Iien Otemjej Jeorļo̧k Jero̧wiwi ko Ami

Ilo mour in jej ioon ļotak an kanniōk im iien em̧m̧an n̄an bar ļotak ilo jetōb.³ Kar kakkōļ kōj jān rikanaan ro im rijilōk ro n̄an “[rujļo̧k] n̄an Anij,⁴ im “bar ļotak,”⁵ im erom menin kōm̧anm̧an eo ekāāl ilo Kraist ⁶ n̄an būki ilo mour ko ad kōjeram̧m̧an ko kar kōm̧m̧ani kōn Pinmuur eo an Jisōs Kraist. Jab “kōn tōllo̧ke, tūriam̧okake, im jouj an Messaia”⁷ maron̄ jipan̄ kōj anjo̧ ioon kōņaan ko ad make im piktok ko an armej make im jino jab ļōmņak kōn e make, jouj, im jatōr. Jej mour bwe jen maron̄ “jutak ilo ejjeļo̧k libbijinjin im̧aan [Irooj] ilo raan eo āliktata.”⁸

Rikanaan Josep Smith eaar kōmeļeļeik jerbal eo eaorōk ilo kain̄i ko an priesthood eo ilo gospel eo an Jisōs Kraist: “N̄an bar ļotak, ej itok ilo Jetōb eo an Anij ilo kain̄i ko.”⁹ Ennaan in ekwaļo̧k jerbal ko jim̧or an Jetōb Kwojarjar im kain̄i ko rekwojarjar ilo wāween bar ļotak ilo jetōb.

Jetōb Kwojarjar ej membōr eo kein kajilu an Doulul in Anij. E ej juon armej in jetōb im ej kwaļo̧k kam̧ool kōn aolep m̧ool. Ilo jeje ko rekwojarjar Jetōb Kwojarjar ej āinwōt Rikaenōm̧m̧an,¹⁰ juon Rikatakin, ¹¹ im juon rikwaļo̧k ennaan.¹² Ilo kakkobaba, Jetōb Kwojarjar ej rikakkwojarjar ¹³ eo ej karreeoik im tile ļo̧k ettoon ko im kadiwōj ļo̧k nana jen jetōb ko an armej āinwōt kōn kijeek.

Kain̄i ko rekwojarjar rej pād io̧lepen gospel eo an Rilo̧mo̧o̧r im n̄an jerbal eo n̄an itok n̄an E im pukōt bar ļotak ilo jetōb. Kain̄i ko rej jerbal ko raorōk me ewōr ie jibadbad eo an jetōb, indeeo eo eaorōk, im kien ko im wāween ko rekkar n̄an Anij.¹⁴ Aolep kain̄i ko an lo̧mo̧o̧r im kain̄i eo an kwojkwoj rej aikuj kōmālim jen juon eo ej kabwijer kii ko an priesthood.

Kain̄i ko an lo̧mo̧o̧r im mour indeeo rej waļo̧k ilo Kabun̄ eo an Irooj ko eļap tokjāer jān jabdewōt ikitōltōl ak kōm̧m̧an. Ijoke, rej jerbal kōn mālim kōn kōjeram̧m̧an ko im kajoor ko an lan̄ maron̄ itok n̄an mour ko ad kajjojo.

Priesthood eo an Melkisedek ej kwaļo̧k gospel eo im kabwijer kii eo an menin ittiņo̧ an aelōn̄ in kiin̄ eo, aaet kii eo an jeļāļo̧kjeņ an Anij.

“Kōn menin, ilo kain̄i ko ie, kajoor in āinwōt anij ej waļo̧k.

“Im ijeļlo̧kun kain̄i ko ie, im maron̄ eo an priesthood, kajoor in āinwōt anij ej jab waļo̧k n̄an armej raņ ilo kanniōk.”¹⁵

Kain̄i ko kar būk im kautiej kōn m̧ool rej aorōk n̄an bōk kajoor eo eoļeeo im aolep kōjeram̧m̧an ko kar kwaļo̧ki kōn Pinmuur eo an Rilo̧mo̧o̧r eo.

N̄an lukkuun meļeļe jerbal eo jej maron̄ bōke im iien otemjej bōk jeorļo̧k in jero̧wiwi ko ad, m̧oktata jej aikuj in meļeļe oktak eo kōtaan kain̄i ko jilu me rej letok kajoor ko jen lan̄: peptaij kōn tuļo̧k ilo dān, likūt pā ko ioon bōrad n̄an bōk menin letok eo an Jetōb Kwojarjar, im kwojkwoj eo.

