2010–2019
Ia Ena Sega Tale Na Ciba
Epereli 2016


Ia Ena Sega Tale Na Ciba

Na Tucaketale sa vu ni vakanuinui levu, vei ira kece era lolositaka na nona mai takali e dua na nona daulomani.

Na macawa sa oti a Siga ni Mate, ka a vakanamata tale na noda vakanananu ki na solibula ni veisorovaki kei na Tucaketale ni Turaga o Jisu Karisito. Na yabaki sa sivi oqo au a vakananuma ka vakasamataka vagumatua vakalevu sara na Tucaketale.

Voleka ni dua na yabaki sa oti, a mate kina na luvei keirau yalewa o Alisa. A sotava voli na dredre ni mate na kenisa me voleka ni walu na yabaki, ena vica vata na veisele, veiqaravi duidui e vuqa, cakamana kidrowataki, kei na yalorarawa bibi. Keitou raica ni sa luluqa mai na kena ituvaki vakayago ni sa mai voleka ni cava na nona bula vakayago. E sa ka mosimosi dina me laurai ni yaco oya ki na neirau goneyalewa vakasakiti —na gonedramidrami lailai bulabula ka sa tubu cake me dua na marama, e vakawati, vuku, ka totoka ka tina. Au nanuma ga sa na kavoro na utoqu.

iVakatakilakila
Alisa Johnson Linton

Yabaki sa oti ena gauna ni Siga ni mate, sivia vakalailai e dua na vula ni bera na nona leqa, a vola o Alisa: “Na Siga ni Mate e sa dua na ivakananumi ni ka taucoko au nuitaka tu me baleti au. Ni dua na siga au na vakabulai ka dua na siga au na taucoko tu. Dua na siga ena sega ni tiko e yagoqu na ka vakaukamea se palasitika. Dua na siga ena galala mai na rere na lomaqu ka galala na noqu vakasama ena lomaocaoca. Au sega ni masulaka tiko me yaco kusarawa na ka oqo, ia au sa rui marau niu vakabauta vakaidina e dua na bula-ni oti-oqo, e totoka.”1

E sa vakadeitaka na Tucaketale i Jisu Karisito na veika saraga a nuitaka tu o Alisa ka sa vakavurea kivei keda yadua “na vu ni nuinui sa tu e [lomada].”2 A vakatoka na Tucaketale o Peresitedi Gordon B. Hinckley me “na ka cecere duadua ena soqo taucoko ni itukutuku ni kawatamata.”3

Na Tucaketale e sa vakavotukana ena Veisorovaki i Jisu Karisito ka sa veiganiti kaya na yavu levu ni veivakabulai.4 Eda sa luvena vakayalo na itubutubu vakalomalagi. 5 Ni da lako mai ki na bula ni vuravura oqo, sa semati na yaloda ki na yagoda. Eda sotakaya na reki kei na bolebole kece e cokoti vata ena bula vakayago. Ni sa mate na tamata, sa tawase na yalodra mai na yagodra. Na tucaketale sa vakavuna me rawa na semati tale ni dua na yalo kei na yago ni tamata, ia na gauna oqo sa na tawamate rawa ka vinaka vakaoti na yago oya—sega ni sotava na mosi, tauvimate, se leqa tale e so.6

Ni oti na tucaketale, na yalo sa na sega tale ni qai tawase tani mai na yago baleta ni vakavurea na Tucaketale ni iVakabula na qaqa vakataucoko mai na mate. Me rawa ni da rawata na noda icavacava tawamudu, me na tiko vei keda na bula tawamate rawa oqo—na yalo kei na yago—semati tawayalani. Ni sa cokoti vata tawatawasei tu na yalo kei na yago tawamate rawa, sa rawa ni da ciqoma na marau sa uasivi sara.7 Vakaidina, ke sega na Tucaketale eda na sega ni ciqoma rawa na marau sa uasivi sara ia eda na kune rarawa tawayalani.8 O ira sara mada ga na tamata yalodina ka yalododonu era raica na tawasei ni yagodra mai na yalodra me tiko vakavesu. Eda sa sereki mai na tiko vakavesu oqo ena Tucaketale, ka sa veivueti mai na ivau se sinucodo ni mate.9 Ena sega na veivakabulai ke sega ruarua na yaloda kei na yagoda.

E tiko yadua na noda malumalumu vakayago, ni vakasama, kei na ituvaki ni bula. Na veibolebole oqo, ka so vei ira e dredre me ulabaleti oqo, ena yaco vakaidina me wali. E sega na leqa me takavi keda ni oti na noda vakaturicake tale. O Alisa a vadikeva na levu ni tamata ka ra bula mai na mataqali kenisa e tiko vua, ka sega ni veivakauqeti na kena iwiliwili. A vola o koya: “Ia e tiko e dua na iwali, kau sa sega ni rere. Sa walia oti tu o Jisu na noqu kenisa, kei na nomu. … Au na vinaka sara. Au marautaka niu kila tu na ka oqo.” 10

Sa rawa ni da sosomitaka na vosa kenisa vata kei na dua tale na leqa vakayago, ni vakasama, se ituvaki ni bula eda na rairai sotava. Ena vuku ni Tucaketale era sa wali oti kece talega. Na cakamana ni tucaketale, na iwali cecere duadua, sa dredre me rawati ena vakayagataki ni kila vakavuniwai e so. Ia e sega ni dredre me rawati ena kaukauwa ni Kalou. Eda kila ni rawa ni caka baleta ni sa tucaketale na iVakabula ka na vakadeitaka na Tucaketale kivei keda yadua talega.11

Na Tucaketale ni iVakabula sa vakadinadinataka ni o Koya sa Luve ni Kalou ka sa dina na veika a vakatavulica. “Sa tucaketale ko Koya, me vaka a kaya.”12 Sa sega na vakadinadina kaukauwa cake me baleta na Nona ilesilesi vakalou mai na Nona lako tani voli mai na ibulubulu ena dua na yago tawamate rawa.

