Esamuhl Pacl Nuh Kwewa

Tamuhlwel ac Tahmtahel sacohk, ke nga tuh kuhlwacnsap fin acn Asia, kuhtuh pacl ah mwet siyuck sihk, “Elder Gong, mwet ekahsr muhta ke Eria Asia luhn Alu uh?”

Nga fahk, “Tahfuhn mwet fin facluh uh—mwet billion 3 tausin 600.”

Sie mwet ah siyuck, “Kuh upac in esamyac inelos nohfohn?”

Esam uh—ac muhlkuhnlah uh—ipin moul uh lwen nuh kwewa. Nuh ke srihkasrak, sie pacl ah, tukun el suk nwe suk ke cell fohn nahtuhl ah, muhtwacn kiyuck el sulwaclah in pahngon cell ah ke taclofon se sahyac. Ke el lohng cell fohn nahtuhl ah wowoyak, muhtwacn kiyuck ah el nuhnkuh, “Kuh suc ac pahngonyuc an? Nga soenna sang nacmpuh sacn nuh sin kuhtwena mwet!”

Esam uh—ac muhlkuhnlah uh—oacyacpac ipin fuhfahsryucsr ma pahtpaht lasr uh. Pacl, sukohsohk in sulwaclah, ac atacn esam uh kahsruh kuht in etwaclah, kapwack, ac yohkwelihk in luhlahlfongi.

Ke kahs luhn soko on pahiyuck:

Kais sie wik, ke kuht ipeis ke kuhfa luhn Leum, kuht olwelah in Esamuhl pacl nuh kwewa. In orekmakihn ma suhmuhslah ekahsr sin ma puhs liki ma 400 ma kahs “esam uh orekmakihnyuck, pa inge ohiyac ohnkohsr ma kuht kuh in esamuhl pacl nuh kwewa.

Ohiyac se emet uh, kuht kuh in esamuhl pacl nuh kwewa ke kuht luhlahlfongi ke wuhlweacng, olwelah, ac kahs in ahkkweye Lal.

Leum El esam wuhlweacng ma pahtpaht Lal uh—ke pacl Lal Adam nuh ke pacl ma tuhlihk nuhtin Adam “fah sruok na ma pwacye, na ngwetack, ac Zion fah ngweti nuh ten, ac inkuhsrao fah rarrarlac ke engan, ac facluh fah kusrusr ke engan.”²

Leum El esam olwelah Lal, weacng pac olwelah in orwacni sruf fahsrwelihk luhn Israel uh ke orekmakihnyacn Puk Luhn Mormon: Siepac Wuhlweacng ke Jisus Kraist ac olwelah ma ituckyang nuh sin mempucr ac misineri nuh kwewa suc esam sacohkiyacn nguhna uh.³

Leum El esam ac ahkkweye muhtuhn facl ac mwet uh. Ke pacl kahfofo ac fohs inge uh,⁴“kuhtuh mwet uh filiya lulalfongi lalos ke chariot, ac kuhtuh ke horse, tuhsruhk kuht e fihliyac luhlahlfongi lasr ke kuh luhn Leum God lasr,”⁵ suc kol “pacl tok uh oacna pacl met.”⁶ Ke pacl in “ongoiyac luhlahp”⁷ uh, kuht esam lah tiac orekma luhn God uh pa tulohkihnyuck, tuhsruhk orekma luhn mwet.”⁸

Ahkluo, kuht kuh in Esamuhl pacl nuh kwewa ke kuht akihlen pahol in moul lasr .

Poun Leum ke moul lasr uh kwacna fihsrwacsr in akihlenyuck ke kuht tuni ma orek met ah. Oacna fwack sin mwet philosopher Kristin se Søren Kierkegaard: “Kuht kuh in kahlwem ma orek met ah, tuhsruhk … kuht enenuh in moul nuh ke ma tohkoh uh.”⁹

Ninac sacohk kiyuck ah el tuhfahna yac 90 lac. El tarilacna in fahkwack ke mwe insewowo luhn God ke kais sie pacl yohk in moul lal. Elaksraonak, facsin luhn sucu, ac kuhpahsr in sucu uh kahsruh kuht in esam ma ke ohiyac engan ac akiyac pac atacn ma fahsruh ac use finsrak kac. Tahklac luhn fahsriyacn wal luhn Pristut uh ac patriarchal blessing uh mwe lohoh ke poun Leum fihl nuh ke fihl uh.