Peptaij kōn tuļo̧k ilo dān n̄an jeorļo̧k in jero̧wiwi ko “ej kadkadin kain̄i eo an gospel eo”¹⁶ an Jisōs Kraist im ej aikuj jerbal kōn tōmak ilo Rilo̧mo̧o̧r im ippān eo ej lukkuun ukweļo̧k. Kain̄i in “ej juon kōkkaļļe im juon kien me Anij eaar letok n̄an ro [Nejin] n̄an deļo̧n̄e aelōn̄ eo An.”¹⁷ Peptaij ej tōl ilo kajoor eo an Aaronic Priesthood. Ilo wāween itok n̄an Rilo̧mo̧o̧r im bar ļotak ilo jetōb, peptaij ej letok juon erreeo eo eaorōk n̄an jetōb eo ad jān jerawiwi.

Bujen peptaij ej kobaiki jilu pedped in katak ko: (1) n̄an m̧ōņōņō in bōk iood make etan Jisōs Kraist, (2) n̄an keememej E iien otemjej, im (3) n̄an kōjparok kien ko An. Kōjeram̧m̧an eo an kallim̧ur in ilo kōjparok bujen in ej “bwe [jen] bōk jetōb eo An [ippād] iien otemjej.”¹⁸ Kōn menin, peptaij ej kōppopo eo eaorōk n̄an bōk mālim im iien em̧m̧an n̄an jem̧jerā eo an Jetōb Kwojarjar eo ej m̧ōttan eo kein kajilu ilo bōran Anij.

“Peptaij [jān] dān … ālkin peptaij eo an Jetōb n̄an kadedeļo̧k.”¹⁹ Āinwōt an kar Rilo̧mo̧o̧r katakin Nicodemus, “Eļan̄n̄e armej e jab ļotak jān dān im Jetōb, e jab maron̄ deļo̧n̄ ilo aelōn̄ in Anij.”²⁰

Jilu ennaan ko jān Būreejtōn Josep Smith ej kwaļo̧k ekkejel eo eaorōk ikōtaan kain̄i ko an peptaij kōn tulo̧k n̄an jeorļo̧k jerawiwi ko im likūt pā ko ioon n̄an menin letok eo an Jetōb Kwojarjar.

Ennaan 1: “Peptaij ej juon kain̄i in kōppoppo eo ekwojarjar n̄an bōk Jetōb Kwojarjar; ej juon janōļ im kii ilo wāween an Jetōb Kwojarjar tōl.”²¹

Ennaan 2: “Komaron̄ in barāinwōt peptaiji juon bāāk in bo̧k āinwōt armej, eļan̄n̄e eaar jab dedeļo̧k ilo jeorļo̧k in jero̧wiwi ko im bōk Jetōb Kwojarjar. Peptaij jān dān ej ak jimettan in peptaij, im em̧m̧an ļo̧k jen jimettan eo juon—en̄in ej, peptaij eo an Jetōb Kwojarjar.”²²

Ennaan 3: “Peptaij kōn dān, ilo ejjeļo̧k peptaij kōn kijeek im Jetōb Kwojarjar, ejjeļo̧k tokjeņ. Raorōk im rejjab aikuj jeno̧ļo̧k jān doon.”²³

Ekkejel eo ejokkun wōt juon ilubwilijin pedped eo an ukweļo̧k, kain̄i ko an peptaij im bōk menin letok eo an Jetōb Kwojarjar, im kōjeram̧m̧an eo aiboojoj an jeorļo̧k jerawiwi ko ej āliji im bar āliji ilo jeje ko rekwojarjar.

