2010–2019
Pilipil kan
April 2016


Pilipil kan

Pilipil me kitail pahn wiahda pahn koasonehdi wasa kitail pahn kohla.

Riei ohl oh lih akan, mwohn ahi pahn doula nan ahi kaweid rahn wet, I men pakair ki tehnpas sarawi pahieu me pahn kokouda nan sounpwung kan oh pahr kan me pahn kohdo. Re pahn wiawihda nan: Quito, Ecuador; Harare, Zimbabwe; Belém, Brazil; and a second temple in Lima, Peru.

Ansou me I wiahla emen tohn Pwihn en Wahnpoaron Ehkriemeno nan pahr 1963, tehnpas sarawi mehte 12 nan Mwomwohdiso. Mwurin kasarawih en Provo City Center Temple wihk riau samwalahro, met tehnpas sarawi meh 150 me wie doadoahk nan sampah. Kitail kapingki mehlel kapai kan me kitail kin alehdi nan tehnpas sarawi kan.

Riei ohl oh lih oko, met I men wia ahi kaping pwehki ansou mwahu me I ahneki I en ehukihong kumwail ekis kaweid nimenseng wet.

Me keren I wie medemedewe duwen pilipil kan. Mie me kosoia me mehkot tikitik kan me kin wiahda mehkot laud, duwehte atail mour kan. Pilipil me kitail pilada ihme kitail pahn wiahla.

Ansou me kitail mwesel sang sapwen ngehno oh leledo nan mour wet, kitail serehdo kisakis en saledek en pilipil. Atail koasondi de pilahn kitail pahn alehdi mour en celestial, oh pilipil me kitail wia me pahn koasonehdi wasa kitail pahn lella.

Pali laud kumwail esehier duwen Alice me Lewis Carroll ntingda nan pwuhk en Alice Adventures in Wonderland. Kumwail pahn taman ni ansou me e lellahng nan ahl me wetpeseng wasa riau, koaros ahl kau reirei kohla wasa me re uhla. Ansou me e medemedewe menia ahl me e pahn keid loale, E idek rehn kaht men me adaniki Cheshire, “Mehnia ahl me I pahn keid loale?”

Kahto sapengki, Wasa me ke men kohla me wiwia. Ma ke sehse iawasa ke men kohla, sohte katepe mehnia ahl me ke pahn keid loale.1

Kitail sohte duwete Alice pwe kitail ese iawasa me kitail men kohla, oh e katapan iawasa kitail kohla pwehki ahl me kitail pahn keid nan mour wet pahn kahluwahlahng kitail atail sohso nan mour mwurin mour wet.

I koapwoaroapwoarki me kitail pahn kakairada loalletail pwoson kehlail me pahn wia perehre keieu kesempwal ong kasongosong kan en sehdan—pwoson mehlel, songen pwoson me pahn utung kitail oh kakehlailih atail ineng en pilada me pwung. Ma sohte songen pwosono, sohte wasa kitail kak kohla. Ma mie, kitail pahn kak alehdi atail koasondih kan.

Mendahte ah kesempwal kitail en pilada mwahu, mie ekei pak kitail pahn wiahda pilipil sapwung. Kisakis en koluhla me Sounkomouro kiheng kitail kahrehda atail kak kapwungala atail mour pwe kitail en kak pwurala nan ahl me pahn kahlua kitail kohla nan celestial wasa me kitail raparapahki.

I koapwoaroapwoar ki me kitail pahn ahneki eimah en powehdi ngihl sakanakan me koaros kin utung kan. Kitail pilada pilipil pwung mehnda ma e apwal.

Ni atail medemedewe pilipil kan me kitail wiahda nan atail mour rahn koaros—mehnda ma kitail pilada pilipil me de mehteio—ma kitail pilada Krais, kitail pahn wiahda pilpil pwung.

Pwe met en kak pweida I kapakaki ni karakarahk oh sang na mongiongi mehlel ni Mwaren Sises Krais, atail Kaun oh Sounkomour, amen.

Ire kan

  1. Adapted from Lewis Carroll, Alice’s Adventures in Wonderland (1898), 89.