Keememej E iien otemjel̗o̗k.

Ro jeiū im jatū, ke ikar jerbal ilo Asia, armej jet iien rekar kajjitōk, “Elder Gong, jete armej rej pād ilo ilo Kabun̄ in ilo Asia Area?”

Ikar ba, “Jimettan in armej ro ilal̗ in—3.6 pilien armej.”

Jet rōkar kajjitōk, “Epen ke n̄an keememej āt ko etāer?”

Keememej—im mel̗o̗kl̗o̗k—rej m̗ōttan wōt mour ko ad. Ilo waanjon̄o̗k, juon alen, ālkin reito reitak im pukot taļboon eo nejin ekāāl, āliktata kōrā eo ippa ekar kālōt n̄an kūri jān bar juon taļboon. Ke ekar ron̄ an jan̄ taļboon eo an, kōrā eo ippa ekar l̗ōmn̗ak, “Wōn in emaron̄ in kūr eō? Ijjan̄in kar lel̗o̗k nōm̗ba in n̄an jabdewōt!”

Kakeememeje—im mel̗o̗kl̗o̗ke—rej barāinwōt uwaan wōt kōttōbar in ad n̄an mour indeeo. Iien, anemkwōj, im kakkeememej rej jipan̄ kōj jel̗ā, eddōkl̗o̗k, im kajoorl̗o̗k ilo tōmak.

Ilo naan ko an juon al ijeļā:

Kajjojo wiik, ilo ad bōk m̗ōttan kwojkwoj eo, jej bujen n̄an keememej E iien otemjej. Bōk jān enan̄in 400 eoon in jipan̄ ko n̄an naan eo keememej, en̄iin jiljino wāween ko jemaron̄ iien otemjej keememej E.

Juon, jemaron̄ iien otemjej keememej E ilo bōk lōke ilo bujen ko An, kallim̗ur ko, im kōjparok ko.

Irooj ej keememej bujen ko An indeeo—jān tōre ko an Adam n̄an raan eo Adam kar kōjeram̗m̗ane “naaj atbakoje m̗ool eo, im relōn̄l̗o̗k, innām Zaion enaaj relal̗tak, im aolep lan̄ ko renaaj udiddid kōn m̗ōn̗ōn̗ō, im lal̗ enaaj ekkāke kōn lan̄lōn̄.”²

Irooj ej keememej kallim̗ur ko An, ekoba kallim̗ur ko n̄an ain Israel eo ejjeplōklōk jān Bok in Mormon: Bar juon Kallim̗ur kōn Jisōs Kraist im kallim̗ur ko lil̗o̗ki n̄an kajjojo mem̗ bōr im mijinede ro rej keememej aorōk in jetōb ko.³

Irooj ej keememej im rōjan̄ aelōn̄ ko im armej ro. Ilo raan kein el̗ap m̗akūtkūt im kamijak, ⁴ “jet rej lōke ilo jādiet ko, im jet ilo o̗o̗j ko: bōtaab jenaaj keememej wōt etan Irooj ad Anij,”⁵ eo ej tōl “ilju āinwōt an kar etto.”⁶ Ilo “iien ko rōkauwōtata,”⁷ jej “keememej bwe ejjab jerbal ko an Anij me rej kallulu, bōtaab jerbal ko an armej.”⁸

Ruo, jemaron̄ iien otemjej keememej E ilo kanooj kūle kam̗m̗oolol Pein ilo aolepān mour kein ad.

Pein Irooj ilo mour kein ad ekkā an kanooj alikkar ilo jōkjōk in. Āinwōt an rikūrijin rimmālōtlōt Soren Kierkegaard karōke: “Mour eaikuj naaj kar meļel̗e likl̗o̗k. Bōtaab … ej aikuj naaj mour m̗aanl̗o̗k.”⁹

Eo jinō jitōn bōro raan kein ekar keememe 90 raan in l̗otak eo an. Ekar kanooj kam̗m̗oolol kōjeram̗m̗an ko an Anij ilo kajjojo tōreān el̗l̗ap ilo mour eo an. Bwebwenato ko an baam̗le, m̗anet ko an baam̗le, im epaak in baam̗le ej jipan̄ kōj m̧ōņōņō im ememeje men ko etto, ejja tōre in wōt ej letok jon̄ak ko an raan kane tok im kōjatdikdik. L̗ain in kajoor an Priesthood im kōjeraam̗m̗an ko an petriak rej kam̗ool an eltan pein Anij jān epepen n̄an epepen.

