1.88) thiab hais rau kuv tias, “Kuv yeej tso tau koj nyob rau hauv peb pawg, tiam sis ntshe koj yeej yuav tsis muaj cib fim ua.” Ces kuv nco ntsoov tias nws ua siab zoo yaum kuv hais tias, “Vim li cas koj tsis mus ncaws pob? Nyaj koj yuav txawj heev.” Kuv tsev neeg qw nrov thaum kuv qhab nias ib zaug.

Peb muaj peev xwm nco txog cov uas ua siab ncaj, siab zoo, siab ntev, thiab txhawb nqa peb kom muab cib fim rau peb, thiab muab cib fim zaum ob. Thiab peb yeej muaj peev xwm rais los ua ib tug uas lwm tus nco ntsoov thaum lawv xav tau kev pab. Qhov uas peb nco ntsoov lwm tus txoj kev pab thiab tus Ntsuj Plig tej kev tshoov siab uas coj peb kev yog ib txoj kev uas peb nco ntsoov txog Nws. Yog ib txoj kev rau peb suav peb cov koob hmoov thiab nco ntsoov tias Vajtswv tau ua li cas rau peb.¹⁰

Qhov thib peb, peb yuav nco ntsoov Nws thaum peb tso siab rau tus Tswv thaum Nws qhia peb tias tus uas tau hloov siab lees txim, Nws zam txim rau tus ntawd, thiab tus Tswv tsis nco txog tej ntawd ntxiv lawm.¹¹

Thaum peb hloov siab lees txim tag nrho, tsis hais lees txim thiab tso kev txhaum tseg, peb nug zoo ib yam li Enos, thaum peb lub txim ploj mus, “Tus Tswv es, ua li cas thiaj ua tau li ntawd?” thiab cia li mloog lus teb, “Vim yog koj txoj kev ntseeg Khetos”¹² thiab Nws txoj kev caw kom nco ntsoov txog Nws.¹³

Thaum peb hloov siab lees txim thiab cov thawj coj pov thawj hwj hais tias peb tsim nyog lawm, peb tsis tas lees txim tas mus li ntxiv. Qhov uas peb tsim nyog tsis txhais hais tias peb zoo tag nrho. Leej Txiv Saum Ntuj Ceeb Tsheej txoj hau kev zoo siab caw kom peb nyob kaj siab lug thaum peb ua neej kom rais los ua neeg zoo tag nrho zoo li Khetos.¹⁴ Nws tsis xav kom peb txhawj, nyuaj siab, los yog tsis zoo siab vim peb tsis zoo tag nrho tam sim no. Cia li nco ntsoov tias, Nws paub txhua yam uas peb tsis xav kom lwm tus paub txog peb—thiab Nws tseem hlub peb heev.

Tej lub sij hawm lub neej no sim peb lub siab seb peb puas tso siab rau Khetos txoj kev siab hlub, kev txim lij, thiab kev txiav txim thiab Nws txoj kev caw peb kom cia Nws txoj Kev Theej Txhoj kho peb zoo thaum peb zam txim rau lwm tus thiab peb tus kheej.

Ib tug ntxhais hluas nyob hauv lwm lub teb chaws xav ua hauj lwm ua ib tug kws sau ntawv xov xwm, tiam sis tus nom uas txib neeg ua hauj lwm phem heev. Nws hais rau nws hais tias, “Kuv sau npe ntawm no, koj yeej yuav ua tsis tau ib tug kws sau ntawv xov xwm es koj yuav tsum mus khawb qhov av.” Nws yog tib tug poj niam uas khawb qhov av nyob hauv ib pawg txiv neej.

Ntau xyoo tom qab ntawd tus poj niam rais los ua ib tug nom. Muaj ib hnub tus txiv neej los xav tau tus poj niam sau npe kom nws ua tau ib txoj hauj lwm.

Tus poj niam nug tias, “Koj puas nco qab kuv?” Tus txiv neej tsis nco qab.

