2010–2019
Semper Mantené un Remishon di Boso Pikánan
April 2016


Semper Mantené un Remishon di Boso Pikánan

Dor di e poder ku ta santifiká di e Spiritu Santu komo nos kompañero konstante, nos por tin un remishon di nos pikánan semper.

Un gran frase usá pa Rei Benjamin den su siñansanan tokante e Salbador i Su Ekspiashon tabata un tópiko ku [kada biaha] ta bini bèk di mi estudio i meditashon pa hopi aña.

Den su predikashi di despedida spiritualmente konmovedor na e pueblo ku el a sirbi i stima, Rei Benjamin a deskribí e importansia di konosé e gloria di Dios i di purba di Su amor, risibí un remishon di piká, di semper kòrda e grandesa di Dios, i di orashon diario i para firme den fe.1 El a primintí tambe ku hasiendo e kosnan aki, “semper boso lo sinti alegria, i lo ta yená ku e amor di Dios, i semper mantené un remishon di boso pikánan.”2

Mi mensahe ta enfoká riba e prinsipio di semper mantené un remishon di nos pikánan. E bèrdat ekspresá den e frase aki por fortalesé nos fe den Señor Jesucristu i profundisá nos disipulado. Mi ta pidi ku e Spiritu Santu lo inspirá i edifiká nos ora ku huntu nos ta konsiderá bèrdatnan spiritual esensial.

Renasementu Spiritual

Den mortalidat nos ta eksperensiá nasementu físiko i e oportunidat pa renasementu spiritual.3 E profetanan i apòstelnan a konsehá nos pa “[lanta] na Dios,”4 “nase di nobo,”5 i bira “kreashon[nan] nobo den Cristu6 dor di risibí den nos bida e bendishonnan hasí posibel mediante e Ekspiashon di Jesucristu. E “méritonan, i miserikòrdia, i grasia di e Santu Mesias”7 por yuda nos triunfá riba e tendensianan egoséntriko i egoista di e hòmber natural i bira mas altruista, di bon boluntat,i santu. Nos ta wòrdu atvertí pa biba di tal manera ku nos por “para sin mancha dilanti [Señor] den e delaster dia.”8

E Spiritu Santu i Ordenansanan di Saserdosio

E Profeta José Smith a resumí kòrtiku e ròl esensial di ordenansanan di saserdosio den e evangelio di Jesucristu: “Renasementu ta bini dor di e Spiritu di Dios mediante ordenansanan.”9 E deklarashon penetrante aki ta enfatisá e ròlnan di tantu e Spiritu Santu i e ordenansanan sagrado den e proseso di renasementu spiritual.

E Spiritu Santu ta e di tres miembro di e Deidat. E ta un personahe di spiritu i ta duna testimonio di tur bèrdat. Den skrituranan e Spiritu Santu ta wòrdu referí na dje komo e Konsolador,10 un maestro, 11 un reveladó.12 Adishonalmente, e ta un Santifikadó13 ku ta limpia i kima impuresa i maldat for di almanan humano komo dor di kandela.

Ordenansanan sagrado ta sentral den e Salbador Su evangelio i den e proseso di bini na Dje i buska renasementu spiritual. Ordenansanan ta aktonan sagrado ku tin propósito spiritual, nifikashon eterno, i relatá na Dios su leinan i statutonan.14 Tur ordenansa salbadó i e ordenansa di e santa sena mester wòrdu outorisá pa un ku ta poseé e yabinan di saserdosio nesesario.

E ordenansanan di salbashon i eksaltashon atministrá den Señor Su Iglesia restourá ta muchu mas ku ritualnan òf aktonan simbóliko. Mas bien, nan ta komponé [di] kanalnan outorisá mediante kua e bendishonnan i podernan di shelu por bini den nos bida individual.

“I e Saserdosio di Melkisedek ta atministrá e evangelio i ta poseé e yabi di e misterionan di e reino, hasta e yabi di e konosementu di Dios.

“E poder di dibinidat ta manifestá den e ordenansanan di e saserdosio mayó.

“I sin nan ordenansanan, i e outoridat di e saserdosio, e poder di dibinidat no ta manifestá na hòmbernan den karni.”15

Ordenansanan risibí i honrá ku integridat ta esensial pa optené e poder di dibinidat i tur e bendishonnan hasí posibel mediante e Salbador su Ekspiashon.

Optené i Retené un Remishon di Pikánan mediante Ordenansanan

Pa komprondé mas mihó e proseso kaminda nos por optené i semper retené un remishon di nos pikánan, nos mester komprondé promé e relashon inseparabel entre tres ordenansanan sagrado ku ta duna akseso na e podernan di shelu: boutismo dor di imershon, ponementu di man pa e don di e Spiritu Santu, i e santa sena.

