2010-2019
Dalayon nga Mahuptan ang Kapatawaran sang Inyo mga Sala
Abril 2016


Dalayon nga Mahuptan ang Kapatawaran sang Inyo mga Sala

Paagi sa nagapakabalaan nga gahum sang Balaan nga Espiritu bilang aton pirme nga kaupod, sarang naton mapadayon nga mahuptan ang kapatawaran sang aton mga sala.

Isa ka makahulogan nga dinalan nga gingamit ni Haring Benjamin sa iya mga pagpanudlo parte sa Manluluwas kag sa Iya Pagbayad-Sala nangin pabalikbalik nga topiko sang akon pagtuon kag pagbinagbinag sa madamo nga tinuig.

Sa iya makapulukaw-sing-espiritu nga pamilinbilin sa katawhan nga iya gin-alagaran kag ginpalangga, ginlaragway ni Haring Benjamin ang importansya sang paghibalo sang himaya sang Dios kag pagtagamtam sang Iya gugma, sang pag-agom ang kapatawaran sang mga sala, sang pirme pagdumdom sang pagkagamhanan sang Dios, kag sang pagpangamuyo adlaw-adlaw kag pagtindog sing malig-on sa pagtuo.1 Kag iya man ginpromisa nga paagi sa paghimo sining mga butang “dalayon kamo nga magkasadya, kag mapuno sang gugma sang Dios, kag dalayon nga mahuptan ang kapatawaran sang inyo mga sala.2

Ang akon mensahe nagatutok sa prinsipyo sang dalayon nga paghupot sang kapatawaran sang aton mga sala. Ang kamatuoran nga ginapahayag sa sining dinalan sarang makapabaskog sang aton pagtuo kay Ginuong Jesucristo kag makapasangkad sang aton pagkasumulunod. Akon ginapangamuyo nga ang Balaan nga Espiritu magainspirar kag magapabakod sa aton samtang ululupod naton nga ginapadaluman ang importante nga espirituhanon nga mga kamatuoran.

Espirituhanon nga Pagkabun-ag Liwat

Sa duta aton maeksperiyensyahan ang pisikal nga pagkabun-ag kag ang oportunidad para sa espirituhanon nga pagkabun-ag liwat.3 Ginalaygayan kita sang mga propeta kag mga apostoles nga magbugtaw sa Dios,4 “mabun-ag liwat,”5 kag mangin bag-o nga mga tinuga kay Cristo6 paagi sa pagbaton sa aton mga kabuhi sang mga bugay nga nangin posible paagi sa Pagbayad-Sala ni Jesucristo. Ang “mga merito, kag kaluoy, kag grasya sang Mesias”7 makabulig sa aton nga madaug ang pagkamaiyaiyahon kag mga huyog sa kadalok sang kinaugali nga tawo kag mangin mas mainulikdon, mabinuligon, kag maayo. Ginalaygayan kita nga magkabuhi agud nga “makatindog [kita] nga wala’y musing sa atubang [sang Ginuo] sa katapusan nga adlaw.”8

Ang Balaan nga Espiritu kag mga Ordinansa sang Priesthood

Maathag nga ginpalip-ot ni Propetang Joseph Smith ang importante nga papel sang mga ordinansa sang priesthood sa ebanghelyo ni Jesucristo: “Ang pagkabun-ag liwat, nagaabot paagi sa Espiritu sang Dios sa mga ordinansa.”9 Ining nagadulot nga pahayag nagapadako sang mga papel sang pareho Balaan nga Espiritu kag sagrado nga mga ordinansa sa proseso sang espirituhanon nga pagkabun-ag liwat.

Ang Balaan nga Espiritu ang ikatatlo nga miyembro sang Pangulohan sang Dios. Isa Sia ka persona nga espiritu kag nagasaksi sang tanan nga kamatuoran. Sa balaan nga mga kasulatan, ang Balaan nga Espiritu ginakilala bilang Mananabang,10 manunudlo,11 kag manugpahayag sang rebelasyon.12 Dugang pa, ang Balaan nga Espiritu isa ka manugpakabalaan13 nga nagatinlo kag nagasunog sang lagdo kag kalainan sa kalag sang tawo nga daw kasubong sang kalayo.

Ang balaan nga mga ordinansa importante sa ebanghelyo sang Manluluwas kag sa proseso sang pagpalapit sa Iya kag paghandum sang espirituhanon nga pagkabun-ag liwat. Ang mga ordinansa sagrado nga mga buluhaton nga may espiritwal nga katuyuan, wala katapusan nga importansya, kag may kaangtanan sa mga layi kag mga palatukoran sang Dios.14 Ang tanan nga nagaluwas nga mga ordinansa kag ang ordinansa sang sakramento kinahanglan awtorisado nga ginahikot sang isa nga nagakapot sang kinahanglanon nga mga yabi sang priesthood.