Eda kilai ira na vakadinadina kina Tucaketale ena gauna ni Veiyalayalati Vou. Me ikuri ni marama kei na turaga eda wiliki ira ena Kosipeli, sa vakadeitaka vei keda na Veiyalayalati Vou ni drau vakacaca era a raica saraga na Turaga sa tucaketale.13 Ka sa tukuna na iVola i Momani e vuqa tale na drau: “A ra sa lako yani na lewe vuqa ka daramaka na ligadra ki na sarisarina, … [era] sa raica e matadra ka tara ena ligadra, ka ra sa vakadinata ni sai Koya dina oqo era a tukuna tu na parofita ni na lako mai.”14

Kivei ira na vakadinadina makawa sa vakuri na vakadinadina edaidai. Vakaidina, ena idola ni itabagauna oqo, a raica o Josefa Simici na iVakabula tucaketale kei na Tamana.15 Era sa vakadinadinataka na parofita kei na iapositolo bula voli na dina taucoko ni Karisito sa tucaketale ka bula tiko.16 Eda rawa ni na kaya, “Sa vakavolivoliti keda talega e lewe vuqa e vaka na o era sa vakaraici keda.”17 O keda yadua sa rawa ni tiki ni dua na o era sa vakaraici keda ka kila tu ena kaukauwa ni Yalo Tabu ni veika eda marautaka ena Siga ni Mate a yaco vakaidina—ni sa ka dina na Tucaketale.

Na dina taucoko ni Tucaketale ni iVakabula sa ulabaleta ka sosomitaka na noda yalorarawa ena vakanuinui baleta ni sa vu mai kina na veivakadeitaki ni ra sa dodonu ka dina na yalayala kece tale e so ni kosipeli—na yalayala e so ka sa veivakurabuitaki tu me vaka na Tucaketale. Eda kila ni sa tiko Vua na kaukauwa me savai keda mai na noda ivalavala ca kecega. Eda kila ni sa colata o Koya na noda malumalumu, mosi, kei na cakacala taucoko eda sa voraki kina.18 Eda kila ni o Koya sa “tucaketale mai na mate, ka kauta lako e tabana na veivakabulai.”19 Eda kila ni sa rawa ni vakataucokotaki keda o Koya se cava na ka e kasere tu vei keda. Eda kila o Koya ena “tavoya tani kecega na wai ni mata mai na [matada]; ia ena sega tale na ciba, se na rarawa, se na tagi, ka na sega tale na vutugu.”20 Eda kila ni da rawa ni “vakasavasavataki ena vuku i Jisu …, io nai soro sa uasivi sara”21 kevaka meda na vakabauta ga ka muri Koya.

Ni mai cava na ivakatagi veivakauqeti na Messiah, a biuta vata o Handel na ivakatagi totoka ni vosa e so ni iApositolo o Paula ka rekitaka na Tucaketale.

“Raica, au sa [tukuna] vei kemudou e dua na ka vuni; Eda na sega ni moce kece, ia eda na vakamataliataki kecega,

“Ena vakasauri sara, ena vaka na sauriva ni matada, ni sa uvu na davui sa muri sara: … ena uvuci na davui, ena qai vakaturi cake tale ko ira na mate me sega ni vuca tale, ia koi keda eda na vakamataliataki talega.

“Sa na vakaisulu na yago vuca oqo me kakua tale ni vuca rawa, ka sa na vakaisulu na yago sa mate oqo me kakua tale ni mate rawa.

“… Ena qai vakayacori kina na vosa sa volai, Sa guce ko mate, a sa muduki sara.

“Ko iko mate, sa evei na nomu bati gaga? Ko iko bulubulu, sa evei na nomu gumatua? …

“Ia meda vakavinavinaka vua na Kalou, o koya sa solia vei keda meda gumatua sara ena vuku ni noda Turaga ko Jisu Karisito.”22

Au vakavinavinakataka na veivakalougatataki e sa noda me baleta na Veisorovaki kei na Tucaketale ni Turaga o Jisu Karisito. Kivei ira kece na sa vakadavora e dua na gone ena ibulubulu se lolositaka na kisi ni mate ni watina se rarawataka na mate ni dua na itubutubu se dua era lomana, na Tucaketale sa ivurevure ni vakanuinui levu. Sa na dua na ka ni qaqa dina na noda na sotavi ira tale—sega ena ituvaki ni yalo ga ia ena yago sa vakaturi cake tale.

Au sa gadreva dina meu raica tale na tinaqu ka vakila na ligana malumu ka raica na matana lomani. Au via raica na matadredredre nei tamaqu ka rogoca na nona dredre ka raici koya vaka e dua na tamata vakaturi cake ka vinaka vakaoti. Ena rai vakauqeti ena vakabauta, au raitayaloyalotaki Alisa vakataucoko tani mai na sasala ni leqa vakavuravura cava ga se batigaga ni mate cava ga—e dua na Alisa, qaqa vakaturi cake, vinaka vakaoti ka vakasinaiti ena reki.

Ena vica na Siga ni Mate sa oti, a vola o koya: “Na bula ena Yacana. Sa levu na inuinui. Dauvakakina. Ena ka kecega. Au taleitaka na Siga ni Mate me vakananumi au.”23

Au vakadinadinataka na dina taucoko ni Tucaketale. Sa bula o Jisu Karisito, ka baleti Koya, eda na bula kece tale. Ena yaca i Jisu Karisito, emeni.