Boutismo dor di imershon pa e remishon di pikánan “ta e ordenansa introduktorio di e evangelio”16 di JesuCristu i mester wòrdu presedé pa fe den e Salbador i arepentimentu sinsero. E ordenansa aki “ta un señal i un mandamentu ku Dios a pone pa [Su yunan] pa drenta den Su reino.”17 Boutismo ta atministrá den e outoridat di e Saserdosio Aaróniko. Den e proseso pa bini na e Salbador i renasementu spiritual, boutismo ta duna un limpiesa inisialnesesario di nos alma di piká.

E kombenio boutismal ta inkluí tres kompromiso fundamental: (1) pa ta dispuesto pa tuma riba nos e nòmber di JesuCristu, (2) pa kòrd’É semper, i(3) pa warda Su mandamentunan. E bendishon primintí pa honra e kombenio aki ta “ku [nos] por tin su Spiritu semper huntu ku [nos].”18 Pues, boutismo ta e preparashon esensial pa risibí e oportunidat outorisá pa tin e kompania konstante di e di tres miembro di e Deidat.

“Boutismo [dor di] awa ... mester wòrdu siguí pa boutismo di e Spiritu pa e por ta kompleto.”19 Manera e Salbador a siña Nikodemo, “eksepto un hòmber nase di nobo di awa i di e Spiritu, e no por drenta e reino di Dios.”20

Tres deklarashon di e Profeta José Smith ta enfatisá e vínkulo vital entre e ordenansa di boutismo dor di imershon pa e remishon di pikánan i e ponementu di man pa [konferí e] don di e Spiritu Santu.

Deklarashon 1: “Boutismo ta un ordenansa preparatorio sagrado pa e resepshon di e Spiritu Santu; e ta un kanal i yabi mediante kua e Spiritu Santu lo wòrdu atministrá.”21

Deklarashon 2: “Boso por bien boutisá un saku di santu enbes di un hòmber, si e no ta [wòdu] hasí ku e bista riba e remishon di pikánan i risibimentu di e Spiritu Santu. Boutismo dor di awa ta un mitar boutismo, i e no ta sirbi pa nada sin e otro mitar---ku ta, e boutismo di e Spiritu Santu.”22

Deklarashon 3: “E boutismo dor di awa, sin e boutismo di kandela i e Spiritu Santu asistiendo e, no ta sirbi. Nan ta nesesario i inseparabel konektá.”23

E konekshon konstante entre e prinsipionan di arepentimentu, ordenansanan di boutismo i risibimentu di e don e Spiritu Santu, i e bendishon glorioso di e remishon di pikánan ta wòrdu enfatisá kada biaha den e skrituranan.

Nefi a deklará, “ Pasó e porta dor di kual boso mester drenta ta arepentimentu i boutismo di awa; i despues ta bin un remishon di boso pikánan dor di kandela i e Spiritu Santu.24

E Salbador Mes a proklamá, “Awor esaki ta e mandamentu: Arepentí, tur boso ekstremonan di tera i bini na ami i wòrdu boutisá den mi nòmber,pa boso por wòrdu santifiká pa e risibimentu di Spiritu Santu, pa boso por para sin mancha mi dilanti den e delaster dianan.”25

Ponementu di man pa e don di e Spiritu Santu ta un ordenansa atministrá den e outoridat de e Saserdosio di Melkisedek. Den e proseso di bini na e Salbador i renasementu spiritual, risibí e poder santifikadó di e Spiritu Santu den nos bida, ta krea posibilidat di un limpiesa konstante di nos alma for di piká. E bendishon alegre aki ta vital pasobra nada impuro por biba ku Dios.26

Komo miembronan di Señor su Iglesia restourá, nos ta bendishoná ku nos limpiesa inisial di piká asosiá ku boutismo i pa e potensial di un limpiesa kontinuo di piká hasí posibel mediante e kompania i poder di e Spiritu Santu---hasta e di tres miembro di e Deidat.

Konsiderá kon un kunukero ta dependé di un patronchi ku no ta kambia di sembra i kosechá. Komprondiendo e konekshon entre sembra i kosechá ta un fuente di propósito konstante i ta influensiá tur e desishonnan i akshonnan ku un kunukero ta tuma den tur temporada di aña. Meskos, e konekshon inseparabel entre e ordenansanan di boutismo dor di imershon pa e remishon di piká i e ponementu di man pa e don di e Spiritu Santu mester influensiá kada aspekto di nos disipulado den tur temporada di nos bida.

