Gat Tingting we i Stap Doan
Tingting we i stap daon i save mekem yumi kam ol gudfala papa mo mama, ol pikinini boe mo gel, ol hasban mo waef, ol neiba mo ol fren.
Yumi gat blesing long Jos blong save gat wan koleksen blong ol hym we i helpem yumi blong wosip wetem singsing. Long ol Jos miting, “ol hym oli invaetem Spirit blong Lod, krietem wan filing blong respek, mekem ol memba i kam wan, mo givim wan wei blong yumi presem Lod. Sam long ol gudfala toktok oli prijim tru long ol hym.”1
Sam manis afta we Jos i bin oganaes, Profet Josef Smit i bin kasem wan revelesen blong waef blong hem, Ema. Lod i talem long hem “mo bambae mi givim wok long yu tu, blong jusum ol tabu hym, olsem we bambae Spirit blong mi i givim long yu, we bambae mi glad long hem, we bambae oli yusum insaed long jos blong mi.” 2
Ema Smit i putum tugeta wan koleksen blong ol hym we oli bin stap bifo long hym buk blong Ketlan long 1836. 3 I gat 90 singsing nomo we i stap long smol buk ia. Plante long olgeta i kam long ol Protestan. Twante-sikis long olgeta, Wiliam W. Felps i bin komposem, mo hem nao i bin priperem mo printimaot ol hym ia. Oli bin raetem ol toktok nomo; i nogat ol not blong miusik wetem ol raeting ia. Smol hym buk ia i wan bigfala blesing long laef blong ol eli memba blong Jos.
Inglis lanwis hymbuk; we yumi stap yusum naoia oli bin pablisim long 1985. Plante long ol seleksen we Emma i bin jusum plante yia i pas, oli stap yet long hymbuk blong yumi olsem “Mi Save Ridima Hem i Laef” mo “Tijing Blong Jisas oli stamba blong yumi.”4
Wan long ol singsing we i niu long 1985 hymbuk ia hem i “Gat Tingting we i Stap Doan.” 5 Naes pisful hym ia; Gritj Tebeg Raoli we i pas awe las yia nao i bin raetem. Hem i joenem Jos long 1950, long Hawai, taem we hem i bin stap tij long wan skul. Sista Raoli i bin givim seves long Jeneral Miusik Komiti mo i bin givhan blong putum ol hym i go long plante defren lanwis. Hem i raetem ol toktok blong hym ia “Gat Tingting we i Stap Doan” folem tu vas long skripja: Doktrin mo Ol Kavenan 112:10 mo Ita 12:27. Vas long Ita i rid olsem: “Mo sapos ol man i kam long mi bae mi soem samting we i no strong blong olgeta. Mi givim olgeta samting we i no strong blong mekem se oli save putum tingting blong olgeta i stap daon; … from sapos oli putum tingting blong olgeta i stap daon long fored blong mi, mo gat fet long mi, afta bae mi mekem ol samting we i no strong i kam strong long olgeta.”
Olsem evri hym blong Jos, “Gat Tingting we i Stap Daon” hem i tijim wan simpol mo klin tru tok. Hem i tijim yumi se sapos yu gat tingting we i stap daon, bae yumi kasem ansa long ol pre blong yumi; bae tingting blong yumi i no trabol; bae yumi mekem gud moa long ol koling blong yumi; mo sapos yumi gohed wetem fet, bambae long las dei bambae yumi save kam bak long fored blong Papa blong yumi long Heven.
