2010–2019
Im Enaaj Ejjeļo̧k Bar Mej
Eprōļ 2016


Im Enaaj Ejjeļo̧k Bar Mej

N̄an aolep ro rekar liajļōļ kōn mej eo an juon eo rej iakwe, Jerkakpeje eo ej jipan̄ eo im kōjatdikdik eo eļap.

Juon wiik emoot ļo̧k ekar Ijtō, bar juon alen ļōmņak ko ad raar iook ļo̧k wōt en̄taan in pinmuur eo im Jerkakpeje eo an Irooj Jisōs Kraist. Iiō eo ej jem̧ļo̧k ļo̧k iaar ļōmņak im kejōkļo̧kjeņ kōn Jerkakpeje eo eļap ļo̧k jān m̧okta.

Epaake ļo̧k juon iiō emoot ļo̧k, leddik eo nejim Alisa eaar mej. Eaar en̄taan kōn kenjer ium̧in enan̄in ralitōk iiō ko, kōn jet iien m̧wijm̧wij ko, elōn̄ kain kōm̧adm̧ōd ko, kabwilōn̄lōn̄ ko rōkaitokto limo, im inepata ko reļļap. Kōm kar lale jekjek in paotok eo an nana ļo̧k ke eaar tōpar tok jem̧ļo̧k in mour eo an. Ekar kanooj in kōmmetak n̄an lo an waļo̧k n̄an ledik eo eaorōk nejim—eaar eo nejim ekaitoktok limo me eaar rūtto tak n̄an an kapeel, kōrā aiboojoj, lio pālele, im m̧am̧a. Iaar ļōmņak būruwō en kar rub.

Pija
Alisa Johnson Linton

Iiō eo ļo̧k ilo iien Ijtō, em̧ootļo̧k juon jim̧a allōn̄ m̧okta jān an kar jako, Alisa eaar je: “Ijtō ej juon kakeememej kōn aolep ta eo ij kōjatdikdik kake n̄a make. Bwe juon raan inaaj nan̄inmej im juon raan inaaj mour. Juon raan eban wōr jabdewōt aen ak būļajtiik ilowaō. Juon raan būruwō enaaj anemkwoj jān mijak im aō ļōmņak naaj anemkwoj jān inepata ko. Ijjab jar bwe menin en m̧ōkaj an waļo̧k, bōtaab ij kanooj laudin̄din̄ ij lukkuun tōmak ilo mour eo ālkin eaiboojoj.”1

Jerkakpeje eo an Jisōs Kraist ej kapen lukkuun men ko Alisa eaar kōjatdikdik kaki im katōk ilo kōj kajjojo “juon un [n̄an] kōjatdikdik bwe ej ilo [kōj].”2 Būreejtōn Gordon B. Hinckley B. Hinckley eaar keidi n̄an Jerkakpeje eo āinwōt “iien eo eļap tata iaan aolep iien ilo bwebwenato an armej.”3

Jerkakpeje eo ej bōktok Pinmuur eo an Jisōs Kraist ej juon m̧ōttan emenin aikuj n̄an karōk in lo̧mo̧o̧r eo eļap.4 Jej ajri in jetōb ro nejin ro jined im jemed ilo lan̄.5 Ke jaar itok n̄an mour in laļ in, jetōb eo ad ej bar koba ippān ānbwinid. Jej en̄jake aolep lan̄lōn̄ ko im apan̄ ko rej bwinnin mour in. N̄e juon armej ej mej, jetōb eo aer ej jepel ļo̧k jān ānbwinier. Jerkakpeje eo ekōm̧m̧an an pidodo bwe jetōb im ānbwin juon armej rej bar koba ippān doon, ilo tōre in wōt ānbwin eo enaaj jab wabanban im ej weppen—jab lokjak n̄an metak, nan̄inmej, ak jorrāān ko jet.6