E santa sena ta e di tres ordenansa nesesario pa optené akseso na e poder di dibinidat. Pa nos por mantené nos mes kompletamente sin mancha di e mundu, nos ta mandá pa bai na e kas di orashon i ofresé nos sakramentu riba e dia santu di Señor.27 Por fabor konsiderá ku e emblemanan di e Señor Su kurpa i sanger, e pan i e awa, ámbos ta bendishoná i santifiká. “O Dios, e Tata Eterno, nos ta pidi bo den e nòmber di bo Yu, JesuCristu, pa bendishoná i santifiká e pan aki[òf e awa aki]”28 pa e almanan di tur esnan ku ta partisipá [òf bebe]di dje.” Pa santifiká ta [nifiká] pa hasi puru i santu. E emblemanan di santa sena ta santifiká den memoria di Cristu Su puresa, nos dependensia total riba Su Ekspiashon, i nos responsabilidat pa asina honra nos ordenansanan i kombenionan ku nos por “para sin mancha dilanti [Dje] den e delaster dia.”29

E ordenansa di e santa sena ta un invitashon santu i ripití pa arepentí sinseramente i pa wòrdu renobá spiritualmente. E akto di partisipá di e santa sena, den i di dje mes, no ta kita piká. Pero ora nos ta prepará konsientemente i partisipá den e ordenansa santu aki ku un kurason kibrá i un spiritu kontrito, e ora ei e promesa ta ku nos por tin e Spiritu di Señor semperhuntu ku nos. I dor di e poder santifikadó di e Spiritu Santu komo nos kompañero konstante, nos por retené un remishon di nos pikánansemper.

Nos ta berdaderamente bendishoná kada siman ku e oportunidat pa evaluá nos bida dor di e ordenansa di e santa sena, pa renobá nos kombenionan, i pa risibí e promesa di kombenio aki.30

Boutisá Atrobe

Tin biaha Santunan di Delaster dia ta ekspresá e deseo ku nan por a wòrdu boutisá atrobe---i asina bira mes limpi i digno ku riba e dia ku nan a risibí nan ordenansa salbador di evangelio. Pèrmití mi ku rèspèt sugerí ku nos Tata Selestial i Su Yu Stimá no tin intenshon pa nos eksperensiá tal sentimentu di renobashon spiritual, refreskamentu, i restourashon djis un biaha so den nos bida. E bendishonnan di optené i retené semper un remishon di nos pikánan mediante ordenansanan di evangelio ta yuda nos komprondé ku boutismo ta un punto di salida den nos biahe mortal spiritual; e no ta un destinashon ku nos mester anhelá pa bishitá kada biaha atrobe.

E ordenansanan di boutismo dor di imershon, e ponementu di man pa e don di e Spiritu Santu, i e santa sena no ta eventonan isolá i diskreto; mas bien, nan ta elementonan den un patronchi koherente i akumulativo di un progreso redentor. Kada ordenansa susesivo ta elevá i oumentá nos propósito spiritual, deseo, i prestashon. E Tata su plan, e Salbador su Ekspiashon, i e ordenansanan di evangelio ta proveé e grasia nesesario pa sigui dilanti i progresá liña riba liña i presepto riba presepto te na nos destino eterno.

Promesa i Testimonio

Nos ta sernan humano imperfekto ku ta purba pa biba den mortalidat segun Tata Selestial su plan perfekto di progreso eterno. E rekisitonan di Su plan ta glorioso, miserikordioso, i rigoroso. Tin biaha nos por ta yen di determinashon i otro biaha ta sinti nos totalmente inadekuá. Nos por puntra ku spiritualmente algun dia nos por kumpli ku e mandamentu pa para sin mancha dilanti Dje den e delaster dianan.

Ku yudansa di Señor i mediante e poder di Su Spiritu pa “siña [nos] tur kosnan,”31 enberdat nos por ta bendishoná pa realisá nos posibilidatnan spiritual. Ordenansanan ta invitá propósito i poder spiritual den nos bida segun nos ta purba pa nase di nobo i bira hòmbernan i muhernan di Cristu.32 Nos debilidatnan por wòrdu fortalesé, i nos limitashonnan por wòrdu vensé.

Ounke nos niun por logra perfekshon den e bida aki, nos por bira asombrosamente digno i sin mancha ora nos ta “limpiá dor di e sanger di e Lamchi.”33 Mi ta primintí i testifiká ku nos lo ta bendishoná ku oumento di fe den e Salbador i mas seguridat spiritual segun nos buska pa semper tin un remishon di nos pikánan i, por fin, pa para sin mancha dilanti e Señor den e delaster dia. Mi ta testifiká asina den e nòmber sagrado di JesuCristu, amèn.