Taian Rinerine

Tariu ao mwaneu, imwain ae I waakina oin au rongorongoro n te bong aei, I tangiria ni katanoatai aua tembora aika boou ake, n namwakaina ao ririki n roko, a na kateaki n taabo aika: Quito, Ecuador; Harare, Zimbabwe; Belém, Brazil; and a second temple in Lima, Peru.

Ngke I riki ngai bwa kaain te Kooram n Abotoro n te Tengaun ma Uoman n 1963, iai 12 tembora aika a mwakuri inanon te Ekaretia ni kabuta. Ni katabuan te Provo City Centre Tembora uoua te wiiki n nako, iai ngkai 150 taian tembora aika mwakuri n te aonnaba ni kabuta. Ti bon rang ni kukurei n ibukin kakabwaia aika ti karekei n taian auti aika tabu aikai.

Ngkai, tariu ao mwaneu, I kan kabwarabwaraa au kakaitau ibukin te tai n tibwauai reirei ma ngkami n te ingabong aei.

I a tia ni iangoi rinerine n ae nako. E atongaki bwa bwaai aika riki aika uarereke e kona ni bubura taekana n te karaki, ao ai aron naba maeuira. Taian rinerine aika ti karaoi e uotiira n tokin kawaira.

Ngke ti kitana maiura imwaain te maiu aei ao n roko n te maiu n rabwata, ti uota te bwaintangira n rinerine. Ara kouru bwa ti na karekea te mimitong ae te tiretio, ao rinerine ake ti na karaoi, ao e moa riki bwa, ti na baireia n roko n ara kouru.

E mwaiti ibuakomi ae a tataneiai ma rongorongon Alice n ana karaki Lewis Carrol taekana n te Wonderland Ko na uringa bwa ngke e roko n te tuta ni kawai aika uoua ao e nori bwa kawai n tatabeua a bon kaai ni kaineti nako ma a kaitara. Ma ngke e iango n te tai ae maan bwa tera ae na karaoia, e tuangaki iroun te Cheshire Katamwa, are bubuti nakoina Alice. “Enga te kawai ae N na iria.?”

E kaeka te katamwa, “E bon nakon nanom are ko kan nako iai. Ngkana ko aki ataa ae ko kan nako iai, e aki akaka bwa e ngaa kawaim ae ko na toua.”¹

Tiaki n aron Alice, ti ata ae ti kan nako iai, ao eriaibwa e nga te kawai ae ti nako iai, bwa te kawai are ti toua n te maiu aei e kairira nakon tokin kawaira n te maiu are na roko.

Ti kantaninga bwa ti na rineia ni katea ngaira inanora te onimaki ae korakora man mwaakaroiroi are e na riki bwa ara totoko ae kakai ni kaitarai totoko n ana mwakuri teuare buakaka—te onimaki ni koaua, te aeka n onimaki are na kamatoaira ao ni karikirakea nanora n rinea te eti. N akean te onimaki, ti na aiwa. Ngkana iai iroura, ti kona ni kakoroa nanon ara kouru.

Engae ngke e rangi ni bongana bwa ti na rinerine ma te wanawana, a na iai taai ngkana ti karaoa te nanobaba n rinerine. Bwaintangiran te rairanano, are katauraoaki iroun ara Tia Kamaiu, e na karokoira ni kaetan ara kooti, n te aro bwa ti aonga n oki nakon te kawai are na kairira nakon te mimitong are te tiretio are ti ukokoria.

I kantaninga bwa ti na reitaanako te korakora n rawa n iri iango ae tataekinaki. Ti na teimatoa n rinea te eti ae kanganga n onea mwiin n te bure ae bebete.

Ngkai ti karaoi taian babaire aika ti karaoi ni maiura ni katoa bong—bwa ti rinea aei ke arei—ngkana ti rinea Kristo, Ti a tia ni karaoa te rinerine ae eti.

Bwa aio e na teimatoa namakinana inanou ao au tataro ae mangori n aran Iesu Kristo, ara Uea ao ara Tia Kamaiu.