Kuh oasr pacl kowos nuhnkuh keiwos sifacna oacna sie puk in acsmakihn—oreklac ke ma kowos esam ac ke ohiyac ma kowos sulwaclah in esam uh?

Sie srihkasrak, ke nga fuhsr ah, nga arlac ke sritacl basket ke tim luhn lutlut luhk ah. Nga practice na practice. Sie lwen ah coach sac el srihsrngiyac sie tuhlihk ke tim ah suc arlac suhmaht ke basket uh suc fit- 6 ins- 4 ac oacyacpac nuh sin sie suc arlac suhmaht ac fit-6 ins-2 na fahk nuh sihk, “Nga kuh in lwelah kom in wi tim uh, tuhsruhk tiac kahlwem lah ac oasr pacl kom sritacl.” nNga esam kuhlwacngiacn kwacfe lal, “Efuh kom tiac srihke wi tim luhn soccer? Kom ac puhro.” Sucu luhk ah kahluhkluhk ke nga oruh teng se emet luhk ah.

Kuht kuh in esamuhlos suc lwelah in oasr pacl wo lasr in oruh ma, na pacl se ahkluo, ke inse pwacye, kuhlwacng, mong fihsrwacsr, ac kwacfe. Ac kuht kuh in eklac in mwet suc mwet sahyac uh esam ke elos enenuh nuh pwacye kahsruh. In esam kahsruh luhn mwet sahyac ac pwenyuck luhn Nguhn ke inse srui uh pa sie ohiyac ma kuht kuh in esamuhl. Pa sie ohiyac ma kuht oek mwe insewowo lasr ac liye ma God el oruh.¹⁰

Ahktolu, kuht kuh in esamuhl pacl nuh kwewa ke kuht luhlahlfongi ke Leum El ahkacsmakihnye kuht lah “El suc auliyak ke ma koluk lal uh, el eis nuhnak muhnahs, ac Leum El tilac esam ma koluk ah.”¹¹

Ke kuht auliyak nuh pwacye, weacng fahkwack ac forlah liki ma koluk lasr, kuht wi Enos siyuck, ke mwacta lasr uh wacngihnlac, “Leum, fuhkah tuh in ohinge?” ac lohng top “Ke srihpen luhlahlfongi lom ke Kraist”¹² ac solsol Lal in “Esamuhl.”¹³

Ke kuht auliyak ac mwet kol ke pristut uh fahk muh kuht nwacsnwacs fal, kuht tiac enenuh in kalweni na taltal ma koluk met ah. In nwacsnwacs fal uh tiac kalmac pa in suwohs. Plwacn in engan luhn Pahpah Lucng uh suli kuht in inse puhsisacl ac mihslac ke fuhfahsryucsr in moul lasr uh na sie lwen in ahksuwohswohsyeyucklac sin Kraist,¹⁴ tiac in kwacna fosrngah, elyah, ac suhpwacr ke suhfal lasr mihsenge uh. Esam, El etuh ma nuh kwewa kacsr ma kuht tiac luhngse mwet sahyac in etuh—ac El srwackna luhngse kuht.

Kuhtuh pacl moul uh srihke luhlahlfongi lasr ke pahkotwen, ma sap, ac nuhnuhnkuh luhn Kraist ac ke solsol mwesahs Lal in lwelah Iwaclah Lal in onwekuhtlac ke kuht nuhnak muhnahs nuh sin mwet sahyac ac kuht sifacna.

Muhtwacn fuhsr se suc muhta ke muhtuhn facl sahyac el srihke konwacack orekma oacna sie mwet sihm, tuhsruhk mwet wal se suc kihtakat orekma uh el tiac pahkotwen. El fahk nuh sel, “Ke signature luhk, nga olwelah muh kom ac tiac orekma oacna sie mwet sihm tuhsruhk kom ac puhklaf.” El pa muhtwacn sefanna suc puhklaf ke un mukul.

