Li sik’ok-u

Ex was wiitz’in, xb’een wa chiru naq tintikib’ li waatin anajwan, nawaj xch’olob’ankil naq te’wanq kaahib’ li ak’ santil ochoch, li te’yiib’amanq sa’eb’ li po ut chihab’ li toj te’chalq, sa’eb’ li na’ajej a’in: Quito, Ecuador; Harare, Zimbabwe; Belém, Brazil; ut xkab’ li santil ochoch sa’ Lima, Peru.

Naq xin’ok laa’in choq’ komon sa’ lix Molameb’ li Kab’laju chi Apostol sa’ 1963, kab’laju li santil ochoch xe’wan sa’ chixjunil li Iglees. Rik’in li rosob’tesinkil li santil ochoch re Provo Centro wiib’ xamaan chaq anajwan, wankeb’ chik 150 li santil ochoch sa’ chixjunil li ruchich’och’. K’a’jo’ qab’antioxihom xb’aan li osob’tesink naqak’ul sa’eb’ li santil kab’l a’in.

Anajwan, ex was wiitz’in, nawaj xyeeb’al inb’antioxihom naq ninru chixwotzb’al junjunq li na’leb’ eerik’in sa’ li kutan a’in.

Sa’ li kutan a’in yookin chi k’oxlak chirix li sik’ok-u. Yeeb’il naq lix pueertil li k’a’ru taak’ulmanq nasutun chiru kok’ sutleb’, ut jo’kan ajwi’ lix yu’am li junjunq. Rik’in li k’a’ru naqasik’ ru nachal li toowanq wi’.

Naq xoo’el chaq sa’ li yu’am naq maji’ nokoyo’la ut xoo’ok sa’ li yu’am a’in, xqak’am chaq li maatan re xtaql qach’ool. Li k’a’ru naqaj, a’an li choxahil loq’al, ut ka’ajwi’ taqak’ul a’an a’ yaal li k’a’ru naqasik’ ru.

Naab’al eere nekenaw resil li ixqa’al Alicia sa’ jun li hu tz’iib’anb’il xb’aan laj Lewis Carroll Las Aventuras de Alicia xk’ab’a’. Sa’ li hu, li ixqa’al nawulak sa’ jun xxal li b’e, ub wiib’ li b’e wan chiru, li jun chi junpak’al, ut li jun chi junpak’al chik. Naq yoo chixk’oxlankil b’ar taaxik, nak’utun jun li mes chiru, ut li xAlicia naxpatz’ re li mes, “Barwan chi b’e tink’am?”

Li mes naxsume, “Taak’am a’ yaal b’ar taawaj xik. Wi ink’a’ nakanaw b’ar taawaj xik, maak’a’ naxye k’a’ru li b’e taak’am.”¹

Maawa’o jo’ li xAlicia. Naqanaw b’ar taqaj xik, ut wan xyaalal k’a’ru li b’e taqak’am, xb’aan naq li b’e naqak’am sa’ li yu’am a’in naxk’am sa’ li k’a’ru taqak’ul sa’ li yu’am chalel.

Chiqasik’ ru xyiib’ankil sa’ qach’ool jun li paab’aal nim ut kaw, li taak’anjelaq choq’ kolb’a-ib’ na’ajej chiru lix maa’us aj na’leb’ laj tza—jun li paab’aal tz’aqal re ru, jun paab’aal li taawaklesinq qe, ut tixk’e qach’ool chixsik’b’al ru li us. Wi maak’a’ qik’in xkomon li paab’aal a’an, maab’ar tooxik. Wi wan qik’in, naru taqataw li k’a’ru naqasik’.

Us ta aajel ru naq toosik’oq-u chi chaab’il, wan naq nokosach sa’ li sik’ok-u. Li maatan re li jalb’a-k’a’uxlej, k’eeb’il chaq qe xb’aan laj Kolol qe, nokoxkanab’ chixjalb’al li qab’e, re too’ok wi’chik sa’ li b’e li toxk’am sa’ li choxahil loq’al li naqasik’.

Chiwanq xkawil qach’ool chi elk chaq rik’in lix na’leb’eb’ li jun ch’ol chik. Chiqasik’ ru li us li ch’a’aj chiru li ink’a’ us li moko ch’a’aj ta.

Naq naqak’oxla li k’a’ru taqasik’ ru sa’ li qayu’am wulaj wulaj—ma taqab’aanu a’in malaj taqab’aanu a’an—wi naqasik’ ru li Kristo, chaab’ilaq li b’e toowanq wi’.

Junelik chiwanq chi jo’kan, nintz’aama chi anchal xtuulanil li waam, sa’ xk’ab’a’ li Jesukristo, li Qaawa’ ut aj Kolol qe, amen.