?Mi Mi Stap Biliv?
Sapos ol samting ia oli tru, nao yumi gat mesej blong hop mo help we i hae evriwan we wol i save long hem.
Long 30 Maj, jes wan yia i pas, smol boe blong tu yia, Itan Karneseka, blong Amerika Fork, Yuta, i admit long hospital wetem sik blong lang mo wota raon long lang blong hem. Tu dei afta, helt blong hem i go nogud mekem se oli mas sendem hem long helikopta i go long Praemeri Pikinini Hospital long Sol Lek Siti. Mama blong hem we i wari, Misel, i bin gat raet blong sidaon long jea long fored mo go wetem boe blong hem. Oli givim wan hedset blong hem i save toktok wetem ol narawan long helikopta. Hem i save harem ol nes oli stap wok long smol boe blong hem, mo hemwan i nes blong ol pikinini, so Misel i save inaf blong andastanem se Itan i stap long nogud kondisen.
Long trabol taem ia, Misel i luk se oli stap flae ova long Drepa Yuta Tempol. Antap long ea, hem i luk i krosem vale mo i save luk Jodan Reva Tempol, Okir Hil Tempol, mo tu, Sol Lek Tempol we i stap longwe. Tingting i kam long maen: “Yu yu bilivim hemia o nogat?”
Misel i tokbaot eksperiens ia:
“Mi bin stap lanem abaot ol blesing blong tempol, mo se ol famli oli blong oltaem long Praemeri mo Yang woman. Mi bin serem mesej abaot famli long ol gud pipol long Meksiko long misin blong mi. Mi bin sil long kompanion blong mi blong taem naoia mo i no save finis insaed long tempol. Mi tijim ol lesen abaot ol famli olsem wan Yang Woman lida, mo mi serem ol stori abaot ol famli we i no save finis wetem ol pikinini blong mi long famli haos naet. Mi SAVE hemia, be ?mi mi BILIVIM hemia? Ansa i kam hariap taem mi askem kwestin ia long hed blong mi: Spirit i konfemem long hat mo maen blong mi, ansa ia we mi bin save finis—!Mi STAP bilivim hemia!
“Long tetaem ia, mi talemaot hat blong mi long prea long Papa long Heven, mi talem tangkyu from save mo bilif we mi gat se famli i blong oltaem. Mi talem tangkyu from Pikinini blong Hem, Jisas Kraes, we i mekem se evri samting i posibol. Mi talem tangkyu long Hem from boe blong mi, mo mi letem Papa long Heven i save se sapos Hem i mas tekem smol Itan blong mi i go long hom blong Hem long heven, bae i oraet. Mi trastem Papa blong mi long Heven fulwan, mo mi save se bae mi luk Itan bakegen. Mi bin glad tumas se long trabol taem ia, mi bin gat save MO bilif se gospel i tru. Mi bin gat pis.”1
Itan i spendem plante wik long hospital, dokta i tritim hem. Ol prea, dei blong livim kakae, mo fet blong olgeta we mifala i lavem, wetem kea ia, i letem hem blong aot long hospital mo gobak long hom blong stap wetem famli. Hem i helti mo stap gud tedei.
Taem ia i impoten long Misel from i konfemem long hem se wanem we oli bin tijim hem ful laef blong hem i moa bitim ol toktok; hem i tru.
?Weswe? ?Ating yumi kam blong tekem se ol blesing ia oli nomol, olsem ol memba blong Jos blong Jisas Kraes blong Ol Lata-dei Sent mekem se yumi nomo andastanem fulwan merikel mo tabu wok olsem disaepol insaed long tru Jos blong Masta? ?Yu bin filim finis we yu rong blong no talem tangkyu from presen we i moa hae long laef ia? Sevya Hemwan i tijim: “sapos yu stap obei long ol komanmen blong mi mo stap strong kasem en, bambae yu gat laef we i no save finis, we presen ia, i presen blong God we i moa bigwan long evri narafala presen blong hem.”2
Yumi biliv se Jos ia i moa bitim wan gud ples blong go long hem long ol Sandei mo lanem olsem wanem blong stap wan gudfala man o woman. Hem i moa bitim wan naes sosol klab blong Ol Kristin pipol we oli stap fren wetem ol pipol we oli gat gud standet. I no jes wan grup blong tingting we papa mo mama i tijim long pikinini long hom blong oli responsibol mo kam naes pipol. Jos blong Jisas Kraes blong Ol Lata-dei Sent i moa bitim evriwan long ol samting ia.
