ການເລືອກ
ໂດຍ ປະທານທອມມັສ ແອັສ ມອນສັນ
ຂໍໃຫ້ເຮົາຈົ່ງເລືອກສິ່ງທີ່ຖືກຕ້ອງ ເຖິງແມ່ນຈະຍາກກວ່າ, ແທນການເລືອກສິ່ງທີ່ຜິດ ເຖິງແມ່ນຈະງ່າຍກວ່າ.
ອ້າຍເອື້ອຍນ້ອງທັງຫລາຍ, ກ່ອນຂ້າພະເຈົ້າຈະເລີ່ມຕົ້ນກ່າວຄຳປາໄສ, ຂ້າພະເຈົ້າຢາກປະກາດເຖິງ ພຣະວິຫານໃໝ່ ສີ່ ແຫ່ງ ຊຶ່ງຈະຖືກສ້າງໃນຫລາຍເດືອນ ແລະ ຫລາຍປີທີ່ຈະມາເຖິງ ຢູ່ໃນສະຖານທີ່ດັ່ງຕໍ່ໄປນີ້: ເມືອງຄີໂຕ, ປະເທດເອກວາດໍ; ເມືອງຮາຣາເຣ, ປະເທດຊິມບຳເວ; ເມືອງບີເລັມ, ປະເທດບຣາຊິນ; ແລະ ພຣະວິຫານແຫ່ງທີສອງ ໃນເມືອງລີມາ, ປະເທດເປຣູ.
ຕອນຂ້າພະເຈົ້າໄດ້ກາຍເປັນສະມາຊິກໃນກຸ່ມອັກຄະສາວົກສິບສອງ ໃນປີ 1963, ມີພຣະວິຫານ ທີ່ເປີດບໍລິການຢູ່ 12 ແຫ່ງ ຕະຫລອດທົ່ວສາດສະໜາຈັກ. ດ້ວຍການອຸທິດພຣະວິຫານ ໂພຣໂວ ຊີທີ ເຊັນເຕີ ເມື່ອສອງອາທິດຜ່ານມານີ້, ເຮົາມີພຣະວິຫານ ຢູ່ດ້ວຍກັນ 150 ແຫ່ງ ທີ່ເປີດບໍລິການ ຢູ່ຕະຫລອດທົ່ວໂລກ. ເຮົາມີຄວາມກະຕັນຍູຫລາຍ ສຳລັບພອນທີ່ເຮົາໄດ້ຮັບ ຢູ່ໃນບ້ານທີ່ສັກສິດເຫລົ່ານີ້.
ບັດນີ້ ອ້າຍເອື້ອຍນ້ອງທັງຫລາຍ, ຂ້າພະເຈົ້າຢາກກ່າວເຖິງຄວາມກະຕັນຍູ ສຳລັບໂອກາດທີ່ຈະໄດ້ແບ່ງປັນ ແນວຄິດສອງສາມຢ່າງກັບທ່ານ ໃນເຊົ້າມື້ນີ້.
ເມື່ອບໍ່ດົນມານີ້ ຂ້າພະເຈົ້າໄດ້ຄຸ້ນຄິດກ່ຽວກັບການເລືອກ. ມີຄຳກ່າວວ່າ ເຫດການເລັກນ້ອຍ ອາດກາຍເປັນເລື່ອງໃຫຍ່ໄດ້, ແລະ ຊີວິດຂອງຜູ້ຄົນກໍຄືກັນ. ຈຸດໝາຍປາຍທາງຂອງເຮົາ ແມ່ນຂຶ້ນຢູ່ກັບການເລືອກຂອງເຮົາ.
ຕອນເຮົາໄດ້ຈາກໂລກກ່ອນເກີດມາສູ່ຊ່ວງມະຕະນີ້, ເຮົາໄດ້ເອົາຂອງປະທານແຫ່ງອຳເພີໃຈມານຳ. ຈຸດເປົ້າໝາຍຂອງເຮົາ ແມ່ນທີ່ຈະຮັບເອົາລັດສະໝີພາບແຫ່ງຊັ້ນສູງ, ແລະ ການບັນລຸເປົ້າໝາຍຂອງເຮົາ ແມ່ນຂຶ້ນຢູ່ກັບການເລືອກຂອງເຮົາ.
ພວກທ່ານສ່ວນຫລາຍ ຄົງຈື່ນາງ ອາລິສ ໄດ້ ຢູ່ໃນປຶ້ມນິຍາຍ ທີ່ແຕ່ງໂດຍ ຫລຸຍສ໌ ແຄໂຣ ຊື່ວ່າ Alice’s Adventures in Wonderland. ທ່ານຄົງຈື່ວ່າ ນາງໄດ້ເດີນທາງໄປເຖິງທາງແຍກ, ແຕ່ລະສາຍ ກໍຍາວຢຽດຢູ່ຕໍ່ໜ້ານາງ, ເສັ້ນໜຶ່ງໄປເບື້ອງຊາຍ ແລະ ອີກເສັ້ນໜຶ່ງໄປເບື້ອງຂວາ. ໃນຂະນະທີ່ນາງກຳລັງພິຈາລະນາຢູ່ນັ້ນ, ນາງໄດ້ຫລຽວເຫັນແມວໂຕໜຶ່ງ ຊື່ ເຈຊາຍ, ແລະ ອາລິສໄດ້ຖາມແມວວ່າ, “ຂ້ອຍຄວນໄປທາງໃດ?”
