Oh Solahr Mehla Pahn Wiawi

Wihk nekiero iei Easter, oh atail madamadau kan pwurehng dokehte tomw en tohnmeteio oh Iasadahn Kaun Sises Krais. Sounpar nekiero I medemedewehier oh loalloalehier duwen Iasadao laudsang dahme I kin wia.

Nait serepein Alisa mehla kereniengehr sounpar ehu. E wiewiahier soumwahu en kanser kerenieng sounpar waluh, pil koadoahkehr pangkei, soangoasoangen epwel tohto, manaman kopwuriamwei kei, oh kapahtou laud kei. Se kilang uwen luwetalahn paliwereo ni eh kerekerenlahngehr ni imwin ah mour. E inenen kamedek mehlel kilang dahme wiawihengehr nait serepein kesempwalo—kisin seri kaperen me keirdahr oh wialahr emen me koahiek, lih mwahu, lih pwopwoud, oh nohno men. I lemehieng me I sohte pahn kak nsenamwahula.

Kilel

Alisa Johnson Linton

Sounpar nekiero ni ansoun Easter, ekis pohnangin sounpwong ehu mwohn eh mehlao, Alisa ntingiedi: “Easter wia ehu mehn katamanpen mehkoaros me I kopworopworki ong pein ngehi. Me ehu rahn I pahn kehlailda oh ehu rahn I pahn unsekla. Ehu rahn e sohte pahn mie mete oh pilastik nan paliwereiet. Ehu rahn mohngiongiet pahn saledeksang masak oh ahi lamalam pahn meleileidi. I sohte wie kapakapki soahng wet en wiawi ansou mwadang, ahpw I inenen perenki ahi kamehlele duwen lingan en mwurin mour wet.”¹

Iasadahn Sises Kraiso kamehlelehieng kitail soahng koaros me Alisa kopworopworki oh kin kalakalaude rehn emen emen kitail “ehu kahrepen koapworopwor me mie rehtailet.”² President Gordon B. Hinckley kawewehda me Iasadao me wia “mwekid keieu kesempwal nan poadoapoad en aramas.”³

Iasadao wiawiher sang ni Tomw en Sises Kraiso oh kesempwal ong kosondien komouro.⁴ Kitail wia seri ngehn kei en pahpa oh nohno en nanleng.⁵ Ni atail kodohng ni mour en sampah wet, ngenitail patehngala paliwaratail. Kitail kin aliale kaperen koaros oh kahpwal akan me wia kisehn mour wet. Ni aramas emen eh kin mehla, ngenio kin tohrohrasang paliwereo. Iasada me kin kahrehda palingehn oh paliwar en aramas emen eh pahn kak pwurehng patpene, iei ansouet te me paliwar pahn momourehr oh unseklahr—sohte ahneki medek, soumwahu, de soangen kahpwal teikan.⁶

Mwurin iasada, ngehno sohte pahn pwurehng tohrohralahsang paliwaro pwehki Sapwellimen Sounkomouro Iasadao powehdier douluhl mehla. Pwehn kak lellahng nan dewetail potopoto, kitail anahne ale mour soutuk wet—ehu palingehn oh paliwar—patpene kohkohlahte. Ni palingehn oh paliwar ara patpenehrsoutuk, kitail kak “alehdi peren potopot.”⁷ Ni mehlel, ma sohte Iasadao kitail sohte kak alehdi ehu peren poatoapoat ahpw kitail pahn uhd alehdi lokolok soutuk.⁸ Mehlel aramas pwoson oh pwung kan kin wiahki me kalokolok ehu katohrohrpeseng en palingenirail oh paliwararail. Kitail pitisangehr kalokolok wet pwehki Iasadao, me iei poadoandoarla sang nan ahl akan en mehla.⁹ Sohte komourla ma sohte koaros palingenitail oh paliwaratail.

Emen emen kitail ahneki souitar akan en paliwar, lamalam oh wiewia kan. Kahpwal pwukat, me ekei kitail sohte kak wekidala ansouet, pahn kak kapwungpwungla. Kahpwal pwukat koaros sohte pahn kerempwaikitail mwurin atail iasada. Alisa ropadahr uwen tohtohn aramas akan me iangehr ahniki soangen kanser me e ahnekio, oh re me malaulau. E ntingiedi: “Ahpw mie mehn kamwahuiala, kahrehda I sohte masak. Sises ketin kamwahuilahar ahi kanseret, oh pil amwail kan. … Ipahnkehlailda. I peren pwe I wehwehki met.”¹⁰

Kitail kak weliandakihda lepin lokaiakanser ehu soangen soumwahu teikan en paliwar, lamalam oh wiewia me kitail pahn sohpai. Pwehki Iasadao, soumwahu pwukat pil iang kamwahulahr. Kopwuriamwei en iasadao, wini keieu sawaso, inenen siksang kehlail en wini en ansouet. Ahpw e sohte siksang manaman en Koht. Kitail ese me e kak wiawi pwehki Sounkomouro ketin iasadahr oh pahn kahrehieng emen emen kitail eh pil pahn Iasada.¹¹

Iasadahn Sounkomouro kadehdehda me iei Ih me ketin wia Iehros en Koht oh dahme E ketin padahngkiher uhdahn mehlel. “E ketin iasadahr, ni duwen me E mahsaniher.”¹² Sohte mehn kadehde me pid Sapwelime doadoahk sarawio me kehlailsang Kahlapeo eh ketin iasadahsang nan sousouo ni paliwar oh pahn ieias kokohlahte.

