Tamataman Ih Ansou Koaros

Riei lih oh ohl kesempwal akan, ni ansou me I mih nan ahi misin nan wein liki, ekei pak aramas kin idek, “Elder Gong aramas depe mih nan Mwomwohdiso wet nan Pali Asia o?”

Ngehi nda, “Elep en tohn sampah—3.6 rar en aramas.”

Mehmen ahpw idek rehi, “E apwal en tamataman ederailko pwon?”

Tamataman—oh manokehla—wia kisehn momour en rahn koaros. Ni karasepe, ehu pako, mwurin ah rapahki nah sehlo wasa koaros, ahi pwoud ahpw lemehda en call sang nan ehu dengwa. Ni ansou me e rongada nah sehlo rihng, e medewe, “Isime pahn ekehkerie? I saik kiheng emen nei nempeh!”

Tamataman—oh manokehla—wia kisehn atail seiloak soutuk. Ansou kan, pilipil kan, oh iren ketemen kan wia sawasepetail en esehla, kekeirda, oh kalaudehla pwoson.

Nan lepin lokaiahkan en koul sarawieu me I perenki:

Nan ehu ehu wihk, ni ansou me kitail kin ale kamadipw sarawi, kitail kin inoukihda me kitail pahn tamataman Ih ansou koaros. Mie kahrepen iren pwuk sarawi me tohto sang meh 400 sansalehr ong lepin lokaia tamataman, iet soahng weneu me kitail kak tamatamaniki Ih ansou koaros.

Keieu, kitail kak tamataman Ih ansou koaros sang ni atail pahn pwoson Sapwellime inou kan, oh sapwellime koapwoaroapwoar kan.

Kauno tamataman Sapwellime inou poatoapoat akan—sang nan mwehi en Adam lel rahn me kadaudokehkan pahn kasamwoh me mehlelo, oh kilengdahla powe, Sahion ahpw pahn mahsendihdo, oh nanleng pwon pahn itikengkihda peren, oh sampah pahn rererkihla popohl.”²

Kauno tamataman Sapwellime inou kan, iangahki inou kan en kapwurepene mehn Israel me mwerpesengehr kan sang ni sawas en Pwuken Mormon. Pilehu Kadehdehpen Sises Krais oh inou kan me kohieng tohn mwomwohdiso pwon oh misineri me tamataman kesempwal en aramas.³

Kauno tamataman oh inoukidahr ong wehi oh aramas akan. Nan rahn en kediropw oh kasahliel pwukat,⁴“ekei likih kuruma kan, ah ekei oahs kan: ahpw kitail pahn tamataman mwaren Kauno atail Koht,”⁵ me kin kaweid “nan mour en mwuhr kan duehte Eh ketin kaweid mour en mahso.”⁶ Nan “ansou keper kat,”⁷ kitail tamataman me kaidehn doadoahk en Koht me kaweikek, ahpw doadoahk en aramas.”⁸

Keriau, kitail kak tamataman Ih ansou koaros sang nan atail pahn alehda ni kalahngan oh idawehn nan Sapwellime lipwalipw kohkohlahte.

Lipwalipw en Kauno nan atail mour kin mengei en sansalda ni atail pahn tamanda mwomwen soahng kan me wiawiher mwurin arail nekier. Nin duwen Christian soun medewe mehkot loal men Soren Kierkegaard kosoiahier: “Mour anahne wehwe ni mwuri. Ahpw … e anahne momourki ni mwowe.”⁹

Ahi nohnohu apwtehn wia ah ipwidi en sounpar 90th. E kin kadehdeh ni kalahngan Sapwellimen Koht kapai kan nan ehu ehu kapokon. Wasahn kileledihn peneinei kan, tiahk en peneinei, oh kolokolpenehn peneinei kin sewesei kitail en tamanda ni limpoak soahng tohto me nekier, ni ah kin kihda soahng kan nan koapwoaroapwoar.

Miehier pak ke medeweiuk duwehte pein noumw pwuken ketemen—wiawihdahsang dahme ke pilada en tamataman oh ia mwomwen ahmw pahn tamataman?

Ni karasepe, ansou me I tikitiko, I udahn kin men iang pwihn en basketballo nan sukuhl. I kasseku oh pil kasseku. Ehu rahno coacho ahpw idiadahr nait me reireiki piht wenou-ins pahiou (1.93m) men oh nait me piht wenou oh ins riau (1.88)men oh ndahngie, I kak kiheng uhk nan pwihn wet, ahpw ke pahn kakete sohte mwadong.” I tamataman uwen kadek me e kangongehkinie, “Dahme ke sohte songki soccer? Ke mwein pahn mwahu.” Ahi peneinei udahn werki arail peren ni ansou me I kihlong tepin ahi dengo.