Tingting smol taem abaot ol strong samting we yumi klemem olsem wan relijin. Yumi biliv long semfala Jos we Jisas Kraes i stanemap taem Hem i bin stap long wol mo Hem i putumbak bakegen tu long wan profet we God i singaotem long taem blong yumi, mo ol lida blong yumi oli holem semfala paoa mo atoriti ia blong mekem wok long nem blong God semmak olsem ol Aposol bifo. Oli singaotem prishud blong God. Yumi klemem se, tru long atoriti ia we Hem i putumbak, yumi save kasem ol odinens blong sevem man, olsem baptaes mo glad long presen we i Tabu Spirit we i klinim mo mekem yumi gud moa mo i stap wetem yumi oltaem. Yumi gat ol aposol mo ol profet we oli stap lidim mo stiarem Jos ia tru long ol ki blong prishud, mo yumi biliv se God i stap toktok long ol pikinini blong Hem tru long ol profet.
Yumi biliv tu se prishud paoa ia i mekem i posibol blong yumi mekem ol kavenan mo kasem ol odinens insaed long ol tabu tempol, we wan dei, i mekem se i posibol blong go stap wetem God mo stap wetem Hem blong oltaem. Yumi klemem tu se, tru long paoa ia, ol famli oli save joen tugeta blong taem we i no save finis taem ol kapol oli mekem kavenan ia we i niu mo i no gat en, insaed long ol tabu bilding.
Yumi biliv se tru long wan profet mo paoa blong God, yumi kasem moa skripja, mo ademap testemoni long Baebol ia taem yumi talem se Jisas Kraes i Sevya blong wol.
Yumi klemem se Jos blong Jisas Kraes blong Ol Lata-dei Sent i kingdom blong God mo wan tru Jos nomo long wol ia. Oli singaotem Jos blong Jisas Kraes from se Hem i stap long hed blong Jos; Hem i Jos blong Hem, mo evri samting ia oli posibol tru long sakrifaes blong Hem we i pem praes.
Yumi biliv se olgeta samting ia, yumi no save faenem long wan nara ples o oganaesesen long wol ia. Nomata se ol nara relijin mo jos oli gud, i no gat wan long olgeta i gat atoriti blong givim ol odinens blong fasin blong sevem man we oli stap insaed long Jos blong Jisas Kraes blong Ol Lata-dei Sent.
Yumi save olgeta samting ia, ?be yumi stap bilivim olgeta? Sapos ol samting ia oli tru, nao yumi gat mesej blong hop mo help we i hae evriwan we wol i save long hem. Blong bilivim ol samting ia i impoten long taem we i no save finis, blong yumi mo olgeta we yumi lavem.
Blong biliv, !yumi nidim blong tekem gospel we i stap long hed blong yumi i go insaed long hat blong yumi! Hem i posibol blong yumi stap folfolem nomo olbaot fasin blong laef folem gospel, from se oli askem yumi, o from i kalja we yumi groap long hem, o from se i wan fasin blong yumi. Maet sam i no filim wanem ol pipol blong King Benjamin oli filim afta long toktok blong hem: “Mo olgeta evriwan i bin singaot wetem wan voes, i talem se: Yes, mifala i bin bilivim evri toktok we yu bin talemaot long mifala; mo tu, mifala i save se ol toktok ia oli stret gud mo oli tru, from Spirit blong Lod we i gat Ol Paoa, we i bin mekem wan bigfala jenis long mifala, o insaed long ol hat blong mifala, mekem se mifala i nomo wantem blong mekem nogud fasin, be blong gohed blong mekem gudfala fasin oltaem.”3
Yumi evriwan i nidim blong luklukgud se hat mo fasin blong yumi oli jenis, blong yumi nomo wantem blong folem ol rod blong wol, be yumi mekem God i glad. Tru fasin blong jenisim laef i wan rod we i tekem ples ova long wan taem, mo i nidim se yu mas wantem blong praktisim fet. Hem i kam taem yumi luklukgud insaed ol skripja, be i no Intanet. I kam taem yumi stap obei long ol komanmen blong God. Fasin blong jenisim laef i kam taem yumi givim seves long olgeta raon long yumi. Hem i kam tru long prea wetem tingting, go long tempol, mo stap fetful blong mekem ol responsabiliti we God i givim. I tekem fasin blong wok strong mo wok evri dei.