Sevya i bin tijim ol man we oli stap folem Hem se oli mas putum tingting blong olgeta i stap daon olsem ol pikinini blong oli save go insaed long kingdom blong God. 6 Taem yumi stap tijim ol pikinini blong yumi; yumi nid blong helpem olgeta blong gat fasin ia blong putum tingting i stap daon oltaem taem oli stap gro i kam antap. Yumi no save mekem hemia sapos yumi go agensem olgeta mo mekem olgeta i harem nogud tru long fasin we i no kaen o givim panis we i strong tumas. Taem yumi stap kea gud blong olgeta i gat tras long olgetawan mo respektem olgetawan yumi nid blong tijim olgeta ol fasin blong putum olgeta laswan oltaem, stap kaen, stap obei, no ting hae, gat respek, mo no traem haedem se yu huia stret. Yumi nid blong tijim olgeta blong glad from ol sakses blong ol nara brata mo sista o ol fren. Presiden Hawod W. Hanta i bin tijim se “stret mo tru wari blong yumi hem i blong luk ol narafala i gat sakses.” 7 Sapos no bae olgeta i save gat fasin blong stap mekem gud long olgetawan nomo, o bae oli save jalus o gat filing we i agens taem ol narafala oli mekem wan gud samting. Mi glad tumas from wan mama we taem hem i luk se mi stap tok praod tumas long miwan, bae hem i talem se “Boe, traem putum tingting ia i go daon lelebet mo bae yu save stap glad blong long taem.”
Be fasin blong gat tingting we i stap daon i no blong yumi tijim long ol pikinini nomo. Yumi evriwan i mas trae had moa blong putum tingting i stap daon. Fasin ia blong putum tingting i stap daon hem i impoten blong save kasem ol blesing blong gospel. Fasin blong gat tingting we i stap daon i save helpem yumi blong gat ol brokbrok hat taem yumi sin o mekem mistek mo i mekem i isi blong yumi sakemaot sin. Fasin blong gat tingting we i stap daon i save helpem yumi blong stap ol gudfala papa mo mama, ol pikinini boe mo gel, ol hasban mo waef, ol neiba mo fren.
Be long narasaed blong hemia, fasin blong ting hae i save draonem ol famli rilesensip, brekem ol mared mo spolem ol frensip. Hem i impoten tumas blong tingbaot blong gat tingting we i stap daon taem yu filim se hom blong yu i no stret. Tingbaot ol harem nogud we yu save stopem sapos yu putum tingting blong yu daon mo talem, “Mi sore”; “Mi no sud mekem olsem”; “?Yu wantem mi blong mekem wanem?”; “Mi no bin yusum hed blong mi” o “Mi praod long yu”. Sapos yumi yusum ol smol toktok olsem wetem wan tingting we i stap daon, bambae i katem daon raorao mo i givim pis long ol hom blong yumi.
Blong stap laef nomo, hem i olsem wan eksperiens blong gat tingting we i stap daon. Aksiden mo sik, ded blong wan we yu lavem, problem long rilesensip, ol problem blong mane i save pulum daon yumi. I nomata se ol hadtaem i kam from ol mistek blong yu, ol rong joes mo nogud jajmen, ol had taem ia oli save kam wetem tingting we i stap daon. Sapos yumi jus blong gat spirit mo putum tingting i stap daon mo wantem lanem samting, bae ol pre blong yumi i kam moa strong mo fet mo testemoni blong yumi bae i gro taem yumi stap winim ol had taem long laef blong yumi long wol ia. Evri wan long yumi i stap luk fored from fasin blong kam olsem wan god, be bifo hemia i save hapen, yumi mas stanap strong tru long ol hadtaem fastaem bifo yumi save gat ol gud taem.8
Plante yia i pas, 15 yia pikinini boe blong mitufala, Erik, i bin kasem wan bigfala kil long hed blong hem. Hat blong mifala i brok taem mifala i luk hem i stap long wan koma bitim wan wik. Ol dokta oli talem long mifala se oli no sua tumas se wanem bae happen long hem. Be taem se hem i stat blong wekap bakegen, mifala i bin glad tumas. Mifala i ting se bae evri samting i kam oraet bakegen, be, mifala i rong.
Taem se hem i wekap bakegen, hem i no moa save wokbaot, toktok o fidim hemwan. Antap long hemia, hem i no save tingbaot ol samting we i jes hapen. Hem i save tingbaot ol samting we i hapen bifo long aksiden be hem i no save tingbaot ol samting we i hapen afta, iven ol samting we i jes hapen nomo sam minit i pas.