ແມວໄດ້ຕອບວ່າ, “ມັນຂຶ້ນກັບວ່າ ເຈົ້າຢາກໄປໃສ. ຖ້າເຈົ້າບໍ່ຮູ້ວ່າ ເຈົ້າຢາກໄປໃສ, ກໍບໍ່ສຳຄັນວ່າ ເຈົ້າຊິໄປທາງໃດ.”1
ບໍ່ຄືກັນກັບນາງ ອາລິສ, ເຮົາຮູ້ວ່າ ເຮົາຢາກໄປໃສ, ແລະ ມັນ ກໍ ສຳຄັນວ່າ ເຮົາຕ້ອງເດີນໄປທາງໃດ, ເພາະເສັ້ນທາງທີ່ເຮົາເດີນໄປໃນຊີວິດນີ້ ຈະພາເຮົາໄປເຖິງຈຸດໝາຍປາຍທາງ ຫລັງຈາກຊີວິດນີ້.
ຂໍໃຫ້ເຮົາຈົ່ງເລືອກທີ່ຈະສ້າງສັດທາທີ່ຍິ່ງໃຫຍ່ ແລະ ມີພະລັງຢູ່ໃນຕົວເຮົາ ຊຶ່ງຈະເປັນສິ່ງປ້ອງກັນທີ່ມີປະສິດທິພາບທີ່ສຸດ ຕ້ານກັບຍຸດທະວິທີຂອງຜູ້ປໍລະປັກ—ເປັນສັດທາທີ່ແທ້ຈິງ, ເປັນສັດທາທີ່ຈະຄ້ຳຈູນເຮົາ ແລະ ເພີ່ມຄວາມປາດຖະໜາຂອງເຮົາ ໃຫ້ເລືອກສິ່ງທີ່ຖືກຕ້ອງ. ປາດສະຈາກສັດທາເຊັ່ນນັ້ນ, ເຮົາຈະບໍ່ໄປເຖິງຈຸດໃດເລີຍ. ດ້ວຍສັດທານີ້, ເຮົາຈະສາມາດບັນລຸເປົ້າໝາຍຂອງເຮົາໄດ້.
ເຖິງແມ່ນເປັນສິ່ງຈຳເປັນທີ່ສຸດ ທີ່ເຮົາຕ້ອງເລືອກຢ່າງສະຫລາດ, ແຕ່ບາງເທື່ອ ເຮົາຈະເຫັນວ່າ ເຮົາໄດ້ເລືອກຢ່າງໂງ່ຈ້າ. ຂອງປະທານແຫ່ງການກັບໃຈ, ຊຶ່ງພຣະຜູ້ຊ່ວຍໃຫ້ລອດໄດ້ຈັດຕຽມໄວ້, ສາມາດຊ່ວຍເຮົາໃຫ້ດັດແປງຊີວິດໄດ້, ເພື່ອເຮົາຈະສາມາດກັບຄືນສູ່ເສັ້ນທາງ ທີ່ຈະພາເຮົາໄປສູ່ລັດສະໝີພາບແຫ່ງຊັ້ນສູງ ທີ່ເຮົາສະແຫວງຫານັ້ນ.
ຂໍໃຫ້ເຮົາຈົ່ງກ້າຫານຕໍ່ໄປ ເພື່ອຕ້ານກັບ ມະຕິຂອງມະຫາຊົນ. ຂໍໃຫ້ເຮົາຈົ່ງເລືອກສິ່ງທີ່ຖືກຕ້ອງ ເຖິງແມ່ນຈະຍາກກວ່າ, ແທນການເລືອກສິ່ງທີ່ຜິດ ເຖິງແມ່ນຈະງ່າຍກວ່າ.
ເມື່ອເຮົາຄິດກ່ຽວກັບການເລືອກທີ່ເຮົາຕ້ອງເຮັດໃນແຕ່ລະມື້—ບໍ່ວ່າ ຈະເປັນອັນນີ້ ຫລື ອັນນັ້ນ—ຖ້າຫາກເຮົາເລືອກພຣະຄຣິດ, ແລ້ວເຮົາຈະເລືອກສິ່ງທີ່ຖືກຕ້ອງ.
ນີ້ຄືຄຳອະທິຖານທີ່ຈິງໃຈ ແລະ ຖ່ອມຕົວຂອງຂ້າພະເຈົ້າ ໃນພຣະນາມຂອງພຣະເຢຊູຄຣິດ, ພຣະຜູ້ເປັນເຈົ້າ ແລະ ພຣະຜູ້ຊ່ວຍໃຫ້ລອດຂອງເຮົາ, ອາແມນ.