Kitail kak tamanda irailko me kiheng kitail ansou mwahu, ni mehlel, kadek, kanengamah, oh sawas. Oh kitail kak wiahla aramas emen me mehteikan pahn tamataman ansou irail inenen anahne sawas. Tamataman ni kalahngan sawas en mehteikan oh an Ngehn Sarawio kaweid me lipwalipw iei ehu me kitail tamatamaniki Ih. Iei ehu me kitail song en medewe an emen ah kapai kan koaros oh kilang dahme Koht wiahiong kitailehr.¹⁰

Kesiluh, kitail kak tamatamaniki Ih ansou koaros sang ni likilik ansou me Kauno masanihong kitail “mehmen me pahn koluhla sang nan dipehkan, e pahn alehdi mahk, oh Ngehi, Kauno, pahn manokehla dipehkan.”¹¹

Ansou me kitail koluhla ni mehlel, iangahki wehkada oh manokehla dipetail kan, kitail iang Enos idek, ansou me atail pepehm en dipan akan pahn kohsang kitail, “Maing ahi Kaun, ia mwomwe? oh rong pasapengo “Pwehki ahmw pwoson rehn Krais”¹²oh Sapwellime luhk en ”tamataman ih.”¹³

Ni ansou me kitail koluhla oh kaun en priesthood kan pakairki me kitail waroahng, kitail sohte anahne wenla mwowe pilehu wehkada dipatail kan. Ma ke waroahng e sohte wehwehki me ke mwahu unsek. Sapwellime koasoandi en popohl luke kitail en ahneki aktikitik ni meleilei nan atail seiloak en mour pwe ehu rahn kitail en unsekla rehn Krais,¹⁴ sohla kalapw pwunod, tihwohla, de nsensuedkihla atail souitarkan en rahn pwukat. Tamataman, E mwahngih soahng koaros me kitail sohte mwahuki emen en ese me pid kitail—oh poakoahng kitail laudsang emen ah poakoahng kitail.

Ekei pak mour kin men song atail kin likih sapwellimen Koht kalahngan, pwuhng, kadeik oh nan Sapwellime saledek nan luhk en mweidehng Sapwellime Tomw en komour kitailla ni atail pahn mahk ong mehteikan oh pein kitail.

Peinakapw men nan ehu wehi ahpw kihlong nah daropwehn doadoahk nan pwukoahn soun wia nuhs, ahpw kaun me kin apwahlih pali en doadoahko udahn lemei. E ndahng peinakapwo, “Ahi sain daropweht, I inou kihwei me ke sohte pahn wiahla soun wie nuhs ahpw pahn sapwele nan samin kan.” Ih kelehpw lih me iang sapwele wasa samin nan pwungen ohl tohr.

Sounpar kei mwuri, lih menet wiahla kaun. Ehu rahno ohl emen ahpw kohdo anahne en sain ong doadoahk ehu.

Liho idek, “Ke tamataman ie?” E sohte taman.

Liho idek, “Ke sohte taman ie, ahpw I tamataman uhk. Pwehki ahmw sain nei daropwehu, ke inou kiheng ie me I sohte pahn wiahla soun wia nuhs. Ahmw saino, ke kadariehla ien sapwele wasa samin ko, lihtehmen nan pwungen ohl tohr.”

E ndahng ie, “I pehm I anahne mwahueng ohlo mwahusang dahme e wiahngiehu—ahpw I sohte kehlailehng.” Ekei pak kakehlailo sohte mih rehtail, ahpw e kak dierek ni Tomw en Sises Krais.

Ni ansou me likilik kin ohla, ouraman kan kin ohla, mohngiong kan kin ohla,oh pil pilehu ohla, ansou me kitail mwahuki pwuhng oh anahne mahk, ni ansou me kitail lingeringer oh nsensued, ni ansou me kitail anahne esehda dahme kitail anahne kolokoldieng oh dahme kitail anahne mweidala, kitail kak tamataman Ih ansou koaros. Mour sohte nohn keses mendahte ah kin mie mwomwe ekei pak. Sapwellime limpoak sohte imwio kak sewese kitail en diarada atail ahl, mehlel, oh mour.¹⁵

Ni ansou kitail tamanda Sapwellime mahsen kan oh karasaras, kitail sohte pahn kansensuediala ekei aramas de pil medekila.

An kempoakepahio pahpaho kin wiahda sdohsa oh mesihn teikan. Ah doadoahk mehlel sansalehr nan peh keneinein kamwakel kan. Ehu rahno, mehmen ni tehnpas sarawio ahpw ndahieng me e anahne kamwakele pehko mwohn ah pahn papah wasaho. Ohl menet ahpw tepida iris nein ah peneinei dahl kan ki pihl me sohpw ni ah sohte nsensuedla mwohn ah iang kohla ni tehnpas sarawio. E kasalehda irailko me pahn “pwarada nan dohl en Kauno” oh “kesihnenda nan sapwellime wasa sarawi” ki peh me keieu mwakelekel kan oh mohngiong me keieu mwahu unsek kan.¹⁶

Ma kitail ahneki pepehm me sohte mwahu, pepehm kan en lingeringer me kehlail ong aramas men pahn mihmi loaletail werei de ma kitail ahneki anahn ehu en peki mahkki mehteikan, iei ansouo met.