Mifala i bin wari smol se bae mifala i gat wan pikinini we bae tingting blong hem i no save gro. Ol samting oli bin isi nomo long hem bifo long aksiden ia, hem i gud long spot, hem i popula, mo hem i stap mekem gud long skul. Bifo, hem i gat gudfala fiuja, be naoia mifala i stap wari se bae hem i nogat wan gudfala fiuja, o wan we bae hem i save tingbaot. Naoia hem i mas traehad bakegen blong lanem ol simpol skil blong laef. Hem i wan taem we hem i traehad blong putum tingting blong hem i stap daon. Papa mo mama tu i traehad blong putum tingting i stap daon.
Blong talem tru, mifala i bin stap tingbaot se ?from wanem nao samting ia i happen? Mifala i stap traehad oltaem blong mekem raet samting. Blong laef folem gospel hem i impoten tumas long famli blong mifala. Mifala i no save andastanem from wanem wan samting olsem i save happen long mifala. Mifala i bin nildaon long ol ni blong mifala taem mifala i luksave se tritmen blong kambak gud bakegen bae i tekem plante manis o plante yia. I bin had tumas tu blong luksave se bae hem i no moa semak olsem bifo.
Long taem ia, plante wota blong ae i bin ron, mo ol pre oli kam moa dip mo moa mining ful. Tru long ol ae we i gat tingting we i stap daon, mifala i stat blong luk sloslo, ol merikel we boe blong mifala i go tru long hem long taem blong harem nogud ia. Hem i stat blong kam gud sloslo. Ol fasin mo tingting blong hem i talem se bae hem i kam oraet bakegen.
Tedei, boe blong mitufala Erik, i maredem wan gudfala kompanion mo tufala i gat faef naesfala pikinini. Hem i laekem tumas blong tij, mo i mekem plante gudfala samting blong komuniti blong hem, mo blong Jos. Moa impoten se, hem i gohed blong laef long fasin ia blong gat tingting we i stap daon we hem i bin lanem plante yia i pas.
?Be olsem wanem sapos yumi save gat tingting we i stap daon bifo yumi fesem ol plante hadtaem? Alma i bin tijim:
“Olgeta we oli rili putum tingting blong olgeta i stap daon mo oli no fosem olgeta blong putum tingting blong olgeta i stap daon, bae oli kasem blesing.”
Yes bae hem i kasem moa blesing bitim olgeta we oli fosem olgeta blong putum tingting blong olgeta i stap daon.” 9
Mi talem tangkyu long ol profet, olsem Alma, we oli bin tijim yumi praes blong gudfala fasin ia. Spensa W. Kimbol, namba 12 Presiden blong Jos, i bin talem: “?Olsem wanem nao wan i save gat tingting we i stap daon? Long lukluk blong mi, wan i mas tingbaot oltaem se hem i stap dipen. ?Dipen long huia? Long Lod. ?Olsem wanem nao bae yumi stap rimaenem yumi wan? Tru long fasin blong prea oltaem wetem wan hat we i tru, i revren, mo i glad.” 10
Hem i no wan sapraes long yumi se hym we Presiden Kimbol i laekem tumas hem i “Mi nidim Yu Oltaem.” 11Elda Dalin H. Oks i talemaot se singsing ia nao ol brata oli stap singsing long hem oltaem insaed long tempol olsem opening hym taem we hem i jes joenem Kworom blong Olgeta Twelef. “Traem tingbaot paoa blong spirit taem wan smol grup blong ol wokman blong Lod oli sing long singsing ia bifo oli pre long hem blong lidim olgeta blong mekem ol bigfala responsabiliti blong olgeta.” 12
Mi testifae se i impoten tumas blong gat fasin blong tingting we i stap daon long ol laef blong yumi. Mi tangkyu long ol man olsem Sista Gritj Raoli we i bin raetem ol toktok mo miusik wetem insperesen we i helpem yumi blong lanem doktrin blong gospel blong Jisas Kraes, we fasin blong gat tingting we i stap daon i wan long olgeta. Hem i prea blong mi se bae yumi evriwan i traehad blong gat tingting we i stap daon blong yumi save kam ol gudfala papa mo mama, boe mo gel, mo ol man blong folem Sevya. Long nem blong Jisas Kraes, amen.