Desishonnan

Rumannan, promé ku mi kuminsá formalmente ku mi mensahe, mi ke anunsiá kuater tèmpel nobo kual, den e lunanan i añanan benidero, lo wòrdu konstruí na e siguiente lokalidatnan: Quito, Ecuador; Harare, Zimbabwe; Belém, Brasil; i un di dos tèmpel na Lima, Perú.

Dia ma bira miembro di e Quorum di Diesdos Apòstel na 1963, tabata tin 12 tèmpel den funshon den hinter e Iglesia. Ku e dedikashon di e Provo City Temple dos siman pasa, tin awor 150 tèmpel den funshon rònt mundu. Kon agradesí nos ta pa e bendishonnan ku nos ta risibí den e kasnan sagrado aki.

Awor, mi rumannan, mi ke ekspresá mi gratitut pa e oportunidat di kompartí algun pensamentu ku boso e mainta aki.

Mi a bin ta pensa resientemente tokante eskoho. A wòrdu bisa ku e porta di historia ta drei riba skarnirnan masha chikí, i asina ta ku hende su bida. E desishonnan ku nos tuma ta determiná nos destino.

Ora nos a sali for di eksistensia premortal i drenta mortalidat, nos a trese ku nos e don di albedrio. Nos meta ta pa optené gloria selestial, i e eskohonan ku nos hasi, den gran parti, lo determiná si nos ta logra nos meta of no.

Hopi di boso ta konosí ku Alice i Lewis Carrol su buki klásiko Aventuranan di Alice den Wonderland. Lo bo kòrda ku e ta yega na un krusada ku dos kaminda dilanti di dje, tur dos bayendo dilanti den direkshon opuesto. Miéntras e ta kontemplá kua kaminda pa skohe, e ta wòrdu konfrontá pa e pushi Cheshire, ku Alice ta puntra, “Kua kaminda mi tin ku sigui?”

E pushi ta kontesta, “Esei ta dependé na unda bo ke bai. Si bo no sa unda bo ke bai, no ta importá kua kaminda bo skohe.”¹

Kontrali na Alice, nos sa unda nos ke bai, i si ta importá kua kaminda nos bai, paso e kaminda ku nos sigui den e bida aki ta guia nos na e destino den nos siguiente bida.

Ku nos por skohe pa konstruí den nos mes e fe grandi i poderoso kual lo ta nos defensa mas efikas kontra di e designonan di e atversario un fe real, e tipo di fe ku lo sostené nos i lo reforsá nos deseo pa skohe lo korekto. Sin e fe aki, nos no ta bai ningun kaminda. Ku ne, nos por logra tur nos metanan.

Ounke ta imperativo pa nos skohe sabiamente, tin momentunan ku nos lo hasi eskohonan imprudente. E don di arepentimentu, proveé dor di nos Señor, ta abilitá nos pa koregí e kurso ku nos a skohe, pa nos por regresá riba e kaminda ku ta guia nos na e gloria selestial ku nos ta buska.

Ku nos por mantené e kurashi pa desafiá konsenso. Ku nos por semper skohe lo korekto difísil na lugá di e inkorekto fásil.

Ora nos ta kontemplá e desishonnan ku nos tuma den nos bida kada dia- sea pa hasi e eskoho aki òf un otro- si nos skohe Cristu, nos lo a tuma e desishon korekto.

Ku esaki semper lo ta asina ta mi orashon humilde i di mi kurason den nòmber di JesuCristu, nos Señor i Salbador, amèn.