Tej Kev Xaiv

Cov kwv tij thiab cov muam, hnub no ua ntej kuv pib hais kuv zaj lus qhia, kuv xav tshaj tawm txog peb plaub lub tuam tsev tshiab, uas hauv ob peb hlis thiab xyoos tom ntej, yuav ua hauv tej qhov chaw no: Quito, Ecuador teb; Harare, Zimbabwe teb; Belém, Brazil teb; thiab lub tuam tsev thib ob hauv Lima, Peru teb.

Thaum kuv los ua ib tug mej zeej hauv Pawg Kaum Ob tug Thwj Tim thaum xyoo 1963, tsuas muaj 12 lub tuam tsev hauv tag nrho lub Koom Txoos. Ob lim piam tas los lawm thaum muab lub Tuam Tsev Provo City Center fij tseg, txawm muaj 150 lub tuam tsev uas qhib thoob plaws ntiaj teb no. Peb muaj kev ris txiaj ntau rau tej koob hmoov uas peb txais hauv cov tsev dawb huv no.

Nim no, kuv cov kwv tij thiab cov muam, kuv xav qhia kuv txoj kev ris txiaj rau lub sij hawm no uas kuv muaj qhia kuv tej kev xav rau nej tag kis no.

Tsis ntev tas los no kuv tau ntsuam xav txog tej kev xaiv. Tib neeg hais tias peb zaj liv xwm nyob ntawm tej kev txiav txim me me, thiab peb lub neej yeej zoo ib yam li ntawd. Peb tej kev xaiv txiav txim seb yav tom ntej peb lub neej nyob mus ib txhis yuav zoo li cas.

Thaum peb ncaim lub neej ua ntej thiab yug los rau hauv lub neej no, peb tau lub txiaj ntsim ntawm kev ywj siab nrog peb los. Peb lub hom phiaj yog lub yeeb koob xilethi-aus, thiab feem ntau tej yam uas peb xaiv ua, yuav txiav txim seb peb ncav puas tau peb lub hom phiaj.

Nej feem coob paub txog Alice hauv Lewis Carroll phau ntawv Alice’s Adventures in Wonderland. Nej yuav nco qab tias nws los txog ob txoj kev sib tshuam, nyias kev mus nyias li. Thaum nws ntsuam xav seb nws yuav tig es taug txoj twg, muaj ib tug miv los hais nws, ces Alice nug hais tias, “Kuv yuav tsum taug txoj kev twg?”

Tus miv teb hais tias, “Qhov ntawd nyob ntawm seb koj xav mus rau qhov twg. Yog koj tsis paub hais tias koj xav mus qhov twg, ces koj taug txoj twg los tsis ua li cas.”¹

Peb tsis zoo li Alice, vim peb paub hais tias peb xav mus qhov twg thiab nws tseem ceeb heev seb peb yuav taug txoj twg, rau qhov txoj kev uas peb taug hauv lub neej no coj peb mus rau peb qhov chaw nyob mus ib txhis hauv lub neej tom ntej.

Thov kom peb yuav xaiv los txhim tsa ib txoj kev ntseeg loj heev uas muaj hwj chim uas yuav pab peb tiv thaiv peb tawm ntawm dab ntxwg nyoog tej tswv yim—ib txoj kev ntseeg tiag tiag, ib txoj kev ntseeg uas yuav txhawb nqa peb thiab ua rau peb muaj zog xaiv los ua qhov yog. Yog tsis muaj kev ntseeg loj npaum li ntawd, ces peb tsis mus qhov twg. Yog muaj ces, peb ncav tau peb cov hom phiaj.

Txawm tias peb yuav tsum ua tib zoo xaiv, tseem muaj tej lub sij hawm thaum peb xaiv yuam kev. Lub txiaj ntsim ntawm kev hloov siab lees txim, uas peb tus Cawm Seej muab rau peb, cia peb kho peb txoj hau kev, xwv kom peb thiaj yuav rov qab mus taug txoj kev uas coj peb mus rau lub yeeb koob xilethi-aus uas peb xav tau.

Cia peb muaj siab loj txaus kom tsis txhob ua raws li coob tug pom zoo ua. Thov kom peb yuav xaiv ua qhov zoo uas nyuaj dua tsis txhob xaiv qhov yooj yim uas yog qhov phem.

Thaum peb xav txog peb tej kev txiav txim uas peb niaj hnub xaiv—txawm peb xaiv uas qhov no los sis xaiv uas qhov tod—yog peb xaiv Khetos, ces peb thiaj tau xaiv qhov yog lawm.

Kuv thov tag siab tag ntsws kom peb yuav ua li no thiab kuv txo hwj chim thov li no los ntawm Yexus Khetos, peb tus Tswv thiab tus Cawm Seej lub npe, amees.