Nws hais tias, “Koj tsis nco qab kuv, tiam sis kuv yeej nco qab koj. Thaum koj sau npe, koj ua rau kuv yeej ua tsis tau ib tug kws sau ntawv xov xwm. Thaum koj sau npe, koj xa kuv mus khawb qhov av, tib tug poj niam nyob hauv ib pawg txiv neej.”

Nws qhia kuv tias, “Kuv xav tias yuav tsum ua rau tus txiv neej zoo dua li nws ua rau kuv—tiam sis kuv tsis muaj zog ua li ntawd.” Tej lub sij hawm peb tsis muaj zog ua li ntawd nyob hauv peb, tiam sis los ntawm peb tus Cawm Seej Yexus Khetos txoj Kev Theej Txhoj peb yuav muaj zog txaus.

Thaum tso tsis taus siab ntxiv, kev ua npau suav ploj mus, lub siab ntais rhe, thiab rov qab mob dua ntxiv, thaum peb xav tau kev txim lij thiab xav tau kev hlub tshua, thaum peb npau taws thiab peb nyuaj siab, thaum peb xav paub yuav muab yam twg tuav rawv thiab muab yam twg tso tseg, peb yeej muaj peev xwm nco txog Nws. Lub neej no yeej tsis phem npaum li peb xav. Nws txoj kev khuv leej uas nyob mus ib txhis yuav pab peb nrhiav peb txoj kev, qhov tseeb, thiab txoj sia.¹⁵

Thaum peb nco txog Nws tej lus thiab tus yam ntxwv, peb yeej yuav tsis ua rau lwm tus tu siab thiab tsis tu siab rau lwm tus.

Kuv tus phooj ywg nws txiv yog ib tug kws kho tsheb. Yeej pom tau nws ua hauj lwm dab tsi txawm yog nws ntxuav tes zoo los. Muaj ib hnub ib tug neeg nyob hauv lub tuam tsev qhia kuv tus phooj ywg txiv hais tias nws yuav tau ntxuav tes ua ntej nws ua hauj lwm hauv lub tuam tsev. Tus txiv neej zoo no, nws tsis tu siab, nws cia li pib siv cov dej uas muaj xum npum ntau heev ntxuav nws tsev neeg tais diav ua ntej nws mus rau lub tuam tsev. Nws yeej coj yam ntxwv zoo li cov uas “mus rau saum tus Tswv lub roob” thiab “sawv hauv nws qhov chaw dawb huv” nrog rau txhais tes huv thiab lub siab dawb paug.¹⁶

Yog tias peb xav tsis zoo txog lwm tus, npau taws, los sis tu siab rau lwm tus los sis peb yuav tsum thov lwm tus zam txim rau peb, tam sim no yog lub sij hawm ua li ntawd.

Qhov thib plaub, Nws caw peb kom nco ntsoov tias Nws yeej tos txais peb.

Peb kawm thaum peb nug thiab nrhiav. Tiam sis thov tsis txhob tsum mus txog thaum lub sij hawm nej ua raws li T. S. Eliot tej lus hais tias, “rov qab tuaj rau qhov chaw uas yus tau pib thiab yog thawj zaug uas yus paub qhov chaw ntawd tiag.”¹⁷ Thaum nej npaj siab, thov qhib nej lub siab rov qab nyeem Phau Ntawv Maumoos zoo li yog thawj zaug. Cia li rov qab thov tiag tiag, zoo li yog thawj zaug.

Cia li tso siab rau qhov uas nej nco txog thaum yav tas los. Cia qhov ntawd ua rau nej txoj kev ntseeg loj tuaj. Yog muaj Vajtswv, yeej muaj cib fim rov qab los.