Konan̄in ke kar l̗ōmn̗ak kake eok make āinwōt am̗ make bok in kakeememej emour —kakeememeji ta im wāween am̗ kālōt n̄an keememej?

Ilo waanjon̄o̗k, ke ikar dik, ikar kanooj kōn̗aan iukkure bāājkōtbo̗o̗l̗ ilo jikuul̗. Ikar kōmmelmel im bar kōmmelmel. Juon raan coach eo ekar jitōn̄tok 6-ne-4-inij eo am (1.93 m) m̗ōkade center im 6-ne-2-inij eo am (1.88 m) m̗ōkade forward im ekar ba n̄an n̄a, Imaron̄ likūt eok ilo tiim in, bōtaab kwonaaj jab maron̄ iukkure.” Ij keememej wāween an kar jouj kōketak eō, “Etke kwoj jab kajjieon̄ n̄an jōkar? Komaron̄ in naaj m̗ōkade.” Baam̗le eo aō rōkar em̗m̗ōn̗ōn̗ō ke ikar kadel̗o̗n̄e boin eo aō m̗oktata.

Jemaron̄ in keememej ro rōkar letok bar juon kattōn ad iien, im juon kattōn alen ruo, kōn el̗ap m̗ool, jouj, kijenmej, im kōllowetak. Im jemaron̄ in erom bar ro jet keememej n̄āāt relukkuun aikuj jipan̄. Kanooj kam̗m̗oolol keememeje jipan̄ eo an ro jet im tōl in im̗ōk eo an Jetōb ej juon ial̗ n̄an keememej E. Ej wāween eo jemaron̄ in bwine kōjeraam̧m̧an ko im loe ta eo Anij ekar kōm̧m̧ane.¹⁰

Jilu, jemaron̄ iien otemejej keememej E ilo lōke n̄e Irooj ej jiron̄ kōj “eo em̗ōj an ukel̗o̗k jān jero̧wiwi ko an, ejja in wōt ej bōk jeorļo̧k bōd, im N̄a, Irooj, ij jab bar keememeji.”¹¹

N̄e jenaaj kanooj ukel̗o̗k, ekoba ilo kwal̗o̗k bōro im jol̗o̗k jerawiwi ko ad, jej kajjitōk ippān Enos, āinwōt bōd ko ad rej julo̗ki, “Irooj, ekōjkan an men in kōm̧m̧an?” im ron̄jake uwaak eo “Kōnke tōmak eo am̗ ilo Kraist”¹² im kūr eo An n̄an “Kwōn kakememej Eō.”¹³

N̄e jej ukel̗o̗k im ritōl ro an Priesthood rej kalikkare ke jerreo, jaikuj jab etal wōt im kwal̗o̗k bōro im kwal̗o̗k jerawiwi ko kwoj jan̄in ukeļo̧k jāni. N̄an naaj wānōk ejjab mel̗el̗ein n̄an naaj weppān. Karōk in m̗ōn̗ōn̗ō eo an Jemedwōj Ilan̄ ej kūr kōj n̄an naaj ettā ilo aenōm̗m̗an ilo ial̗ in n̄an ad juon raan erom wānōk ilo Kraist,¹⁴ jab aolep iien inepata, rup bōro, ak jab m̗ōn̗ōn̗ō ilo ad jab weppān kiiō. Keememej, E ejel̗ā men otemjej ko jejjab kōn̗aan bwe ro jet ren jel̗ā kake kōj—im io̗kwe wōt kōj.

Jet iien mour in ej māllejjon̄e kōj jān jouj eo an Anij, jim̗we, im etale im ilo m̗ool in kūr n̄an kōtl̗o̗k Pinmuur eo An bwe en kōmour kōj ilo ad jol̗o̗k bōd ko an ro jet im ad make.

Juon jiron̄ ilo bar juon lal̗ ekar kappok an jerbal āinwōt juon rikōm̗m̗an nuuj, bōtaab armej eo ej lel̗o̗k jerbal ekar nana. Ekar ba n̄ane, “Kōn eltan peiū, ij m̗ool kwojjab naaj erom rikōm̗m̗an nuuj ak kwonaaj kōb ro̗n̄ in kwōpej.” E wōt kōrā kar kōb ro̗n̄ in kwōpej ibwilijin em̗m̗aan ro.