Ang mga ordinansa sang kaluwasan kag pangkahitaasan nga ginahikot sa ginpanumbalik nga Simbahan sang Ginuo indi lang mga ritwal ukon simboliko nga mga kahiwatan. Kundi, ang mga ini nagalakip sang awtorisado nga mga pamaagi sa diin ang mga bugay kag mga kagamhanan sang langit makailig sa aton kabuhi.

“Kag ining mas mataas nga pagkapari ang nagadumala sang ebanghelyo kag nagakapot sang yabi sang mga misteryo sang ginharian nga amo ang yabi sang ihibalo parte sa Dios.

“Gani, sa mga ordinansa sini, ang gahum sang pagkadiosnon ginapakita.

“Kag kon wala ang mga ordinansa sini, kag ang awtoridad sang pagkapari, ang gahum sang pagkadiosnon indi mapakita sa mga tawo sa unod.”15

Ang mga ordinansa nga nabaton kag ginatahod nga may integridad importante sa pagbaton sang gahum sang pagkadiosnon kag sang tanan nga bugay nga ginpatigayon paagi sa Pagbayad-Sala sang Manluluwas.

Pag-angkon kag Paghupot sang Kapatawaran sang mga Sala paagi sa mga Ordinansa

Agud mahangpan sing mas maayo ang proseso sa diin aton maagom kag dalayon nga mahuptan ang kapatawaran sang aton mga sala, kinahanglan naton una nga mahangpan ang indi maseparar nga kaangtanan sang tatlo ka sagrado nga mga ordinansa nga nagapatigayon sa mga gahum sang langit: bunyag paagi sa pagtugmaw, pagtakdong sang mga kamot para sa dulot sang Balaan nga Espiritu, kag sakramento.

Ang bunyag paagi sa pagtugmaw para sa kapatawaran sang mga sala “amo ang panugod nga ordinansa sang ebanghelyo”16 ni Jesucristo kag kinahanglan nga unahan ini sang pagtuo sa Manluluwas kag sang sinsero nga paghinulsol. Ining ordinansa “isa ka tanda kag kasugoan nga ginpahamtang sang Dios para [sa Iya mga kabataan] sa pagsulod sa Iya ginharian.”17 Ang bunyag ginadumalahan sa awtoridad sang Aaronic Priesthood. Sa proseso sang pagpalapit sa Manluluwas kag espirituhanon nga pagkabun-ag, ang bunyag nagahatag sang kinahanglanon nga primero nga pagtinlo sang aton kalag gikan sa aton mga sala.

Ang kasugtanan sang bunyag, nagalakip sang tatlo ka importante nga mga pangako: (1) nga handa kita nga dalhon sa aton mga kaugalingon ang ngalan ni Jesucristo, (2) dumdumon Sia pirme, kag (3) tumanon ang Iya mga kasuguan. Ang ginsaad nga bugay sa pagtuman sining kasugtanan amo ang “agud [aton] dalayon nga maangkon ang Iya Espiritu sa pag-upod sa [aton].”18 Gani, ang bunyag isa ka importante nga preparasyon sa pagbaton sang awtorisado nga oportunidad sang dalayon nga pagpakig-upod sang ikatatlo nga miyembro sang Pangulohan sang Dios.

“Ang pagbunyag [paagi sa] tubig … dapat pagasundan sang bunyag sang Espiritu agud mangin kompleto.”19 Subong sang gintudlo sang Manluluwas kay Nicodemo, “Kon ang isa [ka tawo] indi matawo sa tubig kag sa Espiritu, indi sia makasulod sa ginharian sang Dios.”20

Tatlo ka pahayag sang Propeta nga si Joseph Smith nagapadako sang importante nga koneksyon sa tunga sang ordinansa sang bunyag paagi sa pagtugmaw para sa kapatawaran sang mga sala kag sang pagtakdong sang mga kamot para sa dulot sang Balaan nga Espiritu.

Pahayag 1: “Ang bunyag isa ka sagrado nga ordinansa nga preparasyon para sa pagbaton sang Balaan nga Espiritu; amo ini ang paagi kag yabi nga ginahatag ang Balaan nga Espiritu.”21

Pahayag 2: “Daw pareho lang nga ginabunyagan ninyo ang isa ka sako sang balas imbis tawo, kon wala ini ginahimo para sa kapatawaran sang mga sala kag pagbaton sang Balaan nga Espiritu. Ang bunyag paagi sa tubig tunga lamang nga bunyag, kag wala sing pulos kon wala ang katunga—nga amo ang, bunyag sang Balaan nga Espiritu.”22

Pahayag 3: “Ang bunyag sang tubig, kon wala ang bunyag sang kalayo kag ang Balaan nga Espiritu nga kaupod sini, wala ini sing pulos. Ini sila importante kag indi mahimo painon.”23

Ang padayon nga pag-alalangot sang prinsipyo sang paghinulsol, sang mga ordinansa sang bunyag kag pagbaton sang Balaan nga Espiritu, kag ang mahimayaon nga bugay sa kapatawaran sang mga sala sulitsulit nga ginasambit sa balaan nga mga kasulatan.