Cov yaj saub thaum ub thiab niaj hnub no thov kom peb tsis txhob cia tib neeg tej kev txhaum los sis tej kev qaug zog—lwm tus li thiab peb li—ua rau peb tsis kawm txog tej qhov tseeb, kev khi lus, thiab lub hwj chim muab neeg txhiv dim nyob hauv Nws txoj moo zoo.¹⁸ Qhov no yeej tseem ceeb nyob hauv ib lub koom txoos uas peb txhua tus kawm los ntawm peb txoj kev koom tes txawm peb tsis zoo tag nrho los. Tus Yaj Saub Yauxej Xamiv hais tias, “Kuv tsis tau qhia nej tias kuv zoo tag nrho; tiam sis tsis muaj qhov ua yuam kev nyob hauv tej kev tshwm sim uas kuv tau qhia.”¹⁹

Qhov thib tsib, peb yuav nco ntsoov txog Nws thaum Hnub Caiv dhau los ntawm lub cim nco txog. Thaum tus Cawm Seej yuav luag ua tiav Nws txoj hauj lwm qhuab qhia hauv lub ntiaj teb no thiab thaum yuav luag pib Nws txoj hauj lwm qhuab qhia tom qab Nws sawv rov los—ob zaug no—peb tus Cawm Seej muab cov mov mog thiab cov cawv txiv hmab thiab hais kom peb nco txog Nws lub cev thiab cov ntshav,²⁰ “vim npaum li uas nej ua qhov no nej yuav nco txog lub sij hawm uas kuv nrog nej nyob no.”²¹

Nyob hauv txoj kab ke txais lub cim nco txog, peb ua tim khawv rau Vajtswv Leej Txiv hais tias peb txaus siab ris Nws Leej Tub lub npe, thiab nco ntsoov txog Nws thiab ua raws li Nws tej lub txib, uas Nws muab rau peb, kom peb yuav muaj Nws tus Ntsuj Plig nrog peb nyob.²²

Raws li Amulej qhia hais tias, peb nco txog Nws thaum peb thov Vajtswv pab peb tej liaj teb, peb cov tsiaj, thiab peb tsev neeg, thiab thaum peb nco txog cov neeg txom nyem, thiab cov neeg liab qab, thiab cov neeg mob.²³

Qhov thib rau, tus Cawm Seej caw peb nco ntsoov txog Nws ib yam li Nws nco ntsoov txog peb.

Nyob hauv Sab Ntiaj Teb Tshiab no, peb tus Cawm Seej uas sawv rov los, Nws caw cov neeg los, ib tug dhau ib tug los muab lawv tej tes xuas qhov mob ntawm Nws sab tav thiab xuas tej qhov ntsia hlau hauv Nws tes thiab Nws taw.²⁴

Cov vaj lug kub piav hais tias thaum peb sawv rov los “tag nrho txhua yam yuav rov txum tim los rau lawv tej qub chaw thiab qub cev uas zoo kawg nkaus,” thiab “ib txoj plaub hau saum taub hau los yuav tsis poob.”²⁵ Yog li ntawd, thov cia li xav seb vim li cas tus Cawm Seej lub cev uas zoo tag nrho thiab sawv rov los tseem muaj tej qhov txhab ntawm Nws sab tav thiab tej qhov ntsia hlau hauv Nws tes thiab hauv Nws taw.²⁶

Tej lub sij hawm nyob hauv zaj keeb kwm, tib neeg raug tua tuag thaum lawv raug ntsia saum ntoo khaub lig. Tiam sis peb tus Cawm Seej, Yexus Khetos, yog tib tug uas tseem muaj tej qhov txhab ntawm Nws txoj kev hlub dawb huv. Tsuas yog Nws xwb thiaj ua kom muaj raws li cov yaj saub tej lus hais tias Nws yuav raug tsa saum tus ntoo khaub lig Nws thiaj hu tau peb txhua tus lub npe, kom los cuag Nws.²⁷

Peb tus Cawm Seej hais tias:

“Tej zaum lawv tsis nco qab, tab sis kuv yuav nco ntsoov nej.

“Saib seb, kuv tau muab nej txaug rau saum kuv tej xib teg.”²⁸

Nws ua tim khawv hais tias Nws yog tus raug muab dai. Nws yog Yexus tus uas raug muab ntsia rau saum ntoo khaub lig. Kuv yog Vajtswv Leej Tub.”²⁹

Kuv txo hwj chim ua tim khawv, thiab thov Vajtswv, hais tias peb yuav nco ntsoov Nws—txhua lub sij hawm, thaum ua txhua yam, thiab nyob txhua qhov chaw.³⁰ Los ntawm Yexus Khetos lub npe dawb ceev zoo, amees.