Yac ekahsr tohkoh muhtwacn se inge el eklac mwet wal. Sie lwen ah mukul se tuhkuh ac enenuh signature lal in eis orekma.

Muhtwacn se el siyuck, “Kuh kom esamyuc?” El tiacna.

El fahk, “Kom tiac esamyuc, tuhsruhk nga esam kom. Ke signature lom, kom oruh tuh ngan tiac mwet sihm se. Ke signature lom, kom suhpweyuclac tuh ngan puhklaf, muhtwacn sefanna ke un mukul.”

El fahk nuh sihk, “Nga puhla muh nga enenuh oruh nuh sin mukul sacn wo liki el oruh nuh sihk ah—tuhsruhk wacngihn sihk kain kuh sacn.” Kuhtuh pacl uh kuh sacn wacngihn sesr, tuhsruhk kuh in konweyuckyak ke esamyacn Iwaclah luhn Mwet Lahngo lasr, Jisus Kraist.

Ke luhlahlfongi ke mwet se uh ahkkolukyeyuck, ke finsrak uh wacngihnlac, insiyac uh muhsahllah, na sifil muhsahllah, ke kuht ke nuhnuhnkuh suwohs tuh kuht enenuh pahkotwen, ke kuht foloyak ac kuht tuhng, ke kuht enenuh in etuh lah meac kuht enenuh sruok na ac meac kuht enenuh in fuhlwelah, kuht kuh in esamuhl pacl nuh kwewa. Moul uh tiacna koluk na oacna luhmweyuck kuhtuh pacl. Pahkomuhta ma pahtpaht Lal uh kuh in kahsruh kuht in konwacack inkacnek, pwacye, ac moul lasr.¹⁵

Ke kuht esam kahs ac srihkasrak Lal, kuht fah tiac ahkkoluk kuh ahkkolukyeyuck.

Pahpah tuhmwacn kawuck se luhk ah el sie mwet orekma ke stosah. Orekma suwohs lal uh ahkkahlwemyeyuck finne ke paho nwacsnwacs lal. Sie lwen ah sie mwet ke tempuhl el fahk nuh sin pahpah tuhmwacn kawuck luhk tuh el enenuh in ohlah pahol met liki el kuhlwacnsap we. Sahyacn ahkkolukyeyuck, mukul wowo sac el muhtwacwacack oul ahluh luhn sucu lal ke pahol ke kof nwacsnwacs met liki el wi nuh tempuhl. El oraclah srihkasrak na wowo kwaclos suc “fanyak nu finohl sin Leum God” ac “utyak nuh in acn muhtahl sel” ke paho ac inse nwacsnwacs.¹⁶

Fin oasr puhla sekuhlwacng lasr, kasrkuhsrak, kuh foloyak lasr sin mwet uh kuh fin oasr srihpac kuht enenuh in siyuck ke nuhnak muhnahs sin mwet, ingena pa pacl lasr in oruh.

Ahkahkosr, El suli kuht in esam lah El kwacna pain kuht nuh lohm uh.

Kuht etwaclah ke kuht siyuck ac suk. Tuhsruhk nuhnak muhnahs met tui ke suk an nwe ke kowos sun—ke kahs luhn T. S. Eliot—“acn [kowos] muhtwacack ah ac puhla muh pa pacl se emet uh.”¹⁷ Ke kowos ahkolah an, nuhnak muhnahs ikacslah insiyowos nuh ke Puk luhn Mormon, sie pac pacl, oacna in pacl se emet. Nuhnak muhnahs pruhe ke inse pwacye, sie pac pacl, oacna in pacl se emet.

Luhlahlfongi ke mwe esam srihk se ke pacl loes somlah ah. Lwelah in ahkyohkye luhlahlfongi lowos. Yurin God, wacngihn ohiyac ma kuht tiac kuh in fohlohk kac.