Kitail ese sounkadehde kan en Iasadaho nan mwehin Kadehde Kapw akan. Me patehng ohl oh lih akan me kitail wadekehr nan Rongamwahu kan, Kadehde Kapwo kadehdehieng kitail me aramas epwiki kei kilangehr iasadahn Kauno.¹³ Oh Pwuhken Mormon kin kasalehda mehkei me tohtohki epwiki kei. “Pokono eri kolahr, oh doahkehkiher pehrail ko pengepengeo, …oh kilangkiher meserail ko oh kehnkiher pehrail ko, oh esehier duwen eh mehlel oh kadehdehier ni nting, iei ih, me soukohp oko ntingiedier, me uhdahn pahn ketdo.”¹⁴

Sounkadehde en ni imwin rahn akan pil petehng irail sounkadehde en kawahko. Ni mehlelo, ni tepdahn mwehi wet, Joseph Smith kilang Sounkomour me iasadahro oh Sahmo.¹⁵ Soukohp ieias oh wahnparon kan kadehdekiher ni mehlel duwen iasadahn Krais ieiaso.¹⁶ Eri kitail kak nda, “Sounkadehde pwukat me tohto kapilkitailpenehr duwehte depwek kalaimwun ehu.”¹⁷ Oh emen emen kitail kak wia kisehn depwek en sounkadehde kei me wehwehki me sang ni manaman en Ngehn Sarawio me dahme kitail kin kawauwih ni Ihster e uhdan wiawi—me Iasadaho me mehlel.

Mehlel en Iasadahn Sounkomouro kasohrala atail pahtou oh weliankihdi koapworopwor, pwehki mwo e kamehlelehiong kitail me inou teikan en rongamwahuo me pil mehlel—manaman en inouko sohte tikitik sang iasadaho. Kitail wehwehki me mie Sapwellime manaman en kamwakelehsang dipatailkan koaros. Kitail wehwehki me E ketin sapwellimenkidahr atail luwet kan, soumwahu kan oh kadeik likamw kan me kitail lokolongkier.¹⁸ Kitail wehwehki me e ketin iasadahr, iangahki manaman en kamwahiala nan limeh kan. ¹⁹ Kitail wehwehki me E kak wiahiong kitail en unsekla sohte lipilipil dahme ohla rehtail. Kitail wehwehki me E “pahn ketin limwihasang pilen mese[tail] koaros; oh mehla solahr pahn wiawi, solahr nsensuwed, solahr mwahiei, solahr medek.”²⁰ Kitail wehwehki me kitail kak unsekla pwehki Sises …, me ketin wiadahr toamw unsek wet”²¹ ma kitail ahneki pwoson oh idawehn Ih.

Kokohlahng ni imwin koul kaselelo Messiah, Handel wiahkihda koul kaselel pwoato mahsen kan en padahk enme Wahnparon Paul padahngki duwen peren pwehki Iasadao.

“Kumwail rong padahk rir wet; kaidehn kitail koaruhsie pahn mehla, ahpw kitail koaruhsie pahn kiewekla,

“Ni ahnsoutehkis, ni marepteieu, ni ansou me keimwiseklahn sowi pahn pepeuk: …ni ngilen sowio, me melahr akan ahpw pahn iasadahng mour, oh kitail koaros ahpw pahn kiewekla.

“Pwe mwerpeseng wet uhdahn pahn kieweklahng sohmwerpeseng, oh mehla pahn uhd kieweklahng solahr mehla.

“… Eri mepwukat pahn kapwaiadada mahsen me ntingdiero, Mehla kamwommwomwlahr.

“O mehla, ia ahmw tehtehn meninkau? O sousou, ia ahmw manaman en kalewehdi? …

“Ahpw kalangan akan en ong Koht, me kin ketikihong atail roson en powehdi ni mwaren atail Kaun Sises Krais.”²²

I kapingkalahnganki atail kapaikan pwehki Toam oh Iasadahn atail Kaun Sises Krais. Ong koaros me sarepedier serihmen nan sousou, de mwahiei pohn en ah pwoud kohpwahn mehla de pahtoukihla melahn emen pahpa/nohno de kempoakeparail, Iasadaho wia kahrepen atail koapworopwor laud. Ia pahn mwoamwen atail pepehm ni atail pahn kilang irail—kaidehn ni ngehn kei ahpw ni paliwar me iasadahr kan.

I men pwurehng kilang ahi nohnohu oh kehn ah kin sairie oh kilang nan mese kempoake ko. I men kilang ahn ahi pahpao ah sireio oh rong ngilen ah kouruhr oh kilang ih ni eh iasadahr wia aramas unsek. Ni mahs ehu me pwoson, I kilang Alisa eh dohsang mehlel kahpwal sohte ipilipil en sampah kan de pil kamedek en mehla—Alisa me iasadahr, unseklahr, powehdier oh ahnekiher peren unsek.

Easter kei samwalahr, e ntingiedi, “Momour ni Mwareo. Diren koapworopwor. Ansou koaros. Ni mehkoaros, I pereniki Easter en kin katamanehngie.”²³

I kadehdeki mehlel en Iasadao. Sises Krais ketin ieias, oh pwehki Ih, kitail koaruhsie pahn pwurehng mourda. Ni mwaren Sises Krais, amen.