Nipai eaar kwaļo̧k, “Bwe kōjām eo kom̧ij aikuj deļo̧n̄ ie ej ukeļo̧k im peptaij kōn dān; innām ej itok jeorļo̧k in jero̧wiwi ko ami kōn kijeek im kōn Jetōb Kwōjarjar.”²⁴

Rilo̧mo̧o̧r eo Make eaar kwaļo̧k, “Kiiō en̄in ej kien eo: Ukweļo̧k, kom̧ aolep jeban ko an laļ, im itok n̄an Eō im baptais ilo Eta, bwe kom̧in maron̄ kokwojarjar jān bōke Jetōb Kwojarjar, bwe kom̧in maron̄ jutak ilo ejjeļo̧k lipijinjin im̧aō ilo raan eo āliktata.”²⁵

Likūt pā ko ioon n̄an bōk menin letok eo an Jetōb Kwojarjar ej juon kain̄i in tōl ilo kajoor eo an Melkisedek Priesthood. Ilo jekjek eo n̄an itok n̄an Rilo̧mo̧o̧r im bar ļotak ilo jetōb, bōk kakkwōjarjar in kajoor eo an Jetōb Kwojarjar ilo mour ko ad ekōm̧m̧an erreeo eo ebolelin jetōb eo ad jān jerawiwi. Kōjeram̧m̧an in elem̧ōņōņō ewōr tokjen kōnke “ejjeļo̧k men etton enaaj deļo̧n̄ ilo aelōn̄ eo an Anij.”²⁶

Āinwōt membōr ro ilo Kabun̄ eo an Irooj, jej jeram̧m̧an jim̧or kōn erreeo eo eaorōk jān jerawiwi iokļo̧k peptaij im kōn aorōk eo n̄an erreeo jān jero̧wiwi kar kōm̧m̧an iaļ kōn jem̧jerā im kajoor eo an Jetōb Kwojarjar—aaet membōr eo kein kajilu ilo bōran Anij.

Ļōmņak kōn juon rikallib eo ej pedped wōt ioon okoktak in iien ekkat im totake jikin kallib eo. Meļeļe jekjek eo ej waļo̧k ikōtaan iien ekkat im kalle ej juon jibadbad eo ejjejet im im̧we aolep jokālet ko im m̧akūtkūt ko juon rikallib ej kōm̧m̧ani ilo aolep iien ean̄ ilo juon iiō. Ilo wāween in, wāween ko rejjab jeno̧ļo̧k jān kain̄i ko an peptaij kōn tuļo̧k ilo dān kōn jeorļo̧k in jero̧wiwi ko im likūt pā ko ioon bōraad n̄an bōk menin bōk letok eo an Jetōb Kwojarjar eo ej aikuj in waļo̧k ilo kajjojo jerbal an ro rikaļooraņ ilo aolep iien ean̄ ilo mour ko ad.

Kwojkwoj eo ej kain̄i eo kein kajilu emenin aikuj n̄an bōke n̄an bōk kajoor in āinwōt anij. Bwe jen maron̄ lukkuun kōjparok kōj jen libbijinjin an mour in, kar kakien kōj bwe jen ilo̧k n̄an im̧ōn jar eo im ajeļok aolep kwojkwoj ko am ilo raan eo ekwōjarjar an Irooj.²⁷ Jouj ļōmņak bwe kōkkaļļe ko ilo ānbwinin im bōtōktōkin Irooj, ilo pilawe im dān eo, rej jim̧or kōjeram̧m̧an im kakkwojarjar. “O, Anij Jemām Indeeo, kōm̧ij kajjitōk Ippam̧ ilo etan Nejūm̧ Jisōs Kraist, n̄an kōjeram̧m̧an kokwojarjar pilawā [ak dān] in n̄an jetōb ko an ro otemjej rej bōk m̧ōttan [ak idaak] jene.”²⁸ N̄an kokwojarjare ej kōm̧m̧an erreeo im kwojarjar. Kōkkaļļe ko an kwojkwoj rej kokwojarjar ilo keememej erreeo eo an Kraist, kōn lukkuun pedped eo ilo Pinmuur eo An, im eddo eo ad n̄an kautiej kain̄i ko ad im bujen ko bwe jen maron̄ “jutak jab libbijinjin im̧ im̧aan [Mejen] ilo raan eo āliktata.”²⁹

Kain̄i eo an kwojkwoj ej juon kūr eo ekwojarjar n̄an eo ej lukkuun ukweļo̧k im n̄an kōkāāl mour in jetōb. Jerbal in bōk m̧ōttan kwojkwoj eo, ilo im jān e, ejjab bōkļo̧k jerawiwi ko. Ak ilo ad lukkuun kōppopo im bōk kuna ilo kain̄i in ekwojarjar kōn bōro erup im juon jetōb ettā, innām kallim̧ur in ej bwe jen maron̄ iien otemjej bōk iood Jetōb eo an Irooj. Im jen kokwojarjar in kajoor eo an Jetōb Kwojarjar ilo ad jem̧jerāik, jemaron̄ iien otemjej bōk jeorļo̧k in jero̧wiwi ko ad.