Ālkin jerkakpeje, jetōb eo ejjamin naaj bar jepel ļo̧k jān ānbwiin eo kōnke Jerkakpeje eo an Rilo̧mo̧o̧r eaar bōktok anjo̧ eo ioon mej. N̄an bōk jinikjej eo ad indeeo, ej aikuj wōr ad jetōb jab wabanban—jetōb im ānbwin—ippān doon n̄an indeeo. Kōn jetōb eo im ānbwin jab wabanban rej ekkejel im jab jepel ļo̧k, jemaron̄ “bōk tarlep in lan̄lōn̄ eo.”7 Ilo m̧ool, an ejjeļo̧k Jerkakpeje jej jab maron̄ bōk tarlep in lan̄lōn̄ eo bōtaab naaj kar indeeo en̄taan.8 Jekdoon armej ro retiljek, jim̧we kalimjōk jepel ļo̧k eo an ānbwin ko aer jān jetōb ko aer āinwōt kōm̧akoko. Kar kōtļo̧k kōj jān kōm̧akoko in kōn Jerkakpeje eo, eo ej lo̧m̧o̧o̧ren jān to ko ak tomede ko an mej.9 Ejjeļo̧k lo̧mo̧o̧r ilo an jako jetōb ko ad im ānbwin ko ad.

Kajjojo iaad ewōr an ānbwin, kōļmenļo̧kjeņ, im en̄jake ko ad jon̄ak ko im m̧ōjņo̧ ko. Apan̄ kein, jet iaer rej āinwōt epen anjo̧ ioer kiiō, naaj āliktata ņa mejļaer. Ejjeļo̧k iaan jorrāān kein naaj kainepata kōj ālkin ad jerkakpeje. Alisa eaar ilubwiljin ro raar mour jān kain kānjer eo eaar wōr ippān, im bōnbōn ko raar jab em̧m̧an. Liin eaar je: “Bōtaab ewōr kein kemour, kōn menin ijjab mijak. Jisōs emōj an kōmour kāānjer eo aō, im eo am̧. ... I naaj ājmour ļo̧k. Ij kam̧m̧oolol ijeļā menin.”10

Jemaron̄ bōk jikin naan eo kāānjer kōn jabdewōt nan̄inmej ko an ānbwin, kōļmenļo̧kjeņ, ak en̄jake jemaron̄ jelm̧ai. Kōnke Jerkakpeje eo, rekar mour barāinwōt. Kabwilōn̄lōn̄ eo an jerkakpeje, kemour eo āliktata, ej ļap ļo̧k jān kajoor eo an uno ko raan kein. Bōtaab ejjab ļap ļo̧k jān kajoor an Anij. Jejeļā emaron̄ kōm̧m̧an kōn ke Rilo̧mo̧o̧r eo eaar jerkakpeje im naaj kakūrm̧ool Jerkakpeje eo an kajjojo iaad barāinwōt.11

Jerkakpeje eo an Rilo̧mo̧o̧r ej kam̧ool bwe E ej Neji Anij im bwe ta eo Eaar katakin ej m̧ool. “E ar jerkakpeje, im āinwōt An ba.”12 Ejjamin maron̄ wōr kein kam̧ool ekajoor ļo̧k kōn kwojarjar eo An jān An waļok tok jān lōb eo kōn juon ānbwin jab wabanban.

Jejeļā kōn rikam̧ool kōn Jerkakpeje eo ilo tōre ko an Kallim̧ur Ekāāl. N̄an kakobaba n̄an kōrā ro im em̧m̧aan ro jej riiti kaki ilo Gospel bok ko, Kallim̧ur Ekāāl ej kapen n̄an kōj bwe bukwi raar lukkuun lo Jerkakpeje Irooj.13 Im ilo Bok in Mormon ej jiron̄ kōn elōn̄ ļo̧k bukwi ro: “Jarlepju eo ar wōnm̧aanļo̧k, im karum̧ļo̧k peier ilo katin, … im [raar] lo kōn mejaer im en̄jake kō peier, im kar jeļā ilo m̧ool im kar kam̧ool e, bwe ekar E eo, eo kar jeje kake jān rikanaan ro, bwe E en kar itok.”14

Ippān rikam̧ool ro etto kar kobaik tok rikam̧ool ro ilo raan ko āliktata. Ilo m̧ool, ilo peļļo̧k eo an tōre in bōk eddo in, Josep Smith eaar lo jerkakpeje Rilo̧mo̧o̧r ippān Jemen.15 Rikanaan ro remour im rijilōk ro kar kam̧ool kōn m̧ool eo an jerkakpeje, Kraist eo emour.16, “Bwe jān maron̄ ba, “Innām bwe ri kōnnaan, āinwōt kōdo̧ eļap, rej kōpooļ kōj.”17 Im kajjojo iaad emaron̄ m̧ōttan juon kōdo̧ in rikam̧ool me ejeļā kōn kajoor eo an Jetōb Kwojarjar ej unin ad kam̧oolol kōn ta eo eaar lukkuun waļo̧k ilo Ijtō—bwe Jerkakpeje ej m̧ool in.