Si Nefi nagsiling, “Kay ang gawang nga sa diin kamo dapat magsulod amo ang paghinulsol kag bunyag paagi sa tubig; kag nian magaabot ang isa ka kapatawaran sang inyo mga sala paagi sa kalayo kag paagi sa Balaan nga Espiritu.24

Ang Manluluwas Mismo nagsiling, “Karon ini ang kasuguan: Maghinulsol, tanan kamong yara sa mga [punta] sang duta, kag magkari sa akon kag magpabunyag sa akon ngalan, agud kamo mapakabalaan paagi sa pagbaton sang Balaan nga Espiritu, agud makatindog kamo nga wala’y musing sa akon atubang sa katapusan nga adlaw.”25

Ang pagtakdong sang mga kamot para sa dulot sang Balaan nga Espiritu isa ka ordinansa nga ginahikot sa awtoridad sang Melchizedek Priesthood. Sa proseso sang pagpalapit sa Manluluwas kag sang espirituhanon nga pagkabun-ag liwat, ang pagbaton sang nagapakabalaan nga gahum sang Balaan nga Espiritu sa aton mga kabuhi nagahimo nga posible sang nagapadayon na pagtinlo sang aton kalag gikan sa sala. Ining makalilipay nga bugay malahalon tungod “wala sing di-matinlo nga butang nga makapuyo upod ang Dios.”26

Bilang mga miyembro sang ginpanumbalik nga Simbahan, nabugayan kita alangay sang aton primero nga pagtinlo gikan sa sala mahiangot sa bunyag kag sa posibilidad sang nagapadayon nga pagtinlo gikan sa sala nga nangin posible paagi sa pagpakig-upod kag gahum sang Balaan nga Espiritu—bisan ang ikatatlo nga miyembro sang Pangulohan sang Dios.

Pamensara kon paano ang isa ka mangunguma nagasalig sa wala nagabag-o nga sulundan sang pagpananom kag pag-ani. Ang pag-intiendi sang koneksyon sang pagpananom kag pag-ani isa ka dalayon nga ginhalinan sang katuyoan kag nagaimpluwensya sang tanan nga desisyon kag aksyon nga himuon sang isa ka mangunguma sa tanan nga panahon sa bilog nga tuig. Sa kasubong nga paagi, ang indi mahamulag nga koneksyon sa tunga sang ordinansa sang bunyag paagi sa pagtugmaw para sa kapatawaran sang mga sala, kag pagtakdong sang mga kamot para sa dulot sang Balaan nga Espiritu dapat mag-impluwensya sang tagsa ka aspeto sang aton pagkasumulunod sa tanan nga panahon sang aton mga kabuhi.

Ang sakramento amo ang ikatatlo nga ordinansa nga kinahanglanon agud makaangkon sang gahum sang pagkadiosnon. Agud nga mas lubos naton nga mapabilin ang aton kaugalingon nga wala’y mantsa sa kalibutan, ginasugo kita nga magkadto sa balay sang pagpangamuyo kag maghalad sang aton mga sakramento sa balaan nga adlaw.27 Palihog hunahunaa nga ang mga simbolo sang lawas kag dugo sang Ginuo, ang tinapay kag ang tubig, pareho nga ginabendisyunan kag ginapakabalaan. “O Dios, ang Wala’y Katapusan nga Amay, nagapangabay kami sa imo sa ngalan sang imo Anak nga si Jesucristo, sa pagpakamaayo kag pagpakabalaan sining tinapay [ukon sining tubig] sa mga kalag sang tanan sadtong magaambit [ukon magainom] sini.”28 Ang pagpakabalaan amo ang paghimo nga putli kag balaan. Ang mga simbolo sang sakramento ginapakabalaan sa pagdumdom sang pagkaputli ni Cristo, sang aton lubos nga pagsandig sa Iya Pagbayad-Sala, kag sang aton responsibilidad nga tahuron ang aton mga ordinansa kag mga kasugtanan agud nga “makatindog kita nga wala’y musing sa [Iya] atubang sa katapusan nga adlaw.”29

Ang ordinansa sang sakramento isa ka balaan kag sulitsulit nga pangagda nga maghinulsol sing sinsero kag magbag-o sa espirituhanon. Ang akto sang pag-ambit sang sakramento, kon ini lang, wala nagakakas sang mga sala. Pero kon mahinalungon kita nga nagahanda kag nagapartisipar sa sining balaan nga ordinansa nga may masinulub-on nga tagipusuon kag mahinulsulon nga espiritu, ang promisa amo nga aton dalayon nga maangkon ang Espiritu sang Ginuo sa pag-upod sa aton. Kag paagi sa nagapakabalaan nga gahum sang Balaan nga Espiritu bilang dalayon naton nga kaupod, aton dalayon nga mahuptan ang kapatawaran sang aton mga sala.