Kapahiou, E ketin luke kitail en tamataman me ansou koaros E kasamwoh kitailla reh.

Kitail esehla sang ni atail kin peipeidek oh raparapahki. Ahpw menlau kedeh uhdi rapahki lao ke diar—nan lepin lokaiahkan en T. S. Eliot— “wasa me ke tepidahr oh ehdin ahmw ese wasaho.”¹⁷ Ni ansou me ke onopada, menlau rapahki nan ahmw pepehm kan ki Pwuken Mormon, pilehu, ni mwomwen me ehdin. Menlau kapakapki ni ineng mehlel, pilehu, ehdin.

Likih me iren ketemen me luwet sang ansou kei samwalahro. Mweidehng en kalaudepeseng ahmw pwoson. Rehn Koht, sohte ansou ehu me kitail wia mehkot me udahn suwed me pahn apwal en koluhla.

Soukohp en mahsoko oh pil rahn pwukat peki rehtail en dehr mweidehng luwet en aramas, pepehm en dipan kan, de luwet akan—mehteikan de pein atail—kahrehda kitail en sohte alehdi me mehlelo, inou kan, oh manaman en doarehla nan Sapwellime kapwurpwurdohn rongamwahu wet.¹⁸Met udahn kesempwal nan mwomwohdiso ehu me emen emen kitail kin keirda sang nan atail iang towehla mendahte ah sohte unsek. Soukohp Joseph masanih, “I sohte ndahng kumwail me I unsek; ahpw sohte sapwung nan kaudiahl kan me I padahkiher.”¹⁹

Kelimau, kitail kak tamataman Ih ansou koaros nan kamadipw sarawi en rahn en sapwad. Ni imwin Sapwellime kalohk en aramas oh tepin Sapwellime kalohk en iasada, atail Sounkomour ketkihda pilawa oh wain oh peki me kitail en tamataman Sapwellime paliwar oh nta,²⁰ “pwe ansou koaros me kumwail wia met kumwail pahn tamataman ansouwet me I patehng kumwail.”²¹

Nan doadoahk sarawi en kamadipw sarawi, kitail kadehde ong Koht Sahmo me kitail men alehda pohtail mwaren Sapwellime Iehroso oh tamataman Ih ansou koaros oh kapwaiada Sapwellime kosoned akan, me E ketkiheng kitailehr, pwe Sapwellime Ngehn Sarawi en ieiang kitail ansou koaros.²²

Ni Amulek ah padahk, kitail tamataman Ih ansou kitail kapakapki atail mohs akan, atail pwihn en mahn akan, oh tohn ihmwatail kan oh ansou kitail tamanda me anahn, sohte likou, soumwahu oh toutoulahr.²³

Keweneu, atail Sounkomour luke kitail en tamataman Ih ansou koaros duwehte Ah kin kalapw tamataman kitail.

Nan sampah kapwo, atail Sounkomour me iasadahro luke irailko me mih wasahu en kohdo, emen mwurin emen, irail en doahke nan limehkan oh kehn lipwen metehko nan limehko oh alialuwehko.²⁴

Pwuhk Sarawihkan eritikiada iasada me “peh oh neh koaros oh pil wasa tihkan kin pouspene ie pahn kepwurpwurpene … arail wasahkan pwehn unsekla,” oh “sohte ehu piten moange pahn pwopwula.”²⁵ Met iei mwo, menlau teneki ia mwomwen me iasadahn paliwar unsek en atail Sounkomour duhduwehte ohlahkan ni paliwere oh lipwen metehkan ni lime oh alialuwe.²⁶

Nan ansou kan en mahs, aramas kin kamakamkihla kalohpwu. Ahpw atail Sounkomour, Sises Krais kelehpw, me kasamwoh kitailte wewa mwahi kan en Sapwellime limpoak mehlel. Ih kelehpw me kapwaiada kokohp en pwokpwokda pohn lopwuo pwehn ketkihda eden emen emen kitail Reh.²⁷

Atail Sounkomour ketin pakairki:

“Ehi, irail pahn manokehla, ahpw ngehi, sohte kak manokeiukala.”

“Kilang, I kalipweikumwaildier pohn pehi ka.”²⁸

E ketin kadehdeh: “Ngehi iei ih me pwokpwokdahro. Ngehi Sises me kalopwuhlaho. Ngehi sapwellimen Koht Iehros.”²⁹

I kadehdeh ni karakarahk, oh kapakapki, me kitail pahn kin tamataman Ih—nan ansou koaros, soahng koaros, oh wasa koaros me kitail pahn mih ie.³⁰ Ni mwaren Sises Krais, amen.