Jej lukkuun jeram̧m̧an kajjojo wiik kōn iien em̧m̧an n̄an etale mour ko ad ilo kain̄i eo an kwojkwoj, n̄an kōkāāl bujen ko ad, im n̄an bōk bujen kallim̧ur in.³⁰

Jet iien Ro Rekwojarjar rej kwaļo̧k kōņaan in bwe ren kar bar peptaij—im bar erreeo im erreeo āinwōt raan eo ke raar bōk kain̄i in lo̧mo̧o̧r eo m̧oktata an gospel in. In kwaļo̧k bwe Jemedwōj Ilan̄ im Nejin Jitenbōro rejjab kōņaan bwe jen en̄jake kain en̄jake rot in kōn jetōbin kōkāāl, kāāl, im jepļaaktok in juon mour kāāl. Kōjeram̧m̧an ko būki im iien otemjej bōk jeorļo̧k in jero̧wiwi ko ami kōn kain̄i ko an gospel eo ej jipan̄ kōj meļeļe bwe peptaij eo ej juon iaļ in ijjino in em̧akūt eo ad ilo mour in jetōb; ejjab juon mejen kajjik jej aikuj in bar lale im bar lale.

Kain̄i ko an peptaij kōn tuļo̧k ilo dān, im likūt pā ko ioon bōrad n̄an bōk menin letok eo an Jetōb Kwojarjar, im kwojkwoj eo rejjab m̧akūtkūt ko rein juon jān doon; ijoke, rej m̧ōttan ko ilo juon elaajrak eo ekon im jejjet karōkin. Kajjojo kain̄i eo ejjejet karōk in ej kōļapļo̧k jibadbad eo ad ilo mour in jetōb, ikdeleel, im kōm̧m̧an. Karōk eo an Jemed, ilo Pinmuur eo an Rilo̧mo̧o̧r, im ilo kain̄i ko ilo gospel eo rej letok tūriam̧o kake eo jej aikuji n̄an bun̄ m̧aanļo̧k im eddōk ļo̧k jidik kōn jidik im ļain im bar ļain m̧aanļo̧k n̄an mejān kajjik eo ad indeeo.

Jej armej ro rejjab wānōk ro rej kajjieon̄ mour ilo mour wabanban in ekkar n̄an karōk eo ewāppen an Jemedwōj Ilan̄ kōn eddōkļo̧k eo ad indeeo. Men ko rekkar ilo karōk eo An raiboojoj, rejouj, im rem̧ōkaj. Jet iien jemaron̄ obrak kōn kije im en̄jake ilo iien ko jet relukkuun in oktak. Jej maron̄ in kōļmenļo̧kjeņ eļan̄n̄e mour in jetōb eo ad emaron̄ in kar kakūrm̧ool kien eo n̄an jutak ejjeļo̧k libijinjin im̧aan E ilo raan eo āliktata.

Kōn jipan̄ eo an Irooj im kōn kajoor in Jetōb eo An n̄an katakin kōj aolep men otemjeļo̧k,”³¹ ilo m̧ool jej maron̄ in jeram̧m̧an n̄an lo men ko rekkar an jetōb. Kain̄i ko rej kūr jibadbad eo an jetōb im kajoor eo n̄an mour ko ad ilo ad kajieon̄ in bar ļotak im erom̧ m̧aan im kōrā in Kraist.³² Mōjņo̧ ko ad maron̄ kajoor ļo̧k, im likjab ko ad maron̄ in anjo̧.

Men̄e ejjeļo̧k iaad maron̄ in bōk wānōk ilo mour in, jej maron̄ jino erreeo ļo̧k im ejjeļo̧k libijinjin ilo ad “erreeo jen bōtōktōk in Lamb eo.”³³ Ij kallim̧ur im kam̧ool jenaaj jeram̧m̧an kōn eļap ļo̧k tōmak ilo Rilo̧mo̧o̧r im eļap ļo̧k mour in jetōb ilo ad pukot n̄an iien otemjeļo̧k bōk jeoļo̧k in jero̧wiwi ko ad im, āliktata, n̄an jutak ejjeļo̧k libijinjin im̧aan Irooj ilo raan eo āliktata. Ij kōm̧m̧ane āindein ilo etan ekwojarjar Jisōs Kraist, amen.