Iiō ko tokālik, kōrā in ekar erom juon wōpija. Juon raan juon em̗m̗an ekar itok eaikuji etlan pein n̄an juon jerbal.

Ekar kajjitōk, “Kwōj keememej ke eō?” Ekar jab.

Ekar ba, “kwōj jab keememej eō, ak ij keememej eok. Kōn eltan peim̗, kwaar kam̗ool ke iban kar erom juon rikōm̗m̗an nuuj. Kōn eltan peim̗, kwaar jilkinl̗o̗k eō bwe in kōb ro̗n̄ in kwōpej, juon wōt kōrā ibwilijin em̗m̗aan ro.”

Kōrā eo eba, “ij kūle ij aikuj jipan̄ em̗m̗aan en̗ em̗m̗anl̗o̗k jān an kar jipan̄ eō—bōtaab ejjel̗o̗k kajoor eo ippa.” Jet iien kajoor in ejjab pād ippād, bōtaab maron̄ in loe ilo Pinmuur eo an ad Rilo̧mo̧o̧r Jisōs Kraist.

N̄e kaarmejete lōke, ettōn̗ak ko rejjeplōklōk, erup bōro ko, im bar rup, n̄e jej kōn̗aan jim̗we im aikuji jouj, n̄e nakōl̗ ko ad renokjōk im dānnin mejād rej to̗o̗r, n̄e jej aikuj jel̗ā ta eo jen kabbōjrak ie im ta eo aikuj kōtl̗o̗ke, jemaron̄ iien otemjej keememej E. Mour ejjab kanooj nana āinwōt emaron̄ jet iien enana. An jouj el̗ap emaron̄ jipan̄ kōj pukot ad ial̗, m̗ool, im mour.¹⁵

N̄e jej keememej naan ko im waanjon̄o̗k ko An, jenaaj jab maron̄ lel̗o̗k ak jum̗ae.

Jemān eo m̗ōtta ekar jerbal āinwōt juon injinia. Jerbal m̗ool ko an rōkar alikkar ilo an kanooj kwal̗ pā ko pein. Juon raan, juon eo ilo tampeļ ekar ba n̄an jemān eo jera ej aikuj karreoik pā ko pein m̗okta jān jerbal ijen̗. Ijjelo̗kin naaj ellotaan, em̗m̗aan em̗m̗an in ekar jino an kwal̗ pileij ko an baam̗le eo kōn pein kōn bar jidik dān ejjoobob m̗okta jān an pād ilo tampel̗. Ej waanjon̄o̗k kake ro rej wanlōn̄l̗o̗k n̄an tol̗ eo an Irooj” im “jutak ilo jikin ekkwojarjar” kōn pā ko rerreotata im m̗ooltata in bōro.¹⁶

N̄e ewōr ippād en̄jake in jab jouj, n̗ota, ak inepata ko ak n̄e jej kōm̗m̗an n̄an kajjitōk jeerl̗o̗k bōd an ro jet, kiiō ej iien eo in n̄an kōm̗m̗ane.

Emān, E ej kūr kōj n̄an keememej bwe E ej iien otemjej karuwaineneik kōj n̄an m̗weo.

Jej katak jān kajjitōk im kappukot. Bōtaan jouj im jan bōjrak kappukot m̗ae kwōj tōpare—ilo naan ko an T. S. Eliot—“ijo [kwaar] jinoe im jel̗ā kōn jikin eo ejkab kein kajuon.”¹⁷ N̄e kwopojak, jouj im kōppel̗l̗o̗k buruōm̗ n̄an Bok in Mormon, bar juon alen, ejkab kein kajuon. Jouj im jar ilo m̗ool in kōttōpar, bar juon alen, ejkab kein kajuon.

Lōke ilo jinoin ak kwoj jab ememej. Kōtl̗o̗k bwe en kōkajoorl̗o̗k am̗ tōmak. Kōn Anij, ejjel̗o̗k bar jepl̗aak.