M̧ool eo an Jerkakpeje eo an Rilo̧mo̧o̧r ej anjo̧ ioon būrom̧ōj ko ad kōn kōjatdikdik, kōnke ippān tok kam̧ool eo bwe aolep kallim̧ur ko jet an gospel eo rej m̧ool in—kallim̧ur ko me rej āinwōt Jerkakpeje eo. Jejeļā bwe ewōr Ippān kajoor eo n̄an karreoik kōj jān aolep jero̗wiwi ko ad. Jejeļā Eaar bōk ioon Make aolep nan̄inmej ko ad, metak ko, im kalijōk ļo̧k ko jaar en̄taan kaki.18 Jejeļā bwe E “[kar] jerkak jān ro remej, kōn kōmour ilo pein bao ko Pein.”19 Jejeļā bwe Emaron̄ kōm̧m̧an bwe jān mour jekdo̧o̧n ta eo ejorrāān ilo kōj. Jejeļā bwe “Enaaj kōm̧ōrāik jān [mejeer] dānnin kōm̧jaaļaļ otemjej; im enaaj ejjeļo̧k bar mej, im re jāmin bar liaajlo̧ļ, ak jan̄, ak en̄taan; bwe men ko m̧okta re jako.”20 Jejeļā bwe jemaron̄ in “kōweeppān er kōn Jisōs …, eo kar jerbale jān pinmuur eweeppān in,”21 eļan̄n̄e enaaj wōr ad tōmak im ļoor E.

Ilo jem̧ļo̧k in ļo̧k al eo eim̧we Messiah, Handel eaar kūne ilo al naan ko an Rijilōk Paul kōn Jerkakpeje.

“Lo, ij kōnnaanōk kom̧ jun men eo ettiņo; jab kōj otemjej je naaj kiki, a kōj otemjej je naaj āinjuon,

“Ilo būkkinkwōle, ilo rom̧, ilo jilel eo āliktata: … tbwe jilel enaaj jan̄, im ro re mej re naaj jerkakpeje re jabwabōnbōn, im kōj je naaj erom āin juon.

“Bwe em̧m̧an wabanban in en kōņak jabwabōnbōn, im mej in en kōņak banmej.

“… Innām enaaj jejjet naan eo em̧ōj kar je, Mej ej jako ilo anjo̧.

“O mej ewei am̧ kein ire? “O mej, ewi am̧ anjo̧? …

“A kam̧m̧oolol Anij, eo Ej letok n̄an kōj anjo̧ kōn ad Irooj Jisōs Kraist.”22

Ij kam̧m̧oolol kōn kōjeram̧m̧ān ko me rej ad kōnke kōn Pinmuur eo im Jerkakpeje eo an Irooj Jisōs Kraist. N̄an aolep ro eaar wōr nejier remej ak jan̄ iturin bo̧k eo an eo pālele ak būrom̧ōj kōn ro jinier im jemeer ak juon eo ejitōnbōro, Jekakpeje eo ej juon kein jipan̄ eļap an kōjatdikdik. Juon en̄jake eo eļap enaaj n̄an lo er bar juon alen—ejjab wōt ilo jetōb ko ak kōn ānbwin ko raar jerkakpeje.

Ij jan̄uwade n̄an lo jinō bar juon alen im en̄jake meoeo in an jibwe im kalimjōk māj ko rejouj. Ikōņaan lo ettōn̄ eo an jema im ron̄jake an ettōn̄ im lo e āinwōt juon armej jerkakpeje, weppān. Kōn tōmak, ij pijaikļo̧k an Alisa maron̄ eļļāļo̧k jān jabdewōt en̄taan in laļ in im jabdewōt nana an mej—juon eo emōj an jerkakpeje, Alisa eo ewāppen, ej anjo̧ im bōk juon tarlep in lan̄lōn̄.

Jet Ijtō ko remoot ļo̧k, liin eaar je: “Mour kōn Etan. Ekanooj ļap kōjatdikdik. Iien otemjej. Kōn men otemjej. Ij iakwe Ijtō n̄an kakememej n̄a.”23

Ij kam̧ool kōn m̧ool eo an Jerkakpeje eo. Jisōs Kraist emour, im kōnke kōn E, jenaaj aolep mour bar juon alen. Ilo etan Jisōs Kraist, amen.