Matuodtuod kita nga ginapakamaayo kada semana sang oportunidad nga tulutimbangon ang aton mga kabuhi paagi sa ordinansa sang sakramento, sa pagbag-o sang aton mga kasugtanan, kag sa pagbaton sining promisa sang kasugtanan.30

Nabunyagan Liwat

Kon kaisa ang mga Santos sa Ulihing mga Adlaw nagapabutyag sang ila handum nga tani makapabunyag sila liwat—kag mangin pareho katinlo kag kaangayan sadtong adlaw nga ila nabaton ang ila primero nga nagaluwas nga ordinansa sang ebanghelyo. Matinahuron ko nga ginapanugyan nga ang aton Amay nga Langitnon kag ang Iya Pinalangga nga Anak wala nagatuyo nga aton maeksperiyensyahan inang pamatyagan sang espirituhanon nga pagbag-o, pagpaumpaw, kag pagpanumbalik sing makaisa lang sa aton mga kabuhi. Ang mga bugay sang pag-angkon kag dalayon nga paghupot sang kapatawaran sang aton mga sala paagi sa mga ordinansa sang ebanghelyo nagabulig sa aton nga maintiendihan nga ang bunyag amo ang tion sang pagsugod sang aton mortal nga espirituhanon nga kabuhi; indi ini destinasyon nga dapat naton kalangkagan nga balikan sing liwatliwat.

Ang ordinansa sang bunyag paagi sa pagtugmaw, ang pagtakdong sang mga kamot para sa dulot sang Balaan nga Espiritu, kag ang sakramento indi separado kag lainlain nga mga kahiwatan; kundi, mga elemento ini nga nagailinangot kag amat-amat nga sulundan sang nagatubos nga pag-uswag. Ang tagsa ka nagasunod nga ordinansa nagabayaw kag nagapadako sang aton espirituhanon nga katuyuan, handum, kag hinimoan. Ang plano sang Amay, ang Pagbayad-Sala sang Manluluwas, kag ang mga ordinansa sang ebanghelyo nagahatag sang grasya nga kinahanglan naton sa pagpadayon kag pag-uswag dinalan sa dinalan kag pagsulundan sa pagsulundan padulong sa aton wala katapusan nga destinasyon.

Promisa kag Testimonya

Kita mga di-perpekto nga mga tawo nga nagatinguha nga magkabuhi sa duta suno sa perpekto nga plano sang wala katapusan nga pag-uswag sang Amay nga Langitnon. Ang mga ginapangayo sang Iya plano mahimayaon, maluluy-on, kag maid-id. Mahimo nga may mga tinion nga puno kita sang determinasyon kag kon kaisa nagabatyag nga lubos nga indi makasangkol. Mahimo nga makapamensar kita kon ayhan espirituhanon naton nga matuman ang kasugoan nga magtindog sa atubang Niya nga wala’y musing sa katapusan nga adlaw.

Sa bulig sang Ginuo kag paagi sa gahum sang Iya Espiritu nga “tudloan [kita] sang tanan nga butang,”31 sa pagkamatuod sarang kita pakamaayuhon agud marealisar ang aton espirituhanon nga mga masarangan. Ang mga ordinansa nagaagda sang espirituhanon nga tinutuyo kag gahum sa aton mga kabuhi samtang nagatinguha kita nga mabun-ag liwat kag mangin mga kalalakin-an kag kababayin-an ni Cristo.32 Ang aton mga kahuyang sarang mangin kabaskog, kag ang aton mga limitasyon sarang nga madaug.

Bisan nga wala sa aton ang mangin perpekto sa sining kabuhi, sarang kita mangin dalayon nga nagauswag sa pagkatakos kag wala’y musing subong nga kita “natinluan sang dugo sang Cordero.”33 Nagapromisa ako kag nagasaksi nga kita pagapakamaayuhon sang mas dako nga pagtuo sa Manluluwas kag mas dako nga espirituhanon nga kaseguruhan samtang dalayon naton nga ginatinguhaan nga mahuptan ang kapatawaran sang aton mga sala kag, sa ulihi, magatindog nga wala’y musing sa atubang sang Ginuo sa katapusan nga adlaw. Nagapamatuod ako sini sa ngalan ni Jesucristo, amen.