Rikanaan ro etto im rein raan kein rōkar kajjitōk ippād n̄an jab kōtl̗o̗k ruōn armej ro, bōd ko, ak m̗ōjn̗o̗ ko—an ro jet ak ad make—kōm̗m̗an bwe jen jab tōpar m̗ool eo, bujen ko, im bōk kajoor eo jān jepl̗aaktok in gospel eo An.¹⁸ Menin el̗ap an aorōk ilo juon kabun̄ eo me jemaron̄ in eddōkl̗o̗k ilo an jab wājepdik ad bōk koņaad. Rikanaan Josep ekar ba, “Ijjan̄in kar jiron̄ kom̗ ke iweppān; bōtaab ejjel̗o̗k bōd ilo revelesōn kein ko ikar katakin.”¹⁹

Lal̗em, jemaron̄ iien otemjej keememej E ilo raan in Jabōt ilo iien kwojkwoj. Ilo iien eo āliktata in an kwal̗o̗k ilo mour in im ilo jinoin An kar kwal̗o̗k ilo jerkakpeje, ad Rilo̗mo̗̗o̗r ekar bōk pilawā im dān im kar kajjitōk bwe jen keememej Ānbwinnin im bōtōktōkin,²⁰ “n̄an toon wōt ami kōm̗m̗ane menin kom̗ naaj keememej awa in me ikar pād immāmi.”²¹

Ilo kōjeram̗m̗ane kwojkwoj eo, jej kam̗ool n̄an Anij eo Jemād bwe jej kōn̗aan bōk iood etan Nejin im iien otemjej keememej E im dāpij wōt kien ko An, ko Eaar litok n̄an kōj, bwe jen maron̄ iien otemjej bōk Jetōb eo An bwe en pād ippād.²²

Āinwōt an Amulek ekar katakin, jej keememej E ilo ad jar kōn jikin kallib ko ad, mennin mour ko ad, im men ko m̗weied im n̗e jenaaj keememeje ro riaikuj, rikeelwaan, rinan̄inmej im riakā.²³

Āliktata, jijno, ad Rilo̧mo̧o̧r ej kūr kōj n̄an keememej E āinwōt An iien otemjej keememej kōj.

Ilo Lal̗ in Ekāāl, Rilo̗mo̗o̗r eo ad ekar jerkakpeje kar kūr ro raan kein n̄an itok, juon illo̗k juon, n̄an karum̗l̗o̗k peier ilo Katin im en̄jaake kōnjān dila ko ilo Pein im ilo Neen.²⁴

Jeje ko rekwojarjar rej kalikkare jerkakpeje āinwōt kajjojo m̗ōttan im ekkeitaak naaj kobaiki ippān doon n̄an … ijōko jikier rōkkar im jejjet,” im “men̄e juon kol̗an bar ejjāmin jako.”²⁵ Bwe enaaj āindein, jouj im l̗ōmn̗ake menin bwe wānōk eo an ad Rilo̗mo̗o̗r, kar jerkakpeje ānbwinnin ej pād wōt kinej ko ilo Katin im jenkwan dila ko ilo Pein im Neen.²⁶

Ilo bwebwenato in tōre kein, rōkōn bar m̗anm̗an armej ilo debwāāl. Bōtaab Rilo̗mo̗o̗r eo ad wōt, Jisōs Kraist, ekar atbo̗kōj kōj ej bōk wot kakōl̗l̗e ko an io̗kwe eo An em̗ool. E wōt ekar ellā jān kanaan ko kōn kotake ioon debwāāl bwe E emaron̄ bōk kajjojo iaad, kōn āt, n̄an E.²⁷

Ad Rilo̗mo̗o̗r ej kwaļo̧k:

“Aaet, rein re maron̄ in meļo̧kļo̧k, a I jāmin meļo̧kļo̧k eok.

“Lo, em̧ōj Aō je etam̧ illo̧piden Peiū.”²⁸

E ej kam̗ool: “N̄a e eo kar kotak ilōn̄. N̄a Jisōs me kar debwāāle. N̄a ij Nejin Anij.”²⁹

Ij lukkuun ettā kam̗ool, im jar, bwe jenaaj iien otemjej keememej E—ilo aolep iien ko, aolep men ko, im aolep jikin ko me jemaron̄ pād ie.³⁰ Ilo etan et ekwojarjar im erreo etan Jisōs Kraist, amen.