Plante taem oli askem mi: “?Wanem nao jalenj we i moa bigwan we ol yut blong yufala oli fesem tedei?” Mi ansa se mi biliv se hem i paoa blong lidim tingting we i kamaot long “bigfala haos we i gat fulap spes” long laef blong olgeta.4 Sapos oli raetem Buk blong Momon from taem blong yumi naoia, nao i tru, yumi evriwan i no save mestem trutok biaen long evri mesej insaed long visen blong Lihae abaot tri blong laef, mo risal we i stap from olgeta ia long bigfala haos we oli stap poenem fingga mo stap jik.
Wanem we i mekem hat blong mi i krae, i hao oli tokbaot olgeta ia we oli faet mo mekem rod blong olgeta tru long ol tudak i go kasem rod we i stret mo smol, oli hang long rel blong aean, oli kasem gol blong olgeta, mo oli stat blong testem frut blong tri blong laef we i klin gud mo i tes naes. Afta, ol skripja oli talem se ol pipol ia we oli dresap long sas klos we oli stap long bigfala haos wetem fulap spes, oli stap jikim ol man mo poenem ol fingga blong olgeta long olgeta we i bin kam kamaot, mo oli bin stap kakae frut.
“Mo afta we oli bin testem frut ia oli bin sem, from olgeta we oli stap jikim olgeta; mo oli bin foldaon i go long ol rod we i no blong folem, mo oli bin lus.”5
Ol ves ia oli tokbaot sam long yumi we i gat finis gospel blong Jisas Kraes long laef blong yumi. Nomata yumi bon long gospel, o yumi mekem rod blong yumi long medel blong tudak blong faenem, yumi bin testem frut ia, “we i moa gudgudfala mo ol man i wantem moa”6 mo i gat paoa blong tekem yumi long laef we i no save finis, we i presen blong God we i hae moa. Yumi nid nomo blong gohed blong kakae, be tu, blong no folem olgeta we oli stap jikim bilif blong yumi, o olgeta we oli laekem blong putum tu tingting, o olgeta we oli stap poenem fingga long ol lida blong Jos mo doktrin ia. Hem i wan joes we yumi mekem evri dei—blong jusum fet, be i no tu tingting. Elda M. Rasel Balad i askem strong yumi blong stap insaed long bot, yusum laefjaket, mo hang strong wetem tufala han.”7
Olsem ol memba blong tru Jos blong Masta, yumi stap finis insaed long bot. Yumi no nid blong go lukaotem ol tingting blong wol blong kasem trutok we bae i givim kamfot, help mo daereksen blong gotru sef long ol tes blong laef—!yumi gat finis! Semmak olsem mama blong Itan i save luklukgud long longtaem bilif blong hem, mo talem stret long taem blong trabol: “!Mi stap biliv!, !yumi tu yumi save mekem!
Mi talem se mi witnes se membasip blong yumi long kingdom blong Masta i wan presen we praes blong hem i bigwan tumas. Mi testifae se ol blesing mo pis we Masta i gat blong olgeta we oli stap obei mo fetful, i bitim evriwan wanem we tingting blong man i andastanem. Mi livim testemoni blong mi wetem yufala long nem blong Jisas Kraes, amen.