Mwet pahluh emet ac ingena uh kwacfe kuht in tiac lwelah tahfonglac srihk, ma koluk, kuh mwe muhnahs luhn mwet uh—ma luhn mwet sahyac kuh ma lasr—in oruh kuht in tiac liye ma pwacye, wuhlweacng, ac kuh in lahngo ma oasr in wosasuc fohlohyak Lal uh.¹⁸ Ma na yohk srihpac ke sie alu ma kais sie sesr kapwack ke orekma sesuwohs lasr uh. Mwet Pahluh Joseph el fahk, “Nga tiacna fahk nuh suwos lah nga perfect; tuhsruhk wacngihn tahfonglac ke fwackyuck ma nga nuh luti uh.”¹⁹

Ahklimekohsr, kuht kuh in esamuhl pacl nuh kwewa ke lwen Sahpuht ke kuhfa luhn Leum. Ke sahflahiyacn orekma Lal ke moul ac ke muhtwacwackiyacn orekma Lal ke El moulyak ah—kwewana pacl uh—Mwet Lahngo lasr El eis puhret ac wain ac siyuck tuh kuht in esam mahnol ac srah Lal,²⁰ “mweyen ke kowos oruh ohinge kowos fah esam lah ke ao sacn El oasr yuruwos.”²¹

Ke akwuck luhn kuhfa luhn Leum, kuht ahkkahlwemye nuh sin God Pahpah tuh kuht insese in eis nuh facsr inen Wen Nahtuhl ac esamuhl pacl nuh kwewa ac liyacacng masap Lal, ma El tuh acse nuh sesr, tuh Nguhn Lal in kuh in wi kuht pacl nuh kwewa.²²

Oacna Amulek el luti, kuht esamuhl ke kuht pruhe ke kuht oasr ke imac lasr, in un sip nahtuhsr, ac lun lohm sesr ac ke kuht esam mwet enenuh, mwet kohflohfohl, mwet mas ac kweok uh.²³

Sahflahiyac, ahkohnkohsr, Mwet Lahngo lasr El suli kuht in esamuhl pacl nuh kwewa oacna El esam kuht pacl nuh kwewa.

Ke acn Macrike, Mwet Lahngo moulyak lasr El solwaclos suc oasr ah in tuhkuh, kais sie, in kohllah paholos nuh sisken inniwacl ac in puhla iken osra ke pahol ac niyacl.²⁴

Ma suhmuhslah uh ahkuhtweyac sifil moulyak uh tuh “paho niyac ac kuhpahsr nuhkwewa fah sifil fohlohkyang nuh ke … ohiyac fal ac wo la,” ac “finne aunsucf ke sifac fah tiacna tuhlac.”²⁵ Ke srihpen ohinge, nuhnak muhnahs motko lah fuhkah tuh monin Mwet Lahngo suwohswohs, sifil moulyak uh srwackna oasr kihnet ke siskacl ac iken osra ke pahol ac niyacl.²⁶

Kuhtuh pacl ke ma mahtuh luhn facluh, oasr mwet suc acnwucki ke srihpsrihpyak. Tuhsruhk Mwet Lahngo muhkwena, Jisus Kraist, El sruok kuht ke srwackna kihnet ke luhngse suwohs Lal. El muhkwena ahkfalye palye se ma sie fah srihpsrihpyak ke sahksin tuh El fah us kais sie sesr, ke ine, nuh yohrohl.²⁷

Mwet Lahngo lasr El fahkwack:

“Ahok, elos kuh in muhlkuhnlah, tuhsruhk Nga fah tiacna muhlkihnkowoslac.”

“Liye, Nga sihmihskowoslac lun pouk.”²⁸

El fahkwack muh El pa El suc srihpsrihpyak. El pa Jisus Kraist suc srihpsrihpyak. El pa Wen nuhtin God.”²⁹

Nga fahkwack ac pruhe ke inse puhsisacltuh kuht fah esamuhl pacl nuh kwewa—ke pacl nuhkwewa, ma nuhkwewa, ac acn nuhkwewa ma kuht oasr we.³⁰ Ke ine muhtahl luhn Jisus Kraist, amen.