2010–2019
Sulwaclah
April 2016


Sulwaclah

Lwelah kuht in oruh sulwaclah lasr uh ke ma upac tuh in pwacye liki na ma fihsracsr uh stuhelac.

Tamuhlwel ac tahmtahel, met liki nga muhtwacack pweng luhk mihsenge, nga ke tuhkahkihn tempuhl sasuc ahkosr, ma ac fah tuhkuh ke mahlwem ac yac fahsruh, ac fah muhsaheack ke acn inge: Quito, Ecuador; Harare, Zimbabwe; Belém, Brazil; ac tempuhl ahkluo fin acn Lima, Peru.

Ke nga wi mempucr ke U luhn Mwet Sap Singucul Luo ke yac 1963, oasr tempuhl 12 orekmakihnyuck ke Alu nohfohn. Ke kihsackuhnlah luhn Provo City Center Tempuhl wik luo tari ah, ingena oasr tempuhl 150 ma orekmakihnyuck fin facluh. Kuht arulacna tarilacna ke mwe insewowo kuht eis ke lohm muhtahl inge.

Ingena, tamuhlwel ac tahmtahel, nga ke ahkkahlwemye tarilacna luhk ke pacl wo inge in akacsruhi kuhtuh ma yuruwos olutu.

Nga Tuhfahna in nuhnkuh ke sulwaclah. Fahklah tari lah mwe sikyak srihk kuh in eklac ma yohk, ac moulin mwet uh pac. Sulwaclah kuht oraclah uh ahkahlwemye finsraklasr.

Ke kuht som liki moul lasr met liki kuht tuhkuh nuh facluh ac muhtwacack moul inge, kuht us yohrohsr mwe sang luhn sukohsohk in sulwaclah. Finsrak lasr pa in eis wolacna celestial, ac sulwaclah ma kuht oruh, ke ip yohk, ahkfalye kuht fin sun kuh tiac sun finsrak lasr.

Inkaiyowos esam Alice ke puk mahtuh lal Lewis Carroll ma pahngon Alice’s Adventures in Wonderland. Kowos ac esam ke el tuhkuh nuh ke inkacnek luo, kais sie som loeslac tuh nuh ke sienna acn Ke el motko ke inkacnek elan fahsr kac, el ohsun nuh sel Kihsrihk ngaho Cheshire, suc Alice el siyuck, “Piac inkacnek nga enenuh in ukwe?”

Kihsrihk ngeow ngaho el topuk, “Ma sacn wiwina acn se kom ke som nuh we. Kom fin nihkihn acn se kom ke som nuh we, tiac yohk srihpac inkacnek soko kom sulwaclah an.”1

Kuht tiac oacna Alice, kuht etuh acn kuht ke som nuh we, ac ma nuh yohk srihpac inkacnek kuh fahsr kac, mweyen inkacnek kuht ukwe ke moul se inge kol kuht nuh ke acn luhn moul fahsruh.

Lwelah kuht in sulwaclah in muhsaheack lun kuht sie luhlahlfongi yohk ac fokoko tuh kuh in lain ma nuh kwewa luhn mwet lokoalok uh—luhlahlfongi pwacye se, kain luhlahlfongi ma kuh in karihngihn kuht ac fah ahkyohkye kena lasr in sulwaclah ma pwacye. Fin wacngihn luhlahlfongi, kuht tiac som nuh ke kuhtwena acn. Fin oasr luhlahlfongi, kuht kuh in ahkfalye finsrak lasr.

Ma pwacye lah yohk srihpac kuht in oruh sulwaclah lahlmwetmwet, oasr pacl kuht oruh sulwaclah lahlfon. Mwe sang luhn auliyak, ma sin Mwet Lahngo lasr, lwelah kuht in ahksuwohsye moul lasr, kuht in muh kuh in fohlohk nuh ke inkacnek ma kol kuht nuh ke wolacna celestial acn se kuht sohkwack.

Nga finsrak kuht in kalweni puhlaik in tiac ukwe mwet sahyac. Nga finsrak kuht in oruh sulwaclah lasr uh ke ma upac tuh in pwacye liki na ma fihsracsr uh stuhelac.

Ke kuht motko ke sulwaclah kuht ac oruh ke moul lasr lwen nuh kwewa—in oruh sulwaclah se inge kuh sulwaclah se ingn—kuht fin sulwaclah Kraist, kuht oruh sulwaclah pwacye tari.

Tuh Ma inge nga pruhe ke inse puhsisacl ac insiye pwacye ke inen Jisus Kraist, Leum ac Mwet Lahngo lasr, amen.

Mwe Kahsruh

  1. Ma ke Lewis Carroll, Alice’s Adventures in